Matayo 11
11
Yohane Mwiibatisa arumya Yesu nrumi
(Luk 7:18-35)
1Naasa Yesu ekimaa ivavasya valya vakiloshyony kyakwe ikumi na vavii, kakwiipoo kulya vakai nandelosha vandu na iwoongoya mbony efo miriny yaawo. 2Naasa elyi Yohane akee kulya kifinngyony kashevio mbony ta mashora Kristo aifo arundaa, naasa kanrummya nrumi karika vakiloshyony kyakwe vavii. 3Kandemmbia, “A yewe mmbwe ulya avereyo nashe ao lukavereya ungyi ndesa?” 4Na Yesu karouwa kavavia, “Kweenngye mundevia Yohane kindo mwamiita na ikilolya. 5Vandu vafu miso veefo valolaa, na vandu vakee miketekete veefo vasheendaa, na va ivave veefo vasheeremukaa, na vandu vafu maarwi veefo vashiitaa; na vandu vafu veefo varutwaa, na vandu vakiva veefo vashoongoywaa nrumi ya Iruva ya nsia. 6Na ngoma nndu nalautau nsindara yaa kwakwa.” 7Naasa elyi vandu valya varie shia yeewuya, Yesu kapooka irera na vandu valya vakuummbye-u kavavia kya Yohane kaamba, “A kimaruma mukakwiipoo kyeny mukandefika kulya kasa nkyoki? A ndesa ni indelola ikongye lyivivitwa-vivitwaa ni uraato? 8A kindo kilemuuta kikammufita-fo nkyokyi? A ndesa ni indelola nndu aree soori shisha! Vandu varee findo fisha ekawo vakee efo mmba ta kimangyi. 9A kilemuuta kulya kyeny kikammufita-fo nkyokyi? A ndesa ni indelola nndu mwaauya fisuku? Ee-da na yeny shamuvia mmbo aveng'ani kailanya nndu nkisuku. 10We mmbwe ulya akee mwaambe efo mareiyony meele kaambawa,
‘Akau nsu wakwa shanruma
nakwiirye mbee,
nandekusongoya shia yafo.’
11Ni kya dede shamuvia, ‘Nnang'ani ya vandu woose valembonika kulandekwiipoo-fo nndu ang'annyi Yohane Mbatisi-fo. Indi efo umangyi ny lwa iruveeu, nndu aifo akee n-du ya vengyi mmbo amwiirye. 12Na kipookya fyeeri efyo fya Yohane Mmbatisi fika ulaalu, umangyi lwa iruveeu mmbo lwatirwa na finya, na vandu vaafinya vakava velurakwa-u. 13Kimmba veawuya fisuku woose sanda na uvavaso, mmbo valeva veamba fisuku kumande Yohane. 14Na mukakunda iirikya we mmbwe Elia ulya akee nteerye nashe. 15Nndu atiri maarwi a yaaranya navearannya!’ 16A irika elyi lya vandu yeva shilyiinanise neekyi? Mmbo lyifwanani na vana vadu vakaa ando a singira vakavaangana na wooroyaawo. 17Vakaamba, ‘A elyi lwamukapya fivale neeni mulafini? A elyi lwakapa kiiyo neeni mulakape mbafu?’ 18Yohane mmbo alesha nafo nalakee nndu mwiilyaa nta mwiina, nawo vakaamba, ‘Mmbo atirwa mmumuyo nkasha.’ 19Mwana yeto wa nndu kasha nafo akee mwiilyaa na mwiina vakauya yaamba, ‘Akakau makilya na makina mfinyo, kaveva na mbuya ya vadedemi na valyamari,’ kikava waarya lwa Iruva mmbo lukooya ivinga, kyuuka na efo mashoreny a vayo.”
Miri ilatiri kikusiryo
(Luk 10:13-15)
20Naasa kapooka isakira miri ilya kundo kuleutikya mashora akwe a wiidimi meengyi, na vandu nta valaute-u yaalashika efo miriminy. 21Kaamba, “Oshiny lwafo yewe Betisaida! Mashika kulya Tiro na Sidoni, kwee mmbo kuleutikya mashora a wiidimi sha alya aleutikya efo kwany, kwee valemaalashika efo mriminy kasha na iraa masara a ukiva na ikoollya ifu, 22Indi shamuvia, ‘Ekyo kya Tiro na Sidoni mmbo kishangwaa nkonu yeto wa mwaandu ngota yekyo kyany.’ 23Na yewe Kapernaumu kuleroswa kwatana kwakooya iruveeu, mmbo kushoolotwaa kufike ando a vafu! Mashika kulya Sodoma kukooye mmbo kuleutika-fo mashora a wiidimi sha alya aleutika kwafo, mmbo verewaa-u vafike nkonu wa inu. 24Indi shamuvia, ‘Nalyo ekyo kya Sodoma mmbo kishangwaa nkonu yeto wa mwaandu ngota ekyo kyafo.’ ”
Oshony na kwakwa musheemuya
(Luk 10:21-22)
25Naasa kyeeri yekyo kyeni Yesu kaalwa kaamba, “Shakwaarafuma paa woi Nde kukee Nndumi wa efo iruveeu na wa masanga, kimmba mbony yeti kwatisuruma vandu vaarya-reu, na yewo varango, kwawuya itirambuya vakoku. 26Ee-da Nde, ni indo kilevekusenya. 27Mmbo shilerambikywa findo fyoose ni Nde-yaakwa. Nta nkwiifo nndu aishi Mwana-fo kulaore ni Nde. Nta nndu aishi nde-fo, kulaore ni yeto Mwana, na nndu yeto Mwana ankunda inrambuya. 28Kusheyeny na kwakwa yeni moose mwivinaa, mukee varovye mmario, na yeny nshemwiimurisaa! 29Endeny raare neeny mukufunde kwakwa, shamashika shikee mfoo shavekunyiisa na nrima, llyoo-ny musheonisyaa mirima yaanga kiimuyo. 30Mashika raare yakwa ikee shisha na irio lyakwa likava yaangu.”
Currently Selected:
Matayo 11: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.