MI CILIMA 31
31
1Jakobo den gbadi Labana bijaba yaa maama ke bi tua ke Jakobo taa bi baa n den pia yaala kuli, ke li tie bi baa yaa piama po n teni ke o tua piado. 2Jakobo go den laa Labana yaa nunga ki sua ke waa go den nua o nani kpiama yeni. 3Lanwani Li Miali Diedo den yedi Jakobo: «Guani a baa diema nni, ŋan den mali naankani, ke n baa yaa ye leni a.»
4Jakobo den yini Lasela leni Lea yaaba n den ye ku muagu nni a yangola kani. 5O den yedi ba: «N laa yi baa nunga, ke waa go nua nni nani kpiama yeni. Ama n baa yaa Tienu ye leni nni. 6Yinba yiba yi bani ke n den soani yi baa po leni n fidu kuli. 7Yi baa den janbi nni ki lebidi n panpaani taalima piiga, ama U Tienu naa den tuo ke o tieni nni yaala n bia. 8O yaa den yedi yaa yogunu ke yaaba n ñoalini n baa tie n panpaani, ti yandi kuli den mali yaadi n ñoalini. O yaa didi den yedi yaa yogunu ke yaadi n buadi buadi n baa tie n panpaani ti yandi kuli den mali yaa bila n buadi buadi. 9U Tienu den ga yi baa kani o yangoli ki teni nni. 10Ti yandi n den do biyaba yaa yogunu, n den yaadi ki laa ti dangidi nni ke yaa yantona n do a yanñuana, bine den buadi buadi bine ñoalini bine den tie lega lega. 11U Tienu maleki den yedi nni ti dangidi nni: ‹Jakobo.› N den goa yedi o: ‹Mini nna.› 12O den yedi: ‹Yaadi ki diidi yaa yantona n do a yanñuana kuli, bine buadi buadi bine ñoalini bine tie lega lega kelima n den laa Labana n tieni a yaala kuli. 13N tie Betela yaa Tienu, ŋan den wuli mi kpama li bontiadikaala po ki go poli npo li poli naankani yeni. Moala, fii, ña mi diema nni ki guani ŋan den mali yaa diema nni.› »#Cil 28.18-22 14Lasela leni Lea den goa ki yedi o: «Naani ti go pia u kaanu ki baa je li faali ti baa diegu nni bi? 15Waa nua ti nani bi canbaa kaa yo, kelima o kuadi ti ki dini ti ligi. 16U Tienu n den ga yaa piama ti baa kani kuli, mi tie tinba leni ti bila yaa yaame moala. Moala ŋan tieni U Tienu n waani a yaala kuli.»
17Jakobo den fii ki teni ke o bila leni o puoba kuli jagini ti yuoyuodi. 18O go den taa o yangoli leni wan den pia yaa piama kuli wan den baa yaala Padana-Alama dogu nni ki gedini. 19Labana n den ye u dogu po ki moagidi o pe kobidi Lasela den suni o baa yaa baayuatiadi. 20Jakobo den janbi Alama yua Labana yeni ki naa waani o o fiima. 21O den taa wan den die yaala kuli ki sani ki gedi. O den fii ki duodi u kpenu ki teli Galaadi juali po.
22Li dataali daali bi den waani Labana ke Jakobo den fii ki sani. 23O den fii ki taa o waamu ki ŋua Jakobo puoli po hali dana lele cenli ki nandi o Galaadi juali kani. 24Ama U Tienu den doagidi Alama yua Labana kani ti dangidi nni ku ñiagu ki yedi o: «Fangi a yuli ki da maadi Jakobo po maamaba kuli.»
25Labana den nandi Jakobo ki sua ke Jakobo tii o gbandieli li juali kani. Labana mo den tii o yaa yaali wani leni o waamu Galaadi juali po. 26Lanwani Labana den yedi Jakobo: «A tieni nni be n yeni? Be yaa po yo ke a janbi nni ki taa n bisiaba ki gedini ba nani a cuo ba leni ki jugisiega yaa paalu yeni? 27Be yaa po yo ke a wuoni ki sani ki janbi nni ki naa waani nni a fiima? N den baa cedi ŋan fii leni li pamancianli leni i yani leni a gangaana leni ti kogiditi yaa puama kuli. 28A naa den cedi ke n gobini n bijaba leni n bisiaba ki cabi ba. A laa moala wani, a tieni nani o yanluodaano yeni. 29N nuu pia u paalu ke n baa fidi ki tieni a yaala n bia, ama a baa yaa Tienu den maadi leni nni wonli nni ki yedi nni: ‹Fangi a yuli ki da maadi Jakobo maamaba kuli.› 30Moala ŋan fii kelima a yama n yaadi ki se ke a bua ki le a baadiegu yeni daa, be yaa po yo ke a den suni n baayuatiadi?» 31Jakobo den goa ki yedi Labana: «N den jie ke daalinba a baa fie nni a bisiaba. 32Ama a yaa laa a baayuatiadi yua yaa kani, wan bodi. Lingi n deenni ti kpiiba kuli nintuali a yaa laa ŋan die yaala ŋan taa.» Jakobo naa den bani ke Lasela den suni ti.
33Labana den kua Jakobo yaa gbandieli nni ki go kua Lea leni a potuadilieda yaa gbandiena nni. Waa laa liba. O den ñani Lea gbandieli nni ki kua Lasela gbandieli nni. 34Lasela den taa ti baayuatiadi ki wuoni ti ku yoyuogu yaa gaali tiipo ki kali lipo. Labana den fiidi o gbandieli nni kuli waa laa liba. 35Lasela den yedi o baa: «N diedo ŋan da biidi a pali ke mii fidi ki fii a nintuali kelima bi puoba n yen pia yaala yeni n pia nni moala.» O den lingi ki naa la ti baayuatiadi. 36Jakobo pali den beni ke o den koani leni Labana. O go den maadi ki yedi: «N tieni be yaa bonbiadile, n *tuonbiadi tie be ke a ŋoadi nni leni li pabienli? 37Ŋan nan fidi n piama kuli yeni, a laa a diegu nni tiadi baa bonyengu? Ñani gu n kpiiba leni a kpiiba nintuali ban jia ti buudi tinba niba lie yaa siiga. 38Dunla n tie bina piilie ke n den ye a kani, a pe leni a ŋuabi naa den mii, n naa dini a yangola petonli baa yendo. 39Baa ti moayandi n ku yaa yanga mii yen cuani ga a kani, a yen teni min pa ga. A go den yen ga n kane ban den suni yaa yanga u yensiinu, bi ku ñiagu. 40Ku tontongu den gbadi nni u yensiinu ti wadi mo den gbadi nni ku ñiagu n nuni naa den bani mi guama mo. 41Diidi, n den tieni bina piilie yeni a diegu nni. N den soani apo piiga n bina naa a bisaliediba po ki go soani bina luoba a yangoli po ke a den lebidi n panpaani taalima piiga. 42Li yaa bi tie ke yua n todi nni tie n baa yaa Tienu, Abalahama yaa Tienu, a den baa cabi nni nukuomu. U Tienu den laa n fala leni n nii yaa tuona lan teni ke o den yie apo wonli nni ñiagu.»
43Labana den goa ki yedi Jakobo: «Bi naa puoba tie n bisiabe, a bila na tie n yaabila yo, li yangoli ne tie n yaa yangole ŋan nua yaala na kuli tie n yaa yaale. N baa fidi ki tieni dinla be yo n bisiaba po, bi bi bila, ban mo n mali yaaba yaa po? 44Cua tin kuani o *ŋantaado mini leni fini yaa siiga.»
45Jakobo den taa li tanli ki sieni li ke li tua li bontiadikaala. 46Jakobo den yedi o kpiiba, taani mani a tana. Bi den taani a tana ki dogini a ke a tua li binbinli ke bi den dini mi jiema lankani li binbinli po. 47Labana den yini laa kaanu Jegala-Sahaduta ke Jakobo mo den yini gu Galeda. 48Labana den yedi: «Dinla li naa binbinli n yaa ye ki tie siedi mini leni fini yaa siiga.» Li tie lani yaa po yo ke bi den yini laa kaanu Galeda lan tie «Siedi tanjuaga.» 49Bi go den yini laa kaanu Mitisipa kelima Labana den yedi: «Li Miali Diedo n yaa tie siedi mini leni fini yaa siiga baa ti yaa go nua tiyaba yaa yogunu. 50A yaa faligi n bisiaba bi a yaa taa potoaba goga ŋan fangi a yuli kelima li naa tie o nilo ka ye leni ti, li tie U Tienu yua n tie siedi mini leni fini yaa siiga.»
51Labana den yedi Jakobo: «Diidi li binbinli na, diidi min maa yaa bontiadikaala mini leni fini yaa siiga. 52Li naa binbinli n tua siedi, li naa bontiadikaala mo n tua siedi ke n kan kandi li naa binbinli ki cua a kani, ke a mo kan kandi li naa binbinli leni li naa bontiadikaala ki cua n kani ki tieni yaala n bia. 53Abalahama leni Nahola yaa Tienu, yua n go tie bi baa yaa Tienu wani n tua o bujialo ti siiga.» Jakobo den poli leni Isaaka n den jie yua yaa yeli. 54Jakobo den padi li padili li juali po ki yini o kpiiba ban cua ki je. Bi den dini yeni ki duani ku ñiagu li juali po.
Currently Selected:
MI CILIMA 31: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.