DEDI 8
8
Na njàpuna na iwa
1I Ala nda nambula-anya i Nuhu dàngu mbuu ndàbada da banda da angu tamana daa la kapalu. I Ala na-pahapuputu-ya na ngilu, hi lupa nangeri hurutu na wai. 2Mbuu ndàbada da matawai la unu tana dàngu mbuu ndàbada da katonga wai la awangu nabita hàlanja. Ka malàna-nanyaka na urangu, 3dàngu parukangu-nanyaka pa-hurutu na wai. La hambeli 150 lodu nda natika-apa pajangga na wai. 4Hurutu pangalangu-mananya na wai tàka la tànggalu 17 wulangu 7, kàndahu-nanyaka na kapalu la pinu palindi Araràtu. 5Kawawaku pangalangu-mananya na wai, la tànggalu hau wulangu hakambulu, pakiringu-danyaka pawuwa da pinu palindi.
6Tomaka patu kambulu lodu, i Nuhu bunggahu-nanyaka na hau katonga kapalu, 7hi na-pahàla-ya na heu na nggangga. Nuna na ma-hawurungu nda nahilu beli-apa la kapalu, tàka hawuru pangalangu-ma-ananya lai nu - lai nu lundu na-kawawaku ailulu na wai iwa. 8Ba talànga tunaka nu, pahàla-nanyaka i Nuhu na heu na kulundiha, ka pi wànya jàka tuba mihi-naka na wai. 9Tàka ba jiapa bia-yapa na wai ba na-lumburu-nya na pinu tana nggubulu-na, nuna na kulundiha ndedi nahunggu-mapa ngia pa-rànjaku-na. Ka beli-nanyaka la kapalu; i Nuhu na-pajola-nya lima hi natama ngàndiya. 10Pihu mbua lodu i Nuhu ba nahili patiangu, hàla hi nahili pahàla-ya nuna na kulundiha. 11La malingu beli-nanyaka nuna na ma-hawurungu lai nyuna ba nangàndi hawàla ruu ai haitungu mamuru la ngànduna. Nu pi-nanyaka i Nuhu na wai ba mihi-nanyaka. 12Ba na-patiangu-ka hili pihu mbua lodu, hili pahàla-nanyaka nuna na kulundiha; nu la rehi nuna nda nahili beli-apa na ma-hawurungu lai nyuna.
13Ba 601 ndau-naka i Nuhu, la tànggalu hau wulangu hau, mihi ailulu-mana-nyaka na wai. Ka bunggahu-nanyaka na toku ndiduna na kapalu i Nuhu, tàka hi na-tàngaru la winggiru-na. Naita-ya na pinu tana mihi-mana-nyaka. 14La tànggalu dua kambulu pihu wulangu padàmbu wàna, màdu-nanyaka na pinu tana.
15Ka tungu-nanyaka liina i Ala lai Nuhu, 16“Luhuwa welingu la kapalu angu na papaha-mu, da anamu dàngu da papaha-da. 17Luhu ngàndi-hawa mbuu ndàbada da ma-hawurungu dàngu da banda hawiangu, ma-bokulu hamanai makudu, ka peku woru mbàmbaru-da dàngu ka da-tanyalangu la pinu tana nggubulu-na,” wànanya. 18Ka luhu-nanyaka i Nuhu welingu la kapalu angu na papaha-na dàngu da anana lupa da papaha-da. 19Mbuu ndàbada da ma-hawurungu dàngu da banda lamara luhu-danyaka welingu la kapalu, maràngga himbu-madanya kalibaru hamada.
I Nuhu ba nawotu kameti maraku
20I Nuhu na-pahadangu hau ngia pawotu maraku kaba aü ndumana i MIRI. Napiti heu welingu la nimbihu ngara ma-hawurungu dàngu banda hawiangu da mahida, hi nawotu-ha la pinu ngia pawotu maraku ba kameti maraku patunu-ha. 21Da wau hiritu-da da kameti pa-maraku wàngu nahàmu wànya na etina i MIRI, hi lupa wàna la etina, “Napa nda kuhilu ràtu-anyapa yiana na pinu tana ruku pawunda-na na tau; ba kupi-manya ba welingu pa-anakeda-manaka ba na-akatu na kanandingu-na. Nda kuhilu pamolu-anyapa mbuu ndàbana na pa-padikangu na maluri, hama tuna ba tunggunya nu na mabidi làpahu. 22Ba ngala ninya yiana na pinu tana, napa na-panua naingu-ka na rehi tondungu dàngu na rehi muti, na rehi maringu dàngu na rehi pa-mbanahungu, na ndau wandu dàngu na ndau urangu, na lodu dàngu na rudungu,” wàna.
Currently Selected:
DEDI 8: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)