Matayo 12
12
Kya nkonu wa Sabato
(Mar 2:23-28; Luk 6:1-9)
1Kyeeri na kilya Yesu kaira mareminy a nganu elyi lya nkonu wa Sabato. Valya vakiloshyony kyakwe vakalyiwa nshaa, vakapooka yuurushwa fyaa fya nganu vakasisasisa vakalya. 2Naasa Vafarisayo vekilolya vakaamba, “Lla-te vakiloshyony kyafo mmbo vatana kindo kilatiri mumu weetana nkonu wa Sabato.” 3Nawe kavavia, “A mmbo mulandesomi shaasa Davidi aletana kyeeri eetirwa nshaa we na valya eeryani nawo? 4Shaasa aleanga na efo mmba ya Iruva vakalya mikate ilya ya kideesyo, nayo nta we nta wooroye valeetiri mumu weelya, kulaore ni Vakohani veni? 5A ndesa mmbo mulandesomi efo mavavasony kya vakohani yewo elyi nkonu wa Sabato mmbo vaimbwa Sabato nta valatiri uvingo. 6Na yeny shamuvia, ‘Ekyi kyikee yaa mmbo king'annyi mmba ya Iruva!’ 7Na kilya kikee kirere kyeamba, ‘Kishisenyi ni ilyillya vandu, nshi irasyo-fo, kwee mwenkimanya shaasa kikai, nta mmweekundaa idenga vandu yeva valatiri uvingo-fo.’ 8Shamashika Mwana yeto wa nndu mmbo akee Nndumi wa Sabato.”
Nndu atiri woko lwa kitongororo
(Mar 3:1-6; Luk 6:6-11)
9Nalyo kakwiipoo alya vakai kafika efo mmba yaawo yeeterevya. 10Nalyo akakau nndu aifo atiri woko lukee kitongororo. Nawe vakammbesa vakaamba, “Kwiifo mumu-ro weeshiisa nndu nkonu wa Sabato?” Nyeeli vasia kyeenkumba. 11Nawe kavavia, “A mmbo kwiifo nndu kunu kwany atiri mburu yakwe imwi nsi kakooya yamooloka kiroriny elyi nkonu wa Sabato, kara nalayuuta-fo? 12A nndu nshi we ailannyi mburu deny? Naasa mmbo kuveefo mumu-da weetanya vandu mesha nkonu wa Sabato.” 13Nalyo kavia nndu ulya, “Orwa woko lwafo!” Nawe kaorwa. Lukawuya iva usha sha yelo lungyi. 14Na Vafarisayo vakasomuka vakandenruvya shila vasie mwaanya wa immamita.
Nndundi nsauwe wa Iruva
15Naasa Yesu kamanya kakwiipo-fo warya. 16Vandu vakallatya veengyi nawe kavashiisa woose kavavia nta mulasheevia nndu. 17Na kimaruma kikeenda indo ni kilya kilererwa ni nkisuku ulya Yesaya kyeamba,
18“Akakau nndundi wakwa shilensauwa,
mmbwe nkunde wakwa ashisetye nriminy,
neeny nshemmbikya Mumuyo wakwa nankaye.
Nawe ashoongoyaa vandu va masanga ngaa ya songosiny.
19Nawe nta nalashaandwa myaandu nta nalashekoomaa.
Na unyanga lwakwe nta lulashiitiwa efo shia.
20Na irere lyikee ibobore nta nnyashelyifishaa-fo,
na uruu lufumbyaa nsu nta nnyashelurumyaa-fo.
Mmbo ashekapannyaa efyo fya usumanu fivinge.
21Na irina lyakwe llyo vandu va masanga vashelyivikaa nsia.”
Yesu na Belsebuli
(Mar 3:20-30; Luk 11:14-23)
22Nalyo keengyo nndu atirwa mmumuyo nkasha, avekee mfu miso, kaveva mbimbi. Nawe kankira. Nndu ulya mbimbi kawuya irera na ilola. 23Naasa vandu valya vakuummbye-u mamwiingyi vakaising'ang'a. “A ndesa yeu mmbwe mwana ulya wa Davidi?” 24Na Vafarisayo vekiita kiirerwa indo vakaamba, “Yeto nta nnyaanta mimuyo mikasha kulaore ni elyi aekywa ni Belsebuli yeto akee nniini wa mimuyo mikasha-fo.” 25Nawe kamanya makusaro alya awo kavavia, “Wo umangyi lwiifo lukaraukana lukakukapa weni mmbo luwaa. Na wo muri wa vandu wiiyo naakwa ni mmba ikaraukana ikakukapa sheni nnyikaaufo. 26Na kwakooya satana ashaantaa satana urooye, mmbo araukana kakukapa muni. Naasa umangyi lwakwe mmbo lushidimaa ikaa-u inda? 27Na kwakooya yeny mmbo shaanta mimuyo mikasha sheekywa ni Belsebuli, a vana yewo vany wo mmbo vaanta vaekywa mmbiny? Kimmba ni indo mmbo vashemuutyaa uvingo. 28Indi kwakooya shaanta mimuyo mikasha sheekywa ni Mumuyo wa Iruva, akakakyo mwammaafukywa ni umangyi lwa Iruva-te!” 29“Ao ni inda nndu ashiidimaa yaanga efo mmba kwa mwaafinya nandekamara-fo fiiya fyakwe, kwakooya kulaore ampooka ifinga mbele mwaafinya ulya? Llyony ashekamaraa fya efo mmba kakwe nafimaa-fo. 30Nndu nalakee wa kyaalu kyakwa mmbo akee nkiduva wakwa. Na yeto nalasheekyaa isanyirya mmbo anyanyataa. 31Kimmba ni indo shamuvia, ‘Kya wo ulyamari lwa nndu na kya wo kyaararo kya nndu mmbo asheonaa ifwaaywa. Indi kya kyaararo kya yaarara Mumuyo Mweele, kyeekyo nnaonaa ifwaayo-fo.’ 32Kwakooya nndu arera kya imina Mwana yeto wa Nndu asheona ifwaaywa. Indi kwakooya nndu arera kya imina Mumuyo Mweele, ekyo kyo nnaonaa ifwaayo-fo, nta meendi a ulana yelu nta yelo lwiishaa-fo.”
Nri na ndunda ta vayo
(Luk 6:43-45)
33“Allweny nri uve nsha na ndunda ta vayo tiveshia. Ao allweny nri uve nkasha na ndunda ta vayo shikasha. 34Yeni ufyari lwa shoka a ni inda mushiidimaa irera kisha mummbe vakasha? Mashika efyo fiishwe efo nriminy mfyo kana kafirera. 35Na nndu yeto nsha efyo fisha asurumyi kaveva mwiiutya vandu fisha. 36Indi shamuviany Wo kirero kya ngula vandu varera mmbo vashekireellywaa nkonu yeto wa mwaandu. 37Shamashika marero afo nng'u kusherumbuywaa nang'u kwiivingaa, na marero afo-se kusherumbuywaa nang'u kwiivingwaa.”
Vakunda wende
(Mar 8:11-12; Luk 11:29-32)
38Nalyo velosha va mavavaso vaiyo maata na Vafarisayo vakaallwa vakaamba, “Llori, mmbo lukunndye lulollye wende kwafo!” 39Nawe kavavia, “Irika elyi yeesi llyiraiye utuusi mmbo lyilanngye lyoorwa wende. Nta llyikaa lyiniingwa wende-fo, kuuta ni wende lwa nkisuku Yona. 40Mashika shaasa Yona alekaa efo ndewuny ya ikunga lyilya iniini kamaa-fo mikonu iraru kio na nsanyiny Mwana yeto wa nndu ni kiwo-da ashevekaa efo si namae-fo mikonu iraru kio na nsanyiny. 41Vasero va kulya Ninive mmbo vashekwiipoo vasalale-u nkonu yeto wa mwaandu amwi na irika elyi valyuutye uvingo, mashika wo valekurya llya valeongoywa mbony ni Yona. 42Mangyi ilya ya kyika ya kulya taari ya sinde mmbo ashekwiipoo nkonu yeto wa mwaandu nasalale amwi na irika elyi nalyuutye uvingo. Shamashika, we alesha auka kishingony kya masanga nandearanya ufundo lwa Salmoni. Na ekyi kyikee yaa akakyi nkiniini kikailanya Salmoni.”
Iwuya lya mumuyo nkasha
(Luk 11:24-26)
43“Na Mumuyo yeto nkasha kwakooya vansomuka nnduny, mmbo uraaraa kundo kulatiri mura wiisyaa ando a iimuya ulaoni. 44Nalyo ukaamba, ‘A shindewuya na mmba ilya kundo shilesomuka.’ Ukasha nang'u ukakooya ilelwa ikee shaaiye na ishopwa. 45Nalyo ukaenda ukandeende mimuyo ingyi mikasha mfungare ikee myeesi ngota to mweni. Ukasha uryani nayo, nayo ikaanga nafo ikaallwafo kwekaa na mbony teefurumya ta nndu ulya tikakashaa ngota tilya ta mbee. Na kya irika elyi yeesi ni indo-da ekyo kya vayo ni indo kisheendaa.”
Vana va maye va Yesu
(Mar 3:31-35; Luk 8:19-21)
46Naasa eefo areraa indo na vandu valya vakuumbye-fo nkuka, akakava maye na vanavamaye vansha nau vasalali yoo poo vakunndye irera nawe. 47Naasa nndu umwi kammbia, “Akakawo mau na vanavamau vasalali yoo poo vakunndye irera neewe.” 48Nawe kaalwa kavia ulya ammbia, “A ma ni vi? Na vanavama?” 49Kooroya vakiloshyony kyakwe woko, kaamba, “Yeva mmbo ma na vanavama. 50Mashika wo nndu atana efyo fisennyi Nde-yaakwa wa efo iruveeu, yeto mmbwe ava mwanama na mfwama na ma.”
Currently Selected:
Matayo 12: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.