2 KHO:KHAM 22
22
Yuda Kho:kham Yoshia
(2 Kho:kham mhomyi: 34.1-2)
1Yoshia wa Yuda kho:kham boe" lo: au: apyad she' zin shi" ngad: ra". Yao: wa Yerusalem mae sam xe: dazin eib: na: ra". Yao: myhi" wa Bozakad vogaung: mae" Adaia nho: myiqe: zo: Yedida ngad: ra". 2Yoshia wa Asang o ngaui: ra" mau" re kad' ra". Yao: wa yao" phug' pho" Davi nho: ve, so: re cao" mung: Mao"So: amyin" dao: jham re jhaug' za: phug' cao" ra".
Tarha" Paug' Re Qho: Myao: Ra" Khyo
(2 Kho:kham mhomyi: 34.8-28)
3Yao: eib ru daxe: she' zin ein: zin mae kho:kham Yoshia wa Meshulam nho: yao: myid:- Azalia nho: yauggai zo: kho:kham kho" mugsug' tung" yaug Shaphan re amyin" we' daga" Caung:pa" Yham khyo ye: nhao: ke' ra". 4Aiwa- Khinjaung Yin" Hilkia jhao" ye: mung: Caung:pa" Yham kham: dung: mae mau" ang: ra" khinjaung qeyang amyu" byu qemae" gaug: zhang: to" ra" ngaui khonho" ngad: ra" lau dao: yeyu: lo ri:- 5Ngaui jham re Caung:pa" Yham nyhang" kad' ra" mo; au: jhaung qere byid: wa,- ga" ein: yao: re ta" wa,. 6Aijham re- lo,mau" zaui: mo,- yham kad' mo,- yham zao mo, re aphug' byid: mung: sag' the: we' laug baui re vai yang: nyhang" kad' rumae ci: nae" ngad: ra". 7Mau" zaui: au: jhaung qe wa pe" ta" maqo dangman" mo, ngad: gemung: ngaui qhid' mae" pe" japhin: mamho' ca" ngad: ra"- ga" ru ngad: ra".
8Shaphan wa kho:kham pho" nho: amyin" dao: re Hilkia re ta" kyo" ra". Hilkia wa Caung:pa" Yham mae" tarha" mugsug' paug' yao: qho: qhug' ra" khyo Shaphan re lham: ta" kyo" ra". Hilkia wa- ai: mugsug' paug' yao: re byid: mung: Shaphan wa aire nghe' ra". 9Ai: thao re yao: wa kho:kham pho" jhao" dam: tug' lo" mung: ni" daui daui mo, wa Caung:pa" Yham mae jo; ra" ngaui jham re yu yang: nyhang" kad' ra" mo; au: jhaung qe: lo, mae ke' byid: va"- ga: lau dao: lo" kyo" ra". 10Aimung: yao: wa Hilkia yang ngore byid' ra" mugsug' paug' dapaug' ngo qo"- ga: ta" mung: yao: wa kho:kham pho" re thoe qi: we' nghe' kyo" ra".
11Kho:kham pho" wa ai: mugsug' nghe' na: rure the' gyo: lao" yao: wa nhag' lam: myid laug: ru we' yao" mai bau: jham lao" cad' pye' ra". 12Amung: khinjaung pho" Hilkia- Shaphan nho: yauggai zo: Ahikam- Mikhaia nho: yauggai zo:- Akbo- kho:kham kho" mugsug' tung" yaug Shaphan kho:kham pho" lakhab' Esaia bam re- 13Ce: mugsug' paug' mae mho" shid' ra" khyo we' sin: yang: nga" qhid' mae" we' Yuda byu qe alhab' qhid' mae". Asang re dao: yemyid: byid: gela,- ngonhaung" phug' pho" qe wa ce: mugsug' paug' yang kad' ca"- ga: ta" to" rure makad' geyang: Asang ngonhaung" re nhag' yo" ru ngad:- ra" ga: amyin" byid' ke' ra".
14Hilkia- Ahikam- Akbo- Shaphan- Esaia bam wa Yerusalem vosag' tam" mae na: ra" lapa myhi" Hulda ga: mang: ra" myiqe: myhi" jhao" dao: yemyid: nae" ye" lo" ako". (Yao" yham sang pho" wa Harha nho: yao: myid:- Tigva nho: yauggai zo: Shalum ngad mung: yao: wa Caung:pa" Yham bau: qhang re jaung: ra" au: jhaung ngad: ra".) Yao: bam boe" ra" khyo yao: re ta" kyo" ako". 15Alao" yao: wa yao: bam re- kho:kham pho" jhao" dam: tug' lo" mung: o mae ta" ra" Asang mae" mungdao: re lo" byid: genae" qhid' mae" ta" ra". 16Aimung dao: wa- mugsug' paug' mae tung" to" rure kho:kham pho" the' nghe' va" ru we' dakhyo: ngo wa Yerusalem re we' vobyu alhab' re qobo dae byid: nae". 17Yao: bam wa ngore ha: pye' gemung: so gatau jham re ngaui" xeim: ngaui" byid' avako". Aimung: yao: bam: lo, mau" yang nga" nhag' jam: yo" rure lhau: zhung" ke' ako". Ngo wa Yerusalem re zab zab zhau nhag' yo: mung: ai wa nhag' yo: magyo" nae". 18Kho:kham pho" qhid' mae" ceru wa Israel nho: Mao"So Asang ngo ta" ru ngad:- nao wa mugsug' paug' mae tung" to" rure nao tae" gyo" ra". 19Yerusalem we' vobyu qere ngo khoru: qobo dae byid: nae" kyaug' nhin" rure nao the' gyo: lao"- nao myid tha" mung: nga" qhid' kheim: mae naoyao" gaung re nyham: khyo" ra". Ni" mai bau: jham lao" cad' mung: ngug: ra". Ngo wa aire qu" gyaug sho' kad' pye' nae". Ai: jo, qo mang re nhang: kheim: khyo" ci: li" genae". Ngadqere: ni" akyu" mho' dao: re ngo gyo: va". 20Amung: Yerusalem dao mae ngo boe" nhao nae" qobo dae byid' ru wa nao shid thao joe" sho'- majoe" li" nae". Ngo wa nao re yaug yo za: shid: lo" nhao nae"- ga" ru ngad: ra". Ai: byu qe wa ce: mungdao: vin yang: kho:kham Yoshia jhao" tug' lo" ako".
Currently Selected:
2 KHO:KHAM 22: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009