Zákaryâ 14
14
Jerúsélem ne Eshê Ekíri
1Dyicí ńdyí Óburúkpâbí o/chi o-kyú ké kakyúng-mpan emen epan dii/fárâng. Ba/chi ba-koo Jerúsélem kâng ba-wuri byěm, ne ba/chi ba-kyii byěm ḿbyí ba/chi ba-wuri éné ké bushú enen. 2Óburúkpâbí o/chi o-bâ ne kángkáng eshê kyikit kyibónge e-ba-nwa byití ne Jerúsélem. Ba/chi ba-koo oshê, ba-jii byěm ké byise, ba-rí ne banyinyi ké busa. Ba/chi ba-kúng kyicê-banet ba-dim ne mbé wǎ básóng, nké ba/chi ba-mîng kyicê kyi-waa ké kafâ-oshê. 3Óburúkpâbí o/chi o-dim kâng o-da-nwa byití ne eshê ányi wǎ eringe nyí o/mû o/nwa ké nkéré mú o/shwôm ké esim. 4Ké nkéré ámu, Óburúkpâbí o/chi o-bwom ké kaku ńké Ólif, ńké nke ké kyicê-Jerúsélem ńkyí esû nyi e-byí i. Owo mú oryên o/chi o-ját kaku-Ólif ánke byicê byifee, kyi-fím ké kyicê ńkyí esû edabyí, tete kyi-ribi ké kyicê ńkyí esû edaríbî e-jâ. Kyicê-kaku kyibónge kyi/chi kyi-tín kyi-jâ bushûyû, ńkyí kyibónge kyi-tín kyi-jâ busyísen. [ 5Ben ba/chi ba-cen ké owo ámu mú o/kyii kaku byicê byifee ba-chêe.] Ben ba/chi ba-chêe wǎ eringe nyí banchí enen ḿbé kpákpá ba/chêe ké nkéré mú esí e/náng, ké nkéré mú Otu Ozáya o/mû otu ké Júda. Óburúkpâbí mú mu Osówo ejí o/chi o-bâ ne barím emen ḿbé banong kángkáng ké kyikû.
6Ké nkéré mú nkéré ámu oo/fyi, [dyibyi ne abíp] bii*kyú to* 7nang kyifip to kii*chi to*. Esû nké nke edakûsan nang ne buchú, Óburúkpâbí kǎnchí nké mu o-nyît ng nkéré mú ńkyín kyi/chi kyi-chi.
8Ké nkéré mú dyicí ándyi dii/fyi, kace ka/chi ka-byí ké Jerúsélem ka-kûsen, kyicê kyi/chi kyi-sen kyi-jâ ké baya ḿbé badakó Bukyû, kyicê ńkyí áku kyi-sen kyi-jâ ké baya ḿbé Medeterényan. Kace ánke ka/chi ka-sen ké dyije dyimúmú, nang ne burwom, nang ne kyifang. 9Nkéré ámu kâng nké Óburúkpâbí o/chi o-kyú Otu mú ejíí emúmú. Nang yeě o/chi o-fé ǎ wǎ Osówo, o-nyît to ochíchí-dyizîn emen ńdyí Óburúkpâbí.
10Kyikim-esí kángkáng, fím ké Géba ké bushûyû a-ribi ké Ryímon ké busyísen ba/chi ba-tare kánkyí. Jerúsélem o/chi o-bwom kyíbóng nyáám ké kyikim-esí ánkyi. Oshê o/chi o-fím ké dyifyi ńdyí Běnjámin o-ribi ké dyifyi ńdyí badakó Kyifût-Ekpe, ké kyikit ńkyí dyifyi dyi/mû kpákpá. O-fím m to ké kiǐnyáám-kyise-mbâm ńkyí Hánánel o-ribi ké kyikit-bato echi ńkyí kyi/já otu-oshê. 11Banet ba/chi ba-kyú ányi, chwǒm kii*chi kámbé* bukyû boo*fé to kámbé bushî*.
12Óburúkpâbí o/chi o-twóm kángkáng eshê nyí e/nwa byití ne Jerúsélem kyibî-orwôm. Byiko ebe, cibicibi ne achi ebe ne bubyíbabang ebe byi/chi byi-kpet efwoo ne ba-kpú.
13Ké nkéré ámu, Óburúkpâbí o/chi o-chi kámbé ba-firi yógeyóge, ne bushî ḿbú bu/chi bu-chi nang yeě o-kám onet mú o/fárâng ǎ o-tû ǎ bunwa. 14Banet ḿbé Júda ba/chi ba-nwa eringe nyí ba/chi ba-nyii Jerúsélem. Ba/chi ba-kúng efang nyí ejíí emúmú wǎ byěm ḿbyí badakoo ké byití, gûl ne syílyíba ne byídí, ḿbyí bii*nwa epan*.
15Kyibî-orwôm to kyi/chi kyi-kám kángkáng azong-bubyî-orá ne boonyam-atû ne kángkáng byitú ḿbyí mbyi ké bampyep-byití ḿbé banet-bushwôn-Jerúsélem.
16Kángkáng banet kâng ḿbé ba/fím ké eshê nyí e/nwa byití ne Jerúsélem, ḿbé ba/chi ba-fem ké byití ḿbyín, ba/chi ba-kûce Jerúsélem kángkáng dyije ba-kûdafé Óburúkpâbí mú o/rêe o-shwôm wǎ Otu, ba-kûtî to dyijî-kyifen ńkyí boompyep ebi. 17Â oshê nang orá o/né o/fu, nyǐ oo*ce o-da-fé Óburúkpâbí mú o/rêe o-shwôm wǎ Otu* omu kâng oo*ba/chi o-chîna ké esí-oshê ámu*. 18Â banet ḿbé Éjip ba/né dyijî-kyifen ńkyí boompyep ebi echi, dyizong-orwôm ńdyí Óburúkpâbí o/chi o-twóm dyi-kám oshê mú odané ece, dyi/chi dyi-kám kámbé to. 19Busông ámbu nké bu/chi bu-ta Éjip ne kángkáng eshê nyí e/chi e-né etî dyijî ándyi.
20Ké nkéré ámu, nang égbáng nyí badafé bubyî-orá ké kyitông, ba/chi ba-sáng ké nyǐ ba/fu, e/já Óburúkpâbí. Butí ḿbú mbe ba-rám m byiryíng ké kiǐtí-kyise-kyifen-Osówo echi bu/chi bu-kyú byěm-ociring wǎ acáng nyí mbe ba-tî ng ké kyikit-kyifen-Osówo echi. 21Ba/chi ba-kúng kángkáng butí-byiryíng ḿbú mbu ké Jerúsélem ne ké kángkáng Júda ba-tî cát, ba-kûrám byiryíng ké mbú ké ofê mú Óburúkpâbí mú o/rêe o-shwôm. Banet ḿbé mbe ba-chi i byifen-Osówo ba/chi ba-kúng kámbú ba-kûrám enyam nyí byifen echi. Ké nkéré mú nkéré ámu oo/fyi, bancen kasî baa*kyú to ké kafâ-kiǐtí-kyise-kyifen echi ńkyí Óburúkpâbí mú o/rêe o-shwôm*.]
Currently Selected:
Zákaryâ 14: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985