MATIUS 19
19
Tintiro ngi Yesus hal᷊i u pusasindo
(Mrk. 10:1-12)
1Su tempo ngi Yesus nasue bou nuhabari kaul᷊ie e'e, i Sie nanintang u Galilea bou e'e nakoa sarang Yudea su simbuka ngu sal᷊uhi Yordan. 2Maul᷊i taumata nutumuhu si Sie, dang i Sie nupakaul᷊e ngi sire su se'e.
3Bou e'e manga tau Farisi nusumongo guna ngu mangakal᷊i si Yesus. I sire nukina, “Tumuhu atorang u agama ngi kite, apa botonge manindo kawinge dingang u haghi ngu alasang?”
4 #
Kar. 1:27, 5:2 I Yesus nusumimbahi, “Apa i kumu mborong ta nubasa su l᷊al᷊ung u Buki Susi himoneu Mawu seng bou titae nundiadi taumata ko ese l᷊au kowawine? 5#Kar. 2:24Dang bou e'e I Sie nangul᷊i, ‘E'e sabapie ko ese manintang i mama papange dang masimbau dingang kawinge, bou e'e i sire rua makoa simbau.’ 6Inau I sire wal᷊inge l᷊ai dua ngkatau, kateho simbau. E'e sabapie apang ko seng nipukauhi u Mawu Ruata ta botonge iputal᷊ei ngu taumata.”
7 #
Sau. 24:1-4; Mat. 5:31 Bou e'e manga tau Farisi nukina si Sie, “Boko kere'e apa sabapie i Musa nangoro taumata punggile surati talaki su kawing ko seng nitintange?”
8I Yesus nusumimbahi, “I Musa nupakawala ngi kumu panindo kawing i kumu ual᷊ing i kumu tumaniu susa panintironge. Tuhu hinonge wal᷊inge kere'e bou titae. 9#Mat. 5:32; 1Kor. 7:10-11Raringihite i'i: I sai manindo kawinge – kateho kowawine e'e ta nundea ko ese ko wal᷊inge – bou e'e nusau nukawing dingang kowawine ko wal᷊inge, i sie seng nawuang.”
10Manga tumatuhu I Yesus nangul᷊i si Sie, “Boko pul᷊al᷊ahiking u singkawingang kere'e, mapiang kuhae mukawing.”
11I Yesus nusumimbahi, “Wal᷊inge kaul᷊i u taumata makatarima didato e'e, kitang taumata ko seng nitantu u Mawu Ruata. 12Watu'u pia taumata ko ta mukawing, ual᷊ing i sie seng nipahana kere'e, pia l᷊ai ta makapukawing ual᷊ingu kakakoa u taumata ko wal᷊inge. Pia l᷊ai ual᷊ingu kaoe sisane ta mukawing, tadeau makapuhal᷊i hal᷊i u Mawu Ruata. Taumata ko makatarima tintiro i'i, walate i sie panarima.”
I Yesus nangal᷊amati manga rario
(Mrk. 10:13-16; Luk. 18:15-17)
13Pia taumata numbawa manga rario sarang koa I Yesus tadeau I Sie mamilo l᷊ima-Nge su timbo i sire dang makikaliomaneng i sire. Kuteu manga tumatuhu I Yesus nuwawal᷊uang si sire e'e. 14I Yesus nudidato su manga tumatuhu-E, “Walate kere manga rario e'e pasongo su koa-Ku! Ariwe panahaghe si sire, watu'u taumata kere i sire e'e makoa umati Mawu Ruata.”
15Bou e'e I Yesus namilo u l᷊ima-Nge su timbo u manga rario e'e dang nangal᷊amati si sire. Mbuhue i Sie nul᷊umal᷊eng bou e'e.
Tau umbaseng ko kala
(Mrk. 10:17-31; Luk. 18:18-30)
16Pia su silou singkatau ko ese nusumongo sarang koa I Yesus. “Tuang Guru,” angkunge, “Kakanoa mapia kirapa ko hino ngu daku koateng tadeau makatarima puwawiahi kahingang dang kakal?”
17I Yesus nusumimbahi “Nakurawe i kau mukina si Sia hal᷊i ko mapia? Kitang pia simbau ko mapia. Boko i kau mo muwiahi, i kau mambeng tuhu manga parenta ngu Mawu Ruata.”
18 #
Sasu. 20:13-16; Sau. 5:17-20 “Parenta sude e'e?” kakina u tau e'e.
I Yesus nusumimbahi, “Kumbahang mamate, kumbahang mawuang, kumbahang manako, kumbahang mul᷊eo, 19#Sasu. 20:12; Im. 19:18; Sau. 5:16pangadati si papangu l᷊au si mamangu, dang kindaghite sinsul᷊ungu taumata, kere i kau mukumindaghi watangengu sisane.”
20“Kaul᷊i u parenta e'e seng daku nituhukang,” nisimbahi tau ko makuda e'e. “Apa l᷊ai mborong?”
21I Yesus nangul᷊i si sie, “Boko i kau mo wiahiu matimu, dakoko wal᷊u apang rarotongu. Pahia doi e'e su tau ko susa, dang i kau sarung makahombang kakakala su sorga. Bou e'e, maite tuhu si Sia!”
22Nakaringihi didato e'e, tau umbaseng e'e nul᷊umal᷊eng dingang susa ngu naunge watu'u i sie napene rarotonge.
23Bou e'e I Yesus nangul᷊i su manga tumatuhu-E, “Ia mangul᷊i si kumu, tumaniu matital᷊i tau ko kala makoa umati Mawu Ruata. 24Dang i'i l᷊ai ko Daku iul᷊i si kumu, mborong mapiang simbau onta sumu su l᷊ohang u rarahung, bou singkatau ko kala sumu su Kararatuang u Mawu Ruata.”
25Suapang manga tumatuhu-E nakaringihi didato Ngi Yesus e'e, i sire naherang. “Boko kere'e,” angkung i sire, “Ko i sai wue botonge masal᷊amati?”
26I Yesus nutuhung si sire, mbuhue nangul᷊i, “Su taumata, e'e ta mariadi! Kitang su Mawu Ruata, kaul᷊ie mariadi.”
27Bou e'e i Petrus nangul᷊i, “Tuhungete i kami seng nanintang u kaul᷊ie watu'u tumuhu si Tuang. Dang apa ko sarung ikarea i kami?”
28 #
Mat. 25:31; Luk. 22:30 I Yesus nangul᷊i si sire, “Pangimangte: Su Dunia ko Wuhu, Ahusi Taumata sarung kumangiang su kadera ko mawantughi. Su tempo e'e i kumu manga tumatuhu-Ku sarung kumangiang su kadera ko mawantughi mapul᷊odua dang mamonesi si sire mapul᷊odua hintou ngu Israel! 29Dang manga taumata ko seng nanintang u wal᷊e arako ana u singkataunge ko ese arako kowawine, arako i mama papange, arako anae arako awuhie ual᷊ing u Ia, taumata e'e sarung makarea pakamahasu su sul᷊enge. Dang i sie sarung manarima l᷊ai puwawiahi ko tutunge dang ko kakal. 30#Mat. 20:16; Luk. 13:30Kateho maul᷊i taumata su orasi i'i kahimotongange sarung makoa ko kasamuriange dang ko su orasi i'i kasamuriange sarung makoa ko kahimotongange.”
Currently Selected:
MATIUS 19: PLT
Highlight
Share
Copy
Want to have your highlights saved across all your devices? Sign up or sign in