Lukas 8
8
Go Lukas aagai ïmo ñoki aagaitai go mui oki ix makïdï oidatukïiña go Suxi
1Dai bhodïrï aipakoga aimïraitadai Suxi dai aïjïiña xako kaburhi gukakana bhaabhaki dai gatïtïïgidiña ñoki. Aagaiña ïgai ix dukatai gatïanïi Diuxi. Dai go bhaibuxtama dan goka mamaatïrdamigadï oidiña aipakoga ïpï 2ïmadï chïki oki ïpï. Ïïmadutai go oki kokokoñiadïkatadai ïkioma dai ïïmoko biakana diabora tïtïañikarudï dai duduaditadai go Suxi dai xibi aipakoga oidiña ïgai. Ïmoko Maria tïgidukatadai ix makïdï Magdalena aagaiña odami. Ïgai biakatadai kubarakami diabora tïtïañikarudï dai Suxi bubaitutadai. 3Dai ïmai ix makïdï oidiña go Suxi Juana tïgidukatadai. Ïgai ïr Chusa aduñdïkana ix makïdï ïr tïanïdamikana pipioñigadï Herodes. Dai ïmai oki ix makïdï oidiña go Suxi Susana tïgidukatadai dai jaa mui oki oidiña ïpï ix makïdï soikïiña go Suxi gïn buxtuidagakïdï.
Suxi aagai ïmo maaxidaragai ñoki aagaitai odami ibhïadï
4Dai aidï gïn ïmpaidiña mui odami bïïxi aipadïrï arhi kiikiañdïrï dai Suxi aagidiña ïmo maaxidaragai aatagi daidi potïtïdaiña,
5—Ïmo imidagai ïmo kïïrhi gaïsïtadai dai jaa ïxtokai boi ugidana surhi dai kïixora dïgabuskïdami go ïxtokai dai dada ujurugi ïpï dai ugiuju. 6Dai jaa ïxtokai ojodai saagida surhi dai bubuaka dïï oton gakixa biïgakatai baagidagai. 7Dai jaa ïxtokai basoi sïïxidakami saagida surhi dai gïï go basoi dai mai dagito xi gïrhiagi gobai. 8Dai jaa ïxtokai gia kïïgadukami dïbïriïrï surhi dai ïgai gia kïïga gïï dai kïïga ibhaidaga. Ïmo cien litro bubuaka ïïmo litroañdïrï kïï ibhaidakatai— itïtïdaiña Suxi go odami.
Dai gïgïr ñokaiña ïgai ïpï daidi ikaitiña,
—Kïïga abïr gïn tïgito kaïka ixtumaxi gïn aagidi aanï— ikaitiña.
9Dai go mamaatïrdamigadï gatïkakai ix tïiya ïrhidi go maaxidaragai ñoki. 10Daidi Suxi potïtïdai,
—Gin aaduñi, maaxidaragaikïdï aatagidiña aanï go odami ix makïdï mai buaboitudai sai mai maatï kaïkana gobai gin ñoki. Arhi kapaka iibhïadï kaxkïdï. Ka podukai ojixi ïmo ojiïrï aagaitai ïgai tudu. Ami ikaiti sai,
Tomaxi naana maaxi nïijadagi ïgai ixtumaxi ix makïdï ïr buaboi bïïxkïrï mai maatï nïidamu. Dai tomaxi naana maaxi kaïkagi ixtumaxi ïr buaboi ïpï bïïxkïrï mai maatï kaïkamu, ikaiti go ojai.
Ka ïïki abhiadïrï mai maatïkana odami ix maaxi tïanïi Diuxi tudu dïï xibi aapimï gin mamaatïrdamiga gia bia oigaragai xi maatïkagi— itïtïdai.
11—Gïn aagidamu aanï ix tïiya ïrhidi go maaxidaragai ñoki tudu. Daiñi— itïtïdai. —Go ïxtokai ïr ïmo maaxidaragai aagaitai Diuxi ñokidï. 12Dai gobai ix makïdï boi ugidïrï surhi ïr ïpïan dukami odami ix makïdï kaïkana go ñoki dïï go diabora maigobai dadasaiña go ñoki ibhïgadïañdïrï sai mai buaboitudaiña ïgai dai mai kïïgakïrï bubuakïna.
13Dai ix makïdï ojodai saagida surhi ïpïan dukami odami ix makïdï bhai ïrhiarakïdï kaïkana Diuxi ñokidï dïï mai xii gubuakami kïïkiba buaboidaradï. Mosïka lachi buaboitudai ïgai dai gokiïrï xïïxkadï daibuñagi ïmo soi ïrhiaragai amaxi ukami kabakana buaboidaradï.
14Dai go ïxtokai ix makïdï basoi sïïxidakamiana surhi ïpïan dukami odami ix makïdï kaïkana Diuxi ñokidï dïï mos apia maaxi óídaga dai buaboidaradï mai kabakaturïi. Kabami buamï gïn ïrhidi ïgai gaagaitai tuminxi dai gaagaitai bhai ïrhiaradï ixtumaxiïrï oidaga tami idi oidigi daama dai kaxkïdï ka mai tïgito ajiopai ïgai Diuxi. Pomaaxi go ïxtokai ix makïdï mai kïïgadukami dïbïriïrï surhi tudu.
15Dïï gia ix makïdï kïïgadukami dïbïriïrï surhi ïgai gia ïpïan dukami odami ix makïdï kïïgadu iibhïadï dai kïïga ïïgida kaïkana Diuxi ñokidï. Ïgai abhana gia aatabuayi Diuxi dai ibuayi naana maaxi kïkïïgadukami ïgaikïdï mos apia buaboitudaitai ïgai— itïtïdai Suxi mamaatïrdamigadï.
Suxi aagai ïmo maaxidaragai ñoki aagaitai kudagi
16Daidi Suxi aagidi ïpï ïmo maaxidaragai ñoki daidi potïtïdai,
—Kïï maatï aapimï sai ïmo kudakarui ïr kukudada bïïtarï kiiyïrï xako dakagi gobai. Xadïrï iñana ïmoko ïmo asokorhi uta xiïpï ïmo boikarui uta ka kudidakai gobai tudu dai bhaiyoma tïka gï dadasai gobai sai kïïga kudakana ami kiiyïrï.
Dai aanï aagai sai, óídakami ix makïdï buaboitudai gin ñoki ïr kukudakarui dukai go óídakami bïïtarï ix makïdï mai maatï ixtumaxi ïr buaboi. Xïxkadï go buaboitudadami kïïga ïïgiadagi gin ñoki podukai ka tïtïgiadan buayi ïgai boi sai go gaa óídakami ïpï maatïkana ixtumaxi ïr buaboi. Gï agai xi go buaboitudadami kïï ïïgiadagi gin ñoki tudu saidi ïr ïmo kudakarui dukaikana ïgai jaa bïïtarï gaaiturhitai podukai gin ñoki. 17Kaxkïdï tudu ixtumaxi ïr buaboi dai ïxtokikan dukai xibi óídakami bïïtarï mai maatïkatai ïgai ixtumaxi ïr buaboi, gobai gokiïrioma gï maaxituldamu óídakami bïïtarï sai maatïkana ïgai— itïtïdai Suxi.
18—Kaxkïdï gï agai xi kïïga gïn tïgito nïijada aapimï ix bhai kïïga ïïgida kaïkana ixtumaxi gïn aagidimi aanï. Kaxkïdï tudu xorai kïïga ïïgida bhïjïi gin ñoki bamioma maatïtuldamu aanï. Dïï gia xorai mai bhïjïi gin ñoki dai maiti in ïïgidi popoidamu aanï ixtumaxi maatï ïrhidi ïgai— itïtïdai Suxi go odami.
Suxi aagai xorai ïgai dai kïïgakïrï ïr aaduñdï
19Dai sïïrhikïdï muidukatadai odami ami kiiyana xako dakatadai go Suxi. Dai ami ayi dïïdï ïmadï susukurhidï dai nïida ïrhiditadai dïï maiti ixtui mos ïï muidukatai odami ami kiiyïrï. 20Dai ïmadutai ix makïdï ami dakatadai potïtïdai go Suxi,
—Gï daada ïmadï gï susukurhi kiidïañdïrï guka dai gï nïida ïrhidi— itïtïdai.
21Daidi Suxi potïtïdai,
—Aanï gin dïïdï dai gin susukurhi duu nïidi bïïxkatai ix makïdï ïïgida kaïkagi Diuxi ñokidï— itïtïdai.
Dodorhi bia Suxi go gïï sudagi
22Dai ïmo imidagai barkoïrï tïsai go Suxi ïmadï mamaatïrdamigadï dai potïtïdai Suxi ïgai,
—Timïda baasadïrï go gïï sudagi— itïtïdai.
Dai iji ïgai go barkoïrï. 23Sudagi daama iimïitadai ïgai tai koi go Suxi ami go barkoïrï. Dai todian dukai kabami ïbï dai táí bañigimi sudagi dai ka sudaimitadai go barko. Karhioga dupi agaitadai tudu. 24Daidi go mamaatïrdami nïñitu go Suxi daidi potïtïdai,
—Gïr mamaatïtuldiadamiga, kaxi aatï karhioga dupi aatïmï— itïtïdai.
Daidi bañi go Suxi dai ïïpitugi go ïbïrhi ïmadï sudagi. Bïïxi gï ïïpitu tudu dai dodorhi bii. 25Daidi Suxi potïtïdai mamaatïrdamigadï,
—¿Tïdui gïn buaboidaraga?— itïtïdai.
Dai duduadimu mamaatïrdamigadï nïiditai ixtumaxi iduitadai go Suxi daidi ikaitimi,
—¿Xorai idi kïïrhi dai asta go ïbïrhi ïmadï sudagi ïïgidi?— ikaitimi.
Suxi busaitu ïmo diabora tïañikarudï ïmo kïïrhiañdïrï
26Daidi Suxi ïmadï mamaatïrdamigadï ayi baasadïrï go gïï sudagi xako Gadarïrï tïgidu oidigi. Galileañdïrï maigo baasadïrï go gïï sudagi bipiïyi gobai tudu. 27Dai ami oidakatadai ïmo kïïrhi biakami tïtïañikarudï diabora. Mui umigi mai kiiyïrï oidakatadai ïgai dai mai yukusukana. Nobai yaasakaru koidadï saagida oidakatadai ïgai tudu biakatai diabora tïtïañikarudï. 28-29Go tïtïañikarudï diabora dudatai soi buadana go kïïrhi dai aaduñdï mai bhaigakatadai xi ïïgi biagi dai bïïxkïrï nukadakana dai asta bupuraiña ïkadï dai ïïkasodï kadenakïdï. Dïï go kïïrhi mos ïïkibudaiña go kadena dai go tïtïañikarudï diabora mïmïltudaiña go kïïrhi oidigamakoga xako ïgiga oidigi.
Daidi mos tïbanïkai Suxi barkoañdïrï sai go kïïrhi tïï dai mïï buidïrï ayi dai totonakïdï kïkiba buidïrï. Daidi Suxi ñokidi go tïañikarudï diabora dai potïtïdai,
—Aapi diabora tïañikarudï, busaiñi go kïïrhiañdïrï— itïtïdai.
Daidi go diabora tïañikarudï gïgïr iñakitu go kïïrhi dai potïtïdai go Suxi,
—Aapi Suxi ïr Maradï Diuxi ix makïdï bïïxi adaama ïr Tïanïdami. ¿Tuipïxi gï bapasai aapi tami in bui? Gï daanïi aanï pïsai mai soimaaxi in taatamitulda tudu— itïtïdai gïgïrï iñakimikatai.
30Daidi Suxi tïkakai go kïïrhi,
—¿Tïgidu aapi?— itïtïdai.
Daidi go kïïrhi itïtïdai,
—Legion tïgidu aanï— itïtïdai.
Legion itïiya ïrhidi mui dai mui biakatadai ïgai diabora tïtïañikarudï. Kaxkïdï Legion aagaiña odami.
31Dai go diabora tïtïañikarudï aapia daañimitadai go Suxi sai mai gïgïbituldana otosakai go gïï dïgakïrï xako bii agai bïïxi diabora tïtïañikarudï.
32Dai no mianai uurana sadakatadai odami kïïga mui tataixorhi aidï. Daidi go diabora tïtïañikarudï gatáí oigaragai go Suxi sai ami ïrana bapakïna. Taidi Suxi maa oigaragai. 33Daidi bubuaka ïgai go kïïrhiañïrï dai tataixorhi ïrana baapa. Dai bïïxkatai go tataixorhi koidamu boopoi bapaborhiana sïïrhi dai mïï taana sudaïrï surhi dai bhaikoi.
34Daidi go nunukadami tataixorhi bïïxi nïidi dai dïgabuna boopoi dai aipakoga aagidimi óídakami ami ïmo arhi kiiyïrï ix makïdï miadïrï daja dai aagidi ïgai jaa ïpï ix makïdï maigobai miadïrï óídaga. 35Bai mui óídakami otoma gamo iji nïida agai as tumaxi pogïduitadai. Dai aïkai ïgai xako dakatadai go Suxi sai tïï ïgai go kïïrhi ix makïdï biakatadai go diabora tïtïañikarudï. Dai xibi dodorhi daka ïgai Suxi ïïkasodï abhana dai kïïga yukusu dai kïïga bia tïgibudagai. Dai duduadimu go óídakami nïiditai. 36Dai go nunukadami tataixorhi aagidi ix dukatai duayitadai go kïïrhi ix makïdï biakatadai diabora tïtïañikaru. 37Daidi kabami duduadimu go óídakami ami dai aagidi ïgai go Suxi sai imïna abhiadïrï. Po dui go óídakami ami Gadarïrï tudu. Aagidi ïgai go Suxi sai dagitona dai sai maigobai imïna.
Daidi go Suxi tïsai ïpamu barkoana dai jii abhiadïrï baasadïrï go gïï sudagi ïpamu. 38Dai mai kia imïkai ïgai sai go kïïrhi ix makïdïañdïrï bubuakatadai go diabora tïtïañikarudï daañimitadai sai maakana oigaragai ix oidagi. 39Dïï Suxi aagidi sai noragïna kiiyamu bhaiyoma daidi potïtïdai,
—Mïïka aagida gï aaduñi ix tumaxi idui Diuxi gï bïïtarï— itïtïdai.
Xi kaxkïdï bïïxi aipakoga jii go kïïrhi ami kiikiïrï dai aagidi óídakami ix tumaxi iduitadai go Suxi ïgai bïïtarï.
Suxi duadi ïmo oki kokoadï kïïga buaboitudaitai ïgai dai duakaturhi ïmo mukiadï ïpï
40Dai aidïxi ayi Suxi ïpamu baasadïrï go sudagi sai ami óídakami ka nïnïrakatadai dai bhai ïrhiarakïdï miadïgidi. 41Dai ami dibia ïmo kïïrhi Jairo tïgidukami. Ïgai ïr ïmo gabhaitïkïakami kiupaigadïrï go judidiu ami. Dai totonakïdï kïkiba ïgai Suxi buidïrï dai daañimi sai imïna kiidïrï. 42Karhioga mutadai maradï kaxkïdï. Dai ïmadugatadai maradï go kïïrhi ïmo arhi oki parï bhaibuxtama dan goka umigi biakami. Dai Suxi oi go kïïrhi dai jaa mui odami oi ïpï dai asta gïixakami iimïi ïgai mos ïï muidukatai.
43Dai ami go odami saagida imïitadai ïmo oki ix makïdï ka bhaibuxtama dan goka umigi abhiadïrï oiditadai kokodagai ïradïkïdï. Dai ton gaagaitadai ïgai duduadadami mai tïï xorai ixtutiadagi ix duadiagi. 44Dai ami gasaagida imïitadai go oki dai gokiamadïrï ayi ïgai go Suxi dai mos taata yukuxidï bai ïradï gï ïïpitu.
45Daidi Suxi potïi aidï,
—¿Borai gin taata?— itïi ïgai.
Dai ix makïdï ami gukigi potïtïdaitadai sai tomarhi ïmadutai ïgai taata. Daidi Piduru potïtïdai go Suxi,
—Aapi gïr mamaatïtuldiadamiga, daiñi mos ïï muidu odami gï gïixatugaimi dai asta gï nïituskimi. ¿Dukatai gatïkakai aapi sa xorai gï taata?— itïtïdai.
46Dïï bïïxkïrï Suxi potïtïdai,
—Ïmadutai gin taata aba. Kïïga maatï taata aanï sai busai gubukarhigai gin tukugañdïrï di— itïtïdai.
47Dai potïkai go Suxi go oki máí ix ka maiti ixtutuidi xi gï ïxtoagi dai gigibukimi duadimukatai dai mïï jii dai totonakïdï kïkiba buidïrï go Suxi dai aagidi ix tuma bïïtarï taatatadai dai aagidi sai ka duayitadai ïpï. Dai bïïxi go odami kaï.
48Daidi Suxi potïtïdai aidï,
—Aapi oki, kïïga in buaboitudai aapi kaxkïdï kïïgakïrï busai aapi. Xibi ka mai buamï ïrhiada aimïrada aapi— itïtïdai.
49Dai kia aatagaitadai Suxi go oki ïmadï mai kia aïkai ïgai kiidïrï go Jairo xako kaatï maradï kokokatai. Kia aatagaitadai ïgai tudu bai ami ayi ïmo kïïrhi imïdami kiiyañdïrï go Jairo. Dai ami buidïrï ayi ïgai Suxi ïmadï Jairo dai potïtïdai ïgai go Jairo,
—Ka ugidagai gï maara— itïtïdai. —Ka maiti gï agai xi soi buadagi go Mamaatïtuldiadami— itïtïdai.
50Dïï gia Suxi kaï ix kaiti go kïïrhi daidi potïtïdai Suxi go Jairo,
—Maiti duadikuda aapi dai bhaiyoma mos sai in buaboitudada dai kïïga duadimu gï maara— itïtïdai.
51Dai aïkai Suxi kiidïrï go Jairo sai baapa ïgai dïï mai dagito ix bapakïdagi go gaa. Mosïkaxi go Piduru ïmadï Jakobo dai ïmadï go Juan dai dïïdïdï go arhi oki, mosïkaxi ïgai gia baapa Suxi ïmadï. 52Dai ix makïdï ka ami kiiyïrï darakatadai gïgïrï suanïitadai soi gïn ïrhiditai. Dïï mos go Suxi potïtïdai,
—Maiti abïr suanïda. Maiti ïr mukiadï go arhi oki. Mos koso gobai— itïtïdai.
53Dïï go odami kïïga maatïkatadai xi ka mutadai go arhi oki dai aasïi ïgai potïkai go Suxi ix mos koso. 54Dïï gia Suxi bhïiyi go arhi oki ïkadïrï dai gïgïrï ño daidi potïtïdai,
—Aapi arhi oki, bañigiñi— itïtïdai.
55Dai mos potïkai Suxi bai go arhi oki otoma duakatu ïpamu dai kïkiba. Dai Suxi gatïjai mïsai bhidana. 56Daidi dïïdïdï mai tïtïgaitadai ixtumaxi gïn tïtïgitoagi nïiditai ix ka duakatu. Dïï mos go Suxi potïtïdai sai mai aagidiña tomarhi ïmadutai ixtumaxi ami daibusai.
Currently Selected:
Lukas 8: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida