MI CILIMA 30
30
1Lasela n den laa ke waa mali a bila Jakobo po, li nunponbiadili den cuo o kelima o kpelo yaa po, ke o den yedi Jakobo: «Pa nni a bila lan yaaka n baa kpe.»
2Jakobo yaa pali den beni Lasela po ke o yedi: «Naani n tie U Tienu yo ki teni ke ŋaa mali?»
3O den yedi: «A laa n potuado Biliha kua o kani ke wan maa a bila n yaa duna po, ke n mo n baa a bonjala kelima o yaa po.»
4O den puni o o potuado Biliha ke o tua o pua, ke Jakobo den kua o kani. 5Biliha den punbi ki mali bonjaga Jakobo po. 6Lasela den yedi: «U Tienu puni nni i moamoani moala.» O den gbadi n miabu ki puni nni ki bonjaga. Lani yaa po o den yini o Dana. 7Lasela yaa potuado Biliha go den punbi ki mali bonjaga miliema Jakobo po. 8Lasela den yedi: «N den moani leni n kpelo Li Miali Diedo nintuali ki paadi o.» O den yini ki biga yeli Nefitali.
9Lea n den laa ke waa go maa. O den taa o potuado Silipa ki puni o Jakobo ke o tua o pua 10Lea yaa potuado Silipa den mali bonjaga Jakobo po. 11Lea den yedi: «Li ne tie li cabiŋanli.» O den yini o yeli Gada yaali n bundi «Cabiŋanli» 12Lea yaa potuado Silipa go den mali bonjaga mi liema Jakobo po. 13Lea den yedi: «Moala n pali mangi, kelima bi jafanba baa yedi ke n pali mangi.» O den yini o Asela.
14Lubena den ñani ki goadi ku muagu nni *ŋalikama cema yaa yogunu o den laa yaa bonpudikaala n yi mandilagole.#30.14 Mandilagole den tie bonpudikaala ke bi den daani ke li jiini tie u ñoagu yu n baa teni o pua n punbi. O den ñani la ki ban teni la o naa Lea. Lasela den yedi Lea: «N mia ŋa, pa nni a bijua yaa mandilagole.»
15O den goa ki yedi o: «Ŋan den fie n calo yeni laa dagidi ke a go baa taa n bijua yaa mandilagole?» Lasela den yedi: «To Jakobo baa duani leni fini dinla yaa ñiagu na a yaa teni nni a bijua mandilagole.»
16Laa ñiagu Jakobo n den ñani o kuanu po ki kpendi, Lea den ñani ki tuogi o ki yedi o: «A baa kua mini yaa kane kelima n den da ŋa leni n bijua yaa mandilagole.» O den duani leni o laa ñiagu. 17U Tienu den gbadi Lea miabu ke o den punbi ki go mali bonjaga Jakobo po ke bi tua bonjala muu. 18Lea den yedi: «U Tienu den puni nni n panpaani kelima n den puni n calo n potuado.» O den yini o yeli Isakala. 19Lea go den punbi ki mali Jakobo po ke bi tua bonjala luoba. 20Lea go den yedi: «U Tienu den puni nni yaa paabu n ŋani, moala n calo baa yaa ye leni nni kelima n den mali opo bonjala luoba.» O den yini o Sabulono. 21Lan den pendi o den mali bonpuoga ki yini o yeli Dina.
22U Tienu den tiadi Lasela po ki gbadi o miabu ke omo baa ti madi. 23O den punbi ki mali bonjaga ki yedi: «U Tienu ñani npo n fe.»
24O den yini o Josefi. Lasela go den yedi: «Li Miali Diedo n go pa nni bonjatoaga.»
Jakobo tua piado
25Lasela n den mali Josefi yaa yogunu Jakobo den yedi Labana: «Cedi min fii moala ki guani n denpo n diema nni. 26Pa nni n puoba leni n bila min den soani apo li tuonli yaaba yaa po ke n baa fii. A bani min den soani apo yaa tuonli kuli.»
27Labana den yedi o: «Ŋan sinja npo daa. N ban diidi ki sua ke Li Miali Diedo seligi nni kelima a yaa po yo. 28Ŋan waani nni a panpaani, n baa pa ŋa.»
29Jakobo den yedi o: «A bani min soani apo yaa banlu. A bani a yangola n tua maama n nuu nni. 30Ŋan den pia yaa bonla waamu ke n daa den cua, li pugini boncianla. Li Miali Diedo den seligi ba kelima mini yaa po. N baa fuoni n yuli u laa yogune?» 31Labana den yedi: «N baa pa ŋa be?» Jakobo den goa ki yedi o: «A kan pa nni puu, a yaa baa tuo min baa waani a yaala. N go baa kpaa a yangola ki guudi ba. 32N baa goandi a yangola kuli dinla ŋan ñani ki paadi i pe kuli yaa siiga yaa pebila n ñoalini ki tie lega lega leni pebiboanga kuli. I ŋuabi yaa siiga, ñani yaaba n tie lega ki ñoalini kuli. Lani n baa tie n panpaani. 33N yaa *teginma baa doagidi npo saala a yaa baa cua ki le n panpaani. Yaaba n naa ñoalini ki naa tie lega lega i ŋuabi yaa siiga ki naa boani a pebila yaa siiga, li baa tie ke n suni ba.» 34Labana den yedi: «To lan tua nani a maama n yedi maama.»
35Laa daali Labana den ñani o yandi yaa siiga yaa ŋuabuana n buadi buadi ki tie lega lega leni yaa ŋuabi n ñoalini ki tie lega lega, baa leni yaaba n pia a legipiena kuli. O go den ñani i pe siiga nni i peboani kuli. O den teni bani kuli o bijaba yaa nuu nni. 36Lanwani o den teni ban foagidi dana taa cenli bani leni Jakobo yaa siiga. Jakobo den kpaa Labana yangoli yenli yaali n sieni. 37Jakobo den taa ti tisoangidi yaa beni yaadi n tie pupilie leni amandie leni pilatani yaa tiidi. O den legidi i beni ke yi ñoalini. 38Lanwani o den bili wan den legidi yaa beni i yangali nni, i pe n den kpendi ki ñu naankani ke i pe yaa cua ki baa ño, ban yaa nua i ki do biyaba. 39I pe den do biyaba lankani ki kuu leni i beni ki mali a bila yaaba n buadi buadi ki ñoalini ki tie lega lega. 40Jakobo den paadi a pebila ki taani yaaba n buadi buadi leni yaaba n boani kuli Labana yaa yangoli nni. O den paadi o yangocela yeni ke baa den taani leni Labana yangola. 41Yaa yandi n pa n den yen do biyaba yaa yogunu o den biliti i tibeni i yangali nni i pe nintuali ke ban do biyaba lankani i tibeni nni. 42Ti yantadinti yaa yen baa do biyaba, waa den biliti i tibeni. Li den tua yeni ke ti yantadinti den tua Labana yaaba.
Jakobo sani ki ñani Labana deni
43Laa ja den tua piado ki pugidi o piama. O den pia ti yanbidi hali boncianla leni a jatuada leni a potuada leni ti yuoyuodi leni i ŋunbi.
Currently Selected:
MI CILIMA 30: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.