Lukas 7
7
Suxi duadi ïmoko ix makïdï ïr pioñigadï ïmo tïanïdami sandadaru
1Dai bhodïrï ka kugaidakai Suxi aatagidï ix makïdï aagidi ïgai odami jii ïgai Kapernaumamu. 2Dai ami oidakatadai ïmo tïanïdami sandadaru romano dai biakatadai ïmo pioñi soigaxikami duu ix makïdï kïïga oigïdaitadai ïgai. Dai kabami kokokatadai go pioñi. Karhioga mukiada maaxkatadai ïgai. 3Daidi go tïanïdami sandadaru kajioma xi ami aimïrai go Suxi dai mïïka otoi ïgai chïki judidiu bhaitï gukakamigadï sai mïï nïidana go Suxi. Aagidi sai daanïna ïgai go Suxi sai dibiana sai duadiana go pioñi. 4Daidi go bhaitï gukakami judidiu ami ayi xako dakatadai go Suxi dai kabami daañimi daidi potïtïdai,
—Aapi Suxi, go tïanïdami sandadaru ix makïdï gïr otoi kïï tuiga dai kaxkïdï gï agai xi soiñagi aapi. 5Kïïga gïr oigïdai ïgai aatïmï judidiu tudu dai asta gïr duñi gïr kiupaiga— itïtïdai.
6-7Daidi oi Suxi go bhaitï gukakami dai ka miadïrï imïi ïgai kiidïrï go sandadaru tïanïdamigadï bai go tïanïdami otoi aaduñdï bai mïï buidïrï aïna go Suxi. Dai go sandaru potïtïdai ojotosadï, —Adukai abïr aagida Suxi gin bïïtarï— itïtïdai,
—Aapi gin Tïanïdamiga— abïr tïda. —Sïïrhikïdï ïr ïmo gïdukami aapi dai maiti ïr gin ajïakami gin bïïtarï tomarhi xi gin kiiyïrï bakiagi aapi— abïr tïda. —Kaxkïdï maiti ipïrhi aanï tukamïrï xi mïïka gï gaagamuagi ïïgi aanï dai bhaiyoma otoi aanï ïmai. Mai bia aanï oigaragai tomarhi xi aiyagi xako dakagi aapi di. Arhiïxi tïkabioma ïr namïakami aapi xi aanï tudu. Kaxkïdï ka maiti soi gï buada aapi dai bhaiyoma mos aagada aapi bai duayimu gin pioñiga, Podukai abïr tïda— itïtïdai go sandaru ojotosadï.
8Daidi abïr potïda ïpï sai —Aanï ïr ïmo sïïrhikami biakami tudu dai buaboitudai aanï sai aapi ïr ïmo sïïrhikami biakami ïpï. Dai aagidiña aanï gin sandadaruga sai iimïna xibhïakoga dai otoma iimïiña xiïpï aagidiña aanï sai dadana dai otoma daibuiña. Dai aagidiña aanï ïmadutai gin pipioñi saidi ibuada ïmo aaduindagai bai otoma ibuayi ïgai. Otoma gin ïïgidi ix makïdï tïanïi aanï tudu. Dai buaboitudai aanï xi aapi ïr ïmo gïdukami sïïrhikami biakami dai kaxkïdï buaboitudai aanï sai mos ñokaitai aapi kïïga duadimu gin pioñiga tomax mai imia aapi gin kiiyamu— podukai abïr aagida tudu— itïtïdai.
9—Xïï kïïga buaboitudai go kïïrhi— gï ïrhidi go Suxi kaïkai ix kaiti go tïanïdami sandadaru.
Maiti ïr judiukatadai go sandaru tudu dai bïïxkïrï kïïga buaboitudai ïgai.
Daidi buijako nïnïaba Suxi go odami daidi potïtïdai,
—Agia kïïga buaboitudai go kïïrhi ix makïdï gin otoxi ñoki. Tomarhi judidiu saagida mai nïidiña aanï ïmo odami ix pokaxi buaboitudagi ix xïïxi buaboitudai gobai— itïtïdai.
10Daidi bhodïrï aa surhi go bhaitï gukakami judidiu ix makïdï otoitadai go sandadaru tïanïdamigadï. Dai aïkai ïgai kiidïrï go sandadaru tïanïdamigadï sai tïï ïgai ix ka kïïga duadixi pioñigadï.
Suxi duakaturhi maradï ïmo oki biudu
11Dai bhodïrï chïki tasaikïdï sai jii Suxi Naínamu daidi mamaatïrdamigadï oiditadai ïmadï jaa mui odami ïpï. 12Dai karhioga aijimitadai ïgai Naínïrï dai aidïpïrï óídakami bhïkatitadai ïmo gïrhi mukiadï dai yaasa agai maigobai kiikiañdïrï xako yaasaiña ïgai koidadï. Mui iimïitadai óídakami tudu. Dai go mukiadï mosïkaxi ïmadugakïdï ïr maradïkatadai go oki. Dai ïkobïrakoga ïr biudakatadai go oki ïpï.
13Dai soi gïlda tïï Suxi go oki aidï daidi potïtïdai,
—Aapi oki, maiti suakada— itïtïdai.
14Dai mïï taata ïgai go kajoñi xako bhïkati ïgai go mukiadï bai gukiba ix makïdï bhïkati. Daidi Suxi potïtïdai go mukiadï,
—Bañigiñi aapi gïrhi— itïtïdai.
15Baidi bañi go gïrhi dai ño bai Suxi potïtïdai dïïdï,
—Tami daka gï maara— itïtïdai ïgai dïïdï.
16Daidi tïïgakai go odami ix go Suxi duakaturhi go mukiadï duduadimu dai aagaimi xïïxi ïr gïdukami Diuxi. Go odami ikaititadai aidï sai,
—Kaxi ti gïr saagida ayi ïmo ñokituldiadamigadï Diuxi kïïga gubuakami. Dai xibi kaxi gïr urhiñdi Diuxi soiñi soi gïlda gïr nïiditai maamaradïkatai aatïmï— ikaititadai go odami.
17Dai bïïxi aipakoga ami xakoga Judeana tïgidu oidigi dai asta maigobioma lachi ïpï ayi go aatagi aagaitai ix Suxi duakaturhi ïmo mukiadï.
Go Juan otoi kïkïïrhi sai tïkakana ïgai go Suxi sa bhai ïgai ïr Diuxi otosadï ix makïdï nïnïrakana go judidiu
18Daidi go Juan mamaatïrdamigadï aagidi go Juan bïïxi ixtumaxi ibuadana go Suxi. Ïgai tudu ïr go Juan ix makïdï bapakonatadai odami. 19Dai kaïkai go Juan ixtumaxi ibuadana go Suxi sai báí ïgai goka mamaatïrdamigadï dai aagidi sai mïï tïkakana go Suxi sa bhai ïgai ïr otosadï Diuxi ix makïdï nïnïrakana ïgai xiïpï xi gï agaitadai xi nïnïrakagi sai dibiana ïmai kia.
20Taidi iji ï goka mamaatïrdamigadï Juan dai mïï ayi xako dakatadai Suxi daidi potïtïdai,
—Go Juan ix makïdï bapakonai odami gïr otoi tïsai gï tïkakana sa bhai aapi ïr go gïï bhaitï kïakami ix makïdï ïki abhiadïrï nïnïraka aatïmï. Sa bhai aapi ïr go otosadï Diuxi tudu. Xiïpï xi gï agai xi nïnïrakagi aatïmï ix dibiagi kia— itïtïdai.
21Dai aidïpïrï ix ayitadai go ojotosadï Juan ami xako dakatadai go Suxi sai aidïpïrï duduaditadai ïgai mui kokokoñiadï naana maaxi kokodagai bipiakami. Dai bubaitutadai mui diabora tïtïañikarudï odami ïrañdïrï ïpï dai nïadatudaiña mui odami ix makïdï mai nïadatadai ïpï. 22Daidi potïtïdai Suxi go ojotosadï Juan,
—Mïïka abïr aagida go Juan mïx tumaxi nïidi aapimï dai mïx tumaxi kaï. Podukai maatïkamu ïgai xorai aanï— itïtïdai. —Aagidabïrai tudu sai duduadi aanï odami ix makïdï mai nïayitadai dai xibi ka kïïga nïayi. Dai ix makïdï gogobikïitadai ka kïïga aimïrai. Dai ix makïdï biakatadai go lepra ka kïïga duayi. Dai ix makïdï mai bhaigakana ix kaïkagi ka kïïga kaï. Dai sai duduakaturhi aanï koidadï. Dai sai gï aiturhiña go bhai ïrhiaragai aatagi go soititigami. Podukai maatïkamu go Juan xorai aanï— itïtïdai. 23—Dai aagidabïrai sai Diuxi maakimu bhai ïrhiaragai bïïxkatai ix makïdï mai dagitokatai gin buaboitudai nïiditai ix tuma buayi aanï— itïtïdai.
Suxi aagidi go odami sai Juan ïr ïmo gïdukami ñokituldiadamigadï Diuxi
24Dai bhodïrï iji go ojotosadï Juan abhiadïrï daidi Suxi aagidi go odami ïmo ñoki aagaitai go Juan daidi potïtïdai,
—Kïï maatï aanï sai muidutai aapimï ajiopatadai oidigamu baasïki nïida ïrhiditai ixtumaxi oidaga ami. ¿Ix tuma nïida ïrhiditadai aapimï ami aidï? ¿Mïx nïnïidi mosïkaxi ïmo basoi bougïadï ix makïdï ami kïakatadai dai aipako oiñïitadai ïbïrhikïdï? Xadïrï. 25¿Mïx nïnïidi ïmo kïïrhi gï aadatikami yukuxi kïï namïakami? Cho ïpï. Daiñi, odami biakami yukuxi kïï namïakami mosïkaxi xigiamaaxkami kiikiïrï óídaga dai asta kiidïrï ïmo rey dai mai xu xi oidigana óídaga xako ajiopatadai aapimï. 26¿Mïx tuma nïida ïrhiditadai ami tudu? ¿Mïx nïnïidi ïmo ñokituldiadamigadï Diuxi dai gamo iji? Ïjï tudu. Nïidi aapimï go Juan dai mai xu xi mosïkaxi ïr ñokituldiadamigadï Diuxi ïgai. 27Diuxi ñokidïrï ojixi ïmo ñoki aagaitai go Juan tudu. Ami adukai ojixi,
Otosamu aanï ïmoko gin otoxikami gï bhaitïki aapi gin maara bai ïgai aagidana odami sai karhioga dibia aapi. Bai podukai kaxi bhai gïn dukagi odami pïx xuduku aiyagi, podukai ojixi Diuxi ñokidïrï aagaitai go Juan. Go Juan tudu ïr go otoxikami ix makïdï aagai ami Diuxi ñokidïrï— itïtïdai Suxi go odami.
28—Kaxkïdï aanï aagai sai ïïki abhiadïrï mai tipukana xorai bamioma namïakagi xi bhai go Juan. Mai tipu óídakami saagida xorai bamioma namïakagi xi ïgai tudu. Dïï gia tomaxi ïr ïmo gïdukami go Juan bïïxkïrï xako gatïanïi Diuxi ami gia oidaga xorai bamioma namïga xi ïgai. Ami asta go otïrhioma namïakïdï oidakami bamioma namïga xi bhai go Juan— itïtïdai.
29Daidi bïïxi go odami ix makïdï kaïkatadai aatagidï Suxi ka kaïkatadai aatagidï go Juan ïpï. Dai ïïgiditadai ïgai dai gïn bapakonatadai. Asta go taanïdami kuota gïn bapakoitadai ïpï ïïgiditai ïgai go Juan. Xi kaxkïdï aidïxi ikaiti Suxi sai go Juan ïr ïmo namïakami ñokituldiadamigadï Diuxi sai bhai gïn ïjïrhi ïgai dai aagaiña xïï kïï sïïrhi aatabuayi Diuxi. Kïïga oigïdai ïgai go Juan kaxkïdï.
30Dïï gia go fariseos ïmadï go tïtïgiadami sïïrhikami ïgai mai ïïgiditadai go Juan dai mai dagitotadai xi gïn bapakonadagi ïgai. Dai kaxkïdï kaïkai ïgai ix pokaiti Suxi sai go Juan ïr ïmo gïdukami ïgai bhaiyoma mos bamioma gïn kapakatu dai mai bhai aa xi iduñagi Diuxi ixtumaxi iduña ïrhidi ïgaikïdï.
31Dai bhodïrï oi Suxi aatagidï dai potïtïdai ïgai go odami,
—Aapimï ix makïdï óídaga xibi nïidiña ixtumaxi ibuadana aanï dai Juan dïï mai kïïgakïrï gïr nïnïidi aapimï. Mai kïïgakïrï nïidi aapimï tomarhi aanï tomarhi go Juan. Gïn aagidamu aanï ix maaxi ibuayi aapimï tudu. 32Daiñi, ïpïan buayi aapimï arhi tïtïïbïdami plasïrï ix makïdï gabapaidi jaa sai tïtïïbïiña ïmadï dïï go gaa maiti ipïrhidi. Potïtïdaiña ïgai gabapaiditai sai,
—Gaiiba aatïmï bhai ïrhiaragai ibaragai dïï aapimï mai bhai gïn ïjïrhi dai maiti ipïrhi xi gatutudiagi. Dai gokiïrï gaiiba aatïmï soi ïrhiaragai ibaragai ïpï dai mai soi gïn ïjïrhi aapimï ïpï dai mai susuanïi aapimï— ikaitiña arhi bapaiditai jaa.
Pomaaxi aapimï tudu. Tomax dukai mai bhai gïn ïrhidiña aapimï dai mai kïïgakïrï nïidi aapimï tomarhi ïmadutai— itïtïdai.
33—Daiñi— itïtïdai. —Go Juan dibia dai mai kuadana kuadagai ix makïdï kuayiña jaa. Ïma maaxi kuadana ïgai. Dai maiti yïïyiña ïgai idagai nabaamudakami ïpï. Dai nïidiña aapimï ixtumaxi ibuadana ïgai dai pokaitiña aapimï sai bia ïmo diabora tïañikarudï— itïtïdai.
34—Dai Aanï Ix Makïdï Kïïrhi Busai gia kïïga kuadana dai yïïdana. Dai nïidiña aapimï ixtumaxi ibuadana aanï dai soi dukai gin nïidiña ïpï. Pokaitiña aapimï sai aanï bhaibitukami kuadana dai sai iitoraga aanï dai sai urapïkïiña aanï naana maaxi soimaaxi ibuadami. Sai asta urapïkïiña aanï taanïdami kuota. Po kaitiña aapimï soi dukai gin nïiditai tudu. 35Daiñi go Juan mai yïïdana bino toma lïïchi dai soi dukai nïidiña aapimï. Dai aanï gia yïïyi dïï bïïxkïrï soi dukai gin nïidi aapimï ïpï. Dïï tomaxi soi dukai gïr nïijadagi aapimï bïïxkïrï kïïga ïr soiñi gïr tïgibudaga. Dai xorai oijadagi gïr tïgibudaga kïïga maaxitudamu ïpï sai gïr tïgibudaga kïïga ïr soiñi— itïtïdai Suxi go odami.
Ïmo oki kïkïïrhimïrhiakami toidi perfume go Suxi oigïdaitai
36Daidi ïmadutai go fariseos báí go Suxi sai kiidïrï gaugana ïmadï jaa bapaidarxikami. Dai go Suxi jii kiidïrï go fariseo dai ami ïmo arhi mesa buidïrï gai daiban dui dai gakuayi. 37Dai ami kiikiïrï oidakatadai ïmo oki kïkïïrhimïrhiakami dai máí sai ami go fariseo kiidïrï gakuadatadai go Suxi. Dai gamo jii ïgai dai bhïkati ïmo tukayu kïï namïakami ïmo odai namïakamikïdï duñixikami ix makïdï alabastro tïgidu. Dai sudaga go tukayu asaiti xigian ubadami. 38Daidi kïkiba go oki gokiamadïrï go Suxi ïïkasodï abhana. Dai suakimi ïgai dai ïïkasodïana aaxi ojogadï dai badaidi dai go oki kuupadïkïdï gakigi. Daidi bhodïrï usupi ïgai ïïkasodï go Suxi oigïdaitai dai toidi go asaiti xigian ubadami.
39Daidi go fariseo ix makïdï gabaitadai go Suxi gï tïgito nïidi ix maaxi iduitadai go oki ami daidi po gï ïrhidi sai,
—Xi buaboikïdï ïr ïmo ñokituldiadamigadïkamudai go Suxi Diuxi aidï gia maatïkamudai gobai ix tuiga go oki ix makïdï taata. Maatïkamudai gobai saidi ïr ïmo soimaaxi ibuadami kïkïïrhmïrhiakamikatai gobai— as ïrhidi go fariseo.
40Dai Suxi maatïkatadai ixtuma gï tïtïitoi go fariseo daidi potïtïdai,
—Aapi Ximuñi, gï aagidamu aanï ïmo maaxidaragai— itïtïdai. Ximuñi tïgidukatadai go fariseo tudu.
Daidi go Ximuñi potïtïdai,
—Ïjï kïïgadu aapi gin mamaatïtuldiadamiga. Gin aagidañi— itïtïdai.
41Dai Suxi potïtïdai,
—Oidakatadai ïmo kïïrhi dai jaa goka kïkïïrhi buaturhitadai tuminxi. Ïmoko buaturhitadai taama ciento dai go gïmai tajukan ciento. 42Dai bïï gokatai maiti ixtui xi aa noraidagi go tuminxi. Dïï gia go makïdï gatañubi kïï tuiga dai bhaiyoma mos gaoidi sai ka mai buatulda bii bïï gokatai go kïkïïrhi. Xibi gin aagidañi, ¿Ix makïdï ï goka kïkïïrhi bamioma gaoigïda bii buidïrï ix makïdï tañubi tuminxi ix ïrhidi aapi?— itïtïdai Suxi go Ximuñi.
43—Po ïrhidi aanï sai go makïdï bamioma buaturhitadai— itïtïdai go Ximuñi.
—Ïjï. Pomaaxi aba— itïtïdai Suxi.
44Daidi bui nïnïaba Suxi go oki daidi potïtïdai ïgai go Ximuñi,
—Aapi Ximuñi kïï maatï sai aatïmï gabakuanaiña ïïkasodï gïr dadidakami xïxkadï gïr daibidagi ïgai. Podukai gïr biturhi aatïmï tudu. Dïï aapi tomarhi maiti gin buapi sudagi ixtukïdï gin bakuandagi gin ïïkaso dibiakai aanï. Dai idi oki gia bapakoi gin ïïkaso ojogadïkïdï dai kuupadïkïdï gakigi. 45Aapi maiti gin usupi ix duu gïr bida aatïmï dïï gobai gia aidï abhiadïrï xi dibia aanï mai dagitokai usudai gin ïïkaso. 46Dai aapi maiti gin toidi asaiti gin moana ix duu gïr bida aatïmï ïpï. Dïï gia idi oki gia gin toidi asaiti xigian ubadami gin ïïkasoana— itïtïdai.
47—Daiñi aapi Ximuñi— itïtïdai. —Ka oigïrhi Diuxi idi oki soimaaxkamigadï tomaxi naana maaxi soimaaxi ibuadana gobai. Kaxkïdï kïïga gin oigïdai gobai dai mamaaxidi buitapi go gaa ix gin oigïdai. Dïï gia mai xii kabami gin oigïdai go odami ix makïdï po gïn ïrhidi sai mai xii mui oigïrhi soimaaxkamigadï— itïtïdai.
48Dai bhodïrï potïtïdai Suxi go oki,
—Diuxi kaxi gï oigïrhi gï soimaaxkamiga— itïtïdai.
49Daidi go gaa ix makïdï ami mesa buidïrï darakatadai ïïgi aipako gïn aagidimi daidi ikaiti,
—¿Xorai idi kïïrhi dai asta oigïrhi soimaaxkamigadï odami?— ikaitimi.
50Daidi Suxi potïtïdai go oki,
—Kïïga buaboitu aapi dai kaxkïdï ka kïïgakïrï gï busaitu Diuxi. Ka maiti buamï ïrhiada aapi tudu— itïtïdai.
Currently Selected:
Lukas 7: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida