Mika 2
2
Balo na bɛɛse nabwona to wó na lɛɛro
1Ko ná ye balo na jege lwarem boboŋa to, lɛɛro wo ba yuu ne! Ba yeini ba peini tete ne ba boŋe boboŋ-balwaaro mo. Tega ná poore, ba wó seene ba ke kolo na su ba yia to, ba na jege ko dam to ŋwaane. 2Ba yeini ba vere kare selo maama ba yia na su to se ba va. Ba ta maa vere sɔŋɔ kolo maama ba na lage to se ba taa zoore ko wone. Ba yeini ba ke konto mo, ye ba ma dam ba jwoŋi nɔɔna jeŋa wonnu maama.
3 Baŋa Wɛ nam na tage kolo to mo tento:
“Amo tete jege boboŋa se a pa cham mo ba abam baŋa ne. Nɔɔno tera á wone o na wó wane o jwoŋi o tete o yage. Maŋa kam konto ne, á wó na lɛɛro pa se á de á kamunni dem maama tega ne. 4Nɔɔna wó taa jege abam ba mɔna ye ba leeni wo-chechɔgɔ leiŋa ba we:
‘Lɛɛro wo dé yum ne!
Ba vere dé tega kam ba daare debam.
Ka laam wo dé dona bam jeŋa ne mo!’ ”
5Konto to, ba ná jwoori ba pɔɔre tega kam ba pa Wɛ kɔgɔ kom nɔɔna bam, abam balo na vere nɔɔna tega to daa bá jwoŋi á nyem á ta‑á tei.
6Nɔɔna bam konto yeini ba pworisi ba ta de amo ba we, “Yé ta‑n pworisi konto dwoŋi! Debam bere dé bá na dé chaveera!”#2 Tigisim 25:14-16; Jeremia 20:1-2
7Ko wo maŋe se Jakob dwi tiina bam taa ŋɔɔne konto dwoŋi. Á boŋe we Baŋa Wɛ wó peene o bane de abam, se o yé ke abam kolokolo mo na? Ko nam ná ye balo na tɔge chwoŋa to, amo ni taane dem wó fɔge-ba lanyerane.
Baŋa Wɛ maa we:
8“Abam na ke tei to, á tiini á pa ko zo amo nɔɔna bam yera, ne á ye a dona mo tei. Á yeini á zi á dwonna balo na nwoŋi jara jei ba jwoori ba sam to, ye á daare á vere ba gwaaro tem. 9Abam mo zeili amo nɔn-kɔgɔ kom kaana bam pa ba nwoŋi sam delo na ye ba kugu jei sem to wone. Ko ta ná ye ba bia bam, á ma vere wo-laaro telo amo na ke ba jeŋa ne se ba taa tei to.
10Zaŋe-na á lage jei! Á daa bá ta‑á zoore jei sem konto ne se á na siu. Abam lwarem totoŋa mo pɛ se teo kom maama chɔge. 11Nɔɔna bam konto wó taa lage sampwora kalo ni na su de vwa taane to mo. Konto tu ná tu o pworisi de-ba o we, ‘Á wó na sa-dɛɛra dedɛ se á ta‑á nyɔ á sui!’, ba wó tɔge o kwaga de wopwolo.
Baŋa Wɛ nɔɔna bam wó na fɔgem
12Jakob dwi tiina bam, amo wó jwoori a la abam a ke daane. Chega to, a wó kale balo maama na daare Isarele tiina kɔgɔ kom wone to, ne nayero na kale o pei o pa se jwoori se zo se peiga jei tei to. Konto to, tega kam wó ba ka su de kɔgɔ dedɛ.”
13Wolo na jege dam se o pore chwoŋa o pa-ba to mo wó tɔge ba yiga. Ba wó pi ba nwoŋi teo kolo ba dona bam na peene-ba to wone. Ba Pɛ wom mo wó to ba yiga ne, ye ba da ba nwoŋi. Wonto ye ba Yuu-tu Baŋa Wɛ mo.
Currently Selected:
Mika 2: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)