Mika 4
4
Nabiina wó ba ba zuli Baŋa Wɛ
1Maŋa wó ba ye Baŋa Wɛ diga kam na zege peo kolo yuu ne to na yere ko dwoni logo baŋa jei maama. Ko wó taa zege wɛɛne vili-vili se ko dwoni peero tem maama. Dwi dedɛ tiina wó taa nwoŋi ba teene dem ne ba twoŋi daane taa ba yɔɔre da. 2Logo baŋa dwi tiina bam konto maa wó ba da ye ba ta ba bere daane we, “Pa-na dé vo dé di Baŋa Wɛ peo kom yuu se dé zuli Jakob Wɛ wom o diga kam ne. Wonto wó bere debam o chwei sem, se debam de wane dé taa tɔge-se.”#Izaya 2:2-4
Kokuri to, da yam konto ne Wɛ bera yam wó zege Zion ne mo ya jage jei maama ne. Baŋa Wɛ kwora kam maa wó nwoŋi Jerusalem ne ka yi nɔɔna maama. 3Dwi tiina balo na zoore teene delo maama wone to ná jege daane, Wɛ wó fɔge-ba o ke daane ye o lwɛ ba jara yam, de ba ná maŋe ba jege dam tei de. Ba laam wó kwei ba jara-keim se-zɔɔro tem ba ma lu vaane, se ba chichwoa yam de pipiri ya ji lare ya pa-ba.#Joweli 3:10 Teo daa bá kwaare jara de ko dwoŋi. Nɔɔna de daa bá zamese jara keim. 4Nɔɔna bam maama laam wó taa zoore ba sam wone ye lwia tera. Ba wó jeini ba tete teeni dem woro ne ba sii. Nɔɔn-nɔɔno bá wane o fugi-ba. Paŋwa Tu Baŋa Wɛ ni taane mo konto.
5 Dwi-gɛ tiina boŋe se ba taa tɔge ba tete wa yam chwei mo. Debam dwi dem nam wó taa tɔge dé Tu Baŋa Wɛ wom se ko taa vei wuu.
Isarele tiina wó jwoori sɔŋɔ
6 Baŋa Wɛ maa we:
“Da yam konto ne, amo wó la nɔɔna balo a na pɛ ba yaare sa-teo ne to a ke daane. 7Ba na wo yiga yiga de ba tete teo kom to, ba nye de gwane mo. Amo laam wó pa ba ji balo na daare a nɔɔna bam wone ye ba jwoori sɔŋɔ to. Ba teo kom maa wó fɔge ko ke dam. Ko zege da yam konto ne se ko taa vei wuu, amo Baŋa Wɛ wó taa wo Zion peo kom yuu ne ye a nii ba baŋa ne.”
8Jerusalem, nmo wó taa ye teo kolo Wɛ na yere o nɔɔna bam ne nayero tei ko wone to. Nmo ta wó jwoori n ji te-fɔrɔ mɛ pɛ wom na di o paare da to.
9Bɛ mo ke ye á keeri de baare konto? Ko ye á pɛ wom de á nakwa bam ŋwaane mo na? Ba daa ta tera na? Konto ŋwaane mo pɛ á wo zonne wone ne kapua na wowole se o lo tei to na? 10Ɛɛ, Jerusalem tiina bam! Ta‑á suuri-na ye á kona ne kaane na wowole se o lo tei to. Abam laam wó nwoŋi á yage á sam mo se á vo á pu vwoa gaao ne á peini da. Á dona bam maa wó ja abam ba vo Babilon se ba peene abam teo kom konto ne. Baŋa Wɛ nam wó ba o vere abam o yage á dona bam jeŋa ne pa se á jwoori á ta‑á tei á tete.
11Jar-keira mo nwoŋi teene dedɛ wone ba la daane se ba kwaare jara de abam. Ba maa we, “Pa-na dé yɔɔre dé chɔge Jerusalem teo kom zɔŋ-zɔŋ, se dé daare dé pa chaveera ja-ko!” 12Nɔɔna banto nam za wo lɔre Baŋa Wɛ na kwei boboŋe delo de-ba to. Ba daa wo maane we Wɛ mo lage-ba o ke daane se o fere-ba ne nɔɔno na fere mumuna tei to.
Baŋa Wɛ maa we:
13“Jerusalem tiina bam, zaŋe-na se á fere á dona bam! Amo wó pa abam dam nenɛɛne nabea na dana ye ka jege nyea yalo na ye luuru to dedaane napɔɔna yalo na ye channa to. Konto to á wó nɔ dwia yalo maama na wó jeeri abam to. Á laam wó kwei jejegero telo maama ba na nɛ ba jara yam baŋa ne to á ke amo Baŋa Wɛ jeŋa ne. Amo mo ye logo baŋa teene dem maama Teiru wom.”
Currently Selected:
Mika 4: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)