2 Ilmakabayo 14
14
Eiroro Alkimas agilunore Yudas
(1 Mak 7.1-21)
1Ore etulusoitie ilarin okuni neyiolou Yudas o lewa lenyena ajo eshomo Tripolis Demetrius olayioni le Seluko o enjore nagol o meelin kumok. 2Etolimuoki sii ajo etara metua olaiguanani Antioko olarriponi Lisia neibung enkop enye. 3Eetae apa oltung'ani oji Alkimas laa olapolosani kitok apa ninye neibung'a apa ninye enkoitoi Olgiriki te rishata e ngolong'u. Ore pee eyiolou ajo meitoki aikata ninye aaku olapolosani kitok, neure sii inaidim aitaasa Ilyahudi ninye, 4nelo aduaare olaiguanani Demetrio to lari le 151. Ore tena rishata neishoo olaiguanani emaupe e saabu, tenebo mbenek oloirien naishori te nkaji Enkai to lkuaak kake eitu elimu ae toki naiprta inkitobirat enyena. 5Ore te siadi netum erishata naibalie inkitobirat enyena e modai pee eipot Demetrio entumo te nebo olautarok lenyena neikilikuan enayieu Iyhudi neas. Nejo Alkimas, 6“Edamu ilasujak le Yudas Makabayo ate ana ilasipak; kenyor ninche olarabal neitangor iltungana anaake pee egolongu nemeigua aikata ina kop metaseriana. 7Te nkaraki enyamali enye makewan pee meekure eeta enkitoo olapolosani kitok, ina naishaakino te inoto naa ina pee ayewuo ene, 8ore enedukuya nemaamenaa iyie olaiguanani, ore eniare amu kaduaki olng'ur iltung'ana lee nkop ai te nkaraki ilarrabali le modai le Yudas, neti enkop pooki atua enyamali. 9Kaomon iyie olaiguanani tujuru te ngeno nena baa pooki, nias enaishakino te karsisisho ino o nkolongi inono pee iwangie enkironya e nkop ang o ltungana lang. 10Ore ana enaishu Yudas naa kegol oleng pee eshipakino enkop ang osotua.”
Eirriwayie Demetrio Nikanor metarasaki Yudas
11Ore pee eidip airoro kulo rorei, ore ilchoreta lo laiguanani oiba Yudas neitagor Demetrio 12negelu Nikanor te siokinoto ola ninye apa oitasheiki enjore oltome neitaa olgafanai le Yudea neirriwa ninye 13neitanap pee ear metua Yudas, neidapsh iltungana osujita neita Alkimas olapolosani kitok e nkajik Enkai kitok te nkop pooki. 14Ore ilomon pooki te Yudea oisika apa te nkaraki erasakinoto e Yudas neipiri aku te nebo o enjore e Nikanor, amu kedamu ninche ajo ore emirata pooki aashu enyamali nanoto Ilyhudi naa keeku esidano enye. 15#1 Mak 7.27,28Nening Ilyahudi ajo egira Nikanori alotu o lelo tungana lo nkuapi otaa tenebo, nepika nkulupuok ilukuny enye, neomon Enkai enye natagelua olosho lenye metaa emalii enye ntarasi neisho emirishoi iltungana lenyena eitodolu keon enye te ninche. 16Ore te nkitanapata olarikoni lenye nepuku nabo kata agilunore ormangatinta te mbata e nkanasa e Adasa. 17Ore Simion olalashe le Yudas negilunore Nikanor kake eidimuaki ninye tonkitoi ormangatinta nemeyioloi. 18Ore pee ening Nikanor Yudas oltungana lenyena egira amitu enkop enye te mpijan oltau nemut apal olarrabal neishu enyamali pooki tiaeoitoi. 19Neirriwa Posidonias o Teodoto o Matatia meshomo aitobiru olningo Olyhudi. 20Ore pee eidipayu olningo neliki Nikanor enjore nye o sikarini nenyorikino pooki. 21Neitengeli enkolng natumo ilarikok openy. Neyauni ilorikan le nkanyit tolngobor ake pooki. 22Nepik Yudas isikarini oata inareta iwuejitin neishakino pee melotu ake ormang'atinta ass entorroni. Kake enotote lelo arikok oaare neiro aitobiraki. 23Nebik aton ninye Nikanor te Yerusalem neitu eas aetoki, kake eitu eshilaa iltungana oitururote. 24Ore iladuo lewa oaare neeku ilchoreta neiriamari tenebo Yudas o Nikanor. 25Neitukuj Nikanor Yudas pee eyamisho netum inkera. Neyamisho Yudas nebik te nkishui e mboron o eseriani.
Etigilunore Nikanor Yudas
26Ore pee eyiolou Alkimas ajo etisidana shoruetisho e Yudas o Nikanor neitayu empalai naigerore olningo, nelotoki olaiguanani Demetrio. Nejoki olaiguanani mme asipani Nikanor te nkitoria ino amu eitujungo Yudas. 27Neitagor olaiguanani ina kitangoroto nemesipa. Neigeroki olaiguanani te ngoro Nikanor nejoki eitu aitiship olningo linyi neitanap pee eeni Yudas Makabayo te Antiok. 28Ore pee ebaiki ele kilikuai Nikanor nenyamalu nalau enass amu imenyur atigila olningo olee otonyorrayie aibung enkisiligata enye. 29Negol sii te neany eas ana enaitanapishe olaiguanani neiteru aingoru enaiko pee eibung Yudas 30Neyiolou Yudas ajo eta Nikanor arruoni tialo ninye neyiolou ajo olmonokie torono ele. Neiturur iltungana lenyena kumok nelo aisudori. 31#1 Mak 7.29,30Ore pee eyiolou Nikanor ajo aingen Yudas alangu ninye, nelo enkaji Enkai kitok naa sinyati inakata egira ilapolosak aitayu ilasari, neitanapisho pee erikokini ninye Yudas. 32Kake nejo ilapolosak kituak tolmumai mmeyiolo ninche eneti Yudas oingoruni, 33Neilepie Nikanor enkaina enye e tatene aingorie enkaji e Nkai nejo, “tenimitayuyu Yudas nikintarasakiki ana oloyena naa kainyal nanu nagilgil ena aji e Nkai, nainyal ele perere lo lasaari nashet tenwueji enkaji sinyati e Dionisio.” 34Neipang, ore pee elo nedumu inkaik enye ilapolosak aingorie Keper neomon Enkai, Olaripooni oisiligayu le nkop ang: 35“Olaitoriani meetai aetoki niyieu iyie, kintishipa iyie pee etii enkaji ino ene nibik tenebo oyiok. 36Iyie ake osinyati, neitisinyaki enkaji ino, toripo esinyatisho enye ntarasi.”
Etua Rasi te nkaraki enkop enye
37Eetae apa olarikoni te Yerusalem oji Rasi, oitangoroki Nikanor. Etareto apa Rasi iltungana lenyena to nkoitoi kumok neyanyit iltungana omeipoto ajo, “Papai Ilyhudi.” 38Ore to nkolongi e dukuya olarabal le nkibelekeny neitayio enkishui enye te nkaraki olkuaak lo Lyhudi neitangori te nkaraki anaa enaitayio kewan 39Neitodulu Nikanor ajo keiba Ilyhudi oleng neiriwa isikarini iip imiet meibunga Rasi, 40amu etadamua ninye ajo teneibung Rasi na keaku enkitamioto sapuk to Lyhudi. 41Negil isikarini kishomi neretena pee eibung oltalet neitanapisho meyauni enkima nepeji nkishomin. Nemaniki Rasi etamana ilmangati netema arr kewan metua 42negelu aye te nkanyit alang olosilisili to nkaik oltungana arruok. 43Ore te siokinoto neitu eitame kewan Rasi to lalem lenye neitu eye ninye. Ore egira isikarini ajingu te nkumoi neipiri Rasi neid esuntai nedoiki eumata oltungana otii boo 44neigut enaduoo umata oo ltung'ana netum Rasi enedoiki. 45Ore eton eishu nedumunye Rasi te ngoro o te mpijan neruko osarge te nkaraki orbaye onoto ninye, nekuet enetii ina umata oo ltung'ana neked endapidapoi sapuk neitashe. 46Ore eishunye osarge to sesen lenye nepolol imonyit enyena too nkaik enyena nenang'aki ina umata oo ltung'ana. Ore pee eas ina neomon Olaitoriani oishooyo enkishui o nkiyang'et pee errinyoki ninye. Neijia eikununo Keeya e Rasi.
Currently Selected:
2 Ilmakabayo 14: BIBLIACATHO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2018