MATEO 4
4
Jesustami, diabloca pandachingapa munashca
(Mar. 1:12-13; Luc. 4:1-13)
1Chai jipami Jesustaca, diablo pandachijuchun jichushca pambaman Diospaj Espíritu aparca.
2Jesusca, chuscu chunga punlla, chuscu chunga tutata na micushca cashpami, ninanda yarjachijurca. 3Pandachij diabloca, Jesuspajman shamushpami cashna nirca:
“Taita Diospaj Churipacha cashpaca, cai rumicunata tandaman tigrachun mandai” nircami.
4Shina nijpimi Jesusca cashna nirca:
“Quilcashcapica cashnami nijun: ‘Gentecunaca, na tandahuanlla causangachu. Ashtahuangarin, Taita Dios tucui rimashca shimicunahuanmi causanga’ nijunmi” nirca.
5Shina nijpimi diabloca, Jesustaca Diospajlla puebloman pushashpa, Diospaj huasi jahua umaman aparca. 6Chaipimi Jesustaca cashnami nirca:
“Taita Diospaj Churipacha cashpaca, caimanda ucuman shitari. Quilcashcapica cashnami nijun:
‘Taita Diosmi, canda ricuchun Paipaj angelcunata cachamunga.
Paicunami, can ama rumipi nitijachumbash, maquipi charinajunga’ nijunmi” nircami.
7Shina nijpimi Jesusca cashna nirca:
“Cashnatapashmi quilcashcapica nijun:
‘Canda Mandaj Diostaca, ama can munashcata rurachun mandanguichu’ nijunmi” nircami.
8Cutinmi diabloca, Jesustaca jahua jahua urcuman aparca. Chai jahuamandami, cai pachapi mandashpa tiyanajuj tucui llactacunata, ñapash ricuchirca. 9Paitaca cashnami nirca:
“Ñucata cungurishpa ninanda alicachijpica, caicunataca tucuillatami canman cusha” nircami.
10Shina nijpimi Jesusca:
“Satanás, caimanda anchuri. Quilcashcapica: ‘Canta Mandaj Diostallami ninanda alicachingui. Paipajtalla rurashpa causangui’ nijunmi” nirca.
11Chai jipami diabloca, Jesuspajmanda anchurishpa rirca. Chai jipallami Jesustaca, angelcuna ricurianajurca.
Jesusca, Diospajta rurashpami callarishca
(Mar. 1:14-20; Luc. 4:14-15; 5:1-11; 6:17-19)
12Bautizaj Juandaca, prezuna huasipi churashcata uyashpami Jesusca, Galilea llactaman tigrarca. 13Paica, Nazaret pueblotaca saquishpami, Galilea cucha manñapi tiyajuj, Capernaúm puebloman causangapa shamurca. Chaica, Zabulón, Neftalí ayllucunapaj alpapimi tiyajun. 14Profeta Isaías cashna nishpa villashca pactachunmi, chashna tucurca. Paica:
15“Zabulonbaj, Neftalipaj llactacunalla.
Cangunaca, cuchaman rina ñambimi,
Jordán jatun yacu chimbamanmi tiyanajunguichi.
Na Israelcunami, Galilea llactapica causanajun.
16Yana tutapi tiyanajun pueblocunaca,
ninanda punchayachijuj michatami ricurca.
Ña huañui japinalla yanapi causajcunataca,
michami punchayachirca” nijurcami.
17Chai punllamanda callarishpami, Jesusca cashna nishpa villajurca: “Juchayu cashcamanda ninanda llaquirishpa, Diospajman tigrarichi. Jahua pachamanda Dios mandanaca, ñami chayamushca” nijurcami.
18Jesusca, Galilea cucha manñapi purijushpami, ishcaipura huauquicunata ricurca. Pedro nishpa rijsishca Simón, paipaj huauqui Andrespashmi linllihuan pijita japinajurca. 19Paicunatami: “Ñucata catihuaichi. Cangunataca, pijita japijshna gentecunata tandachijcuna cachunmi rurasha” nirca.
20Shina nijpimi paicunaca, linllicunata chaipi saquishpa Jesusta catinajurca.
21Jesusca, chaimanda ashaguta rishpallami Zebedeopaj churi Jacobota, paipaj huauqui Juandapash ricurca. Paicunaca, paicunapaj taita Zebedeohuan, canoapi linllicuna fitirishcata huatashpa tiyanajujpimi Jesusca cayarca. 22Shina cayajpimi canoatapash, paicunapaj taitatapash chaipi saquishpa Jesusta catinajurca.
23Jesusca, tucui Galilea llactata purishpami, sinagogacunapi yachachishpa, jahua pachamanda Dios quishpichijujta villashpa, tucui ungüicunata, tucui nanaicunata charij gentecunatapash alichijurca. 24Chaicunataca, tucui Siria llactapimi yachaj chayarca. Shina yachashpami, nanaita charij tucui gentecunata, shuj shuj ungüicunahuan llaquinayaita causajcunata, aya jundashcacunata, shitarishpa tucurinllacunata, suchucunata apamunajujpi, alichijurca. 25Shina cajpimi, Galilea llactamanda, Decápolis llactamanda, Jerusalen pueblomanda, Judea llactamanda, Jordán yacu chimbamandapash, ashtaca gentecuna Jesusta catinajurca.
Currently Selected:
MATEO 4: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.