Lukas 10
10
Suxi otoi mamaatïrdamigadï sai aituldana ñoki óídakami aipakoga
1Daidi gokiïrï ïko bubaitu Suxi ïpï baikobhai dan bhaibuxtama mamaatïrdamigadï dai bhaitïki otoi bïïxi go gïgïr kiikiamu dai bïïxi go ïïmapïkïrï xakoga imi agai ïgai gokiïrï. Gogokatai otoi ïgai. 2Daidi Suxi aagidi ïmo maaxidaragai aatagi daidi potïtïdai,
—Agia muidu go odami ix makïdï ka bhai gïn duduna xi kaïkagi gïn ñoki dïï gia bhaitoma mai tipu xorai bapaidagi sai buaboitudaiña. Ïpïan dukami ïgai xïïxkadï gïïpigakagi yoobaragai dai chïkidukagi gayobadami. Daanïdabïrai Diuxi tudu sai mui otosana gayobadami sai yooban duñagi ïgai óídakami bapaiditai sai gin buaboitudaiña— itïtïdai.
3-4Daidi bhodïrï potïtïdai ïgai ojotosadï,
—Iimibïrai tudu dai abïnakidada odami saidi gin buaboitudaiña. Maiti abïr bukada ixtumaxi gïn imidaga bïïtarï. Maiti abïr bukada tuminxi tudu tomarhi gïn morarhiga. Abïr bukia mosïkaxi gobai gïn sususaka ix makïdï gïn aadaka aapimï dai mai xu xi ïpï jaa. Dai abïr mai gugukada dai tïbïpi aatagada ami boiyana mïx xïxkadï aiyagi odami. Abïr sïïrhi iimia kiikiamu tudu sai otoma aitulda ñoki.
Dai imïitai abïr kïïga gïn nukada ajiopada. Kaxkïdï tudu gïn otosaimi aanï soimaaxi ibuadami saagida dai ami saagida ïpïamaaxkamu aapimï arhi kañiñiru ix makïdï sïsïïyi saagida ajiopai— itïtïdai.
5—Xïxkadï aiyagi aapimï ïmo kiiyïrï abïr potïda go óídakamisai,
—Diuxi gïn maakana ibhïxtaragai— abïr itïda.
6—Dai xi go óídakami ami nïnïrakagi xi Diuxi maakana ibhïxtaragai aidï gia ipïldamu ïgai ix kaïkagi gïn aatagi dai kïïga gïn miadïgidamu. Dïï gia xi maiti gïn miadïgidagi ïgai aidï gia mai biakamu ïgai oigaragai xi kaïkagi gïn aatagi ïpï. 7Dai xïxkadï aiyagi aapimï ïmo kiiyïrï dai gïn miadïgidagi ïgai abïr amaxi bii asta xïïxkadï ka iimïda agadagi abhai kiikiañdïrï. Maiti abïr mos kiikiïrï ajiopada tudu. Daidi mai xaïraitai abïr uga dai iiyagi ixtumaxi gïn oidadagi ïgai. Kaxkïdï tudu aapimï ïr aatabuadami dai go kuadagi ïr gïn maitïki. Ïmo aatabuadami gï agai xi gamaitïkïdagi tudu— itïtïdai.
8—Dai xïïxkadï ajiagi aapimï ïmo kiikiïrï xi kïïga gïn miadïgidagi óídakami aidï gia abïr uga ixtumaxi gïn bhidagi ïgai 9daidi abïr duduada kokokoñiadï ami ïpï. Dai pobai abïr tïda óídakami sai, ka miadaimi xi gatïanïdagi Diuxi rey dukai— itïtïdai.
10—Dïï gia kiikiïrï xako aiyagi aapimï dai maiti gïn miadïgidagi óídakami ami abïr gia kaiyana gugukada dai kïïga buanada gïn sususaka. Daidi abïr potïda ami óídakami sai maiti ipïrhi ïgai xi kaïkagi gïn ñoki xi kaxkïdï ka iimi agai aapimï. 11Aagidabïrai sai maiti ipïrhidi aapimï xi bhïkiagi tomarhi dïbïrai kubhiadï ami kiikiañdïrï dai kaxkïdï kïïga buanai aapimï gïn sususaka. Gobai ïr ïmo maaxidaragaika agai ix mai kïï dui go óídakami ami. Aagidabïrai ïpï sai ka aijimi ix tïanïdagi Diuxi ïmo rey dukai. 12Dai aanï aagai sai xïxkadï gïgïbituldagi Diuxi soimaaxi ibuadami sai bamioma soimaaxi taata agai ami óídakami xi bhai xi go óídakami Sodomïrï ix makïdï koi ïïki— itïtïdai Suxi mamaatïrdamigadï.
13Dai bhodïrï aagai Suxi ïmo ñoki aagaitai go kiiki xako gaatadui ïgai daidi potïtïdai,
—Sogigi aapimï Korasinïrï óídakami dai aapimï Betsaidïrï óídakami ïpï. Naana maaxi maaxidaragai idui aanï gïn saagida sai nïijada aapimï xïï gubuka Diuxi. Dïï modukai maiti ipïrhi aapimï xi ïma dukai gïn tïtïgitoagi— itïtïdai.
—Aapimï Korasinïrï dai Betsaidïrï óídakami aanï aagai sai soimaaxi taata agai aapimï. Daiñi, go Tiroïrï dai Sidonïrï óídakami ix makïdï óídakatadai ïïki mai ïmadukai gïn tïgito ïpï soimaaxi ibuadatai ïpï. Dïï gia xi nïijadamudai ïgai go naana maaxi maaxidaragai ix makïdï aapimï nïidi aidï gia ka ïïki abhiadïrï ka ïmadukai gïn tïgitokamudai. Ïgai gïn aadamudai yukuxi sïïxidakami dai gïn komaibadamudai mataikïdï soi gïn ïrhiditai. Dai podukai maaxidamudai ïgai sai ka ïmadukai gïn tïgito. Dïï gia aapimï Korasinïrï dai Betsaidïrï óídakami mai pobuayi. Maiti ipïrhidi aapimï xi ïmadukai gïn tïtïgitoagi tudu. 14Kaxkïdï xïxkadï gïgïbituldagi Diuxi óídakami bamioma soi taadakamu aapimï xi bhai go Tiroïrï dai Sidonïrï óídakami— itïtïdai.
15—Dai bia aanï ïmo ñoki aapimï gin bïïtarï ïpï Kapernaumïrï óídakami. Aapimï pobïnïrhidi sai tïtïidi agai tïbagiamu dïï aanï agai sai bhaiyoma surhigimu aapimï go gïï tukabakami dïgakïrï xako maamaixapi koidadï— itïtïdai Suxi.
16Dai biakatadai Suxi ïpï ïmo ñoki mamaatïrdamigadï bïïtarï ïpï daidi potïtïdai,
—Gïn tïgitobïrai sai xorai kïïga kaïkagi gïn ñoki ïr ïpïan dukami xi aanï gin kaïkamudai. Dïï gia xorai maiti kaïka ïrhiada gïn ñoki ix makïdï bhïkati aapimï, Diuxi podukai nïidi sai aanï maiti gin kaïka ïrhidi ïgai. Dai xorai maiti in kaïka ïrhiada Diuxi podukai nïidi xi mai kaïka ïrhidi ïgai Diuxi ïpï. Diuxi otosadï aanï kaxkïdï— itïtïdai.
Go Lukas oja ix tïtïdai Suxi ojotosadï dadakai ïgai ïpamu abhiadïrï xajako otoitadai Suxi
17Daidi go ojotosadï Suxi iji dai idui bïïxi ixtumaxi aagiditadai ïgai. Baikobhai dan bhaibuxtama ïgai. Dai kïïga bhai gïn ïrhidi dadakai ïpamu dai potïtïdai ïgai go Suxi,
—Aapi Suxi, aa gia kïïga aatadui gï gubukarhiga aatïmïkïdï. Asta go diabora tïtïañikarudï gïr ïïgidiña gï ñokiturhitai aatïmï— itïtïdai go ojotoxikami go Suxi.
18Dai Suxi potïtïdai,
—Ïjï, pomaaxi aba. Bia aapimï gubukarhigai xi maitiagi go diabora. Nïidi aanï xi gïi go diabora tïbagiañdïrï tudu ïmo dukudami dukai. Dai xibi gïn maa aanï gubukarhigai xi maitiagi aapimï. 19Daiñi, gïn maa aanï gubukarhigai xi tomaxi kïixapadagi aapimï kookoyi xiïpï naakasorai mai xïduñimu aapimï. Gïn maa aanï gubukarhigai ïpï sai asta go diabora maiti ixtuidana gïn buidïrï. Mai tipu ixtumaxi soi gïn buadagi tudu. Dai kïïga ïr buaboi saidi ïr ïmo bhai ïrhiaragai xïïxkadï gïn ïïgiadagi go diabora tïtïañikarudï 20dïï gia maiti gï agai xi gobai ïr gïn bhai ïrhiaragakagi. Gï agai bhaiyoma xi bhai gïn ïrhiadagi ka ojixikatai gïn tïtiaraga tïbagiana— itïtïdai Suxi ojotosadï.
21Dai amaxi Diuxi Ibhïadï kïïga bhai ïrhiatu go Suxi bai go Suxi aagidi Diuxi ïmo ñoki daidi potïtïdai,
—Aapi gin Oga, aapi bïïxi ïr Tïanïdami tïbagiana dai tami oidigi daama ïpï. Aa gia bhai gin ïrhidi aanï aapikïdï— itïtïdai. —Bhai gin ïrhidi maatïkatai sai tïtïgidi aapi gï tïgibudaga odami ix makïdï mai xi sastudaga tïgibudadï. Mai tïtïgidi aapi jaa ix makïdï ïïgi sastudakami dai mamaatïkami gïn aagai tudu. Aapi ipïrhi xi tïtïgiadagi gobai ix makïdï mai sastudaga tïgibudadï dai ix makïdï mai xii mui ixtumaxi maatï. Podukai bhai ïrhi aapi gin Oga tudu. Kaxkïdï bhai gïn ïrhidi aapikïdï— itïtïdai Suxi.
22Daidi bhodïrï potïtïdai Suxi go odami,
—Diuxi gin Oga kaxi in maa bïïxi aïkatai ixtumaxi oidaga. Dai mosïkaxi Diuxi ïgai dai kïïgakïrï gin maatï xorai aanï. Mai tipu ïmai xorai gin maatïkagi podukai. Dai aanï kïïga maatï Diuxi ïpï. Mosïkaxi aanï ïmadï go odami ix makïdï tïtïgiadagi aanï ïgai dai kïïgakïrï maatï Diuxi dai jaa gia cho— itïtïdai.
23Dai bhodïrï ïkobai aatagidi Suxi mamaatïrdamigadï daidi potïtïdai,
—Ka nïnïidi aapimï naana maaxi namïakami ixtumaxi dai gobai ïr ïmo gïdukami bhai ïrhiaragai gïn bïïtarï. 24Daiñi, ka ïki abhiadïrï mui ñiñokituldiadamigadï Diuxi dai mui reyes nïida ïrhidiña ixtumaxi nïidi aapimï dïï mai tïï ïgai. Dai kaïka ïrhidiña ïgai ixtumaxi kaïkana aapimï ïpï dïï ïgai mai kaï dai aapimï gia. Sïïrhikïdï ïr ïmo bhai ïrhiaragai gobai aapimï gïn bïïtarï— itïtïdai.
25Daidi bhodïrï ami kïkiba ïmo kïïrhi ix makïdï ïr tïtïgiadami go Moises ojadï dai ñokidi ïgai go Suxi. Mos maatïka ïrhiditadai ix bhai kïïga aa noraidana Suxi daidi potïtïdai,
—Aapi gïr mamaatïtuldiadamiga, ¿Tumaxi gï agai aanï xi ibuadagi dai kïïgakïrï oidakagi bïïxkïrï bïïtarï?— itïtïdai.
26Daidi Suxi potïtïdai,
—¿Ix kaiti go Moises ojadï tudu? Gin aagidañi ix dukatai maatï kaï aapi gobai— itïtïdai.
27Dai go kïïrhi potïtïdai,
—Ami ojixi sai, Gï agai xi oigïdada aatïmï Diuxi Gïr Nukadakami bïïxi gïr iibhïdagakïdï dai bïïxi gïr gubukarhigakïdï dai bïïxi gïr tïgibudagakïdï. Dai sai xïïxi gïr oigïdai ïïgi aatïmï pokaxi gï agai xi oigïdada aatïmï gïr aaduñi ïpï. Podukai ojixi ami tudu— itïtïdai.
28Daidi Suxi potïtïdai aidï,
—Kïïga aagai aapi. Kïïga ibuada ix dukai aagai aapi tudu dai kïïgakïrï oidaka bïïxkïrï bïïtarï— itïtïdai.
Apia aatagai Suxi ïmadï go tïtïgiadami sïïrhikami dai aagidi ïmo maaxidaragai aatagi aagaitai ïmo Samariana oidakami kïï tuigakami
29Daidi go tïtïgiadami Moises sïïrhikamigadï ïmo saitudakami ñokadami busia ïrhidi daidi potïtïdai ïgai go Suxi,
—Pokaiti aapi sai bia aanï xi oigïadagi gin aaduñi. Kaxkïdï gin aagidañi xorai ïgai daidi ïr gin aaduñi. ¿Xorai bia aanï xi oigïadagi tudu?— itïtïdai.
30Dai Suxi potïtïdai,
—Gï aagidamu aanï ïmo maaxidaragai aatagi sai maatïkana aapi xorai aagai aanï aagaitai gï aaduñi. Daiñi, ïmo imidagai ïmo kïïrhi judiu maigo koida imi agai Jerusalenañdïrï Jerikoamu. Dai no boiyana sobhi ïïxibogami dai popoki yukuxidï dai kabami gïikarai dai katoma mua dai amaxi boiyïrï bia. 31Dai laachkïdï ami daibusai ïmo dadaxdadami ix makïdï ibuadana xadutudaragai Diuxi bïïtarï. Dïï gia aidïxi tïï ïgai go kïïrhi mos gajiadïrï daibusai dai oi imidagai tomaxi ix makïdï ami kaatïkatadai ïr ïmo aduñdï judiukatai ïgai. 32Daidi bhodïrï ami ayi ïmo aatabuadami go gïï kiupiana Jerusalenïrï ïpï. Ïmo aduñdï ïgai go ami kaatïkïdï ïpï pipiixaradïkatai ïgai go judiu Lebikaru. Dïï bïïxkïrï tïïgakai ïgai go boiyïrï kaatïkïdï mos gajiadïrï daibusai ïpï dai bhaitïki jii ïpï—.
33—Dai gokiïrï ami ayi ïmo Samarhiïrï oidakami dai daama daitugai ïgai ïmo axñitu. Dai tomaxi ïr Samarhiïrï oidakami bïïxkïrï soi gï ïlda tïï ïgai go boiyïrï kaatïkïdï. 34Dai miadïrï kïkiba ïgai dai duduadi xakoga muraidi go kïïrhi. Toidi ïgai olibo asaiti dai bino dai kïïga bupurhi bipiosokorhikïdï xako gï muraitu. Dai bhodïrï soigadï daama dáí dai bhïkai nobai ïmo kiiyïrï xakoga dudatai gïn urhiñana iimïdami dai ami ïmadï gï urhi dai nukagi. 35Dai xadiko aidïxi ka imi agaitadai ïgai sai bubaitu goka plata tuminxi dai maa go oidakami ami daidi potïtïdai,
—Nukadañi idi kïïrhi dai xi bamioma xia buadagi aapi tuminxi gï aa namïidamu aanï xïxkadï ïpamu dibiagi— itïtïdai.
Po tudu idui go Samarhiïrï oidakïdï— itïtïdai Suxi go tïtïgiadami Moises sïïrhikamigadï.
36Dai bhodïrï potïtïdai ïgai,
—Baika kïkïïrhi ïgai dai ayi tudu ami xako kaatïkatadai go muraidadï. Gin aagidañi, ¿Ix makïdï ïgai ïr aduñdï duu ïgai bïïtarï ix ïrhidi aapi?— itïtïdai.
37Daidi go kïïrhi potïtïdai,
—Ix makïdï soi gïlda tïï dai soi— itïtïdai.
Dai Suxi potïtïdai,
—Ïjï, ïgai aba. Dai xibi aapi poduñi ïpï ixdukai idui ïgai— itïtïdai.
Suxi mïï dibiji go Maruta dai Maria
38Daidi go Suxi ïmadï mamaatïrdamigadï iji abhiadïrï dai oi gïn imidaga. Dai ayi ïgai ïmo arhi kiikiïrï xako oidakatadai ïmo oki Maruta tïgidukami. Dai ïgai kïïga miadïgi go Suxi ami kiidïrï. 39Dai ami dakatadai ïpï ïmo oki sukurhidï go Maruta, Maria tïgidu ïgai. Dai ïgai miadïrï daiba go Suxi dai kaïkatadai aatagidï. 40Dïï gia go Maruta arhiï ixtuma ibuadana bhai ibuadatai kuadagai. Dai mai bhai gï ïldatu ïgai mos ïï kabami biakatai aaduindagai. Daidi mïï potïtïdai ïgai go Suxi,
—Aapi in Tïanïdamiga, ¿Maiti pïx buamï ïrhidi toma lachi nïiditai sai gin sukurhi gin bidagi mos ïxi aaduindagai? Aagidañi sai gin soiñana ïgai tudu— itïtïdai.
41Daidi Suxi potïtïdai,
—Aapi Maruta, kïïga gï oigïdai aanï dïï mos aapi arhiï buamï ïrhidi naana maaxikïdï ix makïdï mai xii kabami gï agai. 42Mosïkaxi ïmo ixtumaxi kabami gï agai xi iduñagi dai go Maria ka pobuayi. Gin kaitugai gobai tudu. Dai gobai ïr go bamioma kïïgadukïdï dai mai dagitomu aanï xi bopokiagi tomarhi ïmadutai tudu— itïtïdai.
Currently Selected:
Lukas 10: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida