Litanga 32
32
1Kandi Yakobo ya tsia ku lugendo lwilwe, na tsingelosi va Nyasaye va vugana naye. 2Na Yakobo lwa ya va lola ya vola, Yili ni lihe lya Nyasaye: na ya gulika ha zana Mahanaim.
3Kandi Yakobo ya tuma avatumwa imbiri wewe kutsia Seiru, mu kivala kya Edom ku amwavo wewe Esau. 4Na ya va laga, na a va volera, Mu la volera mwami wange Esau: Mutumekiri wowo Yakobo a volanga, Inze mmenyi halala na Labani, nokuva yo kuduka kalunu: 5kandi mbeye netsing'ombe, netsisukiri, nevyayo, navatugwa avayai, navatugwa avakana: na ndetanga avatumwa yava kuvolera mwami wange, nduke kunyola tsimbabasi imbiri wowo. 6Na avatumwa virana ku Yakobo, ni va vola Kwa duka ku arnwavo wowo Esau naye kandi yadza kukwaganira, na avandu tsimia tsine halala naye. 7Kunangwa Yakobo ya tia ligali na a henda mwoyo: naye ya gavula avandu va ya li navo, na vyayo vyamagondi, na vyetsing'ombe, na vyetsing'amia, nokukola viduma viviri; 8na a vola, Esau na a va na a duka kuduya kidurna kyokutanga, kiduma ki tigaye ki la hona. 9Na Yakobo ya vola, O Nyasaye wa guga wange Abrahamu, na Nyasaye wa dada wange Isaka, O Yahova, wa mbolera, yirana mu kivala kikyo, nomu viko vovo, na nda ku kolera malahi: 10inze si ndukani kali ku tsinkekeke ku tsimbabasi tsitsyo tsyosi, noku ageligali gosi aga wa kolera mutugwa wowo; kigira ndaambuka mugera yigu Yordani nempimbo yange; na kalunu mmedeki kugwa viduma viviri. 11U mbonnye, nku saala, ku mukono gwa amwavo wange, ku mukono gwa Esau: kigira mmu tia, gase a ladza nokuduya inze, na mama halala na avana. 12Kandi ive wa vola, Ligali nda ku kolera malahi, kandi nda kola kisukululwi kikyo kuva kuli umuyeke gwenyanza, gu ta validzwa kigira gu veye munyingi.
13Naye ya gona yo ubudiku yibu, kandi ya vugula ku vindu vya ya li navyo vi ve kihaanwa ku Esau amwavo wewe: 14tsimbuli tsinkali tsimia tsiviri na tsikole makumi gaviri, na magondi tsimia tsiviri na makole makumi gaviri, 15na tsing'amia tsinkerwa makumi gavaka na vimoli vyatsyo, na tsing'ombe tsidwasi makumi gane na tsigiriki likumi, na tsisukiri tsinkali makumi gaviri na vimoli vyatsyo likumi 16Naye ya vi vika mu mukono gwa vatugwa veve, kyayo sa kilala ha luvega, na a volera avatugwa veve Mwimire mwambuke imbiri wange na mu vike ubwiyangu hagati hekyayo nekyayo. 17Na ya laga wembiri na a mu volera, Esau amitu wange lwa a ku nyola, na a ku teva, Ive u veye wa bwaha? Kandi u tsitsa haliha? Ni vya bwaha yivi vi veye imbiri wowo? 18Hene yaho u vole Yivi ni vyomutugwa wowo Yakobo, vi veye kihaanwa kya leterwa mwami wange Esau: na henza, mwene kandi a veye inyima. 19Kandi ya laga ndiyo wa kaviri, nowa kavaka, navo vosi ava londa vyayo, na a vola, Mwinye mu volere Esau lwa mu lolana naye kuli yaga; 20Na mu la vola, Kandi, henza, mutugwa wowo Yakobo a veye inyima wetu. Kigira ya vola, Nda mu yanzidza nekihaanwa kyemirira kutsia imbiri wange, na inyima nda mu lola mumoni mwimwe; mbula a la nyanza 21Kunangwa kihaanwa kyemirira kwambuka imbiri wewe: naye mwene ya gona mu kiduma ubudiku yibwo. 22Na ya vuka ubudiku yibwo, na a vugula avakali veve vaviri, navatugwa veve avakana vaviri, na avana veve likumi na mulala, ni yambuka inyambuku ya Jaboku. 23Na ya tsia navo nokuvambukidza mugera na yambukidza kandi vindu vyosi vya ya li navyo. 24Na Yakobo ya tigala yeng'ine; kandi ha li nomundu wa lwana naye kuduka bwa kya. 25Na lwa ya lola a vula kumuguuta, ya dira mukyi gwe ivadzwa yeye; na mukyi gwe ivadzwa ya Yakobo gwa kunuuka, lwa ya lwana naye. 26Naye ya vola, Leka, ntsie, kigira bu kyeye. Na Yakobo ya vola, Si ndeka u tsie, nu u vula kungasidza. 27Naye ya mu teva, Lieta lilyo ni bwaha? Naye ya tivula, Lieta lyange ni Yakobo. 28Na ya mu volera, Lieta lilyo si li la langwa kandi Yakobo, navutswa li la langwa Israeli: kigira u gerani na Nyasaye na avandu, na u guuti. 29Yakobo ya mu teva, na a vola, U mbolere lieta lilyo, nku saala. Naye ya teva, Kigira ki u tevanga lieta lyange? Na ya mu gasidziraho. 30Na Yakobo ya gulika ha zana Penueli: kigira, ya vola, Ndoli Nyasaye moni na moni, na inze mwene ntigaye mwoyo. 31Na liuva lya tonga kuye lwa yambuka ha Penueli, naye ya segera kigira ivadzwa yeye. 32Kigira yaga avana va Israeli si va litsanga mukyi gwo mumoni yevadzwa kuduka lero: kigira ya dira mu bwongiru bwevadzwa ya Yakobo ho mukyi gwekunyanga.
Currently Selected:
Litanga 32: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967