Matayo 13
13
Kyaaso kya mweera mbeu
(Mar 4:1-9; Luk 8:4-8)
1Naasa nkonu ulya mweni Yesu kasomuka efo mmba kandekaa rembo alya mbaambaa ya yeeve ilya. 2Na alya akai nsemu mwiingyi wa vandu ukandekuumbya-u. Nawe katana asaama na efo, ngalaveny kandekaa-fo rembo. Na nsemu ulya wa vandu ukuumbye-u ukasalala yoo waambeu. 3Nawe kavavia mbony shiingyi asheera fyaaso kaamba, “Akau nndu mweera mbeu alekwiipoo kandeera mbeu takwe. 4Nalyo eefo asheeraa tilya maata tikooloka yoo mbai ya shia. Na ndeye tikasha tikalya tikamaa. 5Na tilya tingyi; tikooloka ando iwe lyikwaalye si, alatiri uteri wiingyi. Tikamya na kyaangu, neelyi tilatiri uteri lufikye si. 6Indi elyi mwi ulevaa tikaya tikanaa, neelyi tilasotye miraarii si tikauma. 7Na tilya tingyi tikooloka ando a miingeny. Miinga ilya ikarwa, ikatisisira, 8tingyi tikooloka ando a uteri usha, tikaraaka fimu. Kimwi kikavika iyana, na tingyi makumi arindaru, na kingyi makumi araru. 9Na nndu atiri maarwi earannya navearanya!”
Kimaruma kya iveera fyaaso
(Mar 4:10-12; Luk 8:9-10)
10Naasa valya va kiloshyony kyakwe vakasha na yoo akai vakammbia, “A kimaruma kwarera nawo kusheraa fyaaso nkyokyi?” 11Nawe kaallwa kaamba, “Yeni mmbo mwaniingwa imanya mbony tikee shirike ta umangyi lwa iruveeu. Indi kya yewo wo valaniingwa. 12Kimmba nndu atiri kindo mmbo aniingwaa fiingyi katana afumbukywa. Indi yeto nalatiri kindo, mmbo asokwaa na kilya akooya atiri. 13Nkyo kimaruma sharera nawo shisheraa fyaaso, mashika ilola valolaa valalollyaa, na yaaranya vaarannyi nta valaite nta iitumuso. 14Na kisuku kilya kya Yesaya nng'u kyainukya kyeamba,
‘Yaaranya mushearannyaa mulamanyaa
na ilola mulole mulalollyaa.
15Mashika vandu yeva ngoo tawo tammba shuumu.
Nawo vakava varoo yaaranya.
Na miso awo vakasingira,
naambo valakooye ilollya,
nta iipuye kindo na maarwi awo,
nta iipuye kindo na ngoo tawo
wooke efo shieny tawo na yeny shivakire.’
16Indi yeni miso any ava a ngoma mashika alollye kindo, na maarwi any, mashika aitye kindo. 17Ni kya dede shamuvia, ‘Vakisuku veefo veengyi na vandu va usumanu velangye ilollya yekyo mulollye yeni, valalollye, na iita yekyo mwiitye yeni valaite.’ ”
Itambashuywa kyaaso kya mweera mbeu
(Mar 4:13-20; Luk 8:11-15)
18“Naasa yeni arannyiny-te kyaaso ekyo kya mweera mbeu shaasa kyikai. 19Wo nndu aifo ashearannyaa kirero ekyo kya mbony ta umangyi lwa Iruva nalaitumuso mmbo asheywa ni yeto nkasha. Kasherakwa-u mbeu yeyo sheere efo nriminy wakwe. Nto mbeu tilya tilewa efo shia. 20Na kya yeto tileerwa ando iwe lyikwaalye si. We mmbwe nndu mwaarannya kirero ekyo. Nalyo yeni kakyiwarya na nsia nriminy. 21Na kindo atura ni miraarii. Mmbo akee nndu wa veru-veru. Kwakooya ashaatarwaa ao irishiswa kimaruma kya ndera yeyo, nalyo yeni kauta-u nsindara. 22Na kya yeto tileerwa efo miingeny, we mmbwe mwiirannya ndera yeyo kandetirwa ni ngyusau ta muu yeu na ilembwa ni masaa, nafyo fikansisira na ndera yeyo ikakaa indo ilavika kimu. 23Na kya yeto tileerwa ando a uteri usha, we mmbwe nndu mwiirannya ndera yeyo kaitumuso. Naasany kandevika fimu. Umwi kavika iyana, ungyi makumi arindaru, ungyi makumi araru.”
Kyaaso kya mamburu
24Na kyaaso kyingyi kaveera kaamba, “Umangyi lwa iruveeu lulesha ifwanana na nndu aleenda yeera mbeu shisha efo ireminy lyakwe. 25Naasa elyi vandu valele rony nkiduva wakwe kasha nau. Kaera mbeu ta mamburu nnang'ani ya nganu tilya, kakweengya. 26Kyasia, elyi mbeu tilya tamya tikava mooro na iraaka, nalyo mamburu alya akavelollywa paa. 27Naasa mashinga a nndu ulya muni irema akansheya akammbia, ‘Ale Nndumi! Yewe kuleera mbeu shisha efo ireminy lyafo-ndi? A kundo lyoota mamburu alya nkwi?’ 28Nawe kavavia: Ni nkiduva alekitana. Mashinga alya akammbia, ‘A ndesa kwakunda lundesanyirya?’ 29Nawe kaamba, ‘Ode, elyi musanyiryaa mamburu yoo, naambo mulaillwe nganu mutisande nang'u. 30Reny fing'ani fii-fivii ando amwi fifike yoo maveiyony. Na elyi kwamfika maveiyony, neeny mmbo nsheviaa yewo veevyaa Pookeny isanyirya mamburu alya mufinge fikonde fikonde andevivyo murony. Na nganu to tivikwa efo mbesheny yakwa.’ ”
Kyaaso kya mbeu ya haradali
(Mar 4:30-32; Luk 13:18-19)
31Na kyaaso kingyi kaveera kaamba, “Umangyi lwa iruveeu mmbo lufwanani na mbekye imwi ya karadali. Nndu mmbo aleiipoo kandeyeera efo ireminy lyakwe. 32Nayo mmbo ikee shinnywa ngota mbeu toose. Indi kwakooya yang'ana ikava niini, ikailanya mare alya akee maronge-fo eelonga shoonga, ikava nri mweni. Na ndeye ta efo nginiiu tikatana tasha ishevika fifuri fyavayo marambeny a vayo.”
Kyaaso kya ntarang'u
(Luk 13:20-21)
33Na kyaaso kingyi kaveera, “Umangyi lwa iruveeu mmbo lufwanani na kinruwo kitarang'aa kyeefumbisa nswa. Nndu nka kakiipoo kakisanda na nswa fideeva firaru. Nato ukatana wakwaana itarang'a deny.”
Irera na fyaaso
(Mar 4:33-34)
34Naasa mbony yeto toose Yesu alevia vandu valya vakuummbye-u aveeraa fyaaso. Nta nalavavie kindo kulaore aveera fyaaso-fo. 35Na kimaruma kikaenda indo, ni kilya kilererwa n'kana ka nkisuku ulya Yesaya naambo kikooye iinukya-u kyeamba, “Nshetarammbwaa kana kakwa sheere fyaaso shipare mbony yeto tekee shirike uka mapookyony a ulana yelu.”
Yesu arera kya kyaaso kya mambekye
36Nalyo Yesu kasama vandu valya vakuummbye-u nkuka, kaenda efo mmba. Valya vakiloshyony vakasha ikuumbya yoo akai, vakaamba, “Lukapye nsuka wa kyaaso yekyo kya mamburu a efo ireminy, mbee!” 37Nawe kaallwa kavavia, “Yeto mweera mbeu yeto shisha ni Mwana yeto wa Nndu. 38Na irema elyo ni ulana yelu. Na mbeu yeto shisha ni vana va efo umangyi ny. Na mamburu yoo ni vana va yeto nkasha. 39Na nkiduva yeto aleera ni mmbishwa. Na mailullyony ni yoo masiiyony a ulana yelu. Na veelula ni vasu va Iruva. 40Nasaany shaasa mamburu asanyirywa akandevivywa murony, na yoo masiiyony a ulana yelu ni indo-da kishevaa. 41Ni Mwana yeto wa nndu asherumaa vasu vakwe, vandesanyirya yewo veende misindara woose yuutwa efo umangyi ny lwakwe, na yewo vetana fya kiila. 42Nawo vavaere efo irininy lya muro. Nafo kushekaa-fo kiiyo na irafunnya mayoo. 43Llyo yewo va usumanu vashevaa paa sha mwi mweni; vekee efo umangyi ny lwa Nde-yaawo. Yeto atiri maarwi earannya navearannya.”
Kyaaso kya masaa asurumyo
44“Lyingyi umangyi lwa iruveeu mmbo lufwanani na masaa akee masurumye ando a ireminy. Nndu kaakooya, kawuya yaalyikya. Na elyi atirwa indo ni nsia kandekumba fyoose atiri kandeura irema lyilya.”
Kyaaso kya samana shisha.
45“Na lyingyi-se umangyi lwa iruveeu mmbo lufwanani na nndu mwiikapa mbusha aruuyaa samana ta ngata shisha. 46Naasa kakooya samana imwi ya uuru uniini. Kaenda kandekumba fyoose atiri kasha iyuura.”
Kyaaso kya nreiyo wa makunga
47“Na lyingyi-se umangyi lwa iruveeu mmbo lufwanani na nreiyo wa makunga uleolotwa efo yeeveny ukaummbya wo ngata iifo. 48Ukaishwa vakawoomuya na efo waambeu. Vakakaa-fo rembo. Alya mesha vakasanyirya efo fiiyeny fyawo. Na alya maporu vakaeera efo. 49Na yoo masiiyony a ulana yelu ni indo-da kyishevaa. Ni vasu va Iruva vashekwiipoo vanderauwa-fo yewo veesi vavaute efo nnang'ani ya va usumanu. 50Nawo vasheveeraa efo irininy lya muro. Nafo kukaa-fo kiiyo na isa mayoo.”
Masaa maiya na makuu
51“A ndesa mwaitumuso efo fyoose?” Vakaamba, “Ee-da mbee.” 52Nawe kavavia, “Kimmba ni indo, naasa wo mwiilosha mavavaso aloshywa kya umangyi lwa iruveeu, mmbo avakye nndu muni kyeny asurumyi masaa akwe, kava muuta-fo fyeesimba fiiya na fikuu.”
Valema Yesu kulya Nasareti
(Mar 6:1-6; Luk 4:16-30)
53Kyikava elyi Yesu ammanda yeera fyaaso efyo kakwiipoo efo akai. 54Kandefika kulya muriny wakwe kundo alelelyo. Kavaloshya efo mmba yaawo yeeterevya. Nawo vakaising'ang'a vakaamba, “A nyira nndu yeu nkwi autye urango yelo na fya wiidimi efi atanaa? 55Yeu nshi we mwana wa mwiipasha firi? Na maye nshi we Maria? Na vanavamaye nshi wo Yakobo na Yosefu na Simion na Yuda? 56Na vamfwamaye nshi wo yewo vakee kunu kweru woose? Naasany nkwi nndu yeu autye findo efyo fyoose?” 57Naasa vakatirwa nnyinyira nawe. Na Yesu kavavia, “Nndu nkisuku nnaminwa kulaore ni efo muriny wakwe muni na efo kyeny kwakwe kweni-fo.” 58Naasa nafo nta nalatani-fo fya wiidimi mashika elyi valera valekusirya nawe.
Currently Selected:
Matayo 13: MASNT00
Highlight
Share
Copy
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.