Lukas 11
11
Suxi aagidi mamaatïrdamigadï ix dukatai gï agai ix aatagada ïgai Diuxi ïmadï
1Ïmo imidagai sai no xibhïkai dakatadai Suxi dai gaatagataidai Diuxi ïmadï. Daidi naato aatagakai ïgai bai ïmadutai go mamaatïrdamigadï potïtïdai,
—Aapi gïr mamaatïtuldiadamiga, go Juan maatïturhi mamaatïrdamigadï ix dukatai daanïdagi ïgai Diuxi dai aatïmï maatia rïrhidi ïpï. Gïr maatïtuldañi tudu ix dukatai daanïdagi aatïmï— itïtïdai.
2Daidi Suxi potïtïdai,
—Xïïxkadï daanïdagi aapimï Diuxi bïrai adukai itïda,
—Gïr Oga, gï daanïi aatïmï sai kïïgakïrï gï xadutuadagi odami dai sai aapi kïïgakïrï gatïanïdagi reykatai aapi.
3Gïr óídañi kuadagai bïïx tasai xïïxi tïgitokagi aatïmï.
4Dai gïr oigïldañi xïïxkadï soimaaxi ibuadagi aatïmï. Kaxkïdï tudu aatïmï ïpï oigïdai odami ix makïdï soi gïr buidadagi.
Dai maiti dagito xi gïr aiyagi tomarhi ïmo ixtumaxi ix makïdï gïr bapaidagi sai soimaaxi ibuada aatïmï. Podukai abïr itïda aapimï— itïtïdai Suxi dai podukai maatïturhi ïgai ix dukatai daanïda ïgai Diuxi.
5Dai bhodïrï apia aagai Suxi go daañigai dai aagai ïmo maaxidaragai aatagi gokïdï. Daidi potïtïdai ïgai go mamaatïrdamigadï,
—Daiñi, xi ïmadutai aapimï biakagi ïmoko gïn aaduñi ix makïdï kïïga ïïmadai aapimï dai xi ïran tukarï imiagi aapi kiidïrï dai potïdagi aapi,
—Gin aduñi, gin óídañi baika pan. 6Utudama ayi ïmo gin aduñi mïkaxdïrï imïdami dai mai bia aanï ixtuma bhidagi— tïdagi aapi.
7—Dai xi go gïmai maiti ipïrhiadagi xi gï soiñagi dai bhaiyoma gï aa noraidagi abhai tukabidïrï dai pobï tïdagi,
—Maiti gin ñokiada. Ka kuupi kitaagiña dai gin maamara kaxi gin ïmadï bïïtï baakoxiana nai kaxkïdï mai bhaiga xi bañigiagi dai gï maakiagi ixtumaxi— gï tïdagi ïgai.
8—Daiñi, xi po gï tïdagi ïgai dai maiti ïpïrhiadagi xi gï soiñagi tomaxi kïïga ïïmadai aapi, bïïxkïrï xi aapia mai xaïraitai tanïdagi aapi bïïxkïrï gï soiñamu ïgai dai gï maakimu pïx tumaxi tïgitokagi— itïtïdai.
9—Dai Diuxi bamioma kïï tuiga xi bhai tomax makïdï odami. Kaxkïdï aanï aagai sai bhaiga aapimï xi daanïdagi Diuxi bai ïgai gïn maakimu ixtumaxi gï aagadagi. Diuxiamadïrï abïr gaaga ixtumaxi gaagaimi aapimï tudu dai tïïgimu aapimï. Diuxi gia gïn miadïgidamu taanïkai aapimï baakigai. Daanïdabïrai ïgai tudu. 10Ïgai mai ïpïan tuiga go kïïrhi ix makïdï maiti ipïrhi xi bañigiagi dai kupiokagi kuuparagai. Diuxi gia soikïi xorai daanïdagi ïgai. Dai xorai tanïdagi baakigai gaagaitai soiñi Diuxi amajadïrï ïgai gia Diuxi maakimu daibuñigai sai tïïgana soiñi— itïtïdai Suxi go mamaatïrdamigadï.
11Dai oi Suxi go aatagi dai aagai ïpï ïmo maaxidaragai aagaitai go daañigai daidi potïtïdai ïgai mamaatïrdamigadï,
—Aapimï ix makïdï maamara, ¿Bhai ix óídana aapimï gin maamara ïmo odai gïn taanïkai ïgai ïmo pan xiïpï ïmo kooyi gin taanïkai ïgai ïmo batopa? Xadïrï ¿Aba? 12Dai xi gïn taañiagi ïgai ïmo takunono, ¿Bhai ix óídana aapimï ïmo naakasorai? Xadïrï. 13Daiñi, aapimï mamaakai ixtumaxi ïr kïïga gïn maamara tomaxi ïr soimaaxi ibuadami aapimï. Dai Diuxi gïïpi bamioma kïï tuiga xi bhai aapimï xi kaxkïdï gï maatï sai ïgai mamaakai ixtumaxi ïr kïïga maamaradï bïïtarï taanïkai ïgai. Dai kïïga maakimu ïgai Diuxi Ibhïadï xorai taañiagi ïpï— astïdai.
Ïïmo odami pokaitiña sai go diabora ïgai dai mamaakaiña gubukarhigai go Suxi
14Ïmo imidagai Suxi busaitu ïmo kïïrhiañdïrï ïmo tïañikarudï diabora. Mai ñokaitadai go kïïrhi dïï gia busaikai go tïañikarudï diabora kïïga ño ïgai ïpamu. Dai go odami mai tïtïgaitadai ixtumaxi gïn tïtïgitoagi nïiditai. 15Dïï gia ïïmadutai ïgai po kaitiña sai go Beelsebú gubukarhigadïkïdï bubaidiña Suxi go diabora tïtïañikarudï. Go odami Beelsebú aagaiña go diabora.
16Dai jaa potïtïdaiña go Suxi saidi ibuada ïgai ïmo maaxidaragai dai maaxitudagi ix bia ïgai gubukarhigai tïbagiañdïrï. Nïida ïrhiditadai go odami ix bhai ïr buaboi sai bia ïgai gubukarhigai kaxkïdï.
17Dïï go Suxi maatïkatadai ixtumaxi gïn tïtïitoitadai go odami daidi potïtïdai,
—Pokaiti aapimï sai go diabora gubukarhigadïkïdï bubaidiña aanï tïtïañikarudï go diabora. ¿Dïï gia dukai ïr buaboikana gobai? Daiñi, gobai ïr ïpïan dukami xi ïïgi gïn bupui surhigiagi tïtïañikarudï ïmo rey. Dai xi tïtïañikarudï ïmo rey ïïgi gïn kokoadan buadagi ka mai tïbïpi gatïañimu go rey. Dai podukai ïpï xi ïïgi gïn bupui kokoadagi óídakami ïïgi kiiyïrï ka maiti ïr ïmo aadunumïka agai ïgai ïpï— itïtïdai.
18-19Daidi bhodïrï potïtïdai ïgai,
—Pokaiti aapimï sai go diabora gubukadadïkïdï bubaidi aanï diabora tïtïañikarudï. Dai potïkai aapimï ka pokaitadan kaiti aapimï sai ïïgi gï bui gïgïsïi go diabora. Dai xi ïïgi gï bui gïgïsïda go diabora aidï gia ¿Dukatai gatïanïiña ïgai?
Daiñi, bia aapimï ïïgi gïn aaduñi ix makïdï tïtïgidiña aapimï ñoki dai ïgai as bubaidiña diabora tïtïañikarudï odamiañdïrï ïpï. ¿Dai ix tuma gubukarhigadïkïdï aatabuayi ïgai ix ïrhidi aapimï? Ïïgi maatïturhi aapimï ïgai di. Dai xi poïrhidi aapimï sai aanï diabora gubukarhigadïkïdï bubaidi tïtïañikarudï dukatai maiti poïrhidiña aapimï sai gïn mamaatïrdamiga podukai aatabuayi ïpï. Ïgai tudu gïn aagida antaada sai maiti ïr buaboi ixdukai aagai aapimï sai go diabora gubukadadïkïdï bubaidi aanï tïtïañikarudï go diabora di.
20Daiñi, kïïga gï maatï sai Diuxi gubukarhigadïkïdï bubaidiña aanï tïtïañikarudï go diabora tami gïn saagida. Dai gobaikïdï kïïga gï maatï ïpï sai Diuxi kaxi gatïanïi tanai gïn saagida ïpï— itïtïdai.
21Dai bhodïrï Suxi aagai ïmo maaxidaragai aatagi sai maatïkana odami sai gïïpi bamioma gubuka ïgai xi bhai go diabora. Daidi potïtïdai,
—Daiñi, xïïxkadï ïmo kïïrhi kïïga gubuakami nukadakagi kiidï dai kïïga biakagi papaiñomi ixtukïdï kokoadagi aidï gia mai tipu xorai ïïxidagi ixtumaxi. 22Mai buamï ïrhidi ïgai buaboidaitai sai go papaiñomi soiñamu sai maitïna buidïrï toma xorai. Dïï gia tomax dukai xi dibiagi ïmai bamioma gubuakami dai bui gïxiagi dai maitiagi aidï gia popoidamu ïgai go papaiñomi ix makïdï buaboidaitadai ïgai ïmadï modukai buxtuidadï. Dai gokiïrï ka maitïkai ïgai aidï gia takoidamu ïgai aaduñdï go buxtuidadï. Pomaaxi aanï xïïxkadï bui gïxiagi aanï go diabora bamioma gubuakatai aanï. Go diabora ïr ïpïan dukami go kïïrhi gubuakami dïï gia aanï bamioma gubuka xi bhai ïgai. 23Ïmo kokoadami aanï tudu dai xorai maiti gin urabagi kaxi ïr gin buidïrï bïïtïkami. Ïmpaidimi aanï gin aaduñi tudu. Dai ix makïdï ïr gin buidïrï bïïtïkamiga ïïko darasaimi go odami ix makïdï bapaidimi aanï sai gin urabana— itïtïdai Suxi go odami.
24Daidi Suxi potïtïdai ïpï,
—Gïn aagidamu aanï ix dukatai ibuayi tïtïañikarudï go diabora xïïxkadï bubuakiagi odamiañdïrï. Xïxkadï busiagi ïmo diabora tïañikarudï sai aipakoga aimïraiña oidigana gaagaitai xako gï ibhïxtagi dai mai tïtïgaiña. Daidi ikaitiña ïgai,
—Imimu aanï ïpamu dai mïï go odami ïrana oidakamu xadïrï busai aanï— ikaitiña.
25—Dai ajïiña ïgai go odami xako ïrana oidakatadai ïgai dai nïidiña sai mai tipu ïmai oidakami ami go odami ïrana. Nïidiña sai go odami ïrabiadïrï ïpïamaaxi ïmo kii kïï boixikikami dai kïïga bhai duñixikami oidakaragai bïïtarï. 26Dai bhodïrï imïiña go diabora tïañikarudï dai gaagaiña ïpï jaa kubarakami diabora tïtïañikarudï ix makïdï bamioma ïr soimaaxi ibuadami xi ïgai. Dai bïïxkatai ïgai bapakïi ami go odami ïrana dai ami óídakana. Dai podukai bamioma soi buadana ïgai go kïïrhi xi bhai baasïkioma— itïtïdai.
27Kia ñokaitadai go Suxi bai ami go odami saagidañdïrï gïgïrï ño ïmo oki daidi potïtïdai,
—Xïï kïïga bia bhai ïrhiaragai go oki ix makïdï gï marai dai gï xiitu— itïtïdai.
28Dïï Suxi potïtïdai,
—Aanï aagai bhaiyoma sai xorai ïïgida kaïkana Diuxi ñokidï ïgai dai kïïgioma bia bhai ïrhiaragai— itïtïdai.
Go odami maiti ipïrhi xi buaboitudagi go Suxi
29-30Dai apia bamioma gïn ïmpaidimitadai odami ami xako dakatadai go Suxi. Daidi Suxi potïtïdai go odami,
—Agia ïr soimaaxi ibuadami aapimï ix makïdï óídaga xibi. Gin taanïiña aapimï sai ibuadana aanï ïmo maaxidaragai ix makïdï odami mai bhaiga xi ibuadagi dai podukai maaxitudagi sai Diuxiañdïrï dibia aanï. Kïïga ïr buaboi sai aanï ïr Diuxi otosadï ix makïdï ïmo kïïrhi busai tudu. Dïï gia mosïkaxi ïmo maaxidaragai oidakamu aapimï gïn bïïtarï. Daiñi, kïï maatï aapimï ixtumaxi daibusai go Jonaskïdï ïïki ix makïdï ïr ïmo maaxidaragaikatadai go óídakami bïïtarï Ninibeïrï sai maatïkana ïgai sai go Jonas ïr otosadïkatadai Diuxi. Dai xibi aanï aagai sai Diuxi iduñimu ïmo maaxidaragai pomaaxkami aanïkïdï ïpï sai gokïdï gin buaboitudaiña aapimï. Mai tipukamu jaa maaxidaragai aapimï gïn bïïtarï— itïtïdai.
31—Daiñi, xïxkadï mïï Diuxi buidïrï gukibagi aapimï bai aagana ïgai sa bhai kïï idui aapimï ix cho ïpï, aidï go reina Sebañdïrï oidakïdï ami kïkibamu ïpï dai maaxi aagamu xïï kabami ïr soimaaxi ibuadami aapimï. Go reina ïgai bamioma ïr kïïga ibuadami ix bhai aapimï tudu. Kïï maatïkatadai ïgai sai saitudaga tïgibudadï go Solomon kaxkïdï mïkaxdïrï jii dai dibiji kaïka ïrhiditai aatagidï. Mïkaxdïrï jii ïgai kaïka ïrhiditai tudu dai aanï tami gïn saagida daja dai gïïpi bamioma ïr gïdukïdï xi bhai go Solomon. Dïï bïïxkïrï maiti ipïrhidi aapimï xi kaïkagi gin ñoki di. Kaxkïdï go reina maaxi aagadamu xïï kabami ïr soimaaxi ibuadami aapimï xïxkadï ami Diuxi buitapi gukakagi aapimï— itïtïdai.
32—Dai go Ninibeïrï óídakami ïpï gukakamu ami Diuxi buitapi dai ami maaxi aagamu ïgai xïï kabami ïr soimaaxi ibuadami aapimï. Kaxkïdï tudu ïgai gia ïma dukai gïn tïtïgito ïki kaïkai ñokidï go Jonas. Dai aanï gïïpi bamioma ïr gïdukïdï xi bhai go Jonas dïï bïïxkïrï aapimï mai ïmadukai gïn tïgito kaïkatai gin ñoki— itïtïdai.
33Dai bhodïrï Suxi kia oidi aatagidï dai potïtïdai go odami,
—Xadïrï ïxtokana odami ïmo kudakarui kudidakai ïgai. Xadïrï ïmo asaraikïdï iiñana ïgai tudu. Bhaiyoma tïkabi dadasai gobai sai kïïga maaxkana bïïtarï xorai baakiagi ami kiiyïrï. 34Dai gïn bupuji kukudakarui duu gïn tukuga bïïtarï. Dai xi kïkïïgadukagi gïn bupuji aidï gia ïr ïpïan dukami aapimï ïmo tukabi xako kïï oidaga kudagi. Ami kïï maaxi bïïxi ixtumaxi tudu. Dïï gia ix mai kïkïïgadukagi gïn bupuji aidï gia tukamuga maaxkana bïïxi ixtumaxi gïn bïïtarï.
35Daiñi, ixtumaxi ïr buaboi ïmo kudagi gï duu gïr ibhïdaga bïïtarï dai ixtumaxi maiti ïr buaboi gobai ïr tukagi duu. Kïïga abïr gïn nukada tudu, tadu kudagi duu nïijada aapimï gobai ix makïdï maiti ïr buaboi. Gïn nukadabïrai ix mai buaboituda aapimï yaatagi tudu. 36Ix buaboitudada aapimï ixtumaxi ïr buaboi aidï gia kïïga kudakan maaxkamu bïïxi aïkatai gïn bïïtarï. Mai tipukamu tukagi gïn bïïtarï tudu. Ïpïamaaxkamu aapimï ïmo tukabi xako kïï oidaga kudagi. Kïïga maaxkamu bïïxi ixtumaxi gïn bïïtarï tudu— itïtïdai.
Suxi bhagakarai go fariseos
37Daidi natokai Suxi go aatagi sai ïmo fariseo báí kiidïrï sai ugana ïgai ïmadï. Dai jii go Suxi dai mesa buidïrï daiba. 38Dai go ix makïdï baitadai gï tïgito nïidi ix go Suxi mesa buidïrï daiba mai kia gï ikomakai ix dukatai gïn bidaka go fariseos dai mai tïtïgaitadai ixtumaxi gï tïgitoagi nïiditai.
39Daidi go Suxi aagidi ïmo ñoki aagaitai iibhïadï go fariseos dai potïtïdai,
—Aapimï fariseos kïïga ïïgiada ïrhidi gïn bituldaraga dai kïïga bakuanai asta gïn ajasokorhi daamanagadï ïïgiditai gobai. Dïï gia ïpïamaaxi aapimï ïmo asokorhi xiïpï ïmo tasa ix makïdï kïïga buañixika maaxi daamanagadï dïï gia tukuraga ïrabiadïrï. Kïïga buanai aapimï gïn tukuga tudu ïïgiditai gïn bituldaraga dïï gia tukuraga gïn ibhïdaga kia mukimudadï tutiakatai aapimï dai biakatai aapimï naana maaxi soimaaxi tïgibudagai gïn ibhïdagïrï. 40Aa gia pupuiruga aapimï. ¿Maiti mïx maatï sai Diuxi idui gïr tukuga ix makïdï nïidi aatïmï dai idui ïgai gïr ibhïdaga ïpï ix makïdï mai nïidi aatïmï? Kaxkïdï xi xadutuada ïrhiada aatïmï Diuxi gï agai xi buañixikagi gïr ibhïdaga ïpï dai mai xu xi mosïkaxi gïr tukuga. 41Buanabïrai gïn iibhïdaga tudu óíditai soiñi soi titiigami. Aidï gia kïïga buañixikamu aapimï asta gïn ïrabiadïrï bïïxi— itïtïdai.
42—Agia soimaaxi taatamu aapimï fariseos gïn aïkai gïgïbidaragai— itïtïdai. —Daiñi, kïïga ïr buaboi sai bïïxi ixtumaxi buiyagi aapimï óídiña aapimï lïïlïchi Diuxi dai kïïgadu gobai. Asta óídiña aapimï lïïchi gïn yooba ibagi toma xïï lïïchi yoobagi aapimï. Kïïga gï agai xi pobuadagi aapimï tudu. Dïï gia gajiadïrï biayi aapimï ixtumaxi bamioma gï agaitadai xi ibuadagi. Mai tïgito aapimï sai gï agai ïpï xi oigïdada aapimï Diuxi dai xi sïïrhi ibuadagi jaa odami bui— itïtïdai.
43—Daiñi aapimï fariseos, sïïrhikïdï ojoidi xi go kïïgadukïdioma daikaruana daraibagi xïxkadï kiupiana bapakïdagi aapimï. Dai ojoidi aapimï ïpï xi kïïga gïn xadutudaitai gïn biatuldagi odami xïïxkadï gïn tïïgiagi kaiyana— itïtïdai. 44—Aa gia soimaaxi taatamu aapimï tudu. Daiñi, aapimï kïïga buañixikami maaxi dai maiti ïr buaboi. Bhaiyoma tukuraga aapimï gïn ïrabiadïrï. Ïpïan dukami aapimï xakoga yaasapi koidadï dai odami daama dïgabuskïiña mai maatïkatai xïï galnaaxi uta. Pomaaxi aapimï gïn ïrabiadïrï tudu. Soimaaxi gïn ibhïdaga— itïtïdai.
45Daidi ïmo kïïrhi tïtïgiadami sïïrhikami ix makïdï ami dakatadai mai bhai ïrhi kaïkatai ñokidï go Suxi daidi potïtïdai,
—Aapi Suxi gïr mamaatïtuldiadamiga, arhiï galkaiti aapi gïr bui. Aatïmï ïpï gïr aagadankaiti aapi aagaitai go fariseos di— itïtïdai.
46—Ïjï— itïtïdai Suxi. —Aapimï ïpï kabami soimaaxi taatamu gïn aïkai gïgïbidaragai ïpï. Daiñi, tïanïiña aapimï odami sai ïïgiada ïgai naana maaxi sïïrhikami xijiakami. Ïmo bïïtïkami kusubi duu taatakana odami ixtumaxi tïanïiña aapimï. Mai nanakogai ïgai tudu dai aapimï toma lïïchi mai soikïi sai mai bïïtïkana ïgai bïïtarï— itïtïdai.
47—Agia kabami soimaaxi taatamu aapimï— itïtïdai. —Daiñi, kïïga bhai buayi aapimï ami xako yaasapi go ñiñokituldiadamigadï Diuxi ix makïdï gïn koditu ïïki. Pobuayi aapimï ipïrhiditai sai odami pokaitadagi sai kïïga xadutudai aapimï go ñiñokituldiadamigadï Diuxi. Dïï maiti ïr buaboi. Mai xadutudai aapimï tudu. 48Dai bhaiyoma kïïga maatï aapimï ïïgi gïn iibhïdagïrï sai ïpïan tutuiga aapimï gïn ïïki aaduñi ix makïdï koi go ñiñokituldiadamigadï Diuxi. Bhai buayi aapimï xako yaasapi go ñiñokituldiadamigadï Diuxi tudu dai podukai gamamaaxidi aapimï sai kïïgadu ïrhidi aapimï ixtumaxi idui gïn aaduñi ïïki kodatai ïgai. Mai xadutudai aapimï go ñiñokituldiadamigadï Diuxi toma lïïchi di— itïtïdai.
49—Kaxkïdï Diuxi aagai ïmo ñoki ïïki gïn aagaitai aapimï— itïtïdai. —Diuxi ikaiti sai,
—Otosdamu aanï mui gin ñiñokituldiadamiga dai gin ojotosa dai kodamu aapimï jaa dai jaa soimaaxi taatatulda agai aapimï— ikaiti Diuxi—.
—Bïïxi aïkatai maatï Diuxi tudu dai podukai aagai. 50Kaxkïdï aapimï xibi óídakami taata agai gïgïbidaragai. Ka buatulda bii aapimï Diuxi kodatai aapimï bïïxi go ñiñokituldiadamigadï ix makïdï gïn koditu ïïki abhiadïrï. Ix makïdï gïn koditu aidï abhiadïrï xi kïkiba oidigi tudu. 51Go Abelkaru ïgai dai gï muatu ïpïgioma dai gokiïrï jaa mui gïn koditu ïpï asta aidïxi ukami gï muatu go Zakariaskaru. Ïgai ix makïdï muu go gïï kiupai tuixikigadïana tudu. Ami xako gï muatu ïgai ïmo padïrï kïïka go gïï kiupai dai ïma padïrï kïïka go dadaxdakarui dai ami ïrana gïi ïgai. Dai aanï aagai sai aapimï po ïrhidi sai kïï idui gïn aaduñi ïïki kokai ïgai go ñokituldiadamigadï Diuxi dai kaxkïdï aanï aagai ïpï sai buaturhi aapimï Diuxi bïïxkatai ïgai ix makïdï gïn koditu— itïtïdai Suxi.
52—Agia soimaaxi taatamu aapimï tïtïgiadami sïïrhikami— itïtïdai. —Kaxkïdï tudu sobhikïi aapimï odami ix mai maatïkagi ïgai ixtumaxi ïr buaboi. Ïpïan buayi aapimï ïmo odami ix makïdï maigobai daitudagi yabe ixtukïdï bakiagi ïmoko xakoga gï mamaatïrïi ixtumaxi ïr buaboi dai gokiïrï ka mai bhaigakana ïgai ixdukatai bapakïdagi tomarhi ïgai dai tomarhi jaa ïpï. Pobuayi aapimï sobhikïitai aapimï jaa ix mai maatïkagi ïgai ixtumaxi ïr buaboi— itïtïdai Suxi.
53Dai bhodïrï ka imïimitadai Suxi abhiadïrï. Dai go tïtïgiadami sïïrhikami ïmadï go fariseos bhakoi Suxi bui dai tïkakai naana maaxi ixtumaxi. 54Nïida ïrhiditadai ïgai sa bhai mai aagana Suxi ixtumaxi go fariseos buaboidaradï bui. Gïpiïrï buaja ïrhiditai ïgai Suxi kaxkïdï.
Currently Selected:
Lukas 11: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida