1 Bamakabe 4
4
Yudase udi utshimuna mu Emawuse
(2 Mak 8.23-29,34-36)
1Ngorjiyase#4.1 Ngorjiyase: tangila 3.38 ne 2 Mak 8.9. kuangata bena tshiluilu binunu bitanu; kabidi ne babandi ba pa nyama ya tubalu, bamanyi bapiluke tshinunu, kuyabu mu butuku, 2bua kutulukila bena Yuda mu mitanda mu tshintuluntulu bua kubaluisha. Pine apu, bantu ba mu tshimenga tshia Yerushalayime, ba mu nzubu ya bimana bikolesha, bavua baye nabu bua kubaleja njila. 3Yudase umvua bualu, kuyaye kudibu ne bantu bende ba bukitu bua kuluisha bena bukalenga bavua mu Emawuse,#4.3 Emawuse: tangila diumvuija mu 3.40. 4diba adi bena tshiluilu ba ngoyiyase batshivua batangalaka dia muamua dia mitanda. 5Ngorjiyase kufika butuku mu mitanda ya Yudase, kumusangana mutupu, kudituaye ku dikeba bena Yuda mu mikuna, bualu uvua wamba ne: “Bena Yuda mbatunyeme.” Kutuadijabu kubakeba mu mikuna.
6Mu dinda dionsu, tshiluilu tshia Yudase kumueneka mu mpata. Bavua bantu binunu bisatu, kabayi ne ngabu nansha miele bungi bikumbane. 7Kumonabu tshiluilu tshikole tshia benyi, tshivuala ngabu, tshijika kudi bena tubalu, bonsu amu bapiluke mu malu a mvita, baluanganyi ba dilambu. 8Yudase kuambila bena diende ne:
— Kanutshinyi bua bungi buabu nansha bua mushindu udibu batubunda. 9Vulukayi muvua bankambua betu bapande ku Mayi manene makunze, pavua mukalenga wa bena Ejipitu ubalondakaja ne tshiluilu tshiende!#4.9 Tangila Tshim 14. 10Kadi mpindiewu, tusengelelayi Mvidi Mukulu. Padiye mutusue, neavuluke ndondu ivuaye mutue ne bankambua betu. Nenku lelu neaboze tshiluilu etshi patuatshiluisha. 11Matunga onsu a benyi neamanye ne: kudi kampanda udi upikula ne usungidila bena Izrayele.
12Diakanue baluishi kumona tshiluilu tshia bena Yuda tshivua kudibu. 13Kupatukabu mu mitanda bua kubaluisha. Bantu ba Yudase kuela mpungi, 14ke kutuadijabu mvita. Kushipabu bantu ba matunga makuabu, aba kunyema mu mpata. 15Kadi bena Izrayele kushipa bonsu bavua bashale luanyima. Bena Yuda kulondabu bantu too ne mu tshimenga tshia Ngezere ne mu mpata ya Idumeya, ya Asdode ne ya Yamniya.#4.15 Ngezere: tangila Yosh 10.33, musoku udi mutantshi bu wa kilometre 30 ne Yerushalayime. — Idumeya: tangila diumvuija mu 3.41. — Asdode: tangila Yosh 11.22. — Yamniya (nansha Yabne): tangila Yosh 15.11 ne 2 Kul 26.6, badi ku mielelu ya buloba bua mayi manene. Kushipabu bantu benyi batua ku binunu bisatu.
16Yudase upingana ne bena mvita ku dilondakaja baluishi, 17kuambilaye bantu ne:
— Kanutambi kupukila ku bintu bia dipawula. Nuamanya ne: mikuabu mvita mmituindile. 18Ngorjiyase ne tshiluilu tshiende kabena kule to, badi mu mikuna emu. Mpindiewu, tuanji kulamakaja baluishi, tubaluishe. Pashishe nenuangule bintu bionsu bia mvita talalaa.
19Yudase utula meyi, kumonabu baluishi babu ku lusongu lua mukuna benda batentekela. 20Baluishi kumonabu ne: babu bena tshiluilu bavua banyema bonsu, kaba-tshivuapu, kabidi mitanda yabu ivua mitue kapia, bualu minshi ivua ibaleja muvuabi. 21Bamone nanku, baluishi kukuatshika bowa bunene. Bamone kabidi tshiluilu tshia Yudase tshindila mvita, 22bobu kunyema bonsu batangile ku matunga a bena Peleshete.#4.22 bena Peleshete: tangila diumvuija mu 3.24. 23Yudase kupingana mu mitanda ya baluishi bua kupawula bintu. Bena Yuda kuangata mpawungi mivule ne nkanu muengulula mitoke ya mushinga mukole, bilamba bikunzubile ne bia mubidi mukunze kunzuu, kabidi ne biuma bikuabu bia bungi. 24Mu dipingana, kutumbishabu Mvidi Mukulu, kumusamuna, bimba ne: “Mvidi Mukulu udi mulenga, dinanga diende ndia kashidi.” 25Dituku adi kusungidilabu bena Izrayele.
26Bena Ngorjiyase bavua bapanduke mu mvita kuyabu kuambila Lisiyase#4.26 Lisiyase: tangila diumvuija mu 3.32. bualu buvua buenzeke. 27Malu aa kumutonda bikole, kutekeshaye mu maboku. Uvua munyingalale bualu uvua ne dijinga dia kutshimuna bena Izrayele. Kadi ki mbienzeke nanku to. Kabidi uvua ne dijinga dia kukumbaja bionsu bivua mukalenga mumutumine diyi. Bionsu abi wabipangidi.
Yudase udi utshimuna mu Bete-Sure
(2 Mak 11.1-12)
28Tshidimu tshivua tshilonda,#4.28 Tshidimu tshivua tshilonda: ntuadijilu wa 164 bgbg ne Y.K. (tangila 3.37 ne diumvuija). mfumu Lisiyase kusangisha bena mvita bapiluke binunu makumi asambombu, ne bena mvita ya ne tubalu binunu bitanu bua kuluisha bena Yuda. 29Kufikabu mu Idumeya, kuasabu mitanda mu Bete-Sure.#4.29 Tangila 3.41. Yudase kuya bua kusangila nabu ne bena mvita binunu dikumi. 30Pamonyiye bukole bua tshiluilu atshi, ke kutendelelaye wamba ne:
— Utumbe wewe Mupandishi wa bena Izrayele, wewe ngudi mutshibule bukole bua muluanganyi munene Ngoliyate ku tshianza tshia muena mudimu webe Davide, wewe kufila mitanda ya bena Peleshete kudi Yonatane, muana wa Shawule, ne kudi muambadi wa bia lufu biende.#4.30 Tangila 1 Sam 17.4-54; 1 Sam 14.1-23. 31Bena Izrayele mushindu umue bakuate tshiluilu etshi. Bena mvita ya panshi ne ya tubalu ba baluishi betu bafue bundu. 32Mvidi Mukulu, ubakuatshishe bowa, tekesha bukole buabu, mbatshimune pamue nebe, batekeshe mu maboku. 33Bantu badi bakunanga bashipe baluishi babu. Badi bakumanya basamune dina diebe ne misambu.
34Myita kubanga ya bisumbu bibidi. Bena tshiluilu tshia Lisiyase kufua batue ku binunu bitanu. 35Lisiyase umona muatangalaki tshiluilu tshiende, utangila kabidi dikima dia bena mvita ba Yudase, ne muvuabu bashindika mua kufua nansha kushala ne muoyi mu mvita ayi, ke kuyaye mu Antiyokiya#4.35 Tangila mu 3.37. bua kuangata benyi badi mua kukolesha tshiluilu papinganaye mu Yudeya.
Yudase udi umusha mikiya mu nzubu wa Mvidi Mukulu
36Yudase ne bana babu kuambabu ne:
— Tuashipi baluishi betu bonsu, tuyayi bua kumusha mikiya ku nzubu wa Mvidi Mukulu ne kumujidila tshiakabidi.
37Tshiluilu tshijima kudisanga, kuya ku mukuna wa Siyone. 38Kumonabu nzubu wa Mvidi Mukulu mushale mutupu, tshilambuilu tshinyanga, biibi biosha, mu lubanza mumena bisosa bu mu tshisuku nansha mu mikuna, kabidi bibambalu bionsu binyanga. 39Kupandabu bilamba biabu, kudilabu bikole, kudiela butu mu mutu. 40Kulalabu batue biadi panshi. Pakelabu mpungi, ke kuelabu mbila mikole kudi Mvidi Mukulu.
41Yudase kutuma diyi bua bantu bende baluishe bantu bavua basombe mu tshimenga tshia Davide too ne ku tshikondu tshivuaye ujikija mudimu wa kulengeja nzubu wa Mvidi Mukulu. 42Pashishe kusungulaye batuangaji bavua kabayi ne buenzayi, bavua balama meyi ne mikandu ne disuminyina. 43Kumushabu mikiya ku nzubu wa Mvidi Mukulu, kutekabu mabue avua ne mikiya muaba musunguluke.#4.43 mabue avua ne mikiya: mabue mumbushe ku tshilambuilu tshia milambu tshivuabu base kudi Antiyokuse IV (tangila 1.54). 44Bavua badiebeja tshivuabu ne bua kuenza ne tshilambuilu tshia milambu ya kuosha tshikavua tshiuwule ne mikiya. 45Ke kupetabu lungenyi lulenga lua kutshibumbula, bua katshishadi tshibafuisha bundu, bualu benyi bakavua batshishile mikiya. Kutshibumbulabu. 46Kadi kutekabu mabue atshi pa mukuna wa nzubu wa Mvidi Mukulu, pa muaba muakumbanyine, bindile muambi bua avue kuamba tshia kuenza nawu.#4.46 muambi bua avue: fuanyikija ne 14.41. 47Kuangatabu mabue kaayi masonga, bu muvua meyi mambe,#4.47 Tangila Tshim 20.25 ne diumvuija. kuibakabu tshinga tshilambuilu tshifuanangane ne tshia kale. 48Kuakajilulabu muaba wa tshijila ne munda mua nzubu wa Mvidi Mukulu. Kujidilabu kabidi ne mbanza. 49Bamane kuenza ngesu mipiamipia#4.49 ngesu: ngesu ya kale ivua miba kudi Antiyokuse Epifane (tangila 1.21-24). mijidile, kutekabu mu nzubu wa Mvidi Mukulu tshitekelu tshia miendu, tshilambuilu tshia manananshi ne mesa a mampa malambula. 50Kuoshabu musenga wa kamonya pa tshilambuilu, kutemeshabu miendu mu nzubu wa Mvidi Mukulu. 51Kutekabu mampa pa mesa, kukudikabu tshilamba, kujikijabu midimu yonsu.
52Mu dituku dia makumi abidi ne ditanu dia ngondu wa tshitema#4.52 Kislewu: tangila Neh 1.1 ne diumvuija. udi dina ne: Kislewu, mu tshidimu tshia lukama ne makumi anayi ne muanda mukulu, kujukabu dinda dionsu. 53Kulambulabu mulambu pa tshilambuilu tshivuabu base bu muvua Meyi a Moshe mambe. 54Kubanjijabu tshilambuilu ne misambu, ne lunzenze ne nshiba ne mpungi anu dituku dia mufikilu divuabu batshinyanga kudi benyi atshi. 55Bantu bonsu kudiela panshi bua kukukuila Mvidi Mukulu, pashishe kuimbabu misambu ne musangelu. 56Kuenzabu tshibilu tshia dijidila tshilambuilu matuku muanda mukulu. Ke kulambulabu milambu ya kuosha ne disanka dinene, kabidi ne milambu ya ditua ndondu ne ya diela tuasakidila. 57Kulengejabu tshimana tshia kumpala kua nzubu wa Mvidi Mukulu, ne bikata bia mpawungi ne ngabu milengeja bimpe,#4.57 bikata bia mpawungi ne ngabu: ke bilengejilu bivua baluishi bumushe ku bimana bia nzubu wa Mvidi Mukulu (tangila 1.22). kulongololabu ne bibuelelu ne bibambalu, kupingaja biibi. 58Bantu kupeta disanka divule. Bundu buvuabu bapeta kudi benyi kujika. 59Yudase ne bana babu ne bena Izrayele bonsu kujadika bua kuenzenza tshibilu tshia dijidila nzubu wa Mvidi Mukulu, matuku muanda mukulu, ku tshidimu ku tshidimu, bituadije ku matuku dikumi ne atanu a ngondu wa Kislewu, bua basanke, batshionkomoka.
60Matuku awu ke ashilebu tshimana tshile tshinyungulule mukuna wa Siyone, ne tuleya tukole, bualu bavua batshina ne benyi kabavu kunyanga miaba ayi bu bangabanga. 61Yudase kuteka tshisumbu tshia bena tshiluilu bua kulama nzubu wa Mvidi Mukulu bimpe. Kukoleshaye Bete-Sure, bua bantu bende bikale ne muaba mukole mutangilangane ne ditunga dia Idumeya.#4.61 Bete-Sure: tagila diumvuija mu kan. 29. — Idumeya: tangila diumvuija mu 3.41.
Currently Selected:
1 Bamakabe 4: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996