Luka 7
7
Yesu Ugumuforia Mutumwa wa Müküü Umwe
(Mat 8:5-13)
1Narë wamarëya nkhani yakwe yoong'e umatwë antu, mweeso againgëa uKapernaumu. 2Na müküü wa asikai arë ukwetë mutughwa në mweeso arë umwanjëte ino, naarë uwairë, muvë, fifë ukuya. 3Narë mweeso wategheeya sayu amwa Yesu, mweeso agatuma kunë mweeso anyampaa va Gëyahudi, umuromba mweeso aje na umuforya mutugwa wakwe. 4Narë vafika kunë Yesu, vëgamufefeheya ino, vëuhanya, “Unoneye veve umutendee vii, 5gusoko umëyanjëte ndughu itu, na wagujengea isinagogi ritu.” 6Na Yesu agaenda itambërëmwedu inao. Narë akëë atikuure na nyumba, musikai agatuma vambuya vakwe kunë mweeso, vamukhanëe, “Müküü utagikhasye vee mughonjo, gusoko nene ntinoneye veve uja uingie fang'ë a itembe rane. 7Gusoko asëë nene ntinasoya uja kunë veve. Ëgweeso hanya ukhani, na mutughwa wane ugufoa, 8Gusoko nenenoo nafiwe udaho, nëkweti asikai nëvëfang'ë ane, nanë namukhanëa umwedu ‘Enda,’ na mweeso winjë; na muuya, ‘Nju’ na mweeso ujie; na u mutughwa, wane ‘Tenda vii, na mweeso ugutenda uyii.’” 9Yesu narë wategheeya uyii agamutaka mweeso na agagifetukëya na urëkhanëa iburi naarë rëmuhongete, “Ngumukhanëa nyee, nambësa ung'ë a Isiraeli ntinaona uhuvëi mwino urui.” 10Na vasaa naarë vatumwa narë vasuka ukhaya, vëgaenda umuhanga mutumwa wafoa.
Yesu Wamufetya Mwana wa Muhimbë
11Gënyahafo agaenda umuji umwedu në uguëtwa Naini, na asëywi vakwe na iburi rikuu arë vëhongete inao. 12Naarë wahumbera uginyamwango nëgëkuu ga muji, kengea muntu naarë ukure wuuchiywe utuwe unji, mwana umwedu kunë nyinya na arë muhimbe, na iburi rikuu ufuma umujini arë vitambërëmwedu na mweeso. 13Na Müküü naarë wamuona agamuonea uvai, agamukhanëa, “Utarëe.” 14Na agahumbëa na urëtenya mukunja#7:14 Mukunja: Mukunja nëutotu wa ng'ombe wa ukenkea na uvëkëëra akuyi., na anya uriucha vëgaëmëka. Na agamukhanëa, “Muhumba nene ngugukhanëa veve uka.” 15Na mukuyi wasuu agauka agagikhaa na agaandya urighëëtya. Na mweeso agamutoa kunë nyinya. 16Wova ugavakwata voong'e na veeso vëgamukurya Muungu, vëuhanya, “Munyagëdaghu wighea mukhatë itu! na Muungu wajie uvasoya antu vakwe!” 17Na sayu ëyëë yakwe ëganing'anëa goong'e ung'ë aUyahudi na ng'ë yoong'e ya fifë.
Atumwa Ufuma Kunë Yohana Mubadisi
(Mat 11:2-19)
18Asëywi vamwa Yohana vëgamwetea sayu a mantu asaa oong'e. 19Na Yohana, agavaëtana vavëë mukhatë asëywi vakwe, agavatuma veeso kunë Müküü, uwëya, “Veve wë uyuo neujie nampa gumwindëe ungëja?” 20Na antu vasaa naarë vafika kunë mweeso, vëgahanya, “Yohana Mubadisi wagutuma kunë vee, uguhanya, Veve wë uyuo nëujie, nampa gumwindie ungëja?” 21Na ikhondo rasëë mweeso arë uguforia marue maingë na makhasëko na inyonyinyonyi në ëvë na vaingë naarë afoku agavatenda vaone kangë. 22Na agavasucha veeso “Endi na umukhanëa Yohana në nyenye mwayaona na uyategheeya, afoku vafewa uona, na anyagëtevee vaja uenenda, anyamatana vaoywa, vambula vaja utegheya, akuyi vëufetyaa, atuki vëutanantëywa sayu në njija. 23Na bahu akwe wasuu në atiuhuriswa nanee.” 24Naarë atumwa vamwa Yohana venda, mweeso agaandya uukhanëa mwirundo sayu amwa Yohana: “Mwendie unji umbugha uona ntuni? inyumbwambwa nërëfembewa na nkungu? 25Nyenye mwendie unji uona ntuni? Muntu nëuyaite masaa asasëana? Ravi vasaa nëvëuyaa masaa asasëa na uduva uduvi wagighwarë vëgikhaa unyumba ya atëmi. 26Ëgweeso nyenye mwendie unji uona ntuni? Munyagëdaghu? Nhaa, ngumukhanëa nyenye, në müküü ukëa munyagëdaghu. 27Uyui unë waandëkëwe ayai:
‘Raava ngumutuma mutumwa wane usonge a usyu wako.
Nëugumëning'anëya njëa usonge ako.’”
28“Nene ngumukhanëa nyenye mukhatë avasaa në vafafiwe na akhema gutie në müküü umukëa Yohana; ëgweeso wasuu në munyui guutëmi wa Muungu wasuu në müküü ukëa mweeso.” ( 29Na antu voong'e na anya ukhua kooti naarë vategheya vii, vëgamukurya tutë a Muungu, kunu vabadisiwe gwa ubadiso wamwa Yohana. 30Ëgweeso Afarisayo na aandëki vaseria vëgahita mafenji a Muungu kunë veeso, gusoko vinabadiswa na mweeso.) 31“Nëvikhwaniye na ntuni antu va ufafo urui, na vëkhwete na ntuni? 32Vëkhwete na ang'ënya nëvikhee usokoni nëvëuvaëtana auya, sese gwamukhuëra filimbi na nyee mwinaina, gwaëmba wëmbo wa gërëo ëgweeso mwinarëa. 33Gusoko Yohana mubadisi wajie atiulya mukaate na atiuywa divai na mugahanya wina gënyonyinyonyi. 34Mwamuntu wajie ugulya na unywa, na mugahanya, ‘Ravi muraku na mughari, munyambuya wa anya ukhua kooti, na anya mahutye!’ 35Mbesa uvii ihaa ra Muungu rëmanyëkie mwino unë ra tutë gwa vana vakwe voong'e.”
Yesu Unyumba a Afarisayo
36Mufarisayo umwedu agamuraëka Yesu vende ulia malëwa inakwe. Na mweeso agaenda unyumba, aMufarisayo na agikhaa umesa. 37Na rarava arë urëfo mukhema umwedu wa umuji, unë munya mahutye. Narë wahanga sayu mwino chu mweeso aja ugumesa unyumba, aMufarisayo agaeta galëmbo#7:37 Galëmbo: Ni gefë gautendea makuta a musalaka. në gina makuta a musalaka. 38Na agaëmëka unyuma akwë umëghuu akwe, ugurëa agaandya umujululëya mihori mëghuu akwe, na umëfanguya na njëë ya gitwe rakwe na utomëa mëghuu, akwe na umëira na makuta a musalaka. 39Na Mufarisayo wasuu nëaja umuraikie mweeso naarë waona uyii, mweeso agahanya mughonjo, “Nesa muntu uyi aja munyagëdaghu, mweeso aja ugumanya anyu na wë urë mukhema uyi në ugumutenya mweeso gusoko mweeso në munya mahutye.” 40Na Yesu agasucha agamwëra, “Simioni nëkweti gëntu gaugukhanëa vee.” Na mweeso agasucha, “Ntuni Musëyi?” 41“Mukofesi ungëja arë ukofesiye antu vavëë, umwedu arë ugumudai dinari maghana atano, na muuya dinari makumi atano. 42Naarë varëmwa urëfa agavaonea uvai voong'e vavëë. Itungwee wafei mukhate ao nëugumuyanja mweeso ino?” 43Simioni agasucha, “Ngughema uyuo nëwaonewa uvai nëënyingë.” Na Yesu agamukhanëa mweeso, veve waramwua ija. 44Kangë agamufetukëa mukhema agamukhanëa Simioni, “Umukengee mukhema uyuinaa? Naingie unyumba, ako na vee winampa nanë majë amëghuu ane ëgweeso mweeso wajululëya mëghuu ane na mihori akwe na umefanguya na njëë yakwe. 45Veve wënantomya nene, ëgweeso fana nëëngera hafai mukhema uyi inareka untomya nene mighuu anë. 46Veve winaira itwe rane na makuta, ëgweeso mweeso waira mëghuu ane na musalaka. 47Gwa uvii nene ngugukhanëa vee, mahutye akwe në maingë aonewa uvai, gusoko asëë wayanjie ino. Ëgweeso wasuu në waonewa uvai gunyui uguyanja gunyui.”
48Na agamukhanëa mukhema wasuu, “Mahutye ako aheeywa.” 49Kangë vasaa unë naa vëkhee umesa itambëëmwe, vegaandya ughema unkhoo yawe, “Uyui unë anyu në ukurekea antu mahutye?” 50Na agamukhanëa mukhema wasuu, “Uhuvëi wako wagutyoa, enda gwa majëghana.”
Currently Selected:
Luka 7: RIMRC
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.