MATEO 3
3
Bautizaj Juanmi villajushca
(Mar. 1:1-8; Luc. 3:1-9,15-17; Juan 1:19-28)
1Chai punllacunallatami, Bautizaj Juanga, Judea llacta jichushca pambapi villashpandi shamujurca:
2Pai villashpaca: “Juchayu cashcamanda ninanda llaquirishpa, Diospajman tigrarichi. Jahua pachamanda mandanaca, ñami chayamushca” nircami.
3Profeta Isaiasca, paimandami cashna nishpa villajurca:
“Jichushca pambapi caparijuj runaguca:
Jatun Diosman ñanda alichipaichi.
Ñucanchi Taita Diosman, ñanda alichipaichi” nijurcami.
4Juanga, camello milmata rurashpa churajushca, cara chumbita chumbilishcami carca. Shinallata, langosta jurucunata, sacha balun mishquitami micushpa causajurca. 5Paita uyangapaca, Jerusalenmandapash, tucui Judea llactamandapash, Jordán yacu muyundicunapi tiyaj llactacunamandapashmi shamunajurca. 6Paicunapaj juchacunata villajpimi Juanga, Jordán yacupi bautizajurca.
7Ashtaca fariseocuna, saduceocuna, chai bautizajun pushtuman shamunajujta Juan ricushpaca, cashnami nirca: “¡Cangunaca, culebrashna na ali gentecunapaj miraicunami canguichi!, ¿Pita cangunataca, ‘Dios ninanda fiñarishpa llaquichinamandaca, pacajunguichillami’ nishpa yachachirca? 8Cangunaca, juchata saquishpami, ali grano fucujshna causana canguichi. 9Na cangunapaj shungu ucupilla: ‘Abrahammi ñucanchipaj taita’ ninajunachu canguichi. Cangunataca cashnami nini: Taita Diosca, cai rumicunatapash Abrahambaj huahuacuna cachun rurai ushanmi. 10Quirucunapaj sapipica, hachata ña churashcallami tiyajun. Na ali fucuj quirucunataca, hachahuan shitashpami, rupajuj ninapi tucuilla churanga. 11Ñucami cangunataca, llaquirishpa Diospajman tigrarishcata ricuchij cachun, yacupilla bautizajuni. Ashtahuangarin ñucapaj jipa shamujmi, ñucatapash yali ushaita charin. Ñucaca, Paipaj chaquipi churajushcata apaitallapash na ushanachu cani. Paimi cangunata, jucha illaj Espirituhuan, ninahuambash bautizanga. 12Paica, trigota huairachinatami maquipi ña charijun. Chaihuanmi, trillana pambapi trigota huairachijshna jupataca agllanga. Trigotaca, granota alichina ucupi alichishpami, jupataca na huañushpa rupajuj ninapi rupachinga” nijurcami.
Jesusta bautizashcamanda
(Mar. 1:9-11; Luc. 3:21-22)
13Jordán jatun yacupi Juan bautizajujpimi, Jesusca bautizai tucungapa Galilea llactamanda shamurca. 14Ashtahuangarin Juanga, na bautizangapa munashpami:
“¿Canrachu ñucata bautizahuai ningapa shamungui? Canmari, ñucata bautizana cahuangui” nirca.
15Shina nijpimi Jesusca:
“Ama imatapash nijushpa bautizahuailla, alita ruranataca tucuitami pactachina canchi” nirca.
Shina nijpimi Jesustaca bautizarca. 16Jesús bautizai tucushpa yacumanda llujshijushpaca, jahua pacha ñapash pascarijtami ricurca. Shinallata, Taita Diospaj Espíritu, palomagushna Paipaj uma jahuaman urai shamujtapashmi ricurca. 17Jahua pachamandaca:
“Caimi, Ñuca juyashca Churigu, Paimandami ninanda cushijuni” nijujmi uyarimurca.
Currently Selected:
MATEO 3: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.