Lukas 12
12
Suxi aagidi go mamaatïrdamigadï sai maiti gï agai xi ïïgi gï dadasdagi ïmoko sai kïï buañixi ibhïadï
1Daidi kia gamaamakaitadai Suxi aatagi dai sïïrhikïdï mui odami gïn ïmpagi ami xako dakatadai ïgai dai asta aipakoga gïn nïituskimi ïgai mos go muidukatai. Daidi Suxi aagidi ïmo ñoki go mamaatïrdamigadï ami go gaa odami saagida gukakatai ïgai daidi potïtïdai,
—Gïn tïgito abïr nïida dai mai oijada tïgibudadï go fariseos. Ïgai ïïgi gïn dadasai saidi ïr kïï buañixikami dai maiti ïr buaboi. Xako nïijadagi jaa gia kïïga ibuayi ïgai dïï gia xako mai nïijadagi jaa mai kïïga ibuayi. Gobai ïr tïgibudadï go fariseos dai bïïxi ixtumaxi ibuadagi ïgai sarabidi pomaaxi tïgibudagai. Maiti abïr gïn dagito tudu xi go tïgibudagai gobai sarabidagi aapimï gïn aaduindaga ïpï. Kaxkïdï tudu ïpïan dukami ibuayi gobai ïmo kopodatudakarui tuiyi ix makïdï bïï sudakami ïmo tuiyi saagida bapakïi. Podukai ibuayi go tïgibudadï go fariseos ïpï. Maiti gï agai tudu xi ïïgiada aapimï go tïgibudagai gobai.
2Daiñi, tomaxi ïxtokikagi ïïmo ixtumaxi ix makïdï ibuayi odami xibi dïï gia ayimu ixtuigako bïïxi gï maaxiulda agai gobai. Tomaxi jaa mai maatïkagi ixtumaxi ibuadagi ïmoko gokiïrï gia kïïga maatïkamu ïgai bïïxi gobai. 3Kaxkïdï tudu bïïxi ixtumaxi aagadagi aapimï ïxtokikami dukai sai jaa mai kaïkana, gobai gï kaidatudamu bïïxi odami buitapi. Dai bïïxi ixtumaxi aagadagi aapimï duudusurhi dukai tukabi kuupikatai gobai gï kaidatudamu xako bïïxi óídakami kaïkamu— itïtïdai Suxi go mamaatïrdamigadï.
4—Gin aaduñi— itïtïdai. —Kaïkabïrai ixtumaxi gïn aagidamu aanï. Gïn aagidamu aanï xorai ïgai dai gï agai xi ïbhiadagi aapimï kabami gubuakamikatai ïgai. Ïbhiadabïrai Diuxi tudu. Daiñi, odami mai xi bia gubukarhigai. Kïïga ixtutuidikïi ïgai xi kodagi gïn tukuga dïï gia gokiïrï ka mai bhaiga ïgai xi bamioma soi gïn buadagi. Kaxkïdï maiti gï agai xi ïbhiadagi aapimï odami. 5Dïï Diuxi gia kabami gubuka. Bia ïgai gubukarhigai xi kodagi odami dai xi taiyïrï surhigiagi iibhïadï ïpï ka kokai tukugadï. Diuxi tudu ïgai dai gï agai xi ïbhiada aapimï kïï gubuakamikatai ïgai.
6Daiñi, Diuxi kïï maatï asta ix gïn buadagi go boutï. Taama boutï mos arhi goka tuminxi namïga dai Diuxi bïïxkïrï kïïga tïtïitoi ïgai dai nukadakana. 7Dai aapimï gïïpi bamioma namïga Diuxi bïïtarï xi bhai go boutï di. Asta kïïga maatï Diuxi xïïkidu gïn kuupa gïn moana mos ïï kïïga gïn nukadatai ïgai. Kaxkïdï abïr mai duduadikudagi ix tumaxi daibuñagi— itïtïdai.
8Daidi Suxi oi aatagidï dai potïtïdai ïgai mamaatïrdamigadï,
—Daiñi— itïtïdai. —Aanï ïr otosadï Diuxi ix makïdï ïmo kïïrhi busai dai aanï pokaiti sai xorai maaxiko aagadagi jaa buitapi ix gin buaboitudai, aanï ïpï maaxiko aagadamu Diuxi tïtïañikarudï buitapi xi ïgai gin buaboitudai. 9Dïï gia xorai pokaitadagi jaa buitapi ix maiti gin buaboitudai aanï ïpï pokaitadamu sai ïr buaboi ix maiti gin buaboitudai. Pokaitadamu aanï Diuxi tïtïañikarudï buitapi tudu— astïdai.
10—Dai aanï aagai ïpï sai tomaxi aanï ïr Diuxi otosadï ix makïdï ïmo kïïrhi busai bïïxkïrï Diuxi bhaiga xi oigïrhiadagi xorai soimaaxi ñokadagi in bui. Dïï gia xi soimaaxi ñokada ïgai Diuxi Ibhïadï bui aidï gia Diuxi ka mai oigirhiadamu ïgai— itïtïdai.
11—Gin aaduñi— itïtïdai. —Diuxi Ibhïadï ïgai dai gïn soiñamu xïxkadï dudunukamiïrï gïn baan tutusatudagi jaa. Mai xudu xi baan gïn tutusatudagi ïgai gubukadagai bipiakami buidïrï ami go judidiu kiupaigadïrï xiïpï xi jaa dudunukamiïrï no xibhïkai ïpï. Maiti abïr buamï gïn ïrhiada ix tïiyagi aapimï tomarhi ix dukatai gïn soikïdagi ami dudunukamiïrï. 12Kaxkïdï tudu xïïxkadï kaxi ami buitapi gukakagi aapimï aidï Diuxi Ibhïadï gïn tïïgidamu ixtumaxi gï agai xi aagidagi aapimï— itïtïdai Suxi go mamaatïrdamigadï.
Suxi aagai ïmo maaxidaragai aatagi aagaitai ïmo gï bidakami
13Daidi ïmo kïïrhi ix makïdï ami kïakatadai go gaa saagida potïtïdai go Suxi,
—Aapi gïr maatïtuldiadamiga, gin soiñañi dai aagida gin xiixi sai gin maakana gin buxtuidaga ix makïdï gin ajïga gin ogakaru buxtuidadïañdïrï— itïtïdai.
14Dai Suxi potïtïdai,
—Aapi kïïrhi, maiti ïr gin aaduindaga gobai xi gïn aagidagi aanï ix tumaxi gïn ajïga gïn oga buxtuidadïañdïrï. Maiti ïr dunukami aanï di— itïtïdai.
15Daidi bhodïrï potïtïdai Suxi go gaa,
—Gïn nukadabïrai dai mai koimudadï tutiaka tomarhi ïmo ixtumaxikïdï. Daiñi— itïtïdai. —Tomaxi kïïga gï bidakagi ïmo odami gobai mai itïiya ïrhidi sai kïïgakïrï oidaka agai— itïtïdai.
16—Xibi gïn aagidamu aanï ïmo maaxidaragai aatagi sai maatïkana aapimï ix dukatai maaxi gobai— itïtïdai Suxi. —Ïmo imidagai sai oidakatadai ïmo kïïrhi kïïga gï bidakami dai dïdïbïradï kïïga bhai buadana ïxikami. Kïï gïïpi yoobaiña ïgai ïxikami tudu. 17Daidi ïmo imidagai ka mai tïtïgaitadai ïgai xako bhai tuagi yoobadï mos ïï gïïpikatai gobai. Daidi as ïrhidi ïgai,
—Dukatai iduna aanï xibi— gï ïrhidi ïgai. —Go trojos xako bhai tuajaiña aanï gin yooba ka mai ajïga— gï ïrhidi. 18—Aa ka máí aanï ixdukatai iduñagi. Surhigimu aanï go arhi trojos dai gïgïrdukamioma iduñimu— gï ïrhidi.
19Dai ka podui ïgai. Dai bhodïrï gï ïrhidi ïgai sai,
—Xibi gia kïïga biakamu aanï bïïxi ixtumaxi tïgitomu aanï mui umigi bïïtarï. Xibi gia mos dakatai gakuadamu aanï dai gayïdamu dai kïïga bhai gin ïrhiadamu— gï ïrhidi ïgai.
20Dïï gia Diuxi potïtïdai go kïïrhi aidï,
—Aa gia ïr buirugami aapi kïïrhi— itïtïdai. —Daiñi— itïtïdai. —Xibi tukarï mukimu aapi dai aidï gia ¿Xorai bïïtarï bimu gï buxtuidaga?— itïtïdai Diuxi go gï bidakami.
21Podukai buirgami busai ïgai mukiñdadï tuigakatai. Dai pomaaxi ïpï toma xorai ix makïdï mui naana maaxi ixtumaxi bhai tuajidagi ïïgi gï bïïtarï ix makïdï kïïga namïakami aagai ïgai dïï gia mai bia ixtumaxi Diuxi namïakami aagai— itïtïdai Suxi.
Suxi gamaa ïmo ñoki aagaitai go tuminxi ïmadï odami buxtuidadï
22Daidi bhodïrï Suxi potïtïdai mamaatïrdamigadï,
—Gin aaduñi— itïtïdai. —Maiti gï agai xi ïpïan tutiakagi aapimï ïgai ix makïdï ïïgi gï buirutu mukiñdadï tuigakatai. Kaxkïdï gïn aagidi aanï mïsai mai buamï gïn ïrhiadagi ix biakagi ixtukïdï oidakagi. Maiti abïr buamï gïn ïrhiada ixtumaxi ugiagi ïmadï gïn yukuxikïdï ixtumaxi gïn aadagi tudu— itïtïdai.
23—Daiñi— itïtïdai. —Kaxi gïn maa Diuxi gïn ibhïdaga ïmadï gïn tukuga dai gobai gïïpi bamioma namïga xi bhai go kuadagai xiïpï go yukuxi. 24Dai gïn tïgito abïr nïijada ix dukatai óídaga go kookoñi ïpï. Ïgai maita gaïsai tomarhi mai gayobai ïpï dai mai bia trojogadï xako bhai tuadagi kuadagai. Diuxi ïgai dai nukadai kaxkïdï. Dai aapimï gïïpi bamioma namïga xi bhai go kookoñi. Xadïrï maiti gïn nukadana ïgai aapimï ïpï di— itïtïdai.
25—Gin aaduñi, Diuxi kïï maatï xïï tïbïpi óídaka agai aapimï. ¿Dai bhai ix ixtutuidikïiña aapimï xi parï ïmo hora tïbïpioma oidakagi kabami buamï ïrhiditai gokïdï? Xadïrï. Daiñi, mai bhaiga aapimï xi buamï gïn ïrhiditai ïmo hora tïbïpioma óídakagi tomaxi ïmo hora sïïrhikïdï ïr lachi. 26Dai ix maiti ixtutuidikïi aapimï xi ïmo hora tïbïpioma oidakagi buamï gïn ïrhiditai, ¿Ix tuixi buamï gïn ïrhidi aapimï ïma maaxi ixtumaxikïdï? Maiti gï agai xi buamï gïn ïrhiadagi tudu— itïtïdai.
27—Gïn tïgitobïrai ix dukatai Diuxi nukadai go yooxigai. Go yooxigai tomarhi mai aatabuayi dai maiti ibuayi yukuxi dai bïïxkïrï kïï titiodi ïgai. Daiñi, go rey Solomon kabami ïr gïdukïdïkana dïï bïïxkïrï yukuxidï mai bamioma kïï tiodikana xi bhai go yooxigai. 28Go yooxigai mosïkaxi parï chïki tasai gukakana oidigana dai todian dukai gï mïmïidiña ïgai mai xii namïakatai ïgai. Mai xii ïr ixtumaxi namïakami ïgai tudu dïï bïïxkïrï Diuxi kïï titioditudai ïgai. ¿Dai mai ix gïïpi bamioma namïga aapimï xi bhai go yooxigai? Ïjï tudu. Kaxkïdï gï maatï sai kïïga gïn nukadakamu Diuxi. Dïï bïïxkïrï naana maaxikïdï buamï gïn ïrhidi aapimï. ¿Ix tuixi mai kïïga buaboitudai aapimï Diuxi bhaiyoma di?— itïtïdai.
29—Maiti abïr buamï gïn ïrhiada ixtuma ugiagi dai ixtuma iiyagi tudu. 30Daiñi, bïïxi go gaa óídakami ix makïdï mai buaboitudai gobai bïïxkïrï mos pomaaxiïrï gïn tïtïitoiña. Dïï gia aapimï gia bia Diuxi gïn Oga ix makïdï gïn nukadai dai ïgai kïï maatï ixtuma tïgito aapimï. 31Buamï gïn ïrhiada bhaiyoma ix Diuxi gïn tïanïna dai ïgai gïn maakimu bïïxi ixtumaxi gï agadagi gïn oidakaraga bïïtarï. 32Aapimï arhi kañiñiru duu dai Diuxi sosoigadï kaxkïdï maiti abïr buamï gïn ïrhiada. Chïkidu aapimï dïï bïïxkïrï ïr ïmo bhai ïrhiaragai Diuxi bïïtarï gïn maakaitai ïgai oigaragai xi ïgai gïn tïanïdagi— itïtïdai Suxi go mamaatïrdamigadï.
33-34Dai Suxi potïtïdai ïpï,
—Daiñi gin aaduñi, xako bhai darasada aapimï ixtumaxi aapimï namïakami ïrhidi, ami gïn tïtïitodamu aapimï. Kaxkïdï abïr gagara mïx tuma biakagi bhaiyoma dai oida go tuminxi go soititigami. Aidï gia biakamu aapimï ïmo tuminxi bhai tuakaru dukai tïbagiana ix makïdï tomarhi ïmo imidagai mai ugiti agai. Dai Diuxi ami darasamu naana maaxi ixtumaxi namïakami gïn bïïtarï ix makïdï tomarhi ïmo imidagai mai ugitimu ïpï. Ami gia mai xia gï buayi ixtumaxi namïakami. Mai bapakïi ïïxibogami ami tudu dai mai tipu batopadagai ixtuma xia duadiagi ix makïdï biakagi aapimï ami— itïtïdai.
Suxi potïtïdai mamaatïrdamigadï sai gï agai xi bhai gïn dukagi ïgai xïïxkadï dibiagi Suxi ïpamu
35-36Daidi Suxi potïtïdai ïpï,
—Gin aaduñi, imimu aanï tabhiadïrï dai gokiïrï ïpïan dibiamu dai mai maatïkamu aapimï xuduku dibiamu aanï. Gï agai tudu xi bhai gïn dukagi toma xuduku. Kïï maatï aapimï sai xïïxkadï ïmo ga amu imiagi kiiyañdïrï ïmo kunataragiana sai gï agai pipioñigadï xi bhai gïn dukagi mai maatïkatai xuduku dibiamu ïpamu. Asta tukarï bïïxi gï agai xi gïn aadakagi ïgai yukuxi tudu dai xi kudidakagi kudakarudï sai bhaigakana ïgai xi otoma kupiokagi kitaagiña xïïxkadï aiyagi amudï dai taañiagi baakigai. Podukai gï agai xi bhai gïn dukagi aapimï ïpï gin nïnïrakatai— itïtïdai.
37—Daiñi— itïtïdai. —Aanï aagai sai kïïga bhai gïn ïrhiadamu pipioñi ix makïdï mai kokosïkagi xïïxkadï aiyagi amudï. Ix kïïga nïnïasïrhikagi ïgai aidï gia amudï ïïgi bhai gï duñimu aaduindagai bïïtarï dai aagidamu go pipioñi sai daraibana dai bhodïrï bhibhidamu ïgai. 38Kïïga ïr bhai ïrhiaragaikamu tudu pipioñi bïïtarï ix makïdï nïnïasïrhikagi xïïxkadï dibiagi amudï tomaxi ïran tukarï ïxi dibiagi ïgai xiïpï xarhimodï ïxi— itïtïdai Suxi go mamaatïrdamigadï.
39Dai Suxi potïtïdai ïpï,
—Gï agai xi kïïga nïnïasïrhikatai gin nïnïrakagi aapimï tudu xïïxkadï aiyagi aanï. Daiñi, ïmo oidakami ïmo kiiyïrï xadïrï kosokana ix maatïkagi ïgai sai ami ayi agai ïmo ïxibugami. Nïnïasïrhi dakana ïgai bhaiyoma dai mai daadagitoiña ïgai ïxibugami xi bakiagi sai mai popoidagi ïgai buxtuidadï. 40Podukai tudu gï agai xi gin nïnïrakagi aapimï ïpï aanï ix makïdï ïmo kïïrhi busai dai ïr otosadï Diuxi. Podukai abïr gin nïnïraka mai maatïkatai xïïxkadï ayimu aanï— itïtïdai.
41Daidi go Piduru potïtïdai aidï,
—Aapi gïr mamaatïtuldiadamiga, ¿Borai bïïtarï idi maaxidaragai aatagi aagaitai aapi go pipioñi? ¿Aatïmï gï mamaatïrdamiga gïr bïïtarï xi gobai? ¿Jaa bïïtarï xio?— itïtïdai.
42Dai Suxi potïtïdai,
—Go ñoki gobai ïr toma xorai bïïtarï ix makïdï ïr pipioñikagi duu kïïga ïïgidarakan tuigakami dai biakami kïïga tïgibudagai. Daiñi, ïmo ga amu ix makïdï muidukagi pipioñigadï xïxkadï xibhï imi agadagi gaagaiña ïmo pioñigadï ix makïdï kïïga ïïgidarakagi dai ix makïdï kïïgadu tïgibudadï. Dai tïïgakai ïgai ïmoko pomaaxkami nukaturhiña ïgai go gaa pipioñi sai nukadakana ïgai dai sai bhibhidiña xïïxkadï gï agadagi— itïtïdai. 43—Dai xi go pioñi kïïga nukadakagi go gaa pipioñi amudï bïïtarï aidï gia bhïimu ïgai ïmo bhai ïrhiaragai xïïxkadï dibiagi amudï. 44Aidï gia amudï maakimu sïïrhikami sai tïanïda ïgai bïïxi xïïxi bia ïgai— itïtïdai Suxi go Piduru.
45—Dïï gia go pioñi ix makïdï go gatïanïdami bii ami kïï bhaiga ix mai kïï buadagi ïpï. Gïgïbi antaada ïgai go gaa pipioñi ïmadï kuxñiñirui tudu po gï ïrhiditai sai mai otoma dibiagai amudï. Ix mai buamï gï ïrhiadagi ïgai ix dibiagi amudï dai bhaiyoma mos gakuadagi dai gayïdagi dai nabaamukagi, 46aidï gia dibiamu amudï xïxkadï go soimaaxi pioñi mai tïgito nïijadagi dai mai nïnïrakagi. Dibiamu ïgai dai kabami gïikarsamu ïgai dai bhodïrï maigobai otosamu xako darakana ix makïdï mai ïïgidarakan tutuiga— itïtïdai.
47—Daiñi, tomax makïdï pioñi ix makïdï maiti ibuayi ixtumaxi amudï ipïrhidi tomaxi kïï maatï ixtumaxi gï agai xi ibuadagi, ïgai kabami taata agai gïgïbidaragai. 48Dïï gia ix makïdï mai kïï ibuadagi mai maatïkatai ixtumaxi aagai amudï, ïgai ïr ajïakami ix taatagi gïgïbidaragai ïpï dïï mai xiu go kaxi. Pomaaxi aatabuayi Diuxi tudu. Daiñi, xi gïïpi maakiagi ïgai ixtumaxi ïmo pioñigadï aidï gia go pioñi gï agai xi gïïpi aa noraidagi gokiïrï. Pomaaxi tudu xorai Diuxi gïïpi nukatuldagi ixtumaxi— itïtïdai Suxi go Piduru.
Suxi potïtïdai mamaatïrdamigadï sai ïgai aagada agai xorai tukuraga ibhïadï dai xorai kïï buañixi dai sai ïjïkobai darasa agai
49Dai bhodïrï oi Suxi aatagidï dai potïtïdai go odami,
—Aanï dibia daituda iñagaitai táí tami oidigi daama. Dai xïïxi ïr kïïgaikamudai ix ka mïjimitadai gobai. 50Dïï mai bhaiga kia. Gï agai xi kabami soimaaxi taatagi aanï kia dai bïïtïkan taadaga gin bïïtarï nïnïrakatai ix bïïxi naato taatagi aanï go soi ïrhiaragai ix makïdï bia aanï xi taatagi kia— itïtïdai.
51Daidi potïtïdai ïpï,
—¿Pobai ix gïn ïrhidi aapimï sai dibia aanï soiña iñagaitai odami sai kïïga xioma uraban dukai óídakagi bïïxkatai? Cho. Daiñi, gïn bupui surhigi agai odami aanïkïdï bhaiyoma. 52Xibi bhaitiakoga asta ïmo kiiyïrï óídakami gïn bupui surhigi agai aanïkïdï tudu. Dukami, xako óídakagi taama óídakami gokatai ïgai gin urabaka agai dai baikatai bui bïïtïka agai. Xiïpï baikatai gin urabaka agai dai gokatai bui bïïtïka agai ïgai— itïtïdai. 53—Aanïkïdï gïn bupui bïïtïkamu go ojogadï ïmadï maamaradï kïkïïrhi. Dai dïïdïdï ïmadï maamaradï oki gïn bupui bïïtïkamu aanïkïdï ïpï. Dai podukai ïpï go gatumu ïpï ïmadï go kaakaxdïïdï gïn bupui bïïtïkamu ïpï aanïkïdï— itïtïdai Suxi.
Po kaiti Suxi sai gï agai go odami xi kïïga maatï nïijadagi ix tumaxi daibuña agai go Suxikïdï
54Daidi potïtïdai ïgai ïpï,
—Daiñi, aapimï kïïga maatï nïnïidi oidigi dai ïïxitudai ix maaxika agai oidigi. Dukami xïïxkadï uruñi amakoga kabami ikomakagi oidigi pokaitiña aapimï sai duduki agai dai kïïga ïïxitudaiña aapimï. 55Dai pokaitiña aapimï sai xïxkadï sur amajadïrï ïbïradagi oidigi pokaitiña aapimï sai toñika agai dai kïïga ïïxitudaiña aapimï ïpï. 56Dai xibi kïïga nïnïidi aapimï ixtumaxi ibuayi Diuxi aanïkïdï dai ¿ix tuixi mai ïïxitudai aapimï ix tuma bïïtarï gobai? Agia pupuiruga aapimï. Mai ïïxitudai aapimï mai maatïka ïrhiditai ix tuma bïïtarï gobai— itïtïdai.
57—Daiñi— itïtïdai. —Gï agai xi kïïga gïn tïgito nïijadagi dai ibuadagi ixtumaxi ïr sïïrhi. 58Dukami, xi buatuldakagi aapimï ïmai dai ïgai dudunukamiïrï gï baan kïsa ïrhiadagi gï agai xi ïpïgioma bhai duñagi ñoki ïgai ïmadï mai kia aïkai aapimï dudunukamiïrï. Tadu gï bhïiyi go dudunukami dai gï tïïgi go sandadaru bai ïgai gï maixagi. 59Xi pobuadagi ïgai aidï gia ka mai busaimu aapi asta xïïxkadï ka naato aa namïki aapi ix makïdï buaturhi aapi di— itïtïdai Suxi go odami.
Currently Selected:
Lukas 12: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida