MATIUS 20
20
Papinintu mul᷊ahal᷊i su awuhi anggori
1“Boko Mawu Ruata mamarenta, kakakoae musul᷊ung u papinintu i'i: Pia singkatau tataghuang u awuhi anggori nusumuwang mborong mal᷊ukari mundea taumata puhal᷊i su awuhi anggori. 2Suapang i sie nukumire mamaehi si sire doi sal᷊aka simbau silou, i sie nuparenta si sire puhal᷊i su awuhi anggori. 3Pukul᷊i sio mal᷊ukari, tataghuang u awuhi e'e sau nul᷊umal᷊eng, dang nakawua pirangkatau taumata kapul᷊ambaehange su pasari. 4Bou e'e i sie nangul᷊i si sire, ‘Dako i kumu tarai puhal᷊i su awuhi anggoriku. I kumu sarung makarea wawaehi ko mutatahino.’ 5I sire natarai. Pukul᷊i mapul᷊odua kal᷊ihae l᷊au pukul᷊i tatilu wawul᷊aeng, tataghuang u awuhi e'e, nusau nusumuwang nukoa hal᷊i ko musul᷊ung. 6Patehang manga pukul᷊i l᷊ima wawul᷊aeng, i sie nusau nusumuwang dang nakawua mborong pia ko kapul᷊ambaehange. I sie nukina si sire, ‘Nakurawe i kumu kararisi turusi sil᷊ou matiwatu su si'i takoae hambaki kumu?’ 7I sire nusumimbahi ‘Takoae ko mupuhal᷊i si kami.’ ‘Boko kere'e, angkung u tataghuang u awuhi e'e, dakoe i kumu tarai puhal᷊i su awuhi anggoriku.’
8 #
Im. 19:13; Sau. 24:15 Nawawul᷊aeng, tataghuang u awuhi anggori e'e, nangul᷊i su mandorie, ‘Kuieko apang mul᷊ahal᷊i dang waehi doi ngi sire simbau-simbau, manita bou ko nusumu nuhal᷊i kasamuriange sarang ko kahorokange.’ 9Bou e'e nasongo apang mul᷊ahal᷊i ko nuhal᷊i nanita bou pukul᷊i l᷊ima wawul᷊aeng. Pusingkatau i sire nanarima doi sal᷊aka taha pusimbau. 10Tuhue nasongo l᷊ai mul᷊ahal᷊i ko niwaehang mborong mal᷊ukari. Su naung i sire i sire makatarima doi lebe. Kateho i sire l᷊ai mang kitang nionggol᷊ang doi sal᷊aka e'e taha pusimbau. 11Su tempo ngu nanarima doi e'e i sire nukunori su tataghuang u awuhi e'e: 12‘Manga mul᷊ahal᷊i ko nusumongo samuri kitang nakapuhal᷊i singkaorasi. Arawe i kami nuhal᷊i silou matiwatu wati-wati su titi, kateho i Tuang namaehi si sire musul᷊ung si kami!’ 13Tataghuang u awuhi e'e nusumimbahi su singkatau bo i sire, ‘Anu, ia ta nunsal᷊a si kau. Wal᷊ingewe i kau seng nukumire manarima doi sal᷊aka simbau wawaehi muhal᷊i silou? 14Al᷊ate l᷊uangu, dang kapul᷊e'e. Ia sisaneku mo mangonggo su taumata ko nusumu nuhal᷊i samuri e'e wawaehi musul᷊ung ko kere daku nionggo si kumu. 15Apa ia ta wotonge mukoa kaoku sisaneku su rarotongku? Arako i kumu mananoi, ual᷊ingu ia mal᷊ondo?’ ”
16 #
Mat. 19:30; Mrk. 10:31; Luk. 13:30 Bou e'e I Yesus sau nangul᷊i, “Kere'e l᷊ai taumata ko samuri sarung makoa ko kahorokange, dang ko kahorokange sarung makoa ko kasamuriange.”
I Yesus su katilunge nuhabari papate-Nge
(Mrk. 10:32-34; Luk. 18:31-34)
17Su tempo ngi Yesus kal᷊al᷊enge sarang Yerusalem, su l᷊al᷊eng I Sie nukumui tumatuhu-E i sire mapul᷊odua pukomol᷊i sire ha. Bou e'e I Sie nangul᷊i si sire, 18“Raringihi! Orasi i'i i kite makoa sarang Yerusalem. Pai se'e Ahusi Taumata sarung isarakang su tumbonang u manga imam dang manga meteri agama. Bou e'e I Sie sarung manarima hukumang papate, 19bou e'e mbuhue isarakang su umati ko wugha ngu Mawu Ruata. I sire sarung muhinakang si Sie, mamahang si Sie dang munggantong I Sie. Kateho su l᷊ou katilunge, I Sie sarung sau ipuwangung.”
Ndo i mama ngi Yakobus sire rua ngi Yohanes
(Mrk. 10:35-45)
20Bou e'e kawing i Zebedeus nusumongo dingang u manga anae sarang koa I Yesus. Su saruang I Yesus i sie nusuba ual᷊ingu pia ko ipundokange.
21I Yesus nukina, “Apa kao u?”
I mama ngi sire rua e'e nusumimbahi, “Ia mo tadeau anaku darua i'i makaiang singkatau su kuihi dang singkatau l᷊ai su kuaneng I Tuang boko I Tuang mamarenta kere Ratu”
22“I kumu wugha apang ko nipundokang i kumu.” I Yesus nangul᷊i si sire. “I kumu makatanggong manginung bou panganginungang u singsara ko mambeng Daku inungang?”
“Makatanggong,” sasimbahi sire.
23I Yesus nangul᷊i, “Tingari i kumu sarung manginung bou cawang-Ku. Kateho su hal᷊i i sai ko sarung kumangiang su kuihi l᷊au su kuaneng-Ku, e'e wal᷊ingewe haki-Ku manantu. Apang tampa e'e seng guna ngu taumata ko seng nitantu I Yamang-Ku.”
24Su tempo i sire mapul᷊o tumatuhu-E ko wal᷊inge nakaringihi hal᷊i e'e, i sire nuwawal᷊uang si sire rua tamahuari e'e. 25#Luk. 22:25-26Ual᷊ingu e'e, I Yesus nukumui si sire kaul᷊ie mbuhue nangul᷊i, “I kumu matitong manga tumbonang u wanua ko wugha ngu Mawu Ruata, mul᷊inda ana u kawanuange. Dang apang ko l᷊al᷊abo su tal᷊oara i sire sarung manira si sire. 26#Mat. 23:11; Mrk. 9:35; Luk. 22:26Arawe i kumu tawe wotonge kere'e. Taumata ko mo mutingkakoa ko l᷊abo su tal᷊oara i kumu, mambeng makoa paparentangu. 27Dang taumata ko mo mutingkakoa kahimotongange su tal᷊oara i kumu, mambeng makoa l᷊angu. 28Musul᷊ung u l᷊ai Ahusi Taumata e'e; i Sie nusumongo wal᷊ingewe tadeau makital᷊ung, kateho tadeau mutal᷊ung, dang manarakang u badang-E guna ngu mul᷊iwiri taumata ko maul᷊i.”
I Yesus nupakaul᷊e ngu tau ko wuta sire rua
(Mrk. 10:46-52; Luk. 18:35-43)
29Su tempo ngi sire nanintang u Yerikho, maul᷊i taumata nutumuhu si Yesus. 30Pia i sire rua tau ko wuta kakangiang su wiwihi u l᷊al᷊eng. Suapang i sire rua nakaringihi I Yesus kasahenge, i sire rua nukumiha, “Ahusi Daud, kindaghiteko i kami!”
31Taumata maul᷊i su se'e nuwawal᷊uang si sire dang nangoro si sire pakarumasi. Kateho i sire rua kasaunge nukumiha, “Tuang, Ahusi Daud, kindaghiteko i kami!”
32Bou e'e I Yesus nangoro dang nukumui si sire, “Apa ko ikao i rua hino ngu Daku ikoa si kumu rua?” kakina I Yesus.
33I sire rua nusumimbahi, “Tuang i kami mo makawua!”
34I Yesus nukumindaghi si sire rua, bou e'e namilo u l᷊ima-Nge su mata ngi sire rua. Singkatempo e'e l᷊ai i sire rua seng nakawua. Bou e'e i sire nutumuhu si Yesus.
Currently Selected:
MATIUS 20: PLT
Highlight
Share
Copy
Want to have your highlights saved across all your devices? Sign up or sign in