1 Bamakabe 5
5
Yudase udi uluisha bena mutumba wende
(2 Mak 10.14-33)
1Bena matunga avita ku mutumba wa bena Izrayele, bumvue ne: bena Yuda mbasulule tshilambuilu, kabidi mbalongolole muaba wa tshijila, bu muvuabi kale kufikabu munda bikole. 2Kushindikabu mua kubutula bena Izrayele bavua basomba munkatshi muabu. Kutuadijabu kushipa, kubutula kabidi bana betu.
3Yudase kuluisha bena mu Idumeya mu Akrabatene,#5.3 Idumeya: tangila diumvuija mu 3.41. — Akrabatene: nditunga dia bena Akrabatene divua mutantshi wa kilometre 12 kuinshi kua Shekeme. bavua babanyungulula. Kubakengeshaye bikole, kubipata, kupawula bintu biabu. 4Pashishe Yudase kuela meji a kunyoka bena Baya#5.4 bena Baya: misangu mikuabu ntshisamba tshia bena Arabe badi kabayi bapita kuendakana. bua ngenzelu yabu mibi: bavua bajikila bena Izrayele njila; bateka mitshi bua kubakuata mu buteyi. 5Yudase kusemeja bena Baya bua bapingane ku nzubu yabu mikolesha. Kubanyungululaye ne mvita. Kushindikaye bua kubabutula bonsu. Kuoshaye nzubu ne bonsu bavuamu. 6Pashishe kuyaye kudi bena tshisamba tshia Amone, bavua ne tshiluilu tshikole kabidi ne bantu musumba munene uvuabu balombola kudi Timote.#5.6 Timote: muena mudimu munene wa mbulamatadi mutangidi wa dishiya dia Yardene. 7Kubelaye mvita mikole. Kubashipaye, kubatshimuna bonsu. 8Kukuataye tshimenga tshia Yazere#5.8 Yazere: tshimenga tshia bena Mowabe, tangila Yesh 16.8. ne misoku yatshi. Pashishe kupinganaye mu Yudeya.
Yudase udi wambuluisha bena Izrayele
9Meku a bena Ngilaade kudisangisha bua kuluisha ne kujimija bena Izrayele bavua base mu buloba buabu. Ke bena Izrayele kuya kusokoma mu nzubu mikolesha mu Datema.#5.9 Ngilaade: ku ntuadijilu nditunga divua luseke lua musulu wa Yaboke. Kadi mu tshikondu tshia bena Ngreke, ditunga dia Ngilaade kualabala kufika ne ku mpata wa bena Siriya. — Datema: muaba udi kauyi mumanyike, udi mua kuikala pabuipi ne Bosora: (tangila tun. 25-29). 10Bena Izrayele kutumina Yudase ne bana babu mukanda, bamba ne:
— Bantu benyi batudi nabu mutumba, mbadisangishe bua kutujimija pa buloba. 11Badi badilongolola bua kutujimija ne tshiluilu tshiabu pa muaba utudi basokome. Timote ke udi ulombola tshiluilu tshiabu. 12Bantu bavule ba munkatshi muetu mbafue. Ufike kunu utusungidile. 13Betu bonsu ba mu ditunga dia Tobiya#5.13 Tobiya: ndelanganyi ya Tobiya, wa mu Neh 2.19. Diku diende divua ne bumfumu ku kale mu ditunga dia Amane ne mu Yardene. mbashipa. Bakaji babu mbaye nabu mu bupika, ne bana kabidi. Bintu biabu mbinyenga. Bantu balume batua ku tshinunu mbajimine diba adi.
14Patshi wabu babala mikanda ayi, bakuabu bantu kufika ne mikenji amu ya momumue, batumina ku Ngalileya, bilamba bipanda, bu badi mu madilu, 15bamba ne: “Bena Ptolemayise, bena Tire ne bena Sidone mbadisange ne benyi#5.15 Ptolemayise: dina edi divua dinyika kudi mukalenga Ptolemeye II mu Ako. — Ngalileya wa benyi, muaku wa nsenda udibu bamba ditunga edi, bualu divua diuwule tente ne bantu bavua kabayi bena Yuda, (tangila Yesh 8.23). bonsu badi mu Ngalileya bua kutubutula.” 16Yudase ne bana babu bumvue nanku, kubikilabu tshisangilu tshinene bua kukeba tshidibu mua kuenza bua kusungidila bana babu badi mu njiwu ya mvita. 17Yudase kuambila muanabu Simeyone ne:
— Sungula balume badi bamanye mvita, uye kusungidila bana betu bena Yuda badi mu Ngalileya. Meme ne Yonatane wetu, netuye mu bena Ngilaade.
18Kushiyaye Yozefe muana wa Zekarya kabidi ne Azariya bua kulombola bantu mu Yudeya. Bamue bena tshiluilu bavua bashale kabidi. 19Yudase kubafundila tshia kuenza ne: “Lamayi bantu, kadi kanutuadiji mvita ne benyi too ne ku diba diapingana.” 20Kupeshabu Simeyone bena mvita binunu bisatu bua kuya mu Ngalileya, ne binunu muanda mukulu kudi Yudase bua kuya mu bena Ngilaade.
Simeyone ne Yudase badi batshimuna mvita misangu ya bungi
(2 Mak 12.10-31)
21Simeyone ufika mu Ngalileya, kuluisha benyi kubatshimuna, kunyemabu. 22Kubalondakajaye too ne ku tshiibi tshia tshimenga tshia Ptolemayise. Benyi kufua batua ku binunu bisatu. Ke kupawulaye bia lufu biabu. 23Kuangataye bena Yuda ba mu Ngalileya ne ba mu Arbata,#5.23 Arbata: misangu mikuabu ditunga adi ditua mua kuikala kuinshi kua Ngalileya. kupinganaye nabu mu Yudeya ne disanka, pamue ne bakaji, bana ne bintu biabu bionsu.
24Eku Yudase Makabe ne muanabu Yonatane kusabukabu musulu wa Yardene, kuenda matuku asatu mu tshipela. 25Kusambakenabu ne bena Nabate.#5.25 Nabate: bena luendu ba bena Arabe batua bendakana mu mpata udi dishiya dia Yardene. Aba kubakidila bilenga, babalondela bionsu bivua bienzekela bana babu ba bena Izrayele mu Ngilaade. Kubambilabu ne: 26bavule ba munkatshi muabu bavua babakuata, babalama mu tshimenga tshia Bosora, tshia Alema, tshia Kasfo, tshia Makede ne tshia Karnayime,#5.26 Bosora, Karnayime: bimenga bibidi mu mpata udi dishiya dia Yardene. bimenga bivuabu bakolesha ne bimana. 27Mudi bavuabu binjidila mu bimenga bikuabu bia bena Ngilaade. Baluishi babu bavua bashindika mua kubabunda maloba mu miaba eyi, kubakuata ne kubutula mu dituku dimue bonsu badibu basanganamu. 28Diakamue Yudase ne tshiluilu tshiende kuangatabu njila wa Bosora, bakosolola tshipela. Kukuataye tshimenga, kushipa balume bonsu, kupawula bintu bionsu, kuosha tshimenga.
29Kubangululaye luendu butuku. Kuendabu too ne ku tshimenga tshia Datema#5.29 Datema: tangila kan. 9 ne diumvuija. tshia bena Yuda, tshidi tshikolesha ne bimana. 30Diba dipatuka, Yudase ne bavuaye nabu kumona musumba wa bena tshiluilu muvule, bimanyika bibandilu, basemeja matempu a mvita bua kukuata tshimenga,#5.30 matempu a mvita: kaleya ka mabaya kavuabu bendesha kuinshi kua bimana bikolesha (tangila 13.43). babanga mvita. 31Yudase umona ne mvita ikadi mituadija, umvua kabidi bela bibingu mu tshimenga, bela mpungi ne mikunda ibanda mu diulu, 32kuambilaye bena tshiluilu tshiende ne: “Tuluangane lelu bua kupandisha bana betu bena Izrayele.”
33Uvua utungunuja tshiluilu tshiende. Kutshikosololaye mu bitupa bisatu. Kulondabu bena mvita ba baluishi mu nyima bua kubaluisha. Kuelabu mpungi, kuelabu mbila, babila Mvidi Mukulu. 34Bena tshiluilu tshia Timote#5.34 Timote: tangila diumvuija mu kan. 6. bamone ne: ntshiluilu tshia Makabe, ke kudituabu lubilu, kunyema. Ke tshiluilu tshia Yudase kubatshimuna. Dituku adi bantu kufua batua ku binunu muanda mukulu.
35Pashishe Yudase kuluisha tshimenga tshia Alema,#5.35 Alema: dina dia tshimenga etshi kadiena dimanyike to. kutshikuata, kushipa balume bonsu, kupawula bintu bionsu, kuosha tshimenga. 36Kumukaye bua kuya kukuata tshimenga tshia Kasfo, tshia Makede ne tshia Bosora, kabidi ne bimenga bikuabu bia bena Ngilaade.
Yudase udi utshimuna kabidi mvita mu buloba bua Ngilaade
37Malu aa mamane kuenzeka, ke Timote kushisha kusangisha banga bena tshiluilu, kuasa mitanda mitangilangane ne tshimenga tshia Rafone, dia muamua dia musulu.#5.37 Rafone: mpindiewu badi babikila ne: Ete-Rafe, mutantshi wa kilometre 60 kuinshi kua Damase. 38Yudase kutuma bantu bua kujadika mudi mu mitanda ya baluishi. Ke kumutuadilabu bualu ne: “Matunga onsu adi matunyungulula mmadisange, mmenze tshiluilu tshinene tshikole, batshilombola kudi Timote. 39Mbangate bena Arabe bua kukumbaja tshisumbu tshiabu. Mbase mitanda luseke lukuabu lua musulu, mbadilongolole bua kukubunda, kuluangana nebe.” 40Diakamue Yudase kuya bua kusangila nabu ne tshiluilu tshiende, usemena ku musulu. Timote kuambila baludiki ba tshiluilu ne:
— Neatupite dikanda bu yeye mudianze kusabuka musulu kumpala kuetu. Nenku katuakutua nkanana to. 41Kadi pikalaye ne bowa, wanji kutula luseke lukuabu lua musulu, tuetu netusabuke. Nanku netumutshimune.
42Kadi Yudase ufika amu ku muelelu wa musulu, kutekaye bamue balombodi ku muelelu wa musulu awu, ubelela mukenji ne:
— Muntu nansha umue kena mua kuimana to. Bonsu baye ku mvita.
43Kusabukaye musulu kumpala, tshiluilu tshionsu tshimulonda munyima. Kutshimunaye baluishi bende. Bobu kuimansha bia lulu biabu, kunyemabu ku nzubu wa tshijila wamu Karnayime.#5.43 Karnayime: dina edi didi diumvuija ne: “nsengu ibidi”, muaba wa tshijila ewu uvua wa nwidie Astarte, uvuabu base nsengu mikese ibidi. 44Bantu ba Yudase kukuata bangabanga tshimenga, kuosha nzubu wa tshijila ne bonsu bavuamu, kutonkola kabidi Karnayime. Biangatshile ku tshikondu atshi kakuvua mushindu wa kukandamana kumpala kua Yudase to.
45Ke Yudase kusangisha bena Izrayele bonsu ba mu Ngilaade, bakulumpe ne bakaji babu, bana ne bintu. Bavua tshisumbu tshinene. Kuyabu batangila ku ditunga dia bena Yuda. 46Kufikabu mu tshimenga tshinene kabidi tshikolesha tshia Efrone,#5.46 Efrone: matuku aa badi babikila ne: Ete-Tayibe, mutantshi wa kilometre 30 ne dijiba dia Ngenezarete. tshivua mu njila uvuabu bayila. Kabavua mua kupita tshimenga etshi ku dia balume nansha ku dia bakaji to. Bua kupitabu, anu bobu batshikosolola munkatshi. 47Bantu ba mu tshimenga kubenga mua kubapitshisha. Ke kudinjidilabu biibi ne mabue manene. 48Ke Yudase kubalayaye ne miaku ya bupole ne: “Tudi tukosolola ditunga dienu bua kupingana kuetu. Muntu kakunuenzela bualu to. Nedipite buludi ne njila.”
Bena ditunga kubenga bua kubunzuluila biibi.
49Yudase kutuma diyi bua bantu bonsu bimane muaba udibu. 50Bena mvita kudilongolola ku mvita. Yudase kubunda bena tshimenga munya ne butuku bujima. Ke kukuataye tshimenga. 51Kushipaye balume bonsu, kubutula tshimenga, kushidisha, kupawula bintu. Pashishe kukosololabu tshimenga benda badiata bitalu. 52Kusabukabu musulu wa Yardene batangila mu Mpata munene udi mutangilangane ne tshimenga tshia Bete-Sheyane.#5.52 Bete-Sheyane nansha Shitopolise: mu tshibanda tshia Yardene (tangila Bal 1.27; 1 Sam 31.10 ne 2 Mak 12.29). 53Yudase uvua utua upingana, ukunguja bena mvita bavua bashadile panyima bapungile, ukolesha bantu ku muoyi too ne muafikibu mu ditunga dia bena Yuda. 54Kubandabu pa mukuna wa Siyone buwule ne disanka, kulambulabu Mvidi Mukulu mulambu wa kuosha, bualu bapinganyi amu bimpe kabayi bajimine kudi muntu nansha umue wa kudibu.
Badi batshimuna Yozefe ne Azariya
(2 Mak 12.32-45)
55Mu matuku avua Yudase ne Yonatane bikale mu Ngilaade, muanabu Simeyone pende mu Ngalileya ku Ptolemayise,#5.55 Ptolemayise: tangila diumvuija mu kan. 15. — Ngilaade: diumvuija mu kan. 9. 56ke Yozefe muana wa Zekarya, ne Azariya, bamfumu wa tshiluilu, kumvua malu a dikema ne nwita ivua bana babu benza. 57Kuambilanganabu ne: “Tukebayi petu lumu, tuluishayi matunga adi matunyungulukila.” 58Kutuminabu bena nwita babu diyi bua baye kuluisha Yamniya.#5.58 Yamniya: tshimenga tshia ku muelelu wa mayi manene, kuinshi kua Yope (Yafa). 59Ngorjiyase#5.59 Ngorjiyase uvua mulombodi wa bena nwita bavua ku muelelu wa mayi manene, uvua kabidi mulombodi wa ditunga dia Idumeya (tangila 3.41 ne 2 Mak 10.14; 12.32). kupatuka mu tshimenga ne bena diende bua kuya kubanga nwita. 60Kutshimunabu Yozefe ne Azariya, kubalondakaja too ne ku mikalu ya ditunga adi. Bena Izrayele bu binunu bibidi kufua dituku adi. 61Bantu kubatshimuna, bualu Yozefe ne Azariya kabavua bateleja diyi dia Yudase ne dia bana babu.#5.61 kabavua bateleja: tangila 5.18-19. Bavua bela meji a kutshimuna bu bakuabu. 62Kadi bobu ki mbantu bavua Mvidi Mukulu mupeshe mudimu wa kusungidila bena Izrayele nansha.
Yudase udi uya mu Idumeya ne mu matunga a bena Peleshete
63Yudase tshilobu tshia mvita ne bana babu kupeta lumu lunene kudi bena Izrayele ne kudi matunga onsu. Bavua amu babatela. 64Bantu bavua babayila bua kubela ka lumbandi.
65Yudase ne bana babu kuya kuluisha bena Edome, mu buloba bua kuinshi kua ditunga. Kukuatabu Ebrone#5.65 Ebrone: bena Izrayele bamane kupatuka mu bupika, kabavua bapingana kabidi mu tshimenga etshi to, bualu tshikavua tshia bena Idumeya (tangila 3.41 ne diumvuija). ne misoku ya pabuipi. Kubumbulabu bimana, kuosha ne tuleya tua mu tshimenga. 66Pashishe kuyabu mu ditunga dia bena Peleshete, bakosolola tshimenga tshia Mareka.#5.66 ditunga dia bena Peleshete: tangila diumvuija mu 3.24. — Mareka: tshimenga tshia bena Idumeya. 67Dituku adi, bavua bashipa batuangaji, bavua bakeba kuya mu mvita, bakeba lumu ne butumbi, kadi kabayi ne budimu. 68Yudase kuya ku Asdode,#5.68 Asdode: tangila diumvuija mu 4.15. mu buloba bua bena Peleshete. Kutonkolaye bilambuilu biabu, kuoshisha mpingu ya nwidie yabu. Kupawulaye bintu bia mu tshimenga, kupingana nabi ku ditunga dia bena Yuda.
Currently Selected:
1 Bamakabe 5: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996