MATEO 5
5
Urcupi Jesús yachachijushpaca: “Ninandami cushijunguichi” nijushcami
(Luc. 6:20-23)
1Jesusca, ashtaca gentecunata ricushpami, urcuman vichai rinapi tiyarirca. Shina cajpimi, paipaj yachajujcunaca quimirinajurca. 2Chaipimi Jesusca shinllita caparishpa cashna yachachijurca:
3“Causaipi ninandapacha llaquirishpa causashpa, Diosta mascajcunaca, ninandami cushijunga. Jahua pachapi Dios mandajuj llactaca paicunapajmi.
4Llaquihuan huacashpa causajcunaca, ninandami cushijunga. Paicunataca Diosmi cushichinga.
5Na ñapash fiñarijllacunaca ninandami cushijunga. Paicunami, cai pachataca paicunapaj cachun japinga.
6Alitalla ruranata yarjachijshna, yacunayachijshna munajcunaca, ninandami cushijunga. Paicunami, alitalla ruranataca japinga.
7Shujcunata llaquishpa juyajcunaca, ninandami cushijunga. Paicunatami, Diosca llaquinga.
8Shungupi ima mapapash illajcunaca, ninandami cushijunga. Paicunami, Taita Diostaca ricunga.
9Fiñanajushpa causajcunata alichijcunaca ninandami cushijunga. Paicunataca, Taita Diospaj Ñuca huahuacunami ninajunga.
10Alitalla rurashcamanda llaquichi tucushpaca ninanda cushijunguichi. Jahua pachapi Dios mandajuj llactaca, paicunapajmi.
11Ñucamanda, cangunata na ricunayachishpa, catiriyashpa llaquichijpi, imatapash llullashpa na alicachijpica, ninandami cushijuna canguichi. 12Ninandapacha cushijunguichilla. Cangunaca jahua pachapimi, ashtacata japinguichi. Cangunapaj ñaupa profetacunatapash chashnallatami catiriyashpa llaquichinajurca.
Cai pachapica cachishna cana cashcamanda
(Mar. 9:50; Luc. 14:34-35)
13Cangunaca, cai pachapica cachishnami cana canguichi. Cachi huaglijpica, ¿imahuanshi cachiyachinga? Cachi huaglishpaca, imapapash na alichu. Ashtahuangarin, canllaman llujchishpa shitajpi, gentecuna sarungapallami canga.
Cai pachapica michashna cana cashcamanda
14Cangunami, cai pachapica punllayachijuj michashnalla cana canguichi. Urcu jahuapi shayachishca puebloca, na pacalla tiyajunllu. 15Michata japichishpaca, cajón ucupica na churanllu. Ashtahuangarin, michata churanapimi churan. Shina churajpimi, huasi ucupi tiyajcunataca tucuillata punllayachin. 16Shuj gentecunapaj ñaupajpica, chashnallatami michashna punchayachina canguichi. Canguna chashna alita rurashpa causanajujta ricushpami, jahua pachapi tiyajuj cangunapaj Taitataca, paicunapash ninanda alicachinajunga.
Mandashca shimicunamandami, Jesusca rimashca
17Mandashca shimicunata, profetacuna villashcacunata, Ñuca yangapi churashpa tucuchingapa shamushcataca, na yanachu canguichi. Ashtahuangarin, chaicunataca pactachingapami shamurcani. 18Na llullashpami cangunataca cashna nini: Jahua pacha, cai pacha tucuringacamambash, mandashca shimicunaca shuj quilcashpa churashca iñullapash, shuj uchilla aspishpa churashca quilcallapash na anchuringachu. Tucuilla pactangacaman tiyajungallami. 19Mandashca shimicunapi shuj ashalla quilcashca tiyajujta maijambash na cazushpa, shujcunatapash chashnallata yachachijushpaca, jahua pachapi Dios mandajuj llactapimi, paica ‘uchillami’ ni tucujunga. Ashtahuangarin, mandashca shimicunata cazushpa, shujcunamambash chashnallata yachachijushpaca, jahua pachapi Dios mandajuj llactapimi, paica ‘jatunmi’ ni tucujunga. 20Cangunamanmi cashna villajuni: Mandashca shimita yachachijcunatapash, fariseocunatapash, na ashtahuan yali alita rurashpaca, jahua pachapi Dios mandajuj llactaman yaicuitaca napacha ushanachu canguichi.
Pitapash na fiñanamandami Jesusca yachachishca
(Luc. 12:57-59)
21Cangunapaj ñaupa taitacunata cashna nishcataca uyarcanguichimi: ‘Ama huañuchinguichu. Maijambash huañuchishpaca, juezpaj ñaupajpica, ninanda llaquichi tucunapachami canga’ nircami. 22Ashtahuangarin Ñucami, cangunataca cashna nini: Maijambash paipaj huauquita fiñashpa rimashpaca, juezpaj ñaupapimi ninanda llaquichi tucunga. Maijambash paipaj huauquita na ali shimicunahuan rimashpaca, mandajpuralla tandanajushcapaj ñaupajpimi, ninanda llaquichi tucunga. Maijambash: ‘Ima llaquipash japishpami ali canman’ nishpaca, nina rupajuj ucu pachaman shitai tucunapachami canga.
23Chashnamandami, ofrendata altarman apashpa ña chayajushpaca, cambaj huauqui canda fiñashcata yarishpa, 24ofrendata apamushcataca altar ñaupajpi saquishpa, cambaj huauquihuanra ali tucungapa rina cangui. Chai jipami, ofrendata apamushcataca caragrina cangui ninimi.
25Canda fiñaj runa, canda cayaj cachashpa juezpajman apajujpica, ñanda rijushpallata ucha paihuan ali tucungui. Paihuan can na ali tucujpica, pactara candaca juezpaj maquipi churanman. Juezca candaca llaquichij runamanmi cunga. Chai runaca, prezuna huasipimi churanga. 26Na llullashpami cashna nini: Prezuna huasimandaca, tucuilla culquita canmanda cungacaman na llujshi ushanguichu.
Cazarashca jahua ama shujhuan causachunmi Jesusca yachachishca
27‘Cazarashca jahua ama shujhuan causanguichu’ nishcataca uyarcanguichimi. 28Ashtahuangarin Ñucami cashna nini: Maijambash shuj huarmita munashpa ricujushpaca, ñami paipaj shungupi chai huarmihuan huainayashca.
29Shina cashcamanda, cambaj ali maquiman tiyajuj ñavi na alita rurachingapa munajpica, surcushpa shitangui. Cambaj tucuilla cuerpohuan ucu pachaman shitai tucungapa randica, shujlla ñavita llujchishpa shitanami ashtahuan ali canga. 30Shinallata, cambaj ali maqui imatapash japishpa, na alita rurachingapa munajpica, muchushpa shitangui. Cambaj tucuilla cuerpohuan ucu pachaman shitai tucungapa randica, shuj maquitalla muchushpa shitanami ashtahuan ali canga.
Cazarashpaca napacha jichuna cashcamanda
(Mat. 19:9; Mar. 10:11-12; Luc. 16:18)
31Cashnatapashmi nishca carca: ‘Maijambash paipaj huarmita jichungapa munashpaca, jichushpa saquina quilcashca fangata cuna’ nishcami carca. 32Ashtahuangarin, Ñucami cashna nini: Napash huainayajpita, paipaj huarmita imamandapash juchachishpa jichushpaca, cusallatami huainayachun saquijun. Shinallata, cusa jichushca huarmihuan pipash cazarashpaca, huainayashpallatami causajun.
Na juramentuna cashcamanda
33Cangunapaj ñaupa taitacunaman, cashna nishcatapash uyarcanguichimi: ‘Na llullashpa juramentunachu cangui. Ashtahuangarin Jatun Diospaj ñaupajpica chaitaca pactachinami cangui’ nircami. 34Ashtahuangarin Ñucami cashna nini: Imamandapash na yangataca, ‘jahua pachalla’ nishpa juramentunachu cangui. Jahua pachaca, Taita Dios mandashpa tiyanami. 35‘Cai pachalla’ nishpapash, na juramentunachu cangui. Cai pachaca, Taita Dios sarujuna alpami. ‘Jerusalenlla’ nishpapash, na juramentunachu cangui. Chai puebloca, jatun Mandajpajmi. 36‘Ñuca umamanda’ nishpapash, na juramentunachu cangui. Cambaj ajchata yurajman, yanaman tigrachitaca, shujllatapash napacha ushanguichu. 37Ashtahuangarin, usharina cajpillami: ‘Ari, ari’ nina cangui. Na usharina cajpica: ‘Na, na’ ninami cangui. Imatapash ashtahuan mirachishpa ninataca, diablomi yarichijun.
Fiñajcunatapash juyanamanda
(Luc. 6:27-36)
38‘Pipash fiñashpa ñavita surcujpica, paitapash ñavita surcunguilla. Shinallata, quiruta llujchijpica, paitapash quiruta llujchinguilla’ nishcataca uyarcanguichimi. 39Ashtahuangarin Ñucami, cashna nini: Canda llaquichijpica, na tigrachishpa saquinguilla. Pipash canda ali lado ñavipi huajtajpica, shuj ladotapash ricuchinguilla. 40Cambaj jahualla churajushcata maijambash quichujpica, ucuman churajushcatapash apachun saquinguilla. 41Pipash canda imatapash apachishpa, shuj kilometrota pushajujpica, ishcai kilometrota ringuilla. 42Pipash canda imatapash mañajpica, caranguilla. Shinallata: ‘Imatapash mañachi’ ningapa shamujpipash, ama mitsashpa mañachinguilla.
43‘Cambaj cumbataca juyangui, canda na ricunayachij runataca fiñangui’ nishcataca uyarcanguichimi. 44Ashtahuangarin Ñucami, cashna nini: Cangunata fiñajcunatapash, juyanami canguichi. ‘Imapash tucushpaca alichari canman’ nijcunatapash alicachinami canguichi. Cangunata na ricunayachij gentecunamambash, aligutami rurana canguichi. Cangunata catiriyashpa llaquichijcunamandapash, Diosta mañanami canguichi. 45Chashna causashpami, jahua pachapi cangunapaj Taitapaj huahuacunapacha canguichi. Paillatami, na alicunamambash, alicunamambash indita cachamujun. Shinallata Paillatami, alita rurajcunamambash, na alita rurajcunamambash tamiata caramujun. 46Cangunata juyajcunatalla juyashpa causashpaca, ¿ima alitashi japinguichi? ¿Nachu impuestota japijcunapash, shinallata ruranajun? 47Shinallata cangunapaj huauquicunatalla: ‘Alillachu capangui’ ninajushpaca, ¿shujcunapaca ima alitata ruranguichi? ¿Nachu Diosta na cazujcunamampash, shinallata ruranajun? 48Jahua pachapi cangunapaj Taitaca, tucui imatapash alitallami rurajun. Cangunapash, shinallatami alitalla rurashpa causana canguichi.
Currently Selected:
MATEO 5: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.