MATYE 7
7
Yò gáa kiti kon hɛn wà na
(Luk 6:37-38,41-42)
1Yò gáa kiti kon hɛn wa na. Nàʔa po ban, Nyɛʔɛlɛ lòo ba kiti kon ye na. 2Mɛjɛn yé na kiti kon pomo ma na ge, lí bi ba kiti kon ye na ki podeme miì na. Yé na yrɛbɛ tonli alege ga ni mâ na pi kanʔa hɛɛn ma be, Nyɛʔɛlɛ lí bi ba yè wobo tonli be wa ki alege kiì ni bi pí kan ye ma ge.#7:2 ma wèle wa Mar 4:24 ni wè. 3Nyaʔa ma kan má na kakraple wele le wa ma nibo wi nyɛlɛ ni le, di moò na kanglangbɔʔɔ ga nyaʔa kí nyɛ wa ma wolo ni le yo? 4Dee di, pa maʔa yo mɛlɛ ma nibo kan we bí yo: ‹Yeré, bì kakraple fara le ma na nyɛlɛ ni le,› áʔa hín bo kanglangbɔʔɔ kí nyɛ wa mo ma wolo ni le ge? 5Noyomo syɛn syɛn fɔlɔ wi má ni. Ma ma kanglangbɔʔɔ fara ge wa kpɛn ma nyɛlɛ ni le, jango ma gbàn ma nya kmaʔa, ma kakraple fara le wa ma nibo wi nyɛlɛ ni le.
6Ga pe cɛʔɛ́ Nyɛʔɛlɛ kan le ge, yò gáa ki kanʔa poon ma. Ná kiì ban, pa pe wa bì grɛʔɛ bìí ki ca bì ye no. Yò gáa yè ncɛnrɛ wa de calayee pe yɛʔɛ̀ ma. Ná kiì ban, pa pe da ti tanri.
Nyɛʔɛlɛ lí na li pii pe nyɛrimi nuru me
(Luk 11:9-13)
7Ye da nyɛrí, Nyɛʔɛlɛ pa liʔi kan ye ma. Ye da ja, Nyɛʔɛlɛ pa liʔi tyɛʔɛ ye na. Ye daʔa kòló, Nyɛʔɛlɛ pa liʔi nyɛʔɛ ye kan. 8Mɛjɛn hɛn o hɛn ŋa wí bi da nyɛri ge, wi naa daʔa. Ŋa wí bi da ja ge, wi naa nyaʔa. Ŋa wí naʔa kolo ge, Nyɛʔɛlɛ pa liʔi nyɛʔɛ wí kan. 9Han nyɛ naʔa ye ni ŋa wi pyɔ nòo bru nyɛri wí ma, pɔɔ ŋglɛnʔɛ kan wí ma ge? 10Dee di, nòo fyɔ nyɛri wí ma ge, pɔɔ wɔgɔ kan wí ma? 11Ali mà ja bo yé nyɛ hɛnpee ge, yé na akmaba kanʔa yè pii ma be pomo ma na, yèé maʔa cɛn. Kanyɛmɛ na, yè To ŋa wí nyɛ wa namuru ni de, wiì wí bi da akmaba kanʔa bee ma pé noo nyɛri ge bì doro yèé na be dɛ.
12Yraʔa o yraʔa ga ye corí hɛɛn pe da hanri ye kan ge, yèé fanna, ye daʔa hanri pé kan kpo. Mɛjɛn kiì gi furu kayoro sɛbɛ ní, ní Nyɛʔɛlɛ leyoo sɛbɛ ní pe kayoro ti kɔ̀rɔ́ we.#7:12 ma wèle wa Luk 6:31 ni wè.
Goyɛtatugu kayoʔo
(Luk 13:23-24)
13Kí ma yala ye je wa goyɛtatugu na. Mɛjɛn goyɛʔɛ ga kí nyɛ kpangbanŋa ge, ki kloʔò áʔa plɛn mâ po kpangbanŋa ge, kí na sye kwɔkpɔʔɔ ni. Bee pé na jin waʔa ni pé nyɛ fafaʔabaa. 14Di goyɛʔɛ ga kí nyɛ tatugu ge, ki kloʔò áʔa ní mâ po tatugu nɛ ge, ki woʔo kí na sye nyuwyeʔe deʔe na. Bee pé maʔa nya poò nyɛ fafaʔabaa.
Tiʔi ní, pibi nì
(Mat 12:33; Luk 6:43-44)
15Ye da yè kɔrɔsi bee ní pé yo pé nyɛ Nyɛʔɛlɛ leyoo, di áʔa hín bo kayocɛnŋɛ ban ge. Pé na mbahlɛrɛ ni na pan yè krugu, di pe lama mí nyɛ nɛ pa sanwyeʔe lama nyɛ me, gee funŋu kí ma ke co kmaʔa ceŋge ge.
16Yé bi pe cɛn pe pibi pii na ba pé bi da seri ge. Hɛɛn pe na hrɛsɛn pibi co wa huru tiʔi na ge yo? Dee di, pe na syaʔa co wa hufidiʔi na ge? 17Ki pomo na me, tikmaʔa o tikmaʔa ki hîn na pikmaba seri. Di titipeʔe o titipeʔe ki naa pitipebe seri. 18Tikmaʔa kòo gban bì da pitipebe seri. Titipeʔe kòo gban bì da pikmaba seri. 19Tiʔi o tiʔi ga ki ìn bi da pikmaba seri ge, pa peʔe kon bìʔi wa kwɔʔɔ ni.#7:19 ma wèle wa Mat 3:10; Luk 3:9 ni wè. 20Ki kala na, yé bi ba pe cɛn pibi ba na pé na seri ge.#7:20 ma wèle wa Mat 12:33 ni wè.
Mi ìn ye cɛn fyeu
(Luk 6:46; 13:27)
21Pè bɛfu ban bee pé na na yeri “wò fɔlɔ, wò fɔlɔ” pé bi je wa Nyɛʔɛlɛ masaʔa ni ge fɔ ŋa wí bi da na To wi nadanma hanri ŋa wí nyɛ wa namuru ni de. 22Ki wlɛʔɛ na ge, pèè fafaʔa bi baʔa yo ná kan bì yo: ‹Wò fɔlɔ, wò fɔlɔ, wòó ban wo dáa nyu ma yele na le mâ na gbosuu prɔ ma yele na le mâ nì ná kafonŋoo fafaʔa hanri ma yele na le yo?› 23Ki nyiŋi na ge, pa miʔi yo pé ma bì yo: ‹Mi ìn ye cɛn fyeu. Yè jɛ̀ nà tanla, kapere hanrifɛɛ.›#7:23 ma wèle wa Ŋuʔu 6:9 ni wè.
Goro syɛn kayoʔo
(Mar 1:22; Luk 4:32; 6:47-49)
24Hɛn o hɛn ŋa wí na na kayoro da nuru de bí daʔa hanri nɛ pa kí ma yo ge, pɔɔ bo nɛ pa ticlimi fɔlɔ nyɛ, ŋa wí ma wi go fan ŋglɛnʔɛ yugu na ge. 25Hɔgɔ ki gáa dun ge, cara à ti na fo. Tiflɛʔɛ àʔa na funnu mà na go ŋroʔo ge. Di ki ìn do, mɛjɛn ki noʔoma wí nyɛ ŋglɛnʔɛ yugu na. 26Hɛn o hɛn ŋa wí bi da na kayoro nuru de, nà wi ìn da ga hanri tí na nyu ge, pɔɔ bo nɛ pa hɛn letɔʔɔ nyɛ. Wí ma wi go fan tanyrɛʔɛ na. 27Hɔgɔ àʔa báa dun. Cara à ti na fo. Tiflɛʔɛ àʔa na funnu mà na ki go ŋroʔo ge. Kì bɛfu àʔa to mà craʔa.»
Jesu wi sye kayoʔo
28Jesu wi gâ ki kayoro da yo á ti kɔ ge, wi krɛʔɛmɛ à mi janma fo me.#7:28-29 ma wèle wa Mar 1:22; Luk 4:32 ni wè. 29Mɛjɛn wi dáa pe krɛʔɛ fanŋa nì. Wi krɛʔɛmɛ mi ìn dà bo nɛ pa pe Furu sɛbɛ cɛnfɛɛ womo nyɛ me.»
Currently Selected:
MATYE 7: NLK10
Highlight
Share
Copy
Want to have your highlights saved across all your devices? Sign up or sign in
Bible Society of Côte d'Ivoire