MI CILIMA 32
32
1Labana den fii ku tiŋaapanpangu ki gobini o bisiaba leni o yaabila ki gaali ba. Lani n den pendi o den fii ki guani o denpo.
Jakobo bogindi ki baa tuogi Esayu
2Jakobo go den fii ki taa u sanu ke U Tienu malekinba den tuogi o. 3Jakobo n den laa ba yaa yogunu, o den yedi: «Li tie U Tienu yaa goli.» O den yini laa kaanu Mahanayima.#32.3 Mahanayima bundi «gola lie.»
4Jakobo den soani bi tondiba o liiga o kpelo Esayu kani hali Seyila diema nni Edomi yaa dogu nni. 5O den teni ba li naa ñoabonli ki yedi ba: «Diidi yin baa yedi n diedo Esayu yaala: ‹Line n tie a naacemo Jakobo n yedi yaala. N den kali Labana kani ki ye likani hali moala. 6N pia i ne leni i ŋunbi leni i pe leni a jatuada leni a potuada. N soani ki waani n diedo laa bonla ki sugini ke a pali n mangi npo.› »
7Bi tondiba den goa cua Jakobo kani ki yedi o: «Ti tuogi a kpelo Esayu ki sua ke o kpendi ki baa tuogi a leni niba kobinaa.»
8Jakobo den jie ti jawaandi hali boncianla ke ti yanyagiciandi den cuo o. O den boagidi yaa niba n den ye leni o kaani lie ki go boagidi i pe leni i ne leni ti yuoyuodi yeni ki yedi: 9«Li yaa tie ke Esayu cua ki tuogi leni kaanyendu yaaba ki paadi ba, yaaba n sieni baa fidi ki sani ki cia.» 10Jakobo den yedi: «O! Li Miali Diedo n baa Abalahama leni n baa Isaaka yaa Tienu, fini yua n den yedi nni: ‹Guani a diema nni ŋan den mali naankani ke n baa tieni apo yaala n ŋani.› 11Mini a naacemo wa boncianla leni ŋan doagidi npo a *ŋanbili leni a dugidi maama. Kelima n den duodi Judana ne leni n gbiamu bebe. Ama moala n tua gola lie. 12N mia ŋa ŋan faabi nni n kpelo Esayu yaa nuu nni kelima n jie ke o baa cua ki pua nni leni a bila leni bi naanba kuli. 13Fini, a den yedi ke a baa tieni nni yaala n ŋani, ke n yaa yaabila baa tua nani mi ñincianma yaa tanbiima ki yabidi hali ke bi kan fidi ki coadi ba.»#Cil 22.17
14Li den tie laa kaanu ke Jakobo den duani ku ñiagu. O den taa wan kubi yaala o nuu nni ki taani ki baa pa la o kpelo Esayu. 15Ŋuañuana kobilie leni ŋuabuana piilie, leni peñuana kobilie leni petona piilie, 16yoyuoñuana piitaa leni ban ŋaandi yaa bila, leni naañuana piinaa leni naatona piiga, ŋunñoe piilie leni ŋunjala piiga. 17O den caa ba ki teni o naacenba ki boagidi ba yankulu yankulu, ki yedi o naacenba: «Yaa cuoni mani n liiga ki ŋa li lenli yankulu kuli leni u lielu siiga.»
18O den teni li ñoabonli yua n ye liiga ki yedi o: «N kpelo Esayu yaa tuogi leni a ki buali ki yedi a: ‹A tie ŋme yaa yua? A caa le? Ŋan deli yaa yankulu tie ŋme yaa yu?› 19A baa goa ki yedi o: ‹A naacemo Jakobo n die ba, li tie bu paabu ke o soani n diedo Esayu po. Diidi, wani oba ye ti puoli.› »
20O den teni laa ñoabonli yua n den ŋua mi liema leni mi taama leni yaaba n den kubi i yankuli ki yedi ba: «Li tie yeni ke yi baa maadi leni n diedo Esayu yi yaa tuogi leni o yaa yogunu. 21Yi baa yedi o: ‹Diidi a naacemo Jakobo mo ŋua ti puoli.› » Kelima Jakobo den yedi o pali nni: «N baa kuugi Esayu pali leni yaa paabu n ye n liiga na. Lan yaa pendi n baa le o nunga ke daalinba o baa biali nni leni ki nunmanga.» 22Bu paabu den ye o liiga ke o den duani laa ñiagu li nagili nni.
Jakobo moa leni U Tienu
23Laa ñiagu yeni o den fii ki taa o poliediba leni o potualiediba leni o bila piiga n biyenga ki duodi Judana kpentaali yaali n yi Yaboki. 24O den taa ba ki teni ke bi duodi u kpenu ki teni ke wan pia yaala kuli mo duodi. 25Jakobo den sedi lankani o bebe. O ja den moani leni o hali lan bua ki yendi yaa yogunu. 26Wan den laa ke waa fidi ki paadi o, o ja den pua Jakobo kpietugili. Jakobo n den moa leni o yaa yogunu o kpiegu den tugidi. 27O den yedi Jakobo: «Cedi min gedi ke li bua ki yendi.» Jakobo den goa ki yedi o: «N kan ŋa ŋa se yaa yogunu ke a seligi nni.»#Ose 12.3-4
28O den yedi o: «A yi lede?» O den goa ki yedi o: «N yi Jakobo.»
29O go den yedi o: «A yaa yeli kan go yaa tie Jakobo, ama bi baa yi ŋa Isalele kelima a moani leni U Tienu leni bi nisaaliba ki paadi.»#Cil 35.10
30Jakobo go den buali o ki yedi: «N mia ŋa ŋan teni min bandi a yeli.» O den goa yedi o: «Be yaa po ke a buali n yeli?» O den seligi o lankani.#Buj 13.17-18 31Jakobo den yini laa kaanu Penueli,#32.31 Penueli bundi «U Tienu nunga.» kelima o den yedi: «N den laa U Tienu yaa nunga ke n naano ciadi.» 32U yienu den pudi ke o den fii ki suagi liiga Penueli po. Jakobo den duugi kelima o kpiegu yeni po. 33Li tie lani yaa po yo ke hali moala Isalele yaaba kan ŋmani yaa jiinu n ye li kpietugili nni kelima U Tienu den pua Jakobo kpietugili jiinu.
Jakobo tuogi Esayu
Currently Selected:
MI CILIMA 32: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.