Zefania 2
2
Nɔɔna bam jege se ba leiri ba wo
1Nam ke-na daane se á tu á tete Wɛ yiga ne,
á na maŋe se chaveera ja abam to ŋwaane.
2Kokuri to, dɛ dem lage de yi lela
se Baŋa Wɛ laam zeili abam o yage,
nenɛɛne vio na fuli poro ko yage tei to.
Dɛ dem konto ne, o ban-lom dem lage de ba de zwɛ abam mo kula,
ne mini na to wonnu wone ko di maama tei to.
3Abam balo na zoore logo kom wone
ye á tu á tete á daare á tɔge Wɛ nia yam to,
kwaane-na se á lɔre Baŋa Wɛ.
Ta‑á ke-na kolo na lana to,
se á daare á tu á tete Wɛ yiga ne.
Dɛ delo Baŋa Wɛ wó kwoli abam
se chɔgem dem yé tɔge de yi abam
o ban-zɔŋɔ dɛ dem ne.
Filisi tiina taane
4Ta‑á yei-na we nɔɔn-nɔɔno daa bá daare Gaza teo wone.#Amosi 1:6-8
Asekelon de wó taa ye di-dwonnu yerane.
Ba lage ba zeili Asedodi tiina maama ba yage,
ye wɛ ta wo yi yupare baŋa.
Ba ta wó gɔ Ekoron tiina de ba yage.#2:4 Gaza, de Asekelon, de Asedodi, de Ekoron déem ye Filisi tiina teene dedwonna.
5Abam Filisi tiina balo na zoore naneo kom ni ne to,
lɛɛro wo á yuu ne!
Abam Filisi tiina na zoore Kanaan ne to,
Baŋa Wɛ maŋe o di abam taane ye o we,
“Amo nam wó yɔɔre a chɔge abam
ye nɔɔn-nɔɔno bá lu.”
6Abam teene delo na bwola de naneo kom to
wó ji naane pwola de najere mo.
7Judah dwi tiina balo na daare to mo wó jwoori
ba jwoŋi á tega kam ba taa tei.
Ba vara wó taa beeri ba di jei sem konto ne.
Tega ná yeini ka yi,
nayera bam wó peini Asekelon di-dwonnu ne.
Ba Tu Baŋa Wɛ wom wó taa nii ba baŋa ne
pa se ba jwoori ba taa jege yu-ywoŋo.
Moaba de Amon tiina taane
8Paŋwa Tu Baŋa Wɛ wom na ye Isarele tiina Wɛ to maa we:
“A nigi Moaba tiina de Amon tiina na jege a nɔɔna bam ba twea
ye ba yaale-ba tei to.
Ba maa bere ba tete we
ba wó jwoŋi ba tega kam ba taa tei.
9Ne amo Baŋa Wɛ na jege ŋwea tei to,
ko ye chega mo we,
Moaba de Amon tiina bam wó yɔɔre ba na chɔgem
nenɛɛne ko na ke Sodom de Gomora teene dem tei to.#Pulim 19:24
Ba teene dem wó ji yɛ-bɔɔro de di-dwonnu yerane,
ye ga-cheiŋo lware tega kam maama taa wuu.
A nɔɔna balo na daare to mo lage ba vere ba wonnu
ye ba daare ba jwoŋi ba tega kam.”
10Konto to, Moaba de Amon tiina bam wó na ba nyɔɔre
ba teera yam baŋa ne,
de ba na jege Paŋwa Tu Baŋa Wɛ nɔɔna bam ba twea
ye ba mɔne-ba to ŋwaane.
11 Baŋa Wɛ mo lage o yɔɔre o fugi-ba,
ye o pa se tega baŋa wa yam maama dam ti.
Logo baŋa teene dem maama ná maŋe ba zoore mɛ maama,
ba laam wó ba ba taa zuli wonto Baŋa Wɛ.
Kusi tiina taane
12Ko ta ná ye abam Kusi tiina bam,
Baŋa Wɛ mo lage o pa á te jara wone.
Asiria tiina taane
13 Baŋa Wɛ wó zaŋe teene delo na wo tega-baŋa seeni to baŋa ne.
O lage o yɔɔre o chɔge Asiria de ko teo kamunu Ninevɛ,
pa se tega kam ji te-kora jei
mɛ nɔɔn-nɔɔno na tera to.
14Naane de pei wó taa peini teo kom wone
ko ta woli de ga-vara dwi maama.
Kunkworru de bachangaaro maa wó taa tigi di-dwonnu tem ne te keera.
Te da-ŋonno tem maama wó taa tigi mo ja,
pa se nɔɔna taa tui ba le-te.
15Ninevɛ teo kom ya lana dedɛ.
Nɔɔna balo na zoore ko wone to tiini ba jege kamunni mo
ye kolokolo ba daane-ba.
Ba maa boŋe we banto teo kom mo dwoi
teene dem maama logo baŋa ne.
Teo kom konto nam mo lage ko ji di-dwonnu
se ga-vara dwi maama taa tigi da.
Balo maama na wó tɔge da ba kɛ to
wó yeeri mo ye ba dole ba je.
Currently Selected:
Zefania 2: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)