MATYE 8
8
Jesu wí ma yanyɛʔɛ fɔlɔ pwɔʔɔ
(Mar 1:40-45; Luk 5:12-14)
1Jesu wi gáa drigi wa angolo yugu na ge, à hɛɛn fafaʔabaa ma pa wí na. 2À yanyɛʔɛ fɔlɔ ma pan wì krugu mà bâ kunbiʔi kán wì tanla mà yo: «Kundiʔi, nà maʔa ta ge, pa ma gban bì na pwɔʔɔ.» 3Wɔ̀ɔ wi kyɛʔɛ haʔala mà màʔà wi na mà yo: «Mí maʔa ta. Ma pwɔʔɔ.» Ki nyidege na ge, yanyɛʔɛ àʔa laʔa wí na kpo. Wɔ̀ɔ pwɔʔɔ. 4Jesu wɔ̀ɔ wí po: «Ma daʔa kɔ̀rɔ̀sí. Mò gaʔá yo hɛn ma. Di maa sye ma ya mà tyɛʔɛ Nyɛʔɛlɛ li sràʔá farafɔlɔ na we. Mowisi wi dá yo hɛɛn pe da sraʔá ŋa fara ge, moo fàrà, jango peʔe cɛn pe yo má pwɔʔɔ.»#8:4 ma wèle wa Sraʔa 14:1-32 ni wè.
Jesu wí ma tungɔɔ pwɔʔɔ
(Luk 7:1-10)
5Jesu pɔɔ da gáa jin wa Kapɛrinamu kàʔà ni ge, à sorasiyee lagwɔ wà ma pan mà bɔ́ɔ̀ flin mòo nyɛri 6mà yo: «Na fɔlɔ, na tungɔɔ wí nyɛ wa go ni syɛnhaʔa. Mɛjɛn wí ma mloʔo na cɔlɔ ceŋge.» 7Jesu wɔ̀ɔ wí po: «Mí bi gɛri wa bì yɔ̀ɔ pwɔʔɔ.» 8Sorasiyee lagwɔ wɔ̀ɔ wí po: «Na fɔlɔ, mí ma cɛrɛ ma jeme na wa na go nî ge. Di ma kayoʔo nigbe yo, na tungɔɔ pɔɔ bwɔʔɔ. 9Mɛjɛn pèè nyɛ na lagwɔɔ, domi à mi po sorasiyee pèè lagwɔ. Nà miʔi yo wà ma bì yo: ‹Ta sye,› wi naa sye. Nà mi ní bì wà po: ‹Ta ban,› wi naa ban. Nà miʔi yo na tungɔɔ ma we bì yo: ‹Ga ki hanri,› wi naʔa hanri.» 10Jesu wi gáʔà loʔo ge, àʔa wí fo. Bee pe da bá wí na ge, wɔ̀ɔ kí yo pé ma mà yo: «Mí biʔi yo ye ma kanyɛmɛ na, mi ìn jé ki pama ma mi nyoʔo kà nya Israyɛli woo wà ma kpɛn. 11Mí naʔa nyu ye ma kanyɛmɛ na, hɛɛn fafaʔabaa bi ba jɛ wa yaa jɛhaʔa na ge ní ki jehaʔa nì ge bì ba glɛn wa Abrahamu tanla we fɛti na, ní Isake nì, ní Jakɔbe nì we wa Nyɛʔɛlɛ masaʔa ni ge.#8:11 ma wèle wa Luk 13:29 ni wè. 12Pa pe ba bee wa finmi na pe di glɛ́n mâ masaʔa kiì kan ge, pe kò leʔe wa yeblimi ni me, deʔe ga na hɛɛn pé na kpele mâ na ganʔa kun ge.»#8:12 ma wèle wa Mat 22:13; 25:30; Luk 13:28 ni wè.
13Jesu wɔ̀ɔ sorasiyee lagwɔ po we: «Maa sye, ki hanri ki yala má kan ma pama ní me.» Wi tungɔɔ wɔ̀ɔ pwɔʔɔ ki nyidege na ge.
Jesu wí ma yabaa fafaʔabaa pwɔʔɔ
(Mar 1:29-34; Luk 4:38-41)
14Jesu wi gâ ban mà bâ je wa Pyɛri wi go nî ge, wɔ̀ɔ Pyɛri wi cɔ wi no nya we wa syɛnhaʔa. Wre ti dá bo wí na tifuru. 15Wɔ̀ɔ maʔá wi kyɛʔɛ na ge. Wre tifumu à mi laʔa wí na kpo. Wɔ̀ɔ jɛ mà na hanri pé kan.
16Yaa ki gâ gɔ kɔ ge, à pe na pan wí kan gbosuu fɛɛ fafaʔabaa ní. Wɔ̀ɔ gbosuu prɔ wi kayoʔo fanŋa ni ge mà yabaa pè bɛfu pwɔʔɔ. 17Ki pomo na me, kayoro à ti funŋu da Nyɛʔɛlɛ leyoo Esayi wi dá yo ge mâ yo: Wí ma wò cɔlɔʔɔ tugu ge mà wò yara laʔa de wo na.#8:17 ma wèle wa Esa 53:4 ni wè.
Bee pé yo pé bi ba Jesu na we
(Luk 9:57-60)
18Jesu wi gâ hɛɛn nya pe yeré móò kɛli ge, wɔ̀ɔ wi ploʔofɛɛ po be, pe plɛ̀n, pe caʔa kon, pe nyini wa ki namyɛlɛ li tɔ na le. 19À Furu sɛbɛ cɛnfɔlɔ wà ma pan wì krugu mà bɔ́ɔ̀ po: «Krɛʔɛfɔlɔ, mí bi da blɛn má ni bì da sye dere tì bɛfu na da má bi da sye ge.» 20Jesu wɔ̀ɔ wí po: «Tindɛrɛ nyɛ nya poon ma be. À heʔere ma po kajɛnʔɛ ma ge, di syɛnhaʔa wò nyɛ Hɛn Pyɔ ma we.» 21À ploʔofɔlɔ wà moo po: «Na fɔlɔ, mí bi ba má na, di ki yaʔa, mí bi gɛri bì yà na to le we kpɛn.» 22Di Jesu wɔ̀ɔ wí po: «Ta ban nà krugu, ma kuu yaʔa be pe da pe nî pè yɛ.»
Jesu wí ma tiflɛʔɛ nì nyumu yrigí me
(Mar 4:35-41; Luk 8:22-25)
23Jesu wi gâ je nyumu kɔrɔ ni ge, wi ploʔofɛɛ à pe je wa wì krugu. 24Welé, à tiflɛgbɔʔɔ ma jɛ na funnu wa nyumu yugu na ge. À mi na jrɛʔɛ mà na nyumu kɔrɔ tonni ge. Di Jesu wiì wɔ̀ɔ po wí na ŋolo. 25À pe kɛri wì krugu mà yɔ́ɔ̀ nyɛ mòo po: «Ma wo syɔ. Wó bi gu.» 26Wɔ̀ɔ pé po: «Yèé bee yè pama mí nyɛ tatunmu ge, nyaʔa ma kan yé na fyaʔa ge?» Wɔ̀ɔ ná jɛ mà yo gbanʔa tiflɛʔɛ nì ge ní nyumu ní me. Pì bɛfu à pi hanri mà yere. 27Àʔa hɛɛn fo be. À pe yo: «Nyaʔa hɛn wi ŋa we, tiflɛʔɛ nì ní nyugbɔmo nì á pi noo kpɔʔɔ ge?»
Jesu wí ma gbosuu fɛɛ syɛn pwɔʔɔ
(Mar 5:1-20; Luk 8:26-39)
28Wi gâ nyugbɔmo kon mâ nyini wa mi namyɛʔɛ gegee na ge, wa Gadara klo ni le, à gbosuu fɛɛ syɛn ma jɛ wa fanra ni de mà bɔ́ɔ̀ flin. Pe dá bo tihroo ceŋge. Ali hɛɛn ìn dàá gbanni bì da doro wa ki kloʔò ni ge adi. 29À pe taʔara mà yo: «Nyaʔa nyɛ wò kpafoʔo ni, mo ŋa Nyɛʔɛlɛ Pyɔ we? Má ma pan bì ba wo cɔlɔ yo, sanni ki nyiŋi kí bi no ge?»
30Calayee fafaʔabaa dá bo wa leʔe pé na li. 31Gbosuu à pe noo nyɛri ceŋge mà yo: «Nà ma wo prɔ wa pe nî ge, ma wo troʔo, wo ya je wa ki calayee fafaʔabaa ni be.» 32Wɔ̀ɔ pé po: «Yee sye.» À pe nyini mà kɛri mà yâ je wa calayee ni be. Pè bɛfu à pe fɛ ticaʔaga mà trigi wa angolo yugu na ge mà bâ do wa caʔa ni ge mà ku.
33Pe naʔafɛɛ à pe fɛ mà kɛri mà yâ ki kaʔa kè bɛfu yo wa kàʔà ni ge ní ga nì ki dá hanri gbosuu fɛɛ na be. 34Welé, ki kàʔà hɛɛn pè bɛfu à pe taʔa mà jɛ na sye bì yà Jesu flin we. Pe gaâ wi nya ge, à pe noo nyɛri ceŋge mà yo wi nyini wa pe klɛnmɛ ni me.
Currently Selected:
MATYE 8: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire