MATYE 10
10
Pitunbee kɛ̂ mà kɛ syɛn
(Mar 3:13-19; Luk 6:12-16)
1Jesu wɔ̀ɔ ploʔofɛɛ kɛ̂ mà kɛ syɛn yeri we mà fanŋa kan pé ma jango pe da gbosuu prɔ, pe da yajɛnʔɛ kè bɛfu lari hɛɛn na be. 2Pitunbee kɛ̂ mà kɛ syɛn pe yegee ké gee: Kplɛlɛ lí la: Simo, ŋa pé na yeri Pyɛri ge, ní wi conlo Andre nì Jake nì ŋa Sebede pyɔ we, ní Jan nì wi conlo we, 3ní Filipe nì, Baritelemi nì, Toma nì, Matye nì, ŋa wí nyɛ misari syɔfɔlɔ we, ní Jake nì, ŋa Alife pyɔ we, ní Tade nì, 4ní Simo nì, ŋa kloklanfɔlɔ we, Judasi Isikariyɔte nì, ŋa wi dá Jesu le wa wi bɛnfɛɛ kyɛrɛ́ ni de.
Jesu wí ma pitunbee kɛ̂ mà kɛ syɛn tun we
(Mar 6:7-13; Luk 9:1-6)
5Jesu wɔ̀ɔ ki hɛɛn kɛ̂ mà kɛ syɛn tun we màʔa yo pé ma mà yo: «Yò gaa je wa klòʔo gee ni ke hɛɛn poò nyɛ Juwifiyee ge. Yò gaa ní bì je wa nɛ Samari kàʔà kà ni kpo. 6Di ye klu ye kɛri Israyɛli kluʔu woo krugu bee pé nyɛ mbara di da ti punŋú ge. 7Nà ye da sye, ye daʔa jari ye yo: ‹Nyɛʔɛlɛ masaʔa kí na nori.›#10:7-15 ma wèle wa Mat 4:23; Mar 1:39; Luk 10:4-12 ni wè. 8Ye da yabaa pori be. Ye da kuu nyɛni be. Ye da yanyɛʔɛ fɛɛ pori be. Ye nì ye da gbosuu prɔ hɛɛn ni be. Yé maʔa ta nadanma na. Ye daʔa kanʔa nadanma na. 9Yò gá tɛ nì, waafiʔi nì, ní kanyɛrɛ gbejanra le wa yè tundaa noro ni de. 10Yò ga ní bì tanʔala kasyara kpe bì drere syɛn syɛn kpe, sabara nì, ní kangandanʔaŋaa ní. Mɛjɛn kí ma yala pe da tungɔɔ kanʔa wi da lí.#10:10 ma wèle wa 1Kor 9:14; 1Tim 5:18 ni wè.
11Nà ye ya je kàkpɔ̀ʔɔ̀ kà ni, ná kiì ban, kàplè là ni ge, ye yùgú, yeʔe cɛn ŋa wí nyɛ hɛncɛnŋɛ wa ki kàʔà ni ge. Ye kò wa ki woo nì we fɔ ye ba gɛri. 12Nà ye ya je go ga ni tɔʔɔ, yeʔe yo ki hɛɛn ma be ye yo: ‹Nyimi mi po ye na.› 13Ki go hɛɛn nà pe ye co kmaʔa, yè nyimi mi kò wa. Di ná pe ìn ye co kmaʔa ge, yè nyimi mi hrù mi pan yè krugu. 14Di hɛɛn nà pe ìn ye co kmaʔa ge, bì loʔo yè kayoro ma de, nà ye gá nyini wa ki go nî ge, ná kiì ban, wa ki kàʔà ni ge, ye yè cyeʔe taplɔʔɔ koro yeʔe làʔá wa yè cyeʔe na ge.#10:14 ma wèle wa Pit 13:51 ni wè. 15Mí biʔi yo ye ma kanyɛmɛ na, Sodɔmu nì, ní Gɔmore nì ki kyɛ̀rɛ̀ ti kiti pɔɔ jɛrɛ bì doro ki kàʔà ki woo na we kiti konwlɛʔɛ na ge.#10:15 ma wèle wa Mat 11:24; Hli 19:24-28 ni wè.
Cɔlɔrɔ da tí na pan wa ge
(Mar 13:9-13; Luk 21:12-17)
16Welé, mì mí ma ye troʔo nɛ pa mbara nyɛ wa sanwyeʔe nulala ni. Ki kala na, ye po ticlimi nì nɛ pa wɔrɔ nyɛ de, ye po baʔahaʔa fun nɛ pa kòtoʔo nyɛ ge.#10:16 ma wèle wa Luk 10:3 ni wè. 17Ye da yè kɔrɔsi, mɛjɛn nabii pèè bi ba ye co bì yà ye kan kiti konfɛɛ ma be bì nì bì da ye kmo wa nɛ pe sɛrigoro ni de. 18Pé bi ba ye co bì gɛri ye nì klo fɛɛ krugu be ní masaa ní be na kala na le, jango ye ya na kala yo pe kân ní klòʔo ke tɔɔ hɛɛn ní be. 19Di nyiŋi ga na pé bi gà ba ye kan pé ma ge, yò gáa honriʔi na yé bi yà yo pomo ma na, ní kayoro da nì yé bi yà yo ge. Mɛjɛn ga yé bi yo ge, Nyɛʔɛlɛ lí bi baʔa kan ye ma ki nyiŋi na ge. 20Mɛjɛn yèé ban yé bi gàá nyu ge. Yè To wi Nyìli liì li lí bi baa nyu wa ye ni ge.
21Hedeme woo wà bi ba wà kan kùʔù ma. Pa to bi ba wi pyɔ kan kùʔù ma ge. Pii pee bi ba yɛʔɛ̀ le pe hefɛɛ ni be bì pe kân, pe pe kpo.#10:21 ma wèle wa Mar 13:12; Luk 21:16 ni wè. 22Hɛɛn pè bɛfu pé bi ba ye cɛ na yele na le, di hɛn ŋa wí biʔi kun wì nî bì ba no ki kɔnyiŋi na ge, ki woo pɔɔ syɔ.#10:22 ma wèle wa Mat 24:9,13; Mar 13:13; Luk 21:17 ni wè. 23Nà pe da ye cɔlɔ wa kàʔà kà ni, ye fɛ̀ ye kɛri kàʔà kà ni nɛ. Mɛjɛn mí biʔi yo ye ma kanyɛmɛ na, yòo gban bì Israyɛli kyɛ̀rɛ̀ tì bɛfu kɔ kí po Hɛn Pyɔ wi ìn je hru bì ban ge.
24Ploʔofɔlɔ wi ín je gbɔʔɔ bì doro ŋa na wí noo ploʔo ge. Ŋklo wi ín je gbɔʔɔ bì doro wi fɔlɔ na we.#10:24 ma wèle wa Luk 6:40; Jan 13:16; 15:20 ni wè. 25Kí ma yala ploʔofɔlɔ wi po nɛ pa ŋa nyɛ wí noo ploʔo ge. Ŋklo wi po nɛ pa wi fɔlɔ nyɛ we. Nà pe da heme lagwɔ yeri we Bɛlisebuli, pa pe da yetipele kanʔa wi heme hɛɛn ma be kpo.#10:25 ma wèle wa Mat 9:34; 12:24; Mar 3:22; Luk 11:15 ni wè.
Ye da fyàʔá Nyɛʔɛlɛ na le
(Luk 12:2-7)
26Ki kala na, yò gáa fyaʔa pé na. Mɛjɛn yraʔa kà wò naʔa tonʔò bì gà go bajɛʔɛgɛ hɛɛn na be, kana bì bo hrahaʔa bì gà go bajɛnʔɛ.#10:26 ma wèle wa Mar 4:22; Luk 8:17 ni wè. 27Ga mí na nyu ye ma yeblimi ni me, ye baa ki jari kpɛnmɛ na. Ga yé na nuru kapɛlɛmɛ ni naakpoʔo tanla ge, ye daʔa nyu, yee ki tàʔàrá wa goro yuru na. 28Yò gáa fyaʔa bee na pé na wre kpun de mâ po pòo gban bí nyìli kpo le. Di ye da fyàʔá ŋa na wí bi gban bí nyìli ní wre plɛn bi ti cɔʔɔ́ wa cɔlɔʔɔ deʔe nî ge. 29Poò na gbɛ̀nhɛ̀nʔɛ syɛn pɛrɛ we kɛkɛbyɔ na yo? Là nigbe ná jé do yè To wi kruʔu na. 30Di yèé bee wí ma yè yujoro tì bɛfu ti nò cɛn ge. 31Ki kala na, yò gáa fyaʔa, mɛjɛn yè pɛrɛ tí nyɛʔɛ mà toro gbɛ̀nhɛ̀nʔɛ fafaʔa woro na.
Jesu wi yo wi woo kuʔu na ge nɛ
(Luk 12:8-9)
32Ki kala na, hɛn o hɛn ŋa wí biʔi yo hɛɛn pe yɛʔɛ̀ na bí yo wí nyɛ Jesu wi woo ge, domi pa miʔi yo na To wi yɛʔɛ̀ na, ŋa wí nyɛ wa namuru ni de, bì yo ki woo wí nyɛ na woo. 33Di hɛn ŋa wí bi je ná ma hɛɛn pe yɛʔɛ̀ na ge, domi pa mi je ki woo ma we na To wi yɛʔɛ̀ na, ŋa wí nyɛ wa namuru ni de.#10:33 ma wèle wa 2Tim 2:12 ni wè.
Nyimi ban, mlaʔa kpele li
(Luk 12:51-53; 14:26-27)
34Yò gáa ki honri bì yo mí ma pan jango bì ba nyimi kan drunya ma we. Mi ìn ban bì ba nyimi kan fɔ mí ma pan mlaʔa kpele ní. 35Mɛjɛn mí ma pan bì ba bɛnmɛ le naŋa nì, wi to nì pe kpafoʔo ni, bì mi le wa nɛ picɛpii ní, wi no nì pe kpafoʔo ni, bì mi le wa nɛ cɛfonŋo nì, ní wi pɔlɔ nò ní pe kpafoʔo ni ge.#10:35-36 ma wèle wa Mis 7:6 ni wè. 36Hɛn wà heme woo bi grɛʔɛ wi bɛnfɛɛ.
37Hɛn o hɛn ŋa wi to nì, wi no nì pé noo glanʔa mâ toro mì na we, paʔa bo ki woo wi ìn yala wi po na woo. Nàʔa po wà pyɔ noo glanʔa bì doro mì na we, paʔa bo ki woo wi ìn yala wi po na woo. 38Ŋa wi ìn bi wi tipraʔa tugu ge bi bá ná na ge, ki woo wi ìn yala bì bo na woo.#10:38-39 ma wèle wa Mat 16:24-25 ni wè. 39Hɛn ŋa wí bi daʔa ca bí wi nyuwyeʔe ta ge, pɔɔ baʔa punŋu. Di hɛn ŋa wí bi wi nyuwyeʔe punŋu ge na kɔsɔ na, ki woo pɔɔ baʔa ta nɛ.
Tonro tama kayoʔo
(Mar 9:41)
40Hɛn ŋa wí bi ye co kmaʔa, paʔa bo wí ma domi co kmaʔa. Ŋa wí bi domi co we kmaʔa, paʔa bo wí ma ŋa co kmaʔa wí ma na tun ge. 41Ŋa wí bi Nyɛʔɛlɛ leyoo wà co kmaʔa ga na wí nyɛ Nyɛʔɛlɛ leyoo ge, tonro ŋa Nyɛʔɛlɛ leyoo wí bi ba da ge, wiì pɔɔ ba wi nyoʔo ta. Ŋa wí bi hɛnsinŋi wà co kmaʔa wi sinmi kala na le, pɔɔ ba hɛnsinŋi tonro nyoʔo ta. 42Ali nà hɛn wà bí nyinyimi cɛnnyɛlɛ kan ki woo bee tatunŋu wà ma ga na wí nyɛ na ploʔofɔlɔ ge, mí biʔi yo ye ma kanyɛmɛ na, wi tonro wòo gà bunŋu fyeu.»
Currently Selected:
MATYE 10: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire