MATYE 9
9
Jesu wí ma lemloʔoŋo pwɔʔɔ
(Mar 2:1-12; Luk 5:17-26)
1Jesu wi gâ je nyumu kɔrɔ ni mâ lɔʔɔ kon mâ je wa wi kàʔà ni ge, 2à pe lemloʔoŋo kpe wi asyɛnʔɛ ní mà pan wí ni wí kan. Jesu wi gâ pe pama nya me, wɔ̀ɔ lemloʔoŋo po we: «Na pyɔ, ma dihon le ma nî. Ma kapere tí ma yaʔa má kan.» 3À Juwifiyee pe Furu sɛbɛ cɛnfɛɛ pèè naʔa nyu pè ma mà yo: «Ki naŋa ŋa wí na Nyɛʔɛlɛ li yele cɔʔɔ le.» 4Jesu wɔ̀ɔ pe honriʔi cɛn ge mà pe po: «Nyaʔa ma kan á ye na honri tipeʔe wa yè dihonyee ni be? 5Mɛjɛn kigii nyɛ hanridanʔa bí lemloʔoŋo po we: ‹Ma kapere tí ma yaʔa má kan,› ná kiì ban, bùu po: ‹Jɛ̀, ma yèré, ma da danrí.› 6Jango yeʔe cɛn ye yo sye nyɛ Hɛn Pyɔ ma we naʔa tra na de wi da kapere yari de,» wɔ̀ɔ lemloʔoŋo po we: «Jɛ̀, ma yèré, ma ma asyɛnʔɛ kpe ge, maa sye ma kasyɛn ma ge.»
7Wɔ̀ɔ jɛ kpo mà kɛri wi kasyɛn ma ge. 8Janma mi gâ ki woʔo ga nya ge, à mi fya mà na Nyɛʔɛlɛ kpɔʔɔ le, la lí ma ki fanŋa kan hɛɛn ma be.
Jesu wí ma Matye yeri we
(Mar 2:13-17; Luk 5:27-32)
9Jesu wi gáa doro, wɔ̀ɔ naŋa wà nya be klɛnhaʔa misari syɔfɛɛ go ni ge. Pé noo yeri Matye. Wɔ̀ɔ wí po: «Ma pà ná na.» Wɔ̀ɔ jɛ mà pa wí na.
10Wi gáa glɛn go ni mâ na li ge, misari syɔfɛɛ ní, kapere hanrifɛɛ fafaʔabaa ma pan mà bâ glɛn na li Jesu ní we mà plɛn wi ploʔofɛɛ ní be.#9:10-11 ma wèle wa Luk 15:1-2 ni wè. 11Farisiyee pe gâ ki woʔo ga nya ge, à pe wi ploʔofɛɛ po be: «Nyaʔa ma kan yè krɛʔɛfɔlɔ wí na plɛn na li misari syɔfɛɛ ní kapere hanrifɛɛ ní be?» 12Wi gáʔà loʔo ge, wɔ̀ɔ yo: «Hɛɛn bee poò nyɛ yabaa ge, poò na cori dɔʔɔtrɔ lagwɔ na, fɔ yabaa bɛ pé na cori wí na ge. 13Nyɛʔɛlɛ à li yo: Mí na nyugara ca. Ho na sraʔá ca we. Ye ya ki kayoro ti kɔ̀rɔ́ ca we, yoo plòʔó. Mɛjɛn mi ìn ban jango bì ba hɛnsinbee yeri, di kapere hanrifɛɛ bɛ.»#9:13 ma wèle wa Mat 12:7; Ose 6:6 ni wè.
Pé ma Jesu yugu we su como kayoʔo ní
(Mar 2:18-22; Luk 5:33-39)
14Ki nyiŋi na, Jan wi ploʔofɛɛ à pe pan Jesu krugu we mà bɔ́ɔ̀ po: «Nyaʔa ma kan wòó ní, Farisiyee ní, wó na su cun we, di ma ploʔofɛɛ pe ìn dɔɔ cun ge?» 15Jesu wɔ̀ɔ pé po: «Fonŋo fɔlɔ nòo po naʔa fonŋo cofɛɛ ní be adi ge, pa pe gban bì da yɛrɛ pɛnʔɛ yo? Ayo. Di nyiŋi kà na pan wa, pé bi ba fonŋo fɔlɔ yrigi we naʔa pe kpafoʔo ni ge. Ki nyiŋi na, pa pe nàá su cun we.
16Hɛn ná jé kpasyofonro kpe bì ti lyɔli kpasyolɛʔɛ na. Ná kiì ban, kpasyofonŋo ki na klé mà hlugu mà laʔa wa kpasyolɛʔɛ na ge. Ki hlugumu mi na toró kplɛʔɛ na ge. 17Pe ín jé hunbunmu kpe bì mi le frogolɛʔɛ ni. Ná kiì ban, frogoʔo paʔa fuʔuru bì ja, hunmù pa mi wo, frogoʔo ki plɛ̀n ki cɔʔɔ. Pé na hunbunmu ni wa frogofonro ni. Pì syɛnmu pi na kò kmaba.»
Jesu wi ma pyɔ nì cɛlɛ pwɔʔɔ
(Mar 5:21-43; Luk 8:40-56)
18Wi da gáa ki kaʔa gee nyu ge pé kan nyiŋi ga na ge, Juwifiyee pe sɛrigo lagwɔ à wà ma pan mà bâ kunbiʔi kán wì tanla mà yo: «Na pyɔ wí nyɛ picɛpii wí ma ku ŋaŋa ni ge. Kiì nì kì bɛfu ní, ma pan ma ba ma kyɛʔɛ pa ge wi na pɔɔ nyɛ.» 19Jesu ní wi ploʔofɛɛ ní à pe jɛ mà pa wí na.
20Welé, cɛlɛ wà dà bo cɛɛpɛʔɛ ní àʔa ta wí na yɛʔɛ́ kɛ̂ mà kɛ syɛn. Wɔ̀ɔ pa Jesu na we mà yâ màʔà wi dreʔe na wa kanla na le.
21Mɛjɛn wi dáa ki honri wa wi lama ni me mà yo: «Ali nà mi ja màʔà wi dreʔe na ge, pa mi bwɔʔɔ.» 22Jesu wi gâ wa mâ krɛʔɛ mâ wele ge mòo nya, wɔ̀ɔ yo: «Na pyɔ, mò gáa fyaʔa, mɛjɛn ma pama mí ma ma pwɔʔɔ.» Ki nyidege na ge, cɛlɛ wɔ̀ɔ pwɔʔɔ kpo.
23Jesu wi gâ ban má bâ je wa sɛrigo lagwɔ go ni ge, wɔ̀ɔ máʔa wyerifɛɛ nya be ní janma ní ma mí ma wlele mì na ge. 24Wɔ̀ɔ pé po: «Yè jɛ̀ naʔamɛ ge. Picɛple li ìn jé gu kpɛn. Lí na ŋolo.» À pe noo tyɛʔɛ. 25Pe gâ janma yrigi me finmi na kɔ ge, Jesu wɔ̀ɔ je mà yâ picɛple co le kyɛʔɛ na. À li jɛ. 26Ki kayoʔo àʔa canmu wa ki klɛnmɛ mì bɛfu ni.
Jesu wí ma fyoon syɛn pwɔʔɔ
27Jesu wi báa doro be ge, à fyoon syɛn ma pa wí na mà na taʔara naʔa pin: «Dafide pyɔ, ma nyugara ta wo na.» 28Wi gâ je go ni ge, ki fyoon syɛn à pe pan wì krugu. Jesu wɔ̀ɔ bâ pe po: «Yé ma paʔa na mà yo pa mi gban bì ki woʔo ga hanri ge yo?» À poo po: «Ee, kundiʔi.» 29Ki nyiŋi na, wɔ̀ɔ maʔá wa pe nyɛʔɛ na ge mà yo: «Ki hanri ye kan ki yala yè pama ní me.» 30Pe nyɛʔɛ à ke nyɛʔɛ kpo. Jesu wɔ̀ɔ kí yo pé ma gbanʔa mà yo: «Yè wèlé, yeʔe kɔ̀rɔ̀sì. Ki ìn yala hɛn wà biʔi cɛ́n.» 31Di pe gâ jɛ wa ge, à pe ní mà na wi yele jari le wa ki klɛnmɛ mì bɛfu ni.
Jesu wí ma naŋa bobo pwɔʔɔ
32Pe gáa nyini, à pe pan wí kan bobo ní. Wi ìn dàá nyu, mɛjɛn gbosyo dà bo wí ni. 33Wi gâ gbosyo prɔ we kɔ ge, bobo wɔ̀ɔ na nyu kpo. Àʔa janma fo me. À mi yo: «Ki woʔo ga wo ìn jé ki nyoʔo kà nya wa Israyɛli klo ni le.» 34Di Farisiyee à pe naʔa nyu mà yo: «Wi na gbosuu prɔ be gbosuu lagwɔ fanŋa ni.»#9:34 ma wèle wa Mat 10:25; 12:24; Mar 3:22; Luk 11:15 ni wè.
Jesu wí ma nyugara ta janma na me
35Jesu wɔ̀ɔ na sye kyɛkpandoro ni, ní kaplèʔe kè bɛfu ní mà yáa pe krɛʔɛ wa pe sɛrigoro ni de mà na masaʔa kayotanʔa jari ge mà na yara tyɛnʔɛ kè bɛfu pori.#9:35 ma wèle wa Mat 4:23; Mar 1:39; Luk 4:44 ni wè. 36Wi gâ janma nya me, mi nyugara à ti wa wí na ceŋge, mɛjɛn pé ma te. Pe lama mi da wlelé pé na, nɛ pa mbara nyɛ da tí nyɛ naʔafɔlɔ fun ge.#9:36 ma wèle wa Ton 27:17; 1Mas 22:17; 2Masa 18:16; Esek 34:5; Mar 6:34 ni wè. 37Ki nyiŋi na ge, Jesu wɔ̀ɔ wi ploʔofɛɛ po be: «Kere tí nyɛ kpangbanra, di akaba konfɛɛ poò sa.#9:37-38 ma wèle wa Luk 10:2 ni wè. 38Ki kala na, ye da kere fɔlɔ nyɛri we, jango wi da akaba konfɛɛ pèè troʔo naʔa wi kere ni de.»
Currently Selected:
MATYE 9: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire