DEDI 9
9
Na pa-ràndingu-da i Ala dàngu i Nuhu
1I Ala na-pakanyuru-nya i Nuhu dàngu da anana, hi napanii, “Paana umbuku padangu-wa, ka pekuna da wàla wuami ka dangia-nya na pinu tana nggubulu-na. 2Mbuu ndàbada da ma-hawurungu, dàngu da iyangu lupa da banda hawiangu napa da-mangàdatu-nggami. Nyuda mbuu ndàbada la kuaha-mi nyimi-mahaka. 3Mbuu ndàbada nuda pekuna bai tuha pangami, hama tumana da matumbu - matumbu da mamuru, mbuu ndàbada kuwuanggai-nja kai tu pangami. 4Hangia jua-ana na manda uku nyimi la panganya nu jia-duhaka da tolungu maningu riangu, nadu na luri ba ninya daa la riana. 5Nimbihu-na na tau jàka ndia na banda na ma-pameti tau, napa kuhuku pameti-ya. 6Na tau ba padika-nya hama tumana Nyungga; jia-duya jàka nggamu na ma-pameti tau, nyuna napa na-pameti-maya anguna patau.
7Tàka lupangu-ma nyimi kai paana umbuku padangu, ka màta da wàla wuami ka dangia-nya na pinu tana nggubulu-na,” wànanya.
8I Ala napanii-nja i Nuhu dàngu da anana, 9“Nàhu tura-nggunyaka pa-njanjingu dàngu nyimi lupa da wàla wuami, 10dàngu mbuu ndàbada da pa-padikangu da maluri, nu da ma-hawurungu dàngu mbuu ndàbada da banda lamara, dàngu mbuu ndàba biada da maluhu karia-nggai welingu la kapalu. 11Yiana-yaka na pa-njanjingu-nggu dàngu nyimi: Ku-panjanjingu ba nda pahili pamolu wa-anyapa iwa mbuu ndàbana na pa-padikangu na maluri. Napa nda hilu ningu-apa iwa obungu ma-pamolu-nya na pinu tana yiana. 12Na tanda pa-njanjingu ma-padaingu lundu nu - nu na patura-nggu dàngu nyimi dàngu mbuu ndàbada da pa-padikangu da maluri, 13kutuya na kapuri-nggu la awangu na tanda pa-njanjingu-nggu dàngu pinu tana. 14Handàka pandàda - handàka pandàda-nggunya karumangu na awangu, hàla hi nawuwa na kapuri, 15nu namu-dunggu-nyaka na pa-njanjingu-nggu lai nyimi dàngu mbuu ndàbada da pa-padikangu da maluri, nu na iwa ba nda nahilu pamolu-anyapa mbuu ndàbana na maluri. 16Jàka era wuwana na kapuri la awangu, jiangu-ma napa kuita-ya tàka hi kunamu-ya na nu pa-njanjingu na ma-padaingu lundu nu - nu lai Nyungga dàngu mbuu ndàbana na pa-padikangu na maluri la pinu tana, wàna. 17Nuna-yaka na tanda pa-njanjingu-nggu na pawua-nggunya mbuu ndàbana na pa-padikangu na maluri la pinu tana,” wàna.
I Nuhu dàngu da anana
18Da anana i Nuhu da maluhu welingu la kapalu, jia-duhaka i Hemu, i Yapitu dàngu i Hàmu. (I Hàmu jia-duyaka na amana i Kanaàngu.) 19Da madua haàtu-da da anana i Nuhu jia-duhaka da boku la mangilu-na mbuu ndàbana na tau la pinu tana.
20I Nuhu mini tungu wokaya, dàngu nyuna-maka na ma-kawunga tungu woka angguru. 21Ba naunu-nyaka na wai angguru-na i Nuhu, ka maüku-nanyaka. Na-pahili ndàbaha da pakina hàla hi na-katuda kalulu daa la maü terana. 22Ba naita-yaka kalulu-na na amana paraïna i Hàmu amana i Kanaàngu, ka luhu-nanyaka hi napanii-ya nuna la angu dedina da madua. 23Tunaka nu nyuda i Hemu dàngu i Yapitu dapiti hawàla kalembi bokulu hi da-wàlahu-ya la kunduda. Hi dawàngu papangga kandulingu ba datama nu la maü tera dàngu hi da-palumburu-nya na amada nuna na kalembi bokulu. Da pa-mbelingu matada ka àmbu taita-ya na amanda na ma-kalulu ba wàda. 24Ba na-hawuri belika welingu la maüku-na dàngu ba napi-nyaka na pawunda-na na ana kamuri-na hanggangu lai nyuna, 25ka panii-duna-nyaka,
“Pa-ràtungu-ya i Kanaàngu!
Nyuna napa ata buta-danyaka paraï angu dedina.
26Wotunya i MIRI, Alana i Hemu!
I Kanaàngu atana i Hemu-yaka napa.
27Màla àru i Ala ka nabonja-nya kanyuru i Yapitu ka na-palera-nya ngia pa-ngiangu-na.
Màla àru da wàla wuana ka daangu ngiangu dàngu da wàla wuana i Hemu.
I Kanaàngu màta ka atana i Yapitu#Yapitu: Na tamu yiana ba wàngu parongu-ya hamana na kareuku hilu Imbarani “pa-bonjangu” ba wàna.-ya,” wàna.
28La hambeli hàla paiwa 350 mbua ndau-napa na lurina i Nuhu. 29Ba nameti 950 mbua ndauna na lurina.
Currently Selected:
DEDI 9: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)