2 Ilmakabayo 15
15
Enkitobirunoto torrono e Nikanor
1Ore pee ening Nikanor ajo eti Yudas oltungana lenyena Samaria nerretena arasaki te nkolong e Sabato inakata egira ayengiyenga. 2Ore Ilyhudi ootarakaki metusuja enjore enye olarabal, neomon ninye pee meas antaboi e ntoroni natiu neijia, kake meyanyita ina olong nayanyita Enkai nadol pooki neitisiny aitulus inkolongi kulie pooki. 3Neikilikuanu oltolut oji Nikanor tena ketae olaitoriani te Keper oitanapa ninche meyanyita enkolong e Sabato. 4Newaliki Iyhudi, “Ee ketii; Olaitoriani oishiu, oitore Keper, oitanapa iyiook mayanyita Sabato.” 5Kake newal Nikanor, “Nanu oitoreisho te nkop, naitanap intae embunga inareta inyi niasiasa enaitanap intae olaiguanani.” Kake eitu ninye eidim atasa enkarueisho natejo ninye ass.
Eteretena Yudas enjore enye olarrabal
6Neuwasa Nikanor te ntoroni enye nejo keshet ninye oltalet le mirishoi enye tialo Yudas. 7Kake keeta ipa Yudas enkirukoto ajo ketum eretoto to Laitoriani. 8Neitanap iltungana lenyena pee meuruyu olmangatinta. Neitagolo Yudas, neitadamu iltungana enaikuna Enkai naata engolon pee etareto to nkolongi esiadi, neitisipaki ajo keidim sii Enkai ataretu tena rishata. 9Neitagol iltuaja lenye to nkitanapat o nkitengenat o loibonok neitadamu ilarrabali kumok oisulie. 10Ore eteretenate ilewa leyena to larrabal, neitanap ninche eitodol iltungana lemeisiligayu lo nkuapi iltungana lemeisiligayu amu eitu eibung olningo lenye. 11Neitanap pee eaku magil mme pee eisilig ilongoi o mperria kake eirorei aitagol iltauja lenye. Neitoki sii aitukuj einosaki enkatini e nduata nanoto naidim aisiliga. 12Ore enduata natodua naa: Onia ola olapolosani kitok, oltungani le tipat naa supat oata olkuaak sidai neiro te mboron neitengenaki te kitisho enye pooki naiprta orkuat oisul neomonoki Iyahudi pooki. 13Nedol Yudas iltungani oata irpapit oibor neeta enkanyit o enkito sapuk. 14Nejo Onia, “Olee ele onyor ilalashera neomonoki iltungana o enkanasa sinyati Yeremia osinka le Nkai.” 15Neitorio Yeremia enkaina enye e tatene neisho Yudas olalem le saabu nejo: 16“Tangamu ele alem sinyati, enkishooroto naingua Enkai, ola ninye indaikie ilmangati linono.” 17Neitukuj irorei sidain oiroro Yudas nepiju iltungana pooki nepushu ilbarnot to larrabal. Eti apa batisho olkuaak lenye o enkanasa enye o enkaji e nkomono nemut Ilyhudi pee meitura erishata nerasaki ormangantinta nerare to larabal. 18Eitu eitoki ninche anyamaliki ilmareita lenye kake etanyamlikitia ninche enkaji sinyati e Nkai. 19Neiput enkuretisho lelo pooki otelekutua te nkanasa edolita olarrabal.
Emirata o keeya e Nikanor
20Etotona pooki ngae aingor ajo aingai oisulu to larrabal. Neigutaki Isikarini lo rmangatinta te nebo olakedok lo mbartan te tatene o kedianye ore iltomia lo larrabal netipikaki ewueji e tipat. 21Neingor Yudas Makabayo ina jore kitok ormangati o larabal o nareta enye o mpukunot kumok o ltomia lenye lo larrabal oopi. Nedum inkaik enyena aipirie Keper, neomon Olaitoriani oas imba enkingasia, amu etayiolo ninye ajo keisho Olaitoriani emirishoi lelo oishiakino mme lelo oat enjore o sikarini oata engolon. 22#2 Ilai 19.35Neomon Enkai nejo: “Ore apa olaiguanani lo Lyahudi, nirriwua olmalaika lino near metuata iltungana ikalifuni ipp o ntomoni siet o mmiet le njore kitok o sikarini le Senakeribu. 23Ore naa tenakata Olaitoriani le keper irriu olmalaika sidai meigusugusie neigirigirie te nkuretisho ilmangati lang. 24Indaikie te ngolon ino kitok, tumuta kulo tungana otamoro enkarna ino neyetuo arasaki olosho lino ogeluno,” Te kulo rorei eidipa enkomono Yudas 25#1 Mak 7.43-50Neigutaki Nikanor o ltungana lenyena eeta e mowuo nerany isinkolioitin lolarrabal; 26netumore Yudas o lewa lenyena ormangatinta to larrabal neomon Enkai metareto. 27Neomon Enkai to ltauja lenye nejing olarabal to nkaik enye, near metuata iltungana inkalifuni tomon uni o mmiet. Neshipakino eretoto nanoto te Nkai. 28Ore pee eluso olarabal inakata egira ashukunye ang eshipakino emirishoi enye nedol Nikanor te wuas olaraba etua neishopito inareta enyena pooki. 29Nebuaku aisis Olaitoriani nemayian Olaitoriani kitok to nkutukie o lo papa lenye. 30Ore Yudas Makabayo otinjinga olarabal to sesen lenye pooki o toltau lenye pooki te nkaraki Ilyhudi, neitu eitura enkariyiano enye e kitisho enye neitanap iltungana lenyena metudugu elukunya e Nikanor o enkaina nedumu aya Yerusalem. 31Ore pee ebau enkanasa e Yerusalem, neiturur Juda iltungana pooki, neitashe ilapolosak to lperere lo lasar neipotuni iltungana pooki otana. 32Neitodol elukunya eilo asakutoni oji Nikanor o enkaina eilo arruoni ina aina naitoroyie agilunore enkaji e Nkai. 33Neitoki adungu orngejep neitotiyie imotonyi neisiong elukunya enye te boo enkaji e Nkai naitadedeyie enaitasa emodai ninye. 34Neingor pooki ngae Keper neisis Olaitoriani oibalunye enkidimata enye nerrip enkaji enye pee meisarkioni. 35Neilili Yudas elukunya e Nikanor te suntai pee eitadedeyie eretoto Olaitoriani. 36#1 Mak 7.49Neosh enkukuo pooki pee merikinoi ake ena olong kake pee eshipakinoi tolarini pooki ina olong nangasunye tene Modekai naa enkolong e tomon okuni o lapa le tomon are oji Adar te Kiaramu.
Irorei oobayie
37Nejia eikunakinote imbaa Nikanor. Ore eiteru teina olong enkanasa e Yerusalem netaa enolosho lo Lyahudi; 38tenelimuno te sidai, naa ina duo nanu anguar; kake tenelimuno te nkoitoi nemeishia, ina nanu aidim atasa. 39Kiyiolo ajo mmesidai tenikiok enkare o enaisho ake, ore enkare nashula o enkare neitobiru eokoto sidai namelok. Neijia ake etiu enkatini natisiraki aitobiraki, keitiship olaisumani. Kulo rorei obayie.
Currently Selected:
2 Ilmakabayo 15: BIBLIACATHO
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2018