Lukas 9
9
Suxi maa aaduindagai go bhaibuxtama dan goka mamaatïrdamigadï
1Dai ïmo imidagai Suxi báí mamaatïrdamigadï dai maa sïïrhikami. Bhaibuxtama dan gokadu mamaatïrdamigadï. Dai maa Suxi gubukarhigai sai bubaidiña ïgai diabora tïtïañikarudï odamiañdïrï ix makïdï biakagi. Maa ïgai gubukarhigai ïpï sai duduadiña kokokoñiadï. 2Dai bhodïrï otoi ïgai sai apakoga aagaiña ïgai ix dukatai tïanïi Diuxi dai sai duduadiña ïgai go kokokoñiadï.
3Dai Suxi potïtïdai aidï,
—Maiti abïr bukai tomarhi ïmo ixtumaxi boiyïrï bïïtarï. Maiti abïr bukai tomarhi gïn gika tomarhi gïn morarhiga tomarhi bhitugai tomarhi tuminxi. Dai mos arhi ïïmo bapasaragai abïr gïn aadatika ïpï dai mai xu xi goka. 4Dai ka iimïkai aapimï tomax tuma kiiyïrï mïx xako gïn urhiñagi amaxi abïr gïn urhiña asta mïx xïxkadï bhïiyi aapimï gïn boi— itïtïdai. 5—Dai xïïxkadï aiyagi aapimï ïmo kiikiïrï ix maiti gïn miadïgidagi óídakami abïr iimi abhiadïrï dai abïr gigigida gïn ïïkaso sai gïsïna ami dïbïrai gïn ïïkasoañdïrï. Podukai maaxitudamu aapimï sai ka dagitoimi aapimï ami óídakami mai kïï ibuadatai ïgai— itïtïdai.
Potïtïdai Suxi mamaatïrdamigadï maakakai sïïrhikami tudu. 6Dai bhodïrï aipakoga iji ïgai dai bïïxi kiikiïrï gamaakaiña ñoki aagaitai go bhai ïrhiaragai aatagi dai duduadiña go kokokoñiadï.
Go gïï dunukami Herodes tïgidukïdï nïida ïrhidi go Suxi dai maatia ïrhidi
Aipakoga ajiopatadai go mamaatïrdamigadï Suxi aidï dai ibuadana aaduindadï ix dukatai gatïjaitadai go Suxi. 7Dai aidï ïmo kïïrhi Herodes Antipas tïgidukami dunukamikatadai Galileana. Dai kajioma ïgai ix tumaxi buadana Suxi ïmadï mamaatïrdamigadï dïï mai ïxitudai go Herodes xorai go Suxi. Jaa pokaitiña saidi ïgai ïr go Juan dai sai gï duakatu ïgai ïpamu. Kaxkïdï mai tïtïgaitadai go Herodes ixtumaxi gï tïtïgitoagi kaïkatai aatagi Suxikïdï. Naana dukai aagaiña odami aagaitai Suxi tudu. 8Jaa pokaitiña saidi ïr go Elias dai sai ka dibiatadai ïpamu. Dai jaa pokaitiña saidi ïr ïmadutai go ïïki óídakami ix makïdï ñokiturhiña Diuxi dai sai gï duakatutadai ïpamu.
9Daidi ikaitiña go Herodes,
—Kajioma aanï sai naana maaxi ibuayi go kïïrhi Suxi tïgidukïdï dïï mai maatï aanï xorai ïgai— ikaitiña. —Kïï maatï aanï sai maiti ïr go Juan tudu. Gobai ka muu. Tïjai aanï guikutaragai modï di. ¿Dïï gia xorai gobai ix makïdï kajioma aanï sai naana maaxi ibuayi?— ikaitiña.
Dai kaxkïdï nïida ïrhiditadai ïgai go Suxi naana maaxi ibuadatai Suxi maaxidaragai.
10Dai gokiïrï ïpamu dada go ojotosadï Suxi ix makïdï aipakoga otoitadai ïgai. Dai dadakai aagidi ïgai go Suxi bïïxi ixtumaxi ibuadana. Dai Suxi ïïgi daka ïrhiditadai ojotosadï ïmadï dai baidakai ïmo arhi kiikiamakoga xako Betsaida tïgidu. 11Dïï go odami máí dai gamo iji ïpï gaagaitai. Dai ka aïkai go odami ami sai Suxi kïïga miadïgidi xako dakatadai ïgai dai gï aaga aagidi ix dukatai tïanïi Diuxi dai duduadi ix makïdï ïr kokokoñiadïkatadai.
Suxi ïïgi gubukarhigadïkïdï bhibhi taama mirhi odami oidigana xako mai tipu kuadagai
12Mïï dadatadai mui odami tudu dai ka uruñimitadai oidigi bai Suxi mamaatïrdamigadï mïï aagidi go Suxi daidi potïtïdai,
—Otosamudai aapi go odami sai mïï gaagana ixtuma ugiagi dai gaagana xako gïn urhiñagi ïpï nobai go arhi kiikiana ix makïdï bamioma miagakagi. Tami oidigana mai tipu ixtumaxi— itïtïdai.
13Daidi Suxi potïtïdai,
—Bhibhidabïrai aapimï— itïtïdai.
Dai go mamaatïrdamigadï itïtïdai,
—Mosïkaxi bia aatïmï taama pan dai goka batopa dai xadïrï aïna mosïïki odami bïïtarï. ¿Agai pïxi ïpï xi mïï sabïda aatïmï kuadagai ixtukïdï bhibhidagi bïïxi idi odami?— itïtïdai.
14Parï taama mirhikatadai go odami go ïï kïkïïrhi dai ïkobïrakoga go oki dai arhi.
Dai Suxi potïtïdai mamaatïrdamigadï,
—Aagidabïrai go odami bai daraibana chïchïkiatai aipakoga parï tatajukan ciento ïïki— itïtïdai.
15Dai go mamaatïrdami aagidi go odami bai go odami bïïxkatai daraiba. 16Dai Suxi bui go taama pan dai goka batopa dai tïbagiamakoga nïnïaba dai potïtïdai Diuxi xïï kïï tuiga ïgai gïn bïïtarï gïn urhiñdakai go kuadagai. Dai bhodïrï maa ïgai go mamaatïrdami sai takoidana go odami. 17Dai bïïxkatai kïïgadu dai tataxkobai. Dai gokiïrï ka ugakai ïgai sai susudagi ïgai bhaibuxtama dan goka asarai sasakigadï ix makïdï bhaibitu. Podukai bhibhi Suxi parï taama mirhi odami.
18Dai ïmo imidagai ïïko jii go Suxi dai nobai gaatagai Ogadï ïmadï. Dai go mamaatïrdamigadï oi bai Suxi potïtïdai,
—¿Borai gin aagai odami?— itïtïdai.
19Dai mamaatïrdamigadï potïtïdai,
—Jaa pokaiti pïsaidi ïr go Juan ix makïdï bapakonaiña odami, dai jaa pokaiti pïsaidi ïr go Elias, dai jaa pokaiti pïsaidi ïr ïmo ñokituldiadamigadï Diuxi dai sai mutadai aapi ïïki dai xibi ka duaka ïpamu— itïtïdai.
20Daidi Suxi potïtïdai aidï,
—¿Dai aapimï borai gin ïrhidi? ¿Borai gin aagai aapimï tudu?— itïtïdai.
Daidi go Piduru potïtïdai,
—Aapi ïr go Diuxi otosadï ix makïdï ïr Ga Bhaitï Kïakami ix makïdï nïnïrakatadai aatïmï— itïtïdai.
21Dai Suxi sïïrhikïdï daidi mamaatïrdamigadï sai mai aagaiña ïgai xorai ïgai. 22Daidi potïtïdai,
—Aanï ïgai ix makïdï kïïrhi busai dai biakamu aanï ix naana dukai soimaaxi taatagi kia. Go judidiu bhaitï gukakamigadï ïmadï go dadaxdadami bhaitï gukakamigadï dai go tïtïgiadami sïïrhikami gin kïïdada agai. Gin tïañiagai muaragai tudu dai bhodïrï baika tasaikïdï duakamu aanï ïpamu— itïtïdai.
Suxi aagai ixdukatai óídaka agai mamaatïrdamigadï
23Daidi bhodïrï Suxi potïtïdai bïïxi go odami,
—Gïn aagidamu aanï ix dukatai gï agai xi ibuadagi odami ix makïdï ipïrhiadagi ïr ïmo gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuada ïgai ïïgi ixtumaxi ipïrhiadagi ïgai tudu. Gï agai bhaiyoma xi bïïx tasai kusukan dukai imïdagi ïgai go kuruxi ixtukïdï gï muatuda aagai ïgai. Gï agai tudu xi bïïx tasai bhai gï dukagi ïgai ix soimaaxi taatagi dai asta xi gï muatudagi gin oiditai. Aidï gia bhaigakamu ïgai xi gin oijadagi dai xi ïr gin mamaatïrdamigakagi. Ïma dukai gia cho—.
24—Daiñi, xorai buamï ïrhiadagi ïïgi gï bïïtarï gï oigïdaitai mosïkaxi ïïgi ïgai, aanï aagai sai ïgai gia mai kïïgakïrï óídaka agai. Dïï gia xorai mai buamï ïrhiadagi ïïgi dai gin oijadagi tomaxi jaa mua ïrhiadagi ïgai gia kïïgakïrï oidaka agai. 25Daiñi, xi ïmo odami ïr tuidakamikagi bïïxi go oidigi dïï gia xïïxkadï mukiagi ïgai ix taatagi ïgai go gïgïbidaragai bïïxkïrï bïïtarï aidï gia, ¿Tumaxi ïr soiñika agai bïïxi gobai ix makïdï biakatadai ïgai?
26Daiñi, aanï ïgai ix makïdï ïr Diuxi otosadï dai kïïrhi busai dai ayimu ixtugako imimu aanï tami oidigi daamaiñdïrï. Dïï gia gokiïrï dibiamu aanï ïpamu gin tïtïañikaruga ïmadï dai maaxitudamu xïïxi ïr gïdukami aanï dai xïïxi ïr gïdukami gin Oga ïpï. Gïn aagidamu aanï ix dukatai iduñimu aanï dibiakai. Amaxi aagadamu aanï sai maiti ïr gin aaduñi xorai mai buaboituda ïrhiada gin ñoki ïmadï xorai gin xaïradagi. 27Dïï gia aanï aagai sai ïïmadutai aapimï ix makïdï tami daraka nïijadamu ix dukatai tïanïi Diuxi mai kia kokai aapimï. Kïïga ïr buaboi gobai— itïtïdai.
Ïmapïdui Suxi ïmo tubidakana dai maaxitu xïïxi ïr gïdukami
28Bhodïrï abhiadïrï mamaako tasaikïdï sai go Suxi baidakai go Piduru ïmadï go Juan dai go Santiago ïmo tubidakiamu aataga agaitai Ogadï ïmadï. 29Dai ami tubidakana ïmapïdui Suxi buibasodï gaatagaitai ïgai Ogadï ïmadï. Tonoraka maaxi bii ïgai dai yukuxidï ïmapïdui ïpï dai tonoraka maaxi kabami tojakatai. 30-31Dai todian dukai gïn maaxitu ami ïpï goka kïkïïrhi dai tonoraka maaxi ïpï. Ïgai ïr go Moises ïmadï go Elias dai aatagaitadai Suxi ïmadï. Agaitadai ïgai go aaduindagai ix makïdï iduñi agai Suxi Jerusalenïrï. Go aaduindagai tudu ix makïdï bïïxi naato iduñimu ïgai mai kia imïkai tami idi oidigi daamaiñdïrï.
32Daidi kabami kokoximu go Piduru ïmadï Juan dai Santiago mai kia maaxtukai go Moises ïmadï Elias. Dai koi ïgai lachi dai amaxi nïnïabakai tïï ïgai go Suxi ix tonoraka maaxi dai tïï ïgai go Moises ïmadï go Elias ïpï xi ami guka. 33Dai ka iimi agaitadai go Moises ïmadï go Elias daidi Piduru potïtïdai go Suxi,
—Gin Tïanïdamiga, aa gia kïï gï dui dai tami daraja aatïmï gï ïmadï— itïtïdai. —Tï gïn duiñtulda baika ikusai tami. Ïmoko aapi gï bïïtarï dai ïmoko go Moises bïïtarï dai ïmoko go Elias bïïtarï— itïtïdai.
Potïtïdai ïgai mai kïïga gï tïgitokatai ïgai.
34Kia ñokaitadai ïgai xi ïmo ikomai iiña ami xako daraka ïgai dai kabami duduadimu go Piduru ïmadï Juan dai Santiago ami go ikomai saagida bapakïkai ïgai. 35Dai abhai ikomai saagidañdïrï gï kaidatu ïmo ñoki daidi ikaiti,
—Go Suxi ïr gin Maara ix makïdï aanï ïkobai busaitu. Kaïkabïrai ñokidï— ikaiti go ñoki ikomaiñdïrï.
36Mos gï kaidatu go ñoki bai go Moises ïmadï Elias maigo iji dai ïïgi bii Suxi. Dai gokiïrï go Piduru dai Juan dai Santiago mai otoma aagaiña ixtumaxi tïïtadai ïgai ami tubidakïrï. Asta gokiïrioma aagaiña ïgai.
Suxi duadi ïmo gïrhi ix makïdï biakatadai ïmo tïañikarudï diabora ïrana
37Daidi xadiko kia tïapaiñimi ïgai go tubidakiañdïrï dai gïn ïmpagi kïïga mui odami dai mïï buidïrï ayi. 38Dai ami go odami saagida imïitadai ïmo kïïrhi dai iñakimi ïgai dai gïgïr potïtïdai ïgai go Suxi,
—Aapi gïr Mamaatïtuldiadamiga, gin soiñañi— itïtïdai. —Gï daanïi aanï pïsai nïidana gin maara. Mos arhi ïmaduga gin maara tudu. 39Dai ïmo tïañikarudï diabora dudatai bui gïgïsïi gobai dai gïgïr iñakitudai dai susuikitudai ïpï dai totosakatudai tïñidï. Bhaitoma mai daadagitoi ïgai dai kabami kokotudai. 40Ka aagidi aanï gï mamaatïrdamiga sai soiñana dai sai busaidana go tïañikarudï diabora gin maarañdïrï. Ton aagidiña aanï ïgai maiti ixtutuidikïi— itïtïdai.
41Daidi Suxi potïtïdai ix makïdï ami daraka,
—Aa gia sïïrhikïdï mai buaboidaraga aapimï dai mai tïtïkaidaga. Aa gia ïr soimaaxi ibuadami aapimï óídakami xibi. ¿Xïï tïbïpi gï aagadamu xi gin kabakadagi aanï sai maiti gïn ojodadagi aanï gïn saagida dakatai kia?— itïtïdai.
Daidi bhodïrï potïtïdai ïgai ix makïdï gatáí soiñi,
—Bhai gobai buapa gï maara— itïtïdai.
42Daidi kia miadïrï imïitadai go gïrhi xako daja go Suxi bai go diabora tïañikarudï dïbïriana daitu ïpamu dai suikiturhi. Dai Suxi bhagakarai go diabora tïañikarudï dai aagidi sai dagitona bai go gïrhi duayi. Dai bhodïrï Suxi tïïgi go gïrhi ïpamu ogadï. 43Daidi bïïxkatai ix makïdï ami daraka mai tïtïgaitadai ixtumaxi gïn tïtïgitoagi. Kïïga máí ïgai tudu sai Diuxi ïgai dai aatadui ami daidi ikaitiña,
—Xïïxi ïr gïdukami Diuxi— ikaitiña go odami.
Suxi ïpamu aagidi mamaatïrdamigadï sai bia ix mukiagi
Kia pokaitimi go odami xïï gïdu Diuxi baidi Suxi potïtïdai go mamaatïrdamigadï,
44—Kïïga abïr gïn tïgito kaïka ixtumaxi gïn aagidamu aanï. Daiñi, aanï ïgai dai Kïïrhi Busai dai gï agai xi jaa gin tïïgidagi aanï gin buidïrï bïïtïkamiga— itïtïdai.
45Dai go mamaatïrdami ïmo xijiakami ñoki dukai kaï ixtumaxi aagidi Suxi dai mai máí ix tïiya ïrhidi. Mai maakiarxikatadai ïgai oigaragai ix maatï kaïkagi kaxkïdï. Dai duduadikoi ïgai xi tïkakagi go Suxi ix tïiya ïrhidi gobai potïkai ïgai sai gï agai xi gï tïgituldagi.
Suxi aagai xorai ïgai dai bamioma ïr gïdukïdïka agai xako gatïanïi Diuxi
46Daidi ïmo imidagai go mamaatïrdamigadï Suxi aipakoga gïn ñokiditadai aagaitai sa xorai ïgaiñdïrï bamioma gatïanïda agai. 47Dai Suxi kïïga maatïkatadai ixtumaxi gïn tïtïitoi ïgai. Daidi bhïiyi ïgai ïmo arhi gïrhi dai báí sai abhana kïkibana. 48Daidi potïtïdai Suxi go mamaatïrdami,
—Gïn aagidamu aanï xorai bamioma ïr gïdukïdï Diuxi bïïtarï. Daiñi, aanï podukai nïidi sai aanï gin xadutuadan buayi odami ix makïdï kïïga xadutuadagi jaa ix makïdï bamioma maiti ïr tïtïanïdami. Ix xadutuada ïgai ïmo arhi gïrhi dukami idi ix makïdï tami gin abhana kïïka, aanï podukai nïidi sai aanï gin xadutudai ïgai pobuadatai. Dai xorai gin xadutuadagi ka xadutudai gin Oga ix makïdï gin otoi ïpï. Gobai maatiga maaxi. Daiñi, gï agai sai maatïka aapimï sai Diuxi bïïtarï bamioma ïr gatïanïdami odami ix makïdï jaa mai tïanïdami dukai nïidi— itïtïdai.
Suxi aagidi mamaatïrdamigadï sai mai daidiña ïgai jaa ix bubiadagi tïtïañikarudï diabora odamiañdïrï
49Daidi go Juan potïtïdai go Suxi aidï,
—Aapi gïr mamaatïtuldiadamiga, nïidi aatïmï ïmo kïïrhi nobai ix makïdï bubaidiña diabora tïtïañikarudï odamiañdïrï aagaitai gï tïtiaraga. Dai aatïmï daidi sai ka mai pobuada ïgai. Maiti gïr urabaka ïgai kaxkïdï— itïtïdai.
50Dïï mos go Suxi potïtïdai,
—Maiti abïr daidada. Maiti gin buidïrï kaatïkan buayi ïgai po budatai. Dai xorai maiti gïn bui kaatïkagi ïgai ïr gïn soikïdami— itïtïdai.
Go Samarhiïrï óídakami mai miadïgi go Suxi
51Daidi ka miadaimitadai ix imi agai Suxi tïbagiamu dai ka maatïkatadai ïgai sai Jerusalenïrï soimaaxi taata agai dai bïïxkïrï gï kabakatu ïgai dai imi agai gamoko. 52Daidi Samarhiïrï daibuña agai ïgai dai bhaitï otoi xorai bhai buadagi xako gï urhiñagi boiyamu imïitai. 53Dïï go óídakami ami Samarhiïrï maiti ipïrhi ix miadïgidagi maatïkatai sai Jerusalenamu iimïdami ïgai#9:53 Go judidiu dai go Samarhiïrï óídakami maiti gïn oigïdaiña dai go Jerusalen ïr kiidï go judidiu kaxkïdï maiti ipïrhi go Samarhiïrï óídakami ix miadïgidagi go Suxi Jerusalenamu imïitai ïgai..
54Daidi goka mamaatïrdamigadï Suxi Jakobo dai Juan tïtïgidukami nïidi xi mai miadïgi Samarhiïrï óídakami Suxi. Dai potïtïdai ïgai go Suxi,
—Gïr mamaatïtuldiadamiga, ¿Ipïrhidi pïxi ix gataañiagi aatïmï táí sai gïsïna tïbagiañdïrï sai mïidana go óídakami ami Samarhiïrï?— itïtïdai.
55Dïï go Suxi buijako nïnïaba mamaatïrdamigadï dai bhagakarai 56Daidi potïtïdai,
—maiti gï agai xi soimaaxi daiturhiada óídakami podukai— itïtïdai. Dai bhaiyoma mos iji ïgai abhiadïrï dai xibhïadïrï iji ïmai kiikiïrï.
Mui odami oijada ïrhidiña go Suxi dïï oidaga naana maaxi ixtumaxi sobhikïi
57Daidi boiyïrï iimïitadai ïgai bai ïmo kïïrhi potïtïdai go Suxi,
—Gin mamaatïtuldiadamiga, gï oidatukuda in ïrhidi toma xakoga imïdagi aapi— itïtïdai.
58Daidi Suxi potïtïdai aidï,
—Go kakaxokai bia gïn tïtïjoga dai go ujurugi bia kokosadï. Dïï gia aanï ïr otosadï Diuxi dai ïmo kïïrhi busai dai aanï mai bia tomarhi gin kii xako oidakagi aanï— itïtïdai.
59Dai potïtïdai ïgai ïmai kïïrhi,
—Gin oidañi— itïtïdai.
—Ïjï gin mamaatïtuldiadamiga dïï mai kia— itïtïdai go kïïrhi. —Gokiïrï xïïxkadï ka mukiagi gin oga dai yaasagi aanï aidï gia gï oijadamu aanï— itïtïdai.
60Daidi Suxi potïtïdai,
—Dagitoñi sai ix makïdï koidadï gïn duduna iibhïadï sai ïgai yaasana aaduñdï xïxkadï koiyagi. Aapi kïïrhi ix gin oijada ïrhiada aapi gï agai gï agai xi aipako aagadagi xïï kïïga gatïanïi Diuxi— itïtïdai.
61Dai ïmai kïïrhi potïtïdai go Suxi,
—Aanï gia gï oijadamu dïï gin maakañi oigaragai kia xi mïï diosaida aanï gin aaduñi— itïtïdai.
62Daidi Suxi aagidi ïmo maaxidaragai daidi potïtïdai,
—Xi ïmo odami ajako nïñiadagi gaxikuanaitai ïgai maiti ïr soiñikamu xikuanaragai bïïtarï. Dai pomaaxi ïpï xorai gin oijada agadagi dai gokiïrï ajako nïnïnadan buadagi buamï ïrhiditai gokïdï ix makïdï ka dagito ïgai. Ïgai maiti ïr ajïakami xi Diuxi tïanïdagi ïgai bïïtarï— itïtïdai.
Currently Selected:
Lukas 9: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida