DEDI 10
10
Da wàla wuada da anana i Nuhu
(1 L Nd. 1:5-23)
1Yiada-haka da wàla wuada da anana i Nuhu, nu i Hemu, i Yapitu dàngu i Hàmu. La hambeli iwa pa-kadua haàtu-da da-ngalangu anada, anakeda mini.
2Da anana i Yapitu jia-duhaka: i Nggomiru, i Mangguku, i Mandai, i Yawàngu, i Tumbàlu, i Mehiku dàngu i Tiràhu. 3Da wàla wuana i Nggomiru jia-duhaka da ma-mandapu-nya na Àhakenàhu, Ripàtu dàngu Tunggàrama. 4Da wàla wuana i Yawàngu jia-duhaka da ma-mandapu-nya la Eliha, Hapanyulu, Hipuru, dàngu Rondihu. 5Nyuda jiaha da boku la mangilu-da da tau da ma-ngiangu la hingi wara dàngu la nuha - nuha. Nuda jia ndàba-haka da wàla wuana i Yapitu. Nimbihu banjaru dàngu kabihu ha-kangia - ha-kangiangu-mada duda la tanada, dàngu ni - ninguma hilu wikida.
6Da anana i Hàmu jia-duhaka i Kuhu, i Mehiru, i Limbia dàngu i Kanaàngu. 7Da wàla wuana i Kuhu, jia-duhaka da ma-mandapu-nya la Hemba, Hawila, Hàputa, Raema dàngu Hàputeka. Da wàla wuana i Raema jiaha da ma-mandapu-nya la Hemba dàngu la Ndendàngu. 8I Kuhu ningu anana mini, na ma-tamungu Nimurutu, nyuna-duka na ma-kawunga kaborangu la pinu tana. 9Wàngu pa-ndulangu-na i MIRI, mini pa-tamangu ma-manyori-maya. Jia-duyaka hi nalara lii wàngu na tau, “Màla àru i MIRI ka natukau mini pa-tamangu ma-manyori hama tuna i Nimurutu,” hi wàna wàngu. 10La kawunga-na na pa-hanganji-na na-hanggaunya la Mbambilu, Eriku dàngu Akatu, pa-katailu mbuada ni ndàbanja la tana Mbambilunia. 11Welingu lai nu nalaku la Ahuru, hi natura-ya na paraingu la Naniwa, la Rihombutu-Iru, la Kala, 12dàngu la Rehingu la manggawa Naniwa dàngu Kala. Mbuu ndàbada nuda paraingu bokulu-ha.
13Da wàla wuana i Mehiru jia-duhaka da ma-mandapu la Lindia, Anamimu, Lehambimu, Nàputuhimu, 14Pàturuhimu, Kàhaluhimu dàngu Kàputorimu. Na banjaru Kàhaluhimu jia-duyaka na boku la mangilu-na na banjaru Pilitingu.
15Da anana i Kanaàngu, jia-duhaka i Hindungu, na ma-maaya dehi, dàngu i Hetu. 16I Kanaàngu jia-mbuya na boku la mangilu-na na banjaru Yambuhi, Amori, Nggiringgahi, 17na tau Hewi, Àraki, Hini, 18Àrawandi, Hamari dàngu Hamati. Da kabihu banjaru Kanaàngu da-tanyalangu marau, 19hi lupa na padira tanada nyuda na-nggailaru piti welingu la Hindungu hanggangu hu luru la Nggeràru, lundu la lihina la Nggaha, dàngu hanggangu la pahunga lodu la Hondumu, Nggomora, Àtama dàngu Hamboimu, lundu tàka la lihina la Laha. 20Nuda-haka mbuu ndàbada da wàla wuana i Hàmu. Nimbihu banjaru dàngu kabihu ha-kangia - ha-kangiangu-mada duda la tanada, dàngu ni - ninguma hilu wikida.
21I Hemu ayana i Yapitu jia-yaka na boku la mangilu-da mbuu ndàbada da banjaru Imbarani. 22Da anana i Hemu jiaha: i Elàmu, i Ahuru, Àrapàkahàtu, i Lutu dàngu i Aràmu. 23Da wàla wuana i Aràmu jia-haka da ma-mandapu-nya la Uhu, Hulu, Nggetiru dàngu Màhu. 24I Àrapàkahàtu amana i Helàhu. Tàka i Helàhu amana i Embiru. 25I Embiru dadua da anana mini, na ma-wungangu i Peliku,#Peliku; Na tamu yiana la hilu Imbarani, “pabi - biwangu,” wàna. nadu la rehi ba ninya nyuna ba jia-duyaka na pabi - biwangu na banjaru la pinu tana; na padua wàda na tamuna i Yòkutàngu-ya. 26Da wàla wuana i Yòkutàngu jia-duhaka da ma-mandapu-nya la Àlumondàtu, Helipu, Hahàru-Mawitu dàngu la Yera, 27Handoràmu, Uhàlu, Ndikula, 28Ombàlu, Ambimaïlu, Hemba, 29Opiru, Hawila dàngu Yombàpu. Mbuu ndàbada wàla wuana i Yòkutàngu-ha. 30Na ngaba ngia pa-ngiangu-da na-nggailaru piti welingu la Meha lundu la Hepàru, nu la ngaba ma-palindingu la pahunga lodu. 31Nuda mbuu ndàbada wàla wuana i Hemuha. Nimbihu banjaru dàngu kabihu hakangia - ha-kangiangu-mada la tanada dàngu ni - ninguma hilu wikida.
32Mbuu ndàbada nuda wàla wuana i Nuhuha, banjaru pa-ndàkingu banjaru, tundunya na ruku dedida nimbihu-da. Nyuda-maka da ngia paweli-na na banjaru dangu la pinu tana yiana, la hambeli iwa obungu-na.
Currently Selected:
DEDI 10: KAM
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)