Mika 3
3
Isarele yiga tiina na tiini ba chɔge tei to
1Amo déem tage a we:
“Abam balo na ye yiga tiina Jakob dwi tiina bam wone to, cheigi-na taane dento! Abam ye Isarele tiina bam dedɛɛra, ye á kikia maama ya maŋe se ya taa tɔge chega mo. 2Abam nam chuli kolo maama na jege lam to ye á daare á tɔge totoŋ-balwaaro kwaga. Á yeini á ja amo nɔɔna bam á pwoni ba tɔn-zwona kam á daare ba kwi sem yerane. 3A nɔɔna bam laam mo jigi nɔna ba pa abam. Á yeini á cha ba ya-nɔna yam á ke kambi-zaŋa wone se á saŋe, ye á daare á bwori bwori ba kwi de. Á laam wó twori nɔn-saŋa yam wone á di.”
4Maŋa beene, se nɔn-balwaaro tem konto ba ba lwoori zeina Baŋa Wɛ tei ne. O nam bá sɛ ba wɛ-lworo kom. O wó ma o kwaga o ya-ba, ba na toŋe lwarem kikia to ŋwaane.#Izaya 1:15
5 Baŋa Wɛ ni taane dem mo tento:
“A lage a ta woŋo de sampwori selo na gane a nɔɔna bam to. Nɔɔno wolo ná pɛ-ba ba ni-wodiu, ba wó ta de kotu we, ‘Yazura taa wo n tei ne.’ Wolo nam ná wo pɛ-ba kolokolo, ba wó fugi kotu we tigura beene o baŋa. 6Á maŋa kam ti. Lim wó ba de kwoli abam, se á daa yé ta‑á nae kolokolo á tɛ á bere nɔɔna bam. Amo daa bá veere a tete de abam. Wɛ dem wó zo de diga pa se á jeini lim wone. 7Sampwori sem de yi-nara bam maama wó kwoli ba yibia de chaveera. Ba wó pu ba nia, Wɛ na ve se o leiri ba bwia yam to ŋwaane.”
8Ko nam ná ye amo, Baŋa Wɛ mo ke o Jworo kom a bochare ne pa se a jege dam. Konto ŋwaane mo a wane a lɔre chwoŋa kalo na lana to, ye a na baare se a ta chega de Isarele tiina bam se ba lɔre ba na tusi tei to.
9Abam balo na ye yiga tiina Jakob dwi tiina bam wone to, cheigi-na taane dento! Chega to, abam balo na ye Isarele tiina dedɛɛra bam to yeini á chuli chega kam ye á chɔge kolo maama na lana to. 10Á tɔge puseŋa totoŋa de nɔn-gora kikia baŋa ne á fɔge á lɔ á sam Jerusalem ne, ye ko ye Wɛ tete teo mo. 11Teo kom dedɛɛra bam yeini ba jwoŋi dim mo ye ba daare ba bore nɔɔno bora. Kaanem tiina bam de maa jwoŋi ŋweero se ba daare ba bere Wɛ taane dem. Sampwori sem de jwoŋi sabu ba veera yam ŋwaane mo. Konto maama, ba nam ta bere ba tete we ba sale Wɛ mo. Ba maa kare ba tɛ ba we, “Cham bá yi debam, se Baŋa Wɛ wo debam tei ne.” 12Abam kikia yam konto ŋwaane Wɛ tete teo Jerusalem wó to ko saare ko ji di-dwonnu yerane. Nɔɔna wó ba ba va Zion tega kam konto ba tiŋi. Teeni wó li zwoŋo kolo Wɛ diga kam ya na zege da to.#Jeremia 26:18
Currently Selected:
Mika 3: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)