Matayo 12
12
Julub Ujaku Jang Cam Ceng’ Sabatu
(Mk 2:23-28; Lk 6:1-5)
1 #
Poi 23:25
I nindo maeno Yesu wotho i podho cam ceng’ sabatu; julubne de kec ubenegogi e gimaku jaku jang cam gimwodo de. 2Ento ka Jufarisayo gineno maeni, giwacu ire kumae, Nen, julubni gitimo gin ma cik uyio ngo ya jutim i ceng’ sabatu. 3#1 Sam 21:1-6Ento ewacu igi kumae, Wusomo gin ma Daudi timo ngo, ka kec ubenege, ku ju ma ginuti gikugi; 4#Law 24:9maram emondo ko i ot pa Mungu, ecamu kwen ma athiera de, ma cik uyio ngo ire ecam, kadok ni ju ma ginuti gikugi de, ento ni julam kendgi? 5#Wel 28:9, 10Kadi wusomo ngo i cik, nia i ceng’ sabatu julam mi hekalu gikadhu ku wi ceng’ sabatu, man gibedo ku dubo ngo? 6Ento awacu iwu, nia acel nuti keni ma sagu hekalu. 7#Mt 9:13; Hos 6:6Ento tek wung’eyo thelembe nini, Ayenyo kisa, lam ungo, kuno di wupoko lembe rac ungo wi ng’atu ma dubo mbe kude. 8Kum Wod dhanu en e rwoth mi ceng’ sabatu.
Ng’atu ma Cinge Lindre
(Mk 3:1-6; Lk 6:6-11)
9Man eai kakeca, emondo de i kacokri migi: 10man nen, ng’atu ma cinge lindre. Gipenje de, giwacu kumae, Cik uyio jukei kum ceng’ sabatu? kara gidote. 11#Lk 14:5Man ewacu igi kumae, Ng’atu moko m’i kindwu, ma won rombo acel, tek eni de podho i vur i ceng’ sabatu, ebimake, ebiwodhe woko de ngo? 12Dhanu sagu rombe dit apila! Kum kumeno cik uyio ya jutim tic ma ber ceng’ sabatu. 13Elund ewacu ni ng’atuno kumae, Riei cingi. E erieyo de; man edoko bo de, calu mucelo. 14Ento Jufarisayo gicidho woko, gipido lembe de i kume, maram ginyothe ko.
Jatic ma Jugoyo Wie
(Isa 42:1-4)
15E Yesu m’ung’eyo maeni eai ku kakeca: man dupa gilubo ng’eye; e ekeyo kumgi kpo, 16man eng’olo igi nia ku giketh jung’eye: 17kara lembe ma Isaya ma jabila yero timbre kakare, m’uwacu kumae,
18 #
Isa 42:1-4
Nen, jatic para m’agoyo wie;
Jamerna ma mutoro nego ng’eyong’ec para i kume:
Abiketho Tipo para i wie,
Man ebiyero lembapoka ni Thekdhanumange.
19Ebidhau ngo, kadi ebikok ma tek de ngo;
Kadok ng’atu moko de mbe ma biwinjo dwande i gengi.
20Usi m’unyoc ebituro ngo,
Atutu m’udunyo yiro de ebinego ngo,
Cil ma fok’eoro lembapoka ni aloci ngo.
21Man i nyinge Thekdhanumange bigeno.
Yesu Ku Beelzebul
(Mk 3:19-30; Lk 11:14-23)
22Julund jukelo ng’atu acel ma won pajogi i bang’e, ma en e abinga ajuba de: e ekeyo kume, kara ng’atu ma ajuba weci enen de. 23Udul dhanu ceke de igi wang’ lii, giwacu kumae, Maeni copo bedo wod Daudi? 24#Mt 9:34; 10:25Ento ka Jufarisayo winjo lembe maeni, giwacu kumae, Ng’atuni bewodho pajogi en ungo, ento ni kum Beelzebul ma jadit mi pajogi. 25E en m’eng’eyo lembe ma igi bepido ewacu igi kumae, Ku ba ker ceke ma tek upokre gire enyothre; ku bang’ adhura ceke de kadi ot de m’upokre gire ebicungo ngo: 26man tek Jok uwodho Jok woko, nwang’u epokre gire; ka ker pare bilund cungo nenedi? 27Tek an awodho pajogi ni kum Beelzebul, wotwu ke giwodhogi woko ni kum ng’a? ka kumeno gibibedo jupoklembe mu. 28Ento tek awodho pajogi ku Tipo pa Mungu, meca ker pa Mungu bino i beng’wu. 29Kadi ng’atu moko copo mondo i ot pa jatego nenedi, eyak piny pare de, tek elar etwio jatego ngo? e kan ebilund nyotho ot pare. 30#Mk 9:40Ng’atu ma tek wakude ngo nwang’u erony i kuma; man ke ng’atu ma wacoko wakude ngo nwang’u eketho. 31Ka kumeno awacu iwu kumae, Ku ba dubo ku lembacidi ceke biwekre woko ni dhanu; ento lembacidi ma kum Tipo re biwekre ngo. 32#Lk 12:10Man ng’atu ma tek biyero lembe kum Wod dhanu, ebiwekre woko ire; ento ng’atu ma tek biyero kum Tipo Maleng’ re, ebiwekre woko ire ngo, kadok i ng’om maeni, kadi i maeca ma bibino.
Yen ku Nyinge
(Lk 6:43-45)
33 #
Mt 7:20; Lk 6:44 Kadi wuketh yen udok ber, nyinge de dok ber; kadi wuketh yen udok rac, nyinge de dok rac: kum jung’eyo yen ni nyinge. 34#Mt 3:7; 23:33; Lk 3:7; Mt 15:18; Lk 6:45Wu nyikwai thwol, wucopo yero gin ma ber nenedi, ma wun wu raci? kum kud i gin m’usagre mir adunde e dhok de yero. 35Ng’atu ma ber wodho gin ma ber woko kud i piny m’akana pare ma ber: ng’atu ma rac de wodho gin ma rac woko kud i piny pare m’akana ma rac. 36Man awacu iwu, nia ku ba lembe ceke ma kite mbe ma dhanu biyero gibitito pire ceng’ pokolembe. 37Kum jubigonyo lembe m’i wii ku lembe peri, man jubipoko lembe rac i wii de ku lembe peri.
Dhanum’utuk ma Gi Rac Giyenyo Giranyutha
(Mk 8:12; Lk 11:29-32)
38 #
Mt 16:1; Mk 8:11; Lk 11:16 Jugorcik kucel ku Jufarisayo gilund giloko lembe ire, giwacu kumae, Japonji, wayenyo wanen giranyutha i beng’i. 39#Mt 16:4; Mk 8:12Ento edwoko lembe ewacu igi kumae, Dhanum’utuk ma gi rac ma gi weg gier de gibeyenyo giranyutha; giranyutha moko de mbe ma bimire igi, ndhu giranyutha pa Yona ma jabila: 40#Yon 1:17kum calu Yona bedo ceng’ adek ku diewor de i cino rec ma dit; e Wod dhanu de bibedo kumeno ceng’ adek ku dieworne de i adunde ng’om. 41#Yon 3:5Dhanu mi Nineve bicungo i pokolembe karacelo ku dhanum’utuk maeni, e gibipoko lembe i wie rac; kum joca loko cwinygi kum lembayera pa Yona; man nen, ng’atu ma sagu Yona ni keni. 42#1 Ub 10:1-10; 2 Kei 9:1-12Ubimo ma dhaku ma yor ariwa ma yo piny bicungo i pokolembe karacelo ku dhanum’utuk maeni, man ebipoko lembe i wie rac: kum eai i tung’ ng’om kara ewinj rieko pa Suleman; man nen, ng’atu ma sagu Suleman ni keni.
Tipo M’ucido Dok Kakare
(Lk 11:24-26)
43Ento tipo m’ucido, kan eai kud i dhanu, ekadhu ku ka ma pi mbe i ie, m’ebeyenyo yom, enwang’e de ngo. 44Elund ewacu kumae, Abidok i ot para m’aai i ie; kan ewok de, enwang’u ie nanu, ebedo ayweya, aruka de. 45Elund ecidho, egamu tipo mange abiro i bang’e ma gi rac ma sage, e gimondo i ie gibedo de keca: bedo ma ng’atuno bedo ko macen doko rac ma sagu ma kwong’a. Ebibedo cil kumeno bende ni dhanum’utuk maeni ma gi rac.
Min ku Utumin Yesu
(Mk 3:31-35; Lk 8:19-21)
46Ka fodi ebeweco ni udul dhanu, nen, min giku utumin mire gicungo woko, giyenyo giwec i bang’e. 47E ng’atu acel uwacu ire kumae, Nen, meru ku utumeru de gicungo woko, giyenyo giwec i beng’i. 48Ento eloko lembe ewacu kumae, ni ng’atu m’uyero ire, Ng’a ma ma? man utumira de gi ng’agi? 49E erieyo cinge yo ba julubne, man ewacu kumae, Nen, ma ku utumira! 50Kum ng’atu ma tek bitimo yeny ma i Vwa m’i polo yenyo, nwang’u en e umira, ku nyamira de, ku ma de.
Currently Selected:
Matayo 12: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.