MATEO 2
2
Ali yachajushca runacuna, huahua Jesusta ricungapa shamushcamanda
1Jatun mandaj Herodes mandajuj punllacunapimi, Judea llactapi tiyajuj Belén pueblopi Jesusca huacharirca. Chai punllacunapimi indi llujshimujmanda, alipacha yachajushca runacunaca Jerusalenman shamurca. 2Paicunaca:
“¿Judiocunata jatun mandajca maipita huacharishcanga? Pai huacharishcata ricuchij luzerotami, indi llujshimujman ricurcanchi. Chaimandami, Paita ninanda alicachingapa shamunajupanchi” ninajurcami.
3Chashna ninajujta uyashpami, jatun mandaj Herodesca, ninanda manllarijurca. Jerusalenbi causajcunapash, tucuillami chashnallata manllarinajurca. 4Shina manllarishpami, mandaj sacerdotecunata, mandashca Shimita chai pueblopi yachachijcunata cayachun cachashpa, Cristo maipi huacharina cashcata tapurca.
5Paicunaca cashnami ninajurca:
“Judea llactapi tiyajuj Belén pueblopimi huacharinga. Chaitaca, Profeta quilcashcapimi cashna nijun:
6‘Judá llactapi tiyaj Belén pueblolla.
Judá llactata mandajpurapica, na yapa uchillaguchu cangui.
Canmandami, shuj jatun pushaj llujshinga.
Paimi, Ñuca agllashca Israelcunataca,
michijunga’ nijunmi” ninajurcami.
7Shina nijpimi Herodesca, alipacha yachajushca runacunataca, pipash na yachajta cayashpa, ima punllapacha chai luzero ricurishcata ali ali tapuchijurca.
8Chai jipami cashna nishpa, Belenman cacharca:
“Chai puebloman rishpaca, chai huahua maipi cajta ali ali tapushpa mascanguichi. Ña tarishpaca, ucha villaj shamunguichi, ñucapash rishpa paita alicachigrisha” nircami.
9Chai runacunaca, jatun mandaj chashna nijta uyashpaca rircallami. Paicunataca, indi llujshimujman ricurishca luzerollata ricurishpami, ñaupashpa rijurca. Chai luzero ña chayashpaca, huahua maipi sirijushcapimi shayarirca. 10Chai luzerota ricushpami, ninandapacha cushijunajurca. 11Chai huasi ucuman yaicushpaca huahuagutapash, paipaj mama Mariatapash ricushpami, cungurishpa ninanda alicachinajurca. Chaipica, caranacunata pascashpami: curita, inciensota, mirrata caranajurca. 12Paicunataca: “Herodespajmanga na tigranachu canguichi” nishpa, muscuipi villashca cajpimi, shuj ñanda japishpa paicunapaj llactaman tigranajurca.
Huahuacunata huañuchishcamanda
13Chai runacuna tigrashca jipami, Jatun Diospaj angelca, muscuipi Joseman ricurishpa cashna nirca: “Ucha jatarishpa, huahuata mamandi pushashpa, Egiptoman rishpa pacajugri. Ñuca canman cutin villangacaman, chaipi causanguilla. Herodesca, huahuata huañuchingapami mascachigrijun” nircami.
14Pai rijcharishpaca, huahuata mamandi apashpami, chai tutallata Egiptoman rirca. 15Chaipimi, Herodes huañungacaman causanajurca. “Egiptomandami, Ñuca Churitaca cayarcani” nishpa profetaman, Jatun Dios villashca pactachunmi cashna tucurca.
16Alipacha yachajushca chai runacuna umachishcata yachashpami, Herodesca ninandapacha fiñarishpa, Belén pueblopi, chai muyundi llactacunapipash, ishcai huatata nara charij, jari huahuacunataca tucuillata huañuchigrichun cacharca.
Alipacha yachajushca runacuna villashca punllacunamanda yupashpami, chashna huañuchigrichun cacharca. 17Chashna rurajpimi, Profeta Jeremías villashca pactarca. Paica cashnami nijurca:
18“Ramá shuti pueblopica, ninanda caparishpa,
ninanda huacashpa, aij nishpa huacajujmi uyarirca.
Raquel huarmigumi, paipaj huahuacunamanda ninanda huacajun.
‘Ama yapa huacaichu’ nijpipash,
huahuacuna huañushcamandaca huacajurcallami” nijurcami.
19Shina cajpimi Herodes huañushca jipaca, Jatun Diospaj ángel muscuipi Joseman, Egiptopi ricurirca.
20Shina ricurishpaca: “Ucha jatarishpa, huahuata mamandi pushashpa, Israel llactaman tigrailla. Huahuata huañuchingapa munaj runacunaca, ñami huañushca” nircami.
21Shina nijpimi Joseca jatarishpa, huahuata mamandi pushashpa, Israel llactaman tigramurca. 22Ashtahuangarin: “Judea llactataca, Herodespaj churi Arquelao runami mandajun” nijta uyashpami, chaiman tigranata manllarca. Muscuipi ricurishpa villajpimi, Galilea llactaman rirca. 23Chai llactaman chayashpaca, Nazaret pueblopimi causanajurca. “Paica, nazareno ni tucushcami canga” nishpa, profetacunaca villashca pactachunmi chaipi causagrirca.
Currently Selected:
MATEO 2: QVI16
Highlight
Share
Copy
Want to have your highlights saved across all your devices? Sign up or sign in
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.