Zefania 1
1
Baŋa Wɛ ban-zɔŋɔ dɛ dem
1Kwora kalo Baŋa Wɛ na kwei o pa Zefania maŋa kam Amon bu Josia na ye Judah teo pɛ to mo tento.#2 Pwa 22:1 Zefania ye pɛ Hezekia dwi tu wolo de na nwoŋi Amaria, de Gedalia, de Kusi dwia yam wone to mo.
2 Baŋa Wɛ taga o we:
“Amo lage a saare woŋo kolo maama na wo tega baŋa ne to mo.
3Amo wó chɔge nabiina bam, de vara bam,
de zuna bam, de ywona yam maama.
Amo wó pa se puseŋ-nyena bam to tega ne,
ye nɔɔno de dedoa de bá daare.
Amo Baŋa Wɛ na tage kolo to mo konto.
4Amo wó zaŋe Jerusalem tiina
de Judah tiina bam maama baŋa ne.
Ko ná ye balo ta na zuli Baal jwona yam to,
amo wó le-ba jei sento wone a yage.
Ba jwona kaanem yiga tiina bam de wó jei,
pa se ba yera saare tega kam baŋa ne.
5Amo ta wó chɔge balo maama na yeini ba diini nayuu
ba jɔɔne wea, de chana, de chalechwe sem to,
ko woli de balo na zuli amo Baŋa Wɛ
ye ba ta du duuri de Moleka jwoni dem to.#Chullu 18:21
6Ko ná ye balo na jwoori amo Baŋa Wɛ kwaga ne
ye ba daa ba laga se a taa nii ba baŋa ne to,
amo wó chɔge banto maama de.”
7Yuu-tu Baŋa Wɛ borem dɛ dem bwola.
Konto ŋwaane ta‑á ye-na chemm o yiga ne.#Habakuki 2:20
Baŋa Wɛ wora o ti o yiga se o kwei Judah tiina bam
o ke ba dona jeŋa ne,
ne o na lage o ke kaanem tei to.
8-9 Baŋa Wɛ ma ta o we:
“Dɛ dem ba na wó ba ba gwoni ba yum konto to,
amo wó waare pɛ wom dedɛɛra bam,
de o bia bam maama.
Banto yeini ba ma dam de kampina mo ba vere nɔɔna wonnu
se ba kwei-te ba tiŋi ba tu wom diga ne ba su.
A ta wó waare balo na jege veira chullu ba tɔga
ye ba zuli jwo-yɔɔro to.
10Dɛ dem konto ná yia,
keira wó zaŋe teo kom Ywona Ni dem ne.
Abam ta wó ni nɔɔna na chwoosa
teo kom jei-doŋa laŋa kam ne.
Sɔɔ-balɔrɔ de maa wó nwoŋi peero telo na gilimi da to.
11Abam balo na zoore teo kom yaga jei sem ne to,
ta‑á keeri-na,
pipim-piina de sabu-leinna bam maama na jei to ŋwaane.
12Kanto maŋa kam ne, amo wó tɔrege min-zwoŋo
a beeri Jerusalem gugworru maama wone.
Ko ná ye balo na boŋe we ba sii mo ba wɛleera wone
ye ba tɛ we,
‘Baŋa Wɛ bá ke debam kolokolo,
ko ná ye chɔgem naa wolim’ to,
amo wó waare-ba.
13Banto tete dona mo lage ba vere ba jejegero tem
ba daare ba chochoge ba sam dem.
Ba wó lɔ sam,
ba nam bá zo de wone.
Ba ta wó jeiri Vini teeni bia,
ba nam bá na de sana ba nyɔ.”
14 Baŋa Wɛ dɛ-kamunu kom konto bwola.
Dɛ dem duri mo lela se de yi.
Baŋa Wɛ dɛ dem wó ja chanɛɛre de ba.
Babɛ maa wó keeri ba wo-chechɔgɔ ŋwaane.
15 Baŋa Wɛ ban-lom wó tiini de zaŋe dɛ dem konto ne.
De wó ja wo-chechɔgɔ de cham de ba.
Chɔgem de wó tiini de taa wora.
Dento dɛ dem wó taa ye lim yerane mo.
Kunkwonnu tem wó zwori te li tega kam maama biramm.
16Nabwanno wó wu. Tiguri-kaasa de maa wó zaŋe.
Jara yam wó yi teene delo na lɔge de pe to,
dedaane de di-dedwaaro tem.
17 Baŋa Wɛ maa we:
“Amo wó pa se chanɛɛre yi nabiina
se ba taa vei ne lilwoa tei,
ba na ke wɛleere ba chɔge a yiga to ŋwaane.
Ba yera jana wó lwo nenɛɛne na na chuuri tei to,
ye ba ya-nɔna faare tega ya pɔ.”
18 Baŋa Wɛ ban-lom dɛ dem ná yia,
nabiina lu-nyenno de ba sabu-seŋa bá wane te jwoŋi-ba te yage.
O ban-zɔŋɔ kom wó chɔge logo baŋa maama,
ne mini na zwɛ wonnu tei to.
Wɛ wó ke lela o saare nabiina bam,
pa ba maama jei kula!
Currently Selected:
Zefania 1: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)