Lukas 6
6
Suxi pokaiti sai ïgai bia sïïrhikami ix aagadagi ixtumaxi gï duñagi go ibhïxtaragai tasïrï
1Daidi ïmo imidagai ïxikami saagida imïitadai Suxi ïmadï mamaatïrdamigadï baidi ïgai bainkumaimi mumuradï dai nobikïdï kïrhibaimi dai kumimi. Ïmo ibhïxtaragai tasïrïkatadai aidï. 2Dai ïïmadutai go fariseos gïn tïgito tïï dai potïtïdai,
—¿Ix tuixi mai ïïgidi aapimï go sïïrhikami? Go sïïrhikami gïr daidi xi aatabuadagi aatïmï ibhïxtaragai tasïrï di. Dai aapimï gakïrhibaimi tïrhigi. Maiti gï agai gobai— itïtïdai.
3Daidi Suxi potïtïdai,
—¿Maiti mïx kia nïidi aapimï ojai xako aagai ixtumaxi idui Dabidkaru ïmo imidagai aidïxi ïgai ïmadï aaduñdï bhiugikoitadai? 4Ami ojiïrï ikaiti sai baa ïgai kiiyïrï xakoga xadutudaiña go judidiu Diuxi dai bui go pan daxdaradï Diuxi dai uu dai oi ïgai aaduñdï ïpï. Go pan ïgai mosïkaxi go dadaxdadami biakatadai oigaragai xi kuadagi tudu. Ka podukai gïr biturhi go Moiseskaru sïïrhikamigadï. Dai bïïxkïrï Diuxi dagito go Dabidkaru sai ugana gobai aidï— itïtïdai.
5Dai Suxi potïtïdai ïpï,
—Daiñi, aanï ïgai dai kïïrhi busai dai aanï bhai aagai ix kïrhibagi ïgai tïrhigi podukai xibi. Aanï adaama ïr Tïanïdami tudu dai kïïga bia aanï gubukarhigai xi aagadagi ixtumaxi gï agai xi iduñagi ibhïxtaragai tasïrï— itïtïdai.
Suxi duadi ïmo kokoadï ïmo ibhïxtaragai tasïrï dai go fariseos mai bhai ïrhi gokïdï
6Dai ïpï ïmo imidagai ibhïxtaragai tasïrï baa Suxi ïmo kiupaigadïrï judidiu dai ami gatïtïïgidi aatagi bai ami dakatadai ïmo kïïrhi ix makïdï gakixapikatadai ïkadï sïïrhixapadïrï. 7Dai ami darakatadai tïtïgiadami sïïrhikami ïpï ïmadï fariseos dai kïïga nukadatadai ïgai go Suxi sa bhai mai duadiña ïgai go kokoadï aidï ibhïxtaragai tasïrï. Gaagaitadai ïgai ixtukïdï gïpiïrï buajagi go Suxi kaxkïdï. Pokaitiña ïgai sai daidarxi ix duadiagi odami ibhïxtaragai tasïrï.
8Dai Suxi maatïkatadai ixtumaxi gïn tïtïitoitadai go fariseos dai potïtïdai ïgai go ix makïdï gakixapi ïkadï,
—Gimi bhaigobai bhaitïki go gaa— itïtïdai.
Dai ïïgidi go kïïrhi dai kïkiba ami go gaa buidïrï.
9Daidi Suxi potïtïdai go odami,
—Gin aagidabïrai ix tuma oigaragai gïr mamaakai go Moiseskaru sïïrhikamigadï saidi ibuada aatïmï ibhïxtaragai tasïrï— itïtïdai. —¿Gïr maakai xi gobai oigaragai xi kïïga ibuadagi aatïmï xi soimaaxi ibuadagi xia? ¿Gïr maakai xi oigaragai xi duduadadagi odami xi soi duadiagi xia?— itïtïdai.
10Daidi mos nïnïidi Suxi go odami aipakoga. Dïï go odami maiti ipïrhi xi aa noraidagi ñokidï. Xi kaxkïdï Suxi potïtïdai go kokoadï,
—Sïïrhiñañi gï ïka— itïtïdai.
Dai podui go kïïrhi bai duayi ïkadï.
11Daidi gokïdï kabami bhakoi go buidïrï bïïtïkamigadï Suxi dai aipako gïn tïkakaimi ix duñagi ïgai go Suxi.
Ïkobai bubaitu Suxi bhaibuxtama dan goka kïkïïrhi dai maa sïïrhikami saidi ïr ojotosadïkana
12Dai bhodïrï maigobai jii go Suxi ïmo gidi daama dai ami ïmo tukagi gaatagai Ogadï ïmadï. 13Dai xadiko mos maaxikai oidigi sai báí ïgai bïïxi mamaatïrdamigadï dai ïgai iji gidiamu ïpï. Dai ïko bubaitu Suxi bhaibuxtama dan goka abhiadïrï mamaatïrdamigadï saagidañdïrï dai maa ïmo sïïrhikami saidi ïr ojotosadïkana ïgai.
14Ïmo otosadï Ximuñi tïgidu. Ïgai ïr ix makïdï Piduru tïïtï Suxi gokiïrï. Dai ïmai otosadï Suxi Andïrïxi tïgidu. Ïgai ïr sukurhidï go Ximuñi Piduru. Dai ïmai Jakobo tïgidu, dai ïmai Juan, dai ïmai Pirhi, dai ïmai Bartolomé, 15dai ïmai Mataibo, dai ïmai Tomás, dai ïmai Jakobo. Ïgai ïr Alfeo maradï. Dai ïmai Ximuñi tïgidu. Ïgai ïr ix makïdï politiko aagaiña odami. 16Dai ïmai Udaxi tïgidu. Ïgai ïr maradï go Santiago. Dai oidakatadai ïmai otosadï Suxi ïpï ix makïdï Udaxi Iskariote tïgidu. Ïgai ïr ix makïdï gatïïgi go Suxi gokiïrï.
Mui óídakami aipako oidatukïiña go Suxi
17Daidi ka tïapanakai ïgai gidiañdïrï sai kïïkiba Suxi ïmo gïï dïjoana ojotosadï ïmadï. Dai ami dadatadai mui óídakami bïïxi aipakoga Judeañdïrï dai Jerusalenañdïrï. Dai jaa mïkaxdïrioma dadatadai ïpï kostañdïrï xako Tiroana dai Sidonïrï tïtïgidu gïgïrï kiiki. 18Ami dadatadai ïgai kaïka ïrhiditai Suxi aatagidï dai ipïrhiditai sai duduadana ïgai ix makïdï kokokoñikana. Dai Suxi duduadiña bïïxkatai ix makïdï go Diabora tïtïañikarudï soi maaxi taataturhiña. 19Bïïxi go odami taata ïrhidiña go Suxi aidï. Duduadaiña ïgai bïïxkatai gubukarhigadïkïdï kaxkïdï.
Suxi maa aatagi mamaatïrdamigadï ïmadï bïïxi go gaa odami dai aagidi sai bia gïïpi bhai ïrhiaragai Diuxi amadïrï
20Daidi Suxi sïïrhi buijako nïnïaba mamaatïrdamigadï daidi potïtïdai,
—Aapimï ix makïdï ïr soititigami duu xibi ka kïïga bia bhai ïrhiaragai Diuxi amadïrï. Diuxi ïgai daidi ïr gïn Reyga kaxkïdï dai ïgai gïn tïanïda agai— itïtïdai.
21—Ka kïïga bia bhai ïrhiaragai aapimï ix makïdï bhiugikoñi duu xibi tudu. Kïïga tataaxkoñikan taadakamu aapimï gokiïrï kaxkïdï.
Dai aapimï ix makïdï soigakoñikagi xibi ka bia bhai ïrhiaragai Diuxi amadïrï ïpï. Kïïga bhai gïn ïjïldamu aapimï gïn tïanïitai Diuxi— itïtïdai.
22—Gin aaduñi, kïïga bia aapimï ixtukïdï bhai gïn ïrhiadagi xïïxkadï gïn kïïdadagi odami gin urabakatai aapimï— itïtïdai. —Daiñi, odami maiti ipïldamu tomarhi xi gïn ñokiadagi dai gïn bhagaidadamu dai asta ïmo soimaaxi ñoki duu kaïkamu ïgai gïn tïtiaraga gin urabakatai aapimï. 23Ka podukai buididiña odami Diuxi ñiñokituldiadamigadï ïïki ïpï tudu. Dïï bïïxkïrï abïr kïïga bhai gïn ïrhiada maatïkatai sai gïïpi bia aapimï gïn maitïki tïbagiana— itïtïdai.
24—Dïï gia sogigi aapimï ix makïdï gïn bipidakami duu. Kïï bia aapimï gïn bhai ïrhiaraga xibi dïï gokiïrï mai tipukamu bamioma bhai ïrhiaraga gïn bïïtarï— itïtïdai.
25—Sogigi aapimï ix makïdï kïïga tataxkoñikan duu xibi tudu. Gokiïrï taatamu aapimï bhiugigai kaxkïdï. Dai sogigi aapimï ix makïdï asïiña bhai ïrhiarakïdï xibi. Gokiïrï suanïdamu aapimï soi ïrhiarakïdï— itïtïdai.
26—Dai sogigi aapimï ix makïdï bïïxi go óídakami kïïga ñokadagi gïn bïïtarï. Daiñi, go óídakami ïïki kïïga ñokaiña bïïtarï go ix makïdï ñokituldiadamigadï Diuxi gïn aagaiña dai maiti ïr buaboikana. Ïgai mos bupuirumadaiña óídakami aagiditai mosïkaxi ixtumaxi kaïka ïrhiditadai óídakami. Dai xibi xi kïïga ñokadagi óídakami aapimï gïn bïïtarï ïpï gobai itïiya ïrhidi sai aapimï ïpï mos aagidimi odami mosïkaxi ixtumaxi kaïka ïrhidi dai mai xu xi ixtumaxi Diuxi ipïrhidi. Ix buaboikïdï tïtïgiadagi aapimï ñoki ixdukatai Diuxi ipïrhidi aidï gia xadïrï kïïga ñokaiña bïïxi odami gïn bïïtarï— itïtïdai.
Suxi aagai ix dukatai gï agai xi aa noraidagi odami ix makïdï soi gïr buidadagi
27Dai bhodïrï oi Suxi aatagidï dai potïtïdai go odami,
—Bia aanï ïmo ñoki bïïxkatai aapimï gïn bïïtarï ix makïdï gin kaï— itïtïdai. —Daiñi, abïr oigïdada ïgai ix makïdï ïr gïn buidïrï bïtïkamiga. Kïïga abïr buidada ïgai ix makïdï soi dukai gïn nïijadagi— itïtïdai. 28—Xi odami daanïdagi Diuxi sai gïn aituldada soi ïrhiaragai aapimï abïr bhaiyoma daanïda ïgai bïïtarï sai Diuxi maakana bhai ïrhiaragai ïgai. Podukai abïr aa noraida ïgai. Daanïdabïrai Diuxi ïgai bïïtarï ix makïdï soi gïn buidadagi tudu— itïtïdai. 29—Dai xi ïmo odami gïn kapiñagi gïn buibasana abïr dagito sai gïn kapiñagi ïpïpï ajadïrï gïn buibasana ïpï— itïtïdai. —Dai xi gubuakïdï gïn popoidagi ïmoko gïn chamaraga abïr maaka gïn basaraga ïpï— itïtïdai. 30—Dai oidadabïrai xorai gïn tanïdagi ixtumaxi. Dai xi ïmadutai bhïiyagi ixtumaxi ïr gïn tuidaga abïr mai gubudakïdï tanïda sai gïn aa noraida gobai— itïtïdai.
31Dai Suxi potïtïdai ïgai ïpï sai,
—Ix dukai aapimï ipïrhidi xi gïn buidadagi óídakami podukai abïr buidada aapimï— itïtïdai.
32-33—Daiñi, ¿Bhai ix kïïgadu xi kïïga nïijadagi dai oigïdadagi aapimï mosïkaxi go odami ix makïdï kïïga gïn buididiña gïn oigïdaitai ïgai? ¿Bhai ix po tïimu Diuxi sai kïï ibuayi aapimï pobuadatai? Xadïrï. Daiñi, asta go odami bamioma galtutiakïdï pobuayi di. ¿Kaxkïdï tumaxi ïr soiñi gobai? Xi ïpïan buadagi aapimï aidï gia mai bamioma kïï tutuiga aapimï xi ïgai— itïtïdai.
34—¿Dai xi tañubidagi aapimï tuminxi mosïkaxi odami ix makïdï poïrhidi aapimï sai kïïga gïn aa noraida antaada bhai ix potïimu Diuxi sai kïï dui aapimï? Podukai ibuayi go odami galtutiakami ïpï di— itïtïdai. —Ix pobuadagi aapimï aidï gia mai bamioma kïï tutuiga aapimï xi ïgai— itïtïdai.
35—Daiñi— itïtïdai. —Aanï aagai sai gï agai bhaiyoma xi oigïdada aapimï asta go odami ix makïdï ïr gïn buidïrï bïïtïkamikagi. Kïïga abïr buidada tudu dai abïr tañubida ixtumaxi gïn tañiagi ïgai tomaxi po gïn ïrhiada aapimï sai mai aa noraida antaada. Ix pobuadagi aapimï aidï gia kïïga buimu aapimï gïn maitïkiga dai kïïga maaxitudamu aapimï saidi ïr maamaradï aapimï Diuxi ix makïdï bïïxi adaama ïr Ga Tïanïdami. Diuxi kïï tuiga buidïrï bïïxi odami tudu tomaxi galtutiakagi ïgai dai ix makïdï mai bhai ïrhiadagi Diuxi bui tomax Diuxi kïï buididi ïgai. 36Soi ïldatai abïr nïida óídakami tudu. Kaxkïdï tudu Diuxi Gïr Oga soi ïlda gïr nïidiña bïïxkatai aatïmï ïpï— itïtïdai.
Suxi aagidi go mamaatïrdamigadï sai mai aagaiña ïgai xorai kïïga ibuayi dai xorai mai kïïga ibuayi
37Daidi Suxi oi aatagidï dai potïtïdai go odami,
—Maiti abïr dudunukami duu gïn ïrhiada ïïgi aapimï aagaitai xorai kïï ibuayi dai xorai mai kïï ibuayi. Dai abïr mai aagada xorai ajïga ïmo gïgïbidaragai ïpï. Ix mai pobuadagi aapimï aidï gia Diuxi mai po kaitidamu ïpï sai mai kïïga buayi aapimï. Dai maiti pokaitadamu ïgai ïpï saidi gïn ajïga gïgïbidaragai. Ix oigïldada aapimï jaa xïïxkadï soi gïn buidadagi ïgai aidï gia Diuxi gïn oigïldadamu ixtumaxi idui aapimï Diuxi bui ïpï— itïtïdai.
38—Dai kïïga abïr oidada jaa ixtumaxi tïgitokagi ïgai. Ix podukai ibuadagi aapimï aidï gia Diuxi kïï gïïpi gïn maakimu ixtumaxi ïpï. Ïpïandukamikamu xi Diuxi ïmo ïpïabikaruana gïïpi dasamudai gïn óídaraga dai asta kïï dagixakami dukai dai gïixakami asta xako ka bhaibitu gobai. Pokaxi gïn maakimu Diuxi tudu xi kïïga maakada aapimï soiñi jaa— itïtïdai.
39Dai bhodïrï Suxi aagidi go odami ïmo maaxidaragai aatagi sai kïïga gïn tïgito nïidiña odami xorai oijada agai. Daidi potïtïdai ïgai,
—Daiñi— itïtïdai. —¿Mai ix ïr buaboi sai ïmo kïïrhi mai nïadami mai bhaiga xi tïïgidagi boi ïmai ix makïdï mai nïayi ïpï? Bïï gokatai dïgakana surhigi antaada ¿aba? Gï agai bhaiyoma ïmo mai nïadami xi oijadagi ïmoko ix makïdï kïïga nïayi dai kïïga maatï boi tudu— itïtïdai.
40—Dai podukai ïpï gï agai xi kïïga gïn tïgito nïijada aapimï xorai gïn mamaatïtuldiadagi ix bhai kïï maatï. Ïgai ïr tïtïgiadami boi duu gïn bïïtarï tudu. Daiñi, ïmo odami ix makïdï oijadagi ïmo mamaatïtuldiadami gokiïrï xïxkadï ka kïïga máí ïpïan buayi go makïdï gatïtïïgidi ñoki. Ïmo gamamaatïrdami xadïrï bamioma gatïanïna ix bhai mamaatïtuldiadamigadï di, dai bhaiyoma ïïgidiña ïgai— itïtïdai.
41Daidi aagai Suxi ïpï ïmo maaxidaragai aatagi dai potïtïdai ïgai go odami,
—Daiñi— itïtïdai. —Aapimï ïr ïpïan dukami ïmo odami ix makïdï bia ïmo gïdukami tukuragai duu bujidïrï kabami soimaaxi ibuadamikatai aapimï. ¿Kaxkïdï ix tuixi buamï gïn ïrhidiña aapimï xïïxkadï ïmai biakagi ïmo arhi dïbïrai kubhiadï duu bujidïrï soimaaxi idunakai ïgai? 42Maiti gï agai tudu xi potïdagi aapimï sai buanadamu aapimï gobai ix makïdï ïr ïmo arhi dïbïrai kubhiadï duu. Mai nïayi aapimï gïïpi biakatai tukuragai ïïgi gïn bupujiïrï di. Kïï tutiakami dukai gïn dadasai aapimï dai maiti ïr buaboi tudu. Bhaiyoma gï agaitadai xi ïpïgioma maigo dadasagi aapimï go soimaaxkami ix makïdï ibuayi aapimï ïmo gïï tukuragai dukaikatai gobai. Aidï gia bhaigakamudai aapimï xi soiñagi ïmai ix makïdï soimaaxkamigadï ïr ïmo arhi dïbïrai kubhiadï duu— itïtïdai.
Suxi aagai ïmo maaxidaragai aatagi aagaitai uxi ibhiadï
43Dai Suxi oi aatagidï dai potïtïdai go odami aagaitai ïmo uxi,
—Daiñi— itïtïdai. —Mai tipu uxi kïkïïgadukami ix soimaaxi ibhiatadagi dai ïmo uxi mai kïïgadukami maiti ixtutuidikïi xi kïïgadukagi ibhiadï ïpï. 44Bïïxi uxi gï maatï ibhiadïrï tudu. Dukami, maiti gï yoobai igoxi xiïpï uba uparaiñdïrï di. 45Dai podukai ïpï odami ibuayi ixtumaxi biakagi ibhïadïrï. Odami ix makïdï kïï buañixikagi ibhïadï kïïga ibuayi biakatai kïïgadukami tïgibudagai ibhïgadïrï. Dai odami ix makïdï soimaaxi ibhïadï mai kïïga ibuayi biakatai soimaaxkami ibhïgadïrï. Ixtumaxi ñokadagi odami ïïgi ibhïadïañdïrï busakïi tudu— itïtïdai.
Suxi aagai ïmo maaxidaragai aatagi aagaitai goka tutusadami bhaabhaki
46Daidi bhodïrï Suxi apia oidi aatagidï dai potïtïdai go odami,
—¿Tui mïxi gïn Tïanïdamiga gin aagai aapimï? Maiti gin ïïgidiña aapimï ixtumaxi gïn tïanïdagi aanï di— itïtïdai. 47—Gïn aagidamu aanï ïmo maaxidaragai aagaitai odami ix makïdï gin urabagi dai kïïga ïïgidi gin ñoki. 48Ïpïan dukami ïgai ïmo kïkïïsadami baaki ix makïdï kïïga tukabi kokoi dïbïrai dai aiti daama dáí simientogadï. Kïïga kïi ïgai baakidï tudu xi kaxkïdï gokiïrï xïïxkadï todian dukai gïïpi daibuñagi sudagi mai xïbuayi go baki. Pomaaxi odami ix makïdï ïïgida kaïkana gin ñoki tudu— itïtïdai.
49—Dïï gia odami ix makïdï mai ïïgiditai kaïkagi gin ñoki gia mai pomaaxi. Ïgai ïr ïpïan dukami ïmo kïkïïsadami baaki ix makïdï mos dïbïrapi kïi baakidï bhaiyoma mai darasakai ojodai uta. Dai gokiïrï xïïxkadï todian dukai gïïpi daibuñagi sudagi otoma daitudai dai bïï xia buayi— itïtïdai.
Currently Selected:
Lukas 6: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida