Máláka 1
1
1Nyín kyitwóm ńkyí Óburúkpâbí o/sét mkpábé emen obónge mú odabángê [Máláka] o/fu, osét banet ḿbé Ézerel.
Kyijé ńkyí Óburúkpâbí mu ne nkyí ne Banet ḿbé Ézerel
2Óburúkpâbí o/raa ne banet emen o/fu, ben bamu ba-jê ng mě kángkáng nkéré. Nké mbé ba/faa ǎ ba/fu, ebóng ńkyí wo aa/chi a-tông a/fu, be byimu byi-jê ng ǒ.
Óburúkpâbí o-faa o/fu, Éso ne Jekôp ba/mû bwǎn-bané, nké Jekôp ne kyikû-banet emen nké mbe ba-jê ng mě, 3Éso ne kyikû-banet emen mbe ba-sa ng mě kafâ. Me mm/bên oshê mú eku éku mú Éso ne mm/bwa ne esí ányi n-kye enyam. 4Â banet ḿbé Édom, ḿbé mbe kyikû-banet ńkyí Éso ba/raa ba/fu, baa/bên eshê eten, nké byi/chi byi-bwât kányí byi-bi, Óburúkpâbí mú o/rêe o-shwôm o/chi o-faa kámbé kâng o/fu, mîng kámbé ba-bwât ba-bi, n-chî ng ebú kányí m-pwó. Banet ba/chi ba-kûkó kányí byibî-eshê ne eshê nyí Óburúkpâbí o/chi o-waa ké kafâ esa ne eshê ányi kángkáng nkéré. 5Banet ḿbé Ézerel ba/chi ba-kúng achi ebe ba-ri ńkyín, ne ba/chi ba-raa ba/fu, Óburúkpâbí mu ne busa nang ké esí ekíri nyí e*fí nyí banet-Ézerel*.
Óburúkpâbí o/bîn Banchi Kyifen Emen
6Óburúkpâbí mú o/rêe o-shwôm o/raa ne banchi kyifen emen o/fu, wǎn o-fâ bonchí mú o/fwon ǎ, ne ḿgbán to o-fâ bonchí emen. Me nké mu bonchí enen, ebóng ńkyí ba*fí ba-fâ mě*. Ben bamu ba-né ng mě, ba-bwa ba-waa ba-bí mě ba/fu, be byi/né ǒ nǎ. 7Bamu ba-né ng mě, ké nǎ, bamu ba-yip ng byiryíng ḿbyí ndaciring ba-tî ng ké kyikit-kyifen ejí echi. Ba-waa ányi ba-bí ba/fu, ebóng bukwóp ḿbú be byi*fí byi-kyâ ǒ ofê*. Me n/chi n-sét běn, ké nǎ, ben bamu ba-dángê e kyikit-kyifen ejí echi.
8Â ben ba/bê ne enyam nyí ee/sêe achi, nang nyí nyi e-rwôm m, nang nyí ee/byíryî bakwón ba/fu, ba-bâ ng echi kyifen ba-kye mě, ben bamu ba-kabe ng ba/fu, kyibî kyi*fí ányi*. Kan n̂ ba/fu, ba-yip ng dyizong-enyam ándyi ba-da-yárê onet-dyishí-oshê. Nyǐ o/chi o-kyú ké bunyîn-dyityém ne ben? o-kye běn ńkyí bamu ba-ryuu ng?
9Kántîk, ben banchi kyifen-Osówo, kan n̂ kâng ba/fu, ba-bí ng Osówo o-kye bě chwǒm ńkyí kyinong. Oo*ba/chi o-jwo nshwam enen* ne kyi/chi kyi-kyú ébîn enen. 10Óburúkpâbí mú o/rêe o-shwôm mu o-raa ng o/fu, kyi/mû kyi/chi kyi-nyîn mě â onet enen obónge o/mû o/cít afyi nyí kiǐtí-kyise-kyifen ejí echi eringe nyí baa*ba/chi ba-chîman emee ekwâ nyí e*da/byí ké chwǒm* ké kyikit-kyifen ejí echi. Kyi*fí kyi-nyîn n mě ne ben*. Mm*ba/chi n-koo byifen ḿbyí bamu ba-chi i ba-kyâ mě*. 11Banet ḿbé mbe ké ejíí emúmú mbe ba-fâ mě. Ké kángkáng byikit, banet mbe ba-shí i burwan ba-kyâ mě, ba-chi i byifen ḿbyí byinong ba-kyâ mě. Mbé ashí kángkáng mbe ba-fâ mě. 12Nké ben ba*fí ba-fâ mě* â ba-kú ba-raa ng ba/fu, kyikit-kyifen ejí echi kyi*da/byí chwǒm* ne â ba-kú ba-yip ng byiryíng ḿbyí ben bayén baa*ryí* ba-tî ké nkyí. 13Ben bamu ba-raa ng ba/fu, be bii/kyee ne kángkáng byěm ḿbyín, ba-chi i byěm ḿbyí byida mě ekye edángé. Bamu ba-yip ng enyam nyí ba/jii ojǐng ne nyí ee/byíryî bakwón ne nyí nyi e-rwôm m ba-bâ ng echi kyifen ba-kyâ mě. Ben ba/kabe ba/fu, me n-koo ng kyifen ánkyi ké abwô enen? 14Kyishû kyiwaa ne onet mú mu o-nîm m banet o-yip ng enyam nyí e*da/kwárê* o-chi kyifen o-kye mě, mú mu ne enyam nyí enong nyí o/ryí ocím o/fu, nyǐ o-kyâ mě. Ké nǎ, me n-chi i Kiǐtí-Otu, ne kángkáng eshê e-shî ng mě.
Currently Selected:
Máláka 1: BKY
Highlight
Share
Copy
Want to have your highlights saved across all your devices? Sign up or sign in
Published by the Bible Society of Nigeria @ 1985