2 KHO:KHAM 21
21
Yuda Kho:kham Manashe
(2 Kho:kham mhomyi: 33.1-20)
1Manashe wa yao: Yuda kho:kham boe" lo: au: daxe: shid' zin shi" ngad: ra". Yao: wa Yerusalem mae ngo" xe: ngo" zin eib: na: ra". Yao: myhi" wa Hepziba ngad: ra". 2Yao" byumyu" qe qhid' khyo jhin" ye" lo" au:- mung"dan: mae" Asang: yang khe' thug' pye' ra" byumyu" qenho: maca' majhad' ave, lo, mau" re cao" mung: Manashe wa Asang re qobo shad' ra". 3Yao: pho" Hezekia yang phyo' pye' va" ra" tarha" taung bug so re caung:pa" ra" jo, qo jham re dam: kad' ra". Yao: wa Israel kho:kham Ahab kad' ru we' dakhyo: Bala re caung:pa" nae" phan jham we' so myhi" Ashe nho: khyao dau lho re kad' ra". Manashe wa kyi jham rere: caung:pa" ra". 4Yao: re caung:pa" byid: nae" jo, qo ga:- Asang: yang ta" to" ra" Caung:pa" Yham mae tarha" taung bug so jham: phan re kad' ra". 5Yao: wa Caung:pa" Yham vang" shid' lam: mae kyi jham re caung:pa" nae" phan jham re kad' ra". 6Yao: wa yao" yauggai zo: re phad' ngaui" xeim: khyo" ngaui" xeim: ngaui" byid' ra". Yao: wa boe, phyid'- vha" ru- lo, kyo' qu" mo, we' jan: zho: mo, re dao: myid: myid' ra" mau" kad' ra". Yao: wa Asang re qi: sho' qobo kad' lhoe" mung: yao" nhag' jam: yo" rure lhau: zhung" ke' ra". 7-8Asang: yang Davi we' yao" yauggai zo: Sholamon pha: re- ce: Yerusalem mae- ce: Caung:pa" Yham mae- ngore caung:pa" nae" jo, qo khyo" Israel amyu" kaung daxe: shid' kaung: nho: mug: myid alhab' mae" ngo khyin: yu: to: ra" jo, qo ngad:- Israel byu qe nga" amyin" dao: jham alhab' re phug' cao" mung:- nga" daui daui yaug Moshe yang yao: bam re byid' to" ra" tarha" alhab' re phug' cao" ko" re wa- yao: bam: phug' pho" qere ngoyang byid' to" ra" mung"dan: mae" yao: bam re khe' thug' pye' nae" akhang" ngo mabyid: nae"- ga: ta" ra" jo, qo Caung:pa" Yham mae Manashe wa so myhi" Ashe nho: aso: alho re yao: to" to" ra". 9Ngadqere: Yuda byu qe wa Asang: mho dao: matae" gyo: mung: yao" byumyu" qe: qhid' au: khyo jhin" ye" lo" ko" au:- Asang: yang khe' thug' pye' ra" byumyu" qeyang shad' lhoe" ko" ra" qobo tho' je: qi" ra" qobo jham re lhao" re: Manashe wa amyu" byu qere jhui" shad' ra".
10 Asang wa yao" daui daui mo, ngad ko" ra" lapa qe: nhad' khyo"- 11Manashe wa ai: maca' majhad' ra" lo,mau" jham ngad: ra" Khanan byu qe kad' ko" ru tho' xo: ra" lo, mau" re kad' ava". Yao" so alho jham: yang Yuda byu qere yao: qobo jhui" shad' ava". 12Aimung: Israel nho: Mao"So Asang ngo wa airu" ra" qug: khai: kyi" khyag' ru Yerusalem we' Yuda mung" dao mae boe" nhao: nae". Ai: khyo re the' gyo" ra" mo, yaug khao: ngo" mo; byaug: li" genae". 13Ngo wa Samari re ngo kad' ru we' dakhyo:- Israel kho:kham Ahab we' yao" myid:zo: qere ngo kad' ru we' dakhyo:- Yerusalem re qobo dae byid: nae". Ban re sad' pye' mung: maug: to" ra" nho" san sho' ngo wa Yerusalem vobyu qere aimae" shao" sho' sad' pye' nae". 14Ngo wa na: dang: ra" vobyu qere shapye' to: mung: yao: bam: gyevo qe: lo, mae ab byid' pye' nae". Aibam wa yao: bam re aung: pye' mung: yao: bam mung" re phyo' zo" pye' li" genae". 15Yao: bam ngore qobo shad' mung: yao: bam: phug' pho" qe Egutu mung" mae" thug' lo ko" ra" ayo, mae" ana" ba joe" sho' ngore nhag' jam: yo: nhao geyang: nga" byumyu" re ceru: ngo kad' nae"- ga: ta" ra".
16Manashe wa qobo maqo" ko" ra" vobyu qe myo: sho' re se' pye' mung: Yerusalem hau" mo" mae sa: qid yug: ra". Yao: wa ceru re laung: yang: Yuda mung" byu qere so alho jham khyo jhui" ye: mung: yao: bam re Asang re qobo shad' lhoe" nhao: ra".
17Manashe kad' ra" gatau lo,mau" ja: khao: ngo" yao: shad' ra" qobo jham re Yuda kho:kham qe: mhomyi: paug' mae tung" xam" to" ako". 18Manashe wa shid: lo" mung: kho:kham kho" bin: khyae- Uzza khyae mae nyhab' pye' ako". Amung: yao" yauggai zo: Amon wa yao" khu mae kho:kham xo' kad' ra".
Yuda Kho:kham Amon
(2 Kho:kham mhomyi: 33.21-25)
19Amon wa yao: Yuda kho:kham boe" lo: ra" au: re apyad shid' xe: shid' zin ngad: ra". Yao: wa Yerusalem mae shid' zin eib: na: ra". Yao: myhi" wa Yodba vogaung: mae" Haru nho: myiqe: zo: Meshulemed ngad: ra". 20Yao: pho" Manashe we' dakhyo: yao: wa Asang re qobo shad' ra". 21Yao: wa yao: pho" nho: lo, mau" re lag qu" yu mung: yao: pho" caung:pa" lo: ra" so alho jham re caung:pa" ra". 22Yao: wa yao" phug' pho" qenho: Mao"So Asang re ha: pye' mung: Asang: amyin" dao: jham re maphug' cao" ngad: ra".
23Amon nho: gyezug: qe wa yao: re gye kad' tau: lhan: mung: yao: re kho:kham kho" mae khug' se' pye' ako". 24Yuda mung" byu qe wa Amon re khug' se' pye' ra" mo, re se' pye' mung: yao" yauggai zo: Yoshia re kho:kham kad' nhao: ako".
25Amon kad' ra" gatau lo, mau" ja: khao: ngo" re Yuda kho:kham qe: mhomyi: paug' mae tung" xam" to" ako". 26Amon re Uzza bin: khyae khug mae" lab mae nyhab' pye' ako". Amung: yao" yauggai zo: Yoshia wa yao" khu mae kho:kham xo' kad' ra".
Currently Selected:
2 KHO:KHAM 21: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009