MI CILIMA 29
29
1Jakobo den fii o sancenli ki gedi puoli po yaaba yaa diema nni. O den nuali 2ki laa li caali ku muagu nni ki sua ke a yangola den ye likani ki dua ki fuo kelima bi den ñundi a yangola laa caali kani. Li tancianli den bii li caali ñoabu. 3A yangola kuli yen taagi lankane. Lanwani bi yen biidi li tanli bu caañoabu kani ki ñuni laa yangola. Li yaa puoli bi go den yen biini li tanli li kaanu bu caañoabu yeni kani. 4Jakobo den yedi bi yankpaaba: «N kpiiba yi tie lepo yaa yaabe?» Bi den goa ki yedi o: «Ti tie Halana yaaba.» 5O den yedi ba: «Naani yi bani Labana Nahola bijua?» Bi den goa ki yedi o: «Ti bani o.» 6O go den yedi ba: «Naani o ye leni laafia?» Bi den goa ki yedi o: «O ye leni laafia. Diidi o bisalo Lasela n kpendi leni li yangoli yeni.» 7Jakobo den yedi: «Diidi yin taantaani a yangola yaa yogunu. Ñuni mani i pe ki gedi ki yaa ban kpaa ba.» 8Bi den goa ki yedi o: «Ti kan fidi ki tieni yeni se a yangola kuli n taani ki gbeni. Laa yogunu bi baa biidi li tanli li kaanu bu caañoabu kani ki ñuni i pe.»
9Wan den maadi leni ba yeni, Lasela den pundi likani leni o baa yangoli kelima o den tie yankpaalo. 10Jakobo n den laa o naa kpelo Labana yaa bisalo Lasela leni o naa kpelo Labana yaa yangoli, o den biidi li tanli ki ñuni li yangoli. 11Jakobo den gobini Lasela ki yaadi ki buudi ki kpaani. 12Jakobo den waani Lasela ke o tie o baa yaa yiadiga, ke o tie Lebeka yaa bijua. O den sani ki waani o baa. 13Labana n den gbadi o waalo yaa bijua Jakobo maama, o den sani ki tuogi o ki bibi o ki gobini o, ki teni ke o kua o diegu nni. Jakobo den waani Labana o laabaali kuli. 14Labana den yedi o: «I moamoani a taa leni nni li kpabili leni ti gbanandi.»
15Jakobo den pua ŋmamunli Labana kani.
Jakobo tieni ñiiga lie
Lanwani Labana den yedi Jakobo: «A baa tuuni npo fanma fanma kelima a tie n kpiilo po? Waani nni yaala n baa tie a panpaani.»
16Li den sua ke Labana pia bisiaba lie. O bisakpelo den yi Lea, o waalo mo den yi Lasela. 17Lea yaa nuni den koani opo ama Lasela yaa bugima leni o nunga kuli den ŋani. 18Jakobo den bua Lasela. O den yedi Labana: «N baa soani apo bina lele ŋan teni nni a bisalo Lasela o bonwaalo.»
19Labana den yedi: «N yaa teni o fini, li mani npo ki cie min teni o nitoa. Kali n kani.»
20Jakobo den soani li tuonli yeni bina lele ki baa baa Lasela. Laa bina den tie o nuni po nani danaba bebe yeni, kelima wan bua o maama po. 21Lan den pendi Jakobo den yedi Labana: «Teni nni n pua moala kelima n yogunu pundi n baa taa o.»
22Labana den taani laa kaanu yaa niba kuli ki tieni mi jaanma. 23Ku ñiagu o den taa o bisalo Lea ki gedini o Jakobo kani ke o duani leni o. 24Labana den puni o bisalo Lea o potuado Silipa. 25Lan den fii ki faa, Jakobo den sua ke li tie Lea. Jakobo den yedi Labana: «A tieni nni be mo n yeni? Mii den soani apo bina lele ki baa baa Lasela kaa? Be yaa po ke a janbi nni?»
26Labana den yedi: «Ti yaa diema nni, ti pia laa bogidili, ke o nilo kan pa o bonwaalo ti jadi ke o kpelo daa kuni ti jadi. 27Ŋan yaa ye leni Lea dana lele ke ti go baa pa ŋa o waalo ke a go baa soani npo bina lele o yaa po mo.»
28Jakobo den tieni yeni ki ye leni Lea ki tuoni dana lele. Lan den pendi Labana den puni o bisalo Lasela ke o tua o pua. 29Labana den puni o bisalo Lasela o potuado Biliha ke o tua o yaa potuado. 30Jakobo den taa Lasela moko wan den bua yua ki cie Lea. O go den soani li tuonli Labana deni bina lele ki pugini.
Jakobo bila
31Li Miali Diedo n den laa ke Jakobo naa den bua Lea, o den teni ke o mali boncianla ke Lasela mo tua ŋoaliga. 32Lea den punbi ki mali bonjaga ki cili o yeli Lubena yaali n bundi «Diidi ki le ki bonjaga.» O den yedi: «Li Miali Diedo den laa n fe ke moala n calo baa bua nni.»
33O go den punbi ki mali bonjaga ki yedi: «Li Miali Diedo den gbadi ke n calo naa bua nni, ke o go puni nni ki naa biga.» O den yini o Simeyono. 34O go den punbi ki mali bonjaga ki yedi: «Moala wani n calo baa bua nni kelima n mali opo bonjala taa.» Lani yaa po o den yini o Lefi.
35O go den punbi ki mali bonjaga ki yedi: «Moala n baa pagi Li Miali Diedo.» Lani yaa po o den yini o Juda. O den cedi yeni ki daa go den mali.
Currently Selected:
MI CILIMA 29: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.