2 KHO:KHAM 20
20
Kho:kham Hezekia No: Ru We' Dam: Gai: Ru
(Esaia 38.1-8, 21,22; 2 Kho:kham mhomyi: 32.24-26)
1Ai: ayo, mae kho:kham Hezekia wa no: li" mung: shid: lo" na: ra". Amod nho: yauggai zo: lapa Esaia wa yao: re no yequ" mung:- ja: khao: ngo" re nyhang" jaung: to: nae" Asang nao re ta" ra". Pe"mung:ga"re ni" no wa magai nae". Shid nae" seim" ci wa,- ga: yao: re ta" ra".
2Hezekia wa yao" myo, khung: khinqae shad' khyo phaug' lo" mung:- 3Asang we"- ngo nao re jhaug' zaug za: caung da" byid: mung: ngo wa nao kad' nhao: ra" ja: re khonhae" re: qam: ke' kad' lo: rure myid: beim: byid: la, wo"- ga: akyu" mho' ra". Amung: yao: wa ngug ag' thaung: sho' ngug: ra".
4Esaia wa kho:kham pho" mae" to" lo" ra". Ngadqere: kho:kham kho" vang" agaung: khyo" mabin: lai: phyid' lo" shire- Asang wa yao: re- 5Asang: byumyu" re eib yaug- Hezekia jhao" dam: tug' ye: yang: yao: re- ni" phug' pho" Davi nho: Mao"So Asang ngo wa ni" akyu" mho' dao: re gyo: mung: ni" ngug byid re myao byid: va". Ngo nao re gai byid: nae"- sam ba lao" nao Caung:pa" Yham khyo ye" li" nae". 6Ngo wa nao re daxe: ngo" zin na nhao shinae". Ngo wa nao re we' ce: Yerusalem re Asuri khosin" lo, mae" khyad' yu nae". Ngo yao" gaung re nga: yhe' ru qhid' mae" we' nga" daui daui yaug Davi re ngo byid' to" ra" dao:so: mathao mae ngo wa ce: vogaung: re gye vha byid: mung: gug: gam byid: nae" ga" ein: lo" ta" kyo: wa,- ga: Esaia re ta" ra".
7Ai: thao Esaia wa kho:kham pho" jhao" li" na mo, re- pho' ham" shi: kyaug' pye: re yao" byang mae nghoe' byid: ge,- yao: gai: lo" li" nae"- ga: ta" ra". 8Kho:kham Hezekia wa Asang ngore gai byid: mung: sam ba lao" ngo Caung:pa" Yham khyo qo" ye: nae" ga" rure qhu" byid: nae" sagse: pe" aso: ngad nae" i? ga: myid' ra".
9Esaia wa Asang wa yao: dao:so: zaung: ra" khyo re sagse: qhu" byid: nae" aso: nao re byid' li" nae". Ana" zam thao mae ba qab re qhid' khyo khuxam daxe ye" lo" nae" o: i? Mangad: lao" thao khyo khuxam daxe tug' lo" nae" nao o: i? ga: myid' ra".
10Hezekia wa qhid' au: khyo khuxam daxe ye" lo" nae" ru wa laui: ra". Thao khyo khuxam daxe tug' lo" nae" kad' wa,- ga: tau" ra".
11Esaia Asang re akyu" mho' mung: Asang wa kho:kham Ahaza yang kad' to" ra" zam thao dao mae ba qab khuxam daxe thao khyo tug' lo" nhao: ra".
Babelon Mae" Lagyo: Qe
(Esaia 39.1-8)
12Ai: ayo, mae Baladan nho: yauggai zo:- Babelon kho:kham Merodag Baladan wa kho:kham Hezekia no: ra" khyo re the' gyo: mung: vhin tung" we' jhaung qhu" yao: re vhin: ke' byid' ra". 13Hezekia wa lagyo: qere lham: tug: yu mung: yao" jo,nho"- qhang- ngaui- zoxeim: sheim nae pyo: ja:- yao" gyezai jham alhab' aibam re qhu" ra". Yao" jhi jham mae we' yao" mung"dan: khotau mae re: aibam re maqhu" ru dakhyi" re: madang ngad: ra". 14Ai: thao lapa Esaia wa kho:kham Hezekia jhao" ye: mung:- cebam khai: mae" joe" li" mung: nao re pe" li" ta" ako" i? ga: myid' ra". Hezekia wa yao: bam wa gyai va" ra" Babelon mung"dan: mae" joe" li" mo, ngad: ako"- ga: tau" ra".
15Yao: bam kho:kham kho" mae pe" re the' myao: ako" i? Yao: bam ja: khao: ngo" myao: avako". Jhi mae jo; ru ngo yao: bam re maqhu" ru pe" madang lo:- ga tau" ra".
16Ailao" Esaia wa kho:kham pho" re qam: bo: ra" Asang ta" ra". 17Ni" kho:kham kho" mae jo; gu: ja: khao: ngo" ana" ba joe" sho' ni" phug' pho" qe qaung" to: ko" ra" zai ja: khao: ngo" re Babelon mung" khyo yu: lo" ra" ayo, joe" li" na: ra". Pe" re: dang nae" mangad:- 18Ni" myid:zo: qe daqhae: re jhui" phao: lo" byaug gemung: Babelon kho:kham nho: kho:kham kho" mae caung da" byid' ra" unug jham kad' pye' li" genae"- ga: ta" ra".
19Kho:kham Hezekia wa yao" pyad gyo: mae ngaui pyo: yaug yo mung:- gug: gam nae" ngad: ga" ra" ce: lajheim: re ba: gyo: mung: nao ngore li" byid' ra" Asang mae" joe" li" ra" mungdao: wa gai: ra"- ga: phaug' tau" ra".
Hezekia Eib Yo, Gan: Lo" Ra" Khyo
(2 Kho:kham mhomyi: 32.32, 33)
20Kho:kham Hezekia kad' ra" gatau lo, mau" ja: khao: ngo"- yao" mazag mavae: ra" lo, mau" jham qid kyaung" we' qid khyo: vogaung: khyo qid she: zaui: ra" qid khyo: dau" ra" khyo alhab' re Yuda kho:kham qe: mhomyi: paug' mae tung" xam" to" ako". 21Hezekia wa shid: lo" mung:- yao" yauggai zo: Manashe wa yao" khu mae kho:kham xo' kad' ra".
Currently Selected:
2 KHO:KHAM 20: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009