MATTHEW 20
20
Atsailu Kümlami
1“Kughengu Kungugha yekipe ye aki-alu pighimi lakhi no pa tsailu lo hupenike ajumi piqe niye inaqhe itheno kapewu ketoie. 2Atsala lakhi jume#20:2 Momu Denarius lakhi, ti ye atsala lakhi jume tsünike küghave kethiu panoqo pesü pa tsailu lo puhuve. 3Tulhu ghuloki lo pa no alhikishi-a lo timi khami azükütütüi puthugho aghi keu ithulu, 4eno pa no pi, ‘Nongu ghi atsailu lo hulo, eno nongu jume kiu no achipi keno I no tsüni.’ 5Ikehu panongu no huve. Tithiu pa no puchou lhuba ghuloki lo wuno kütamiqo ghi azüu tholono puhuve. 6Phitsü ghuloki lo pa no alhikishi-alo wu kelo itaghi timi khami tile puthugho aghi keu ithulu. Panoqo vilo pa no iniju, ‘Nongu ye kushiye azükütütüi hile puthugho ani kea?’ 7Panoqo no pa khochile, ‘Khunomu ajume ningu piqe nike ghaighi moe.’ Ikehu pa no pi, ‘Tishiaye nongu ghi atsailu lo hulo.’ 8Kughou tsüzüve keno, atsailu mpeu no jukükütsüu vilo pi, ‘Aqekiqemi kulo eno ashekhashi hukemi launo huthusü atüghümi kutolo panoqo jume tsüwolo.’ 9Phitsü shive kethiuno hukeqo no ighi kelo milakhi khino atsala lo jume ithulu. 10Kughou atüghüshi hukeqo no ighi keno, panongu ye ala ithulu nani kepi kümsü ae, ikemu panoqo ghi lakhikhi no aphiphi shi ithulue. 11Ti ikhipe panoqo no alu mpeu shou muchho 12ghi pi, ‘Timi hi ashekhashi hughi kemi ye asüchedo lakhi likhi mla, eno ningu ye atsala kupuju aghimeshi khetsünhe no phuqhi mla akeghi nono ningu tsüke qhemi panongu tsüvae.’ 13Ikemu alu mpeu no panoqo gholo lakhi vilo pi, ‘Qele aküsau, ni ye kiumu o pishi püamoe! No ye atsala lakhi jume lono I sasü küghake kumo? 14Kiu no ow keno luve no wuvelo. I no o tsüke qhemi ni ye timi ashekhau hukeu ghi tsünike pulovae. 15I no akeu pesü kiu shinishi keno ni ye shimlani keshea? Ikeo, Iw tsüjekini ghenguno o nheshuve kea?’ 16Ikehu ashekhami no atüghümi shive nani eno atüghümi no ashekhami shive nani.”
Jisü no Aküthüu Pa Kithi Vehu pi
(Mk 10:32-34; Lk 18:31-34)
17Jisü no Jerusalem lo wuche kelo pa khopemi chighikini sasü lomoshi panoqo vilo pi, 18“Julo, ningu ye Jerusalem lo iqho cheae, tilau no Timi Nu pesü achinetomi ngo Ayezah shikükami u lo süve tsüno pa pithive penike panongu no ikhiphe tsü nani, 19eno ashiaye kütami pelo thogha eno heqhi püzü yedave penike tsüve nani. Tishino pa ye aküthüni no xüputhu nani.”
Aza Lakhi no Qhüiniju
(Mk 10:35-45)
20Tile Zebedee nuliqo paza no li nuli sasü Jisü lau ighi, eno pa vilo kiuala inijuni ke pa zülo qhoqhünhe. 21Jisü no li vilo iniju, “No ye kiu lunishi ani kea?” Li no khochile, “O yekipe ighi kelo I nu hi pama lakhi no o u ajeu eno lakhi no o u piyiu iqa penike piqhive tsülo.” 22Ikemu Jisü no khochile, “Nongu no kiu khu ani keno nongu ye mtha aphie. I no shoniye akeu jukhu nongu ye sholu nani keshea?” Pama no khochile, “Nikujo ye tishilu nani.” 23Pa no pama vilo pi, “Nokujo ye I jukhu sholu nani, ikemu I u ajeu eno I u piyiu iqani keu ye I gho kumoe, ikemu I Pu no khuno ghenguno kuto püani keno pano salake.” 24Kughou akhopemi chighi no ti chilu keno, panongu no pama athiazü shou axuideve. 25Ikemu Jisü no panongu kümtsü kukumqo no pi, “Nongu no ithi anike ashiaye kütami ye yepemi no timiqo shou ampeu shicheni, eno panow kijemi no panoqo shou kükagha peitha cheni. 26Nongu dolo ye hitoi shimoni. Ikemu nongu gholo milakhi no kije shinishi aye pa no nongu qeu shimasae, 27nongu dolo khukhumu atüghüu shinishi aye, pa no nongu qüaxeu shimasae. 28Timi Nu thotsü huthu peniye ighike kumoe, ikemu huthu niyeke, eno timi kutomo ghenguno pa küxü pesü xakipheme shi tsüniye ighike.”
Anhechemi kini Shipivi
(Mk 10:46-52; Lk 18:35-43)
29Panongu no Jericho qhive no wuche kelo aqokitikhi kije no Jisü papeche. 30Anhechemi kini alaphe lo iqa ae, eno Jisü ye tipa la chenie pi pama no chilu no ighamku, “David Nu, ni kimiyekütü tsülo, Ampeu!” 31Timiqo no pama vilo iqünheive lopi lomipi, ikemu pama no alau ighamku, “David Nu, ni kimiyekütü tsülo, Ampeu!” 32Jisü no ngove no pama ku püzü iniju, “I pelo nokujo ghenguno kiu shitsü penishi ani kea?” 33Pama no khochile, “Ampeu, ni nhethi xükhove tsü penishi ani.” 34Jisü no pama kimiye qhiyive no pama nhethi lo chotsü, paikhavi no pama nhethi tsükho luve, eno pa pape wuve.
Currently Selected:
MATTHEW 20: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More