Litanga 31
31
1Naye ya hulira makuva ga vana va Labani, ni va vola, Yakobo u hili vyosi vya li vya dada wetu; na yenyolera ubutugi yibu bwosi mu vya li vya dada wetu. 2Na Yakobo ya lola mumoni mwa Labani, si mwa yeka kuye kuli matsyambiri. 3Na Yahova ya volera Yakobo, Wirane ku kivala kya vadada vovo, noku aviko vovo, na inze nda va halala nive. 4Na Yakobo ya tuma mundu kulanga Raheli na Leah vadze mu kyayiru ku kyayo kikye 5na a va volera, Ndoli mumon; mwa dada wenyu si mu yeki ku inze kuli matsyambiri; navutswa Nyasaye wa dada wange a veye halala ninze. 6Na mwinye mu manya nda tumekira dada wenyu netsingulu tsyange tsyosi. 7Na dada wenyu ya ngada, na a girunkanya madanyi gange hali likumi; navutswa Nyasaye si ya mu leka kunzononya. 8Lwa ya vola, kya mavahu ki la va madanyi gogo; hene yaho kyayo kyosi kyivula kya mavahu: na lwa ya vola, Vikalanye vi la va madanyi gogo; hene yaho kyayo kyosi kyivula vikalanye. 9Na ndiyo Nyasaye ya hila mitugu gya dada wenyu, ni ya mpa. 10Kunangwa inyinga yekyayo kya vohola, nda ginga tsimoni tsyange na ndola mu lilota, henza, tsikole tsi tumanga ku kyayo tsya li tsinkalanye, na tsimbalabale, na tsisembe. 11Na ingelosi wa Nyasaye ya mbolera mu maloto, Yakobo: na inze nda vola Mbeye hano. 12Naye ya vola, U ginge tsimoni tsitsyo, u lole, tsikole tsyosi tsi tumanga ku kyayo tsi veye tsinkalanye, na tsimbalabale, na tsisembe: kigira ndoli gosi ga Labani a ku koleranga. 13Mbeye Nyasaye wa Beth-eli, ha wa vaka munara, ha wa singeridza lilagana na inze: kalunu vuka, u twule mu kivala yiki, wirane mu kivala kya wivulwa mu. 14Na Raheli na Leah va tivula, ni va mu volera, Kwinye ku veye neki, dieli kinga miyandu kandi mu inyumba ya dada wetu? 15Si ku volangwa kuye kuva avamenya? Kigira ya ku gulidza, na ya lia vyobugulidzana. 16Kigira ubutugi bwosi bwa Nyasaye ya twulidza ku dada wetu, yibu bu veye bwetu, nobwa avana vetu: kalunu, vyosi vya Nyasaye a ku voleye, u kole.
17Kunangwa Yakobo ya vuka, na a nyinya avana veve na vakali veve ku tsing'amia; 18kandi ya hila imitugu gyigye gyosi, nobutugi bwibwe bwosi bwa ya li kuvungidza, nemitugu gyosi gya yenyolera gya ya vungidzira mu Padan-aram, kutsia wa Isaka dada wewe rnu kivaia kya Kanani. 19Inyinga zana, Labani ya li na a tsiye kukalaga ubwoya bwa magondi gege: na Raheli yiba vifwananyi vya dada wewe. 20Na Yakobo ya tsia makiriri, na Labani Musiria ya vula kumanya, kigira si ya mu volera, yiruka. 21Kunangwa yiruka na vyosi vya ya li navyo; naye ya vuka, ni yambuka Mugera, na a henzidza mumoni mwimwe ku kigulu kya Gileadi.
22Na ku lidiku lya kavaka Labani ya volerwa, Yakobo yiruki. 23Naye ya vugula amwavo veve, nokumulonderera ulugendo lwa madiku gatano na gaviri; na a mu nyola mu kigulu kya Gileadi. 24Na Nyasaye yadza ku Labani Musiria mu lilota lyobudiku, na a mu volera, Welinde u ta volera Yakobo malahi kinga madamano. 25Na Labani ya duka ku Yakobo. Na Yakobo ya li ni yombaki lihema lilye mu kigulu: na Labani navamwavo veve vombaka mahema gavo mu kigulu kya Gileadi. 26Na Labani ya volera Yakobo, U koli kindu ki, u leke inze makiriri, nokuhila avana vange kuli va veye vilanye vi nyoleki nekivavi? 27Kigira ki wiruka makiriri nokungada; na wa vula kumbolera, nduke kusiivulana nive nobuyanzi netsinyimbu, nesigudi nobukana; 28kandi si wa mba ubwiyangu bwokubusa avana vange, avayai navakana? Kalunu u koli ubusiru. 29Mbeye netsingulu mmukono gwange kukukolera ubudamano: navutswa Nyasaye wa dada wowo ya volerana ninze ubudiku lwa veye, ve na a mbolera, Welinde u ta volera Yakobo amalahi kinga madamano. 30Na kalunu u mali kutsia, kigira u kayirangwa inyumba ya dada wowo navufswa kigira ki wibi vanyasaye vange? 31Na Yakobo ya tivula na a volera Labani, Kigira nda tia: kigira nda vola, Gase u la nyaga ku inze avana avakana vovo netsingulu. 32Ku vosi wa u lola a veye navanyasaye vovo, uyu si a la va mwoyo: imbiri wavamitu vetu, u manye ki veye kikyo mmukono gwange, u ki vugule. Kigira Yakobo si ya manya ni Raheli wiba vifwananyi.
33Kunangwa Labani yingira mu lihema lya Yakobo, nomu iya Leah, nomu lyavatugwa veve vaviri; navutswa si ya vi nyola. Na ya twula mu lihema lya Leah, na yingira mu lya Raheli. 34Kunangwa Raheli ya vugula vifwananyi, nokuvivika mu kyokwikala ku ku ing'amia, ni yikala kuvyo. Na Labani ya havatidza mu lihema lyosi, navutswa si ya vi nyola mba. 35Naye ya volera dada wewe Mwami wange a ta vihirirwa ni nta nyala kuvuka imbiri wowo; kigira miima gyavakali gyi veye ku inze. Naye yenya, navutswa si ya nyola vifwananyi.
36Na Yakobo ya vihirirwa, na a lembana na Labani: na Yakobo ya tivula na a volera Labani, Lihyola lyange li veye ki? Ubwoni bwange bu veye ikindu ki, kuduka ive u nondereye nobutima? 37Kalunu u havatidzi mu viju vyange vyosi, u lola ki ki veye ku viju vyenyumba yoyo? U ki vike hano imbiri wa vamwavo vange nowa vamwavo vovo, va kalage hagati hetu kwombi. 38Kalunu mmenyi hala na ive mihiga makumi gaviri; amagondi gogo amanyavuli, na tsimbuli tsinyavuli tsitsyo si tsya logosa mba, na magondi makole gevyayo vivyo si nda ga lia. 39Gyosi gyekindu kya lumaga, si nda gyi leta ku ive, nda bugirira ligota lyagyo; ive wa gyenya ku mukono gwange, ni gyi va ni gyibangwa mbasu kinga ubudiku. 40Na ndiyo nda li; mbasu gwa samba inze, nobudiku nda li mbukindu; na tsindolo tsya twula mu tsimoni tsyange. 41Kalunu ndukidzi mihiga makumi gaviri mu inyumba yoyo; nda ku tumekira mihiga likumi na gyine kunyola avana vovo vaviri, na mihiga gyitano na mulala kunyola mitugu gyigyo: na ive wa girunkanya madanyi gange hali likumi. 42Na a ta li Nyasaye wa dada wange, Nyasaye wa Abrahamu, na Uyu Welitibwa wa Isaka wa li halala ninze, nkano kalunu ligali, ive wa ka nkunga vutswa. Nyasaye u loli ubusaliri bwange na linyankana lya makono gange, na ya ku gaya ubudiku lwa veye.
43Kandi Labani ya tivula na a volera Yakobo, Avakana yava va veye avana vange, na avana yava va veye avakana vange, nemitugu yigyi gyi veye vyayo vyange, na vyosi vya u lola vi veye vyange: na inze nyala kukolera ki lero avakana vange, na avana vavo ava vivula? 44Na kalunu hamba, ku lombe lilagana, inze nive; li ve lilolekidza hagati hange nive. 45Na Yakobo ya vugula ligina, na a li singeridza kukola munara 46Kandi Yakobo ya volera avamwavo veve, Mu vungidze amagina: navo va ga vugula, nokukola kitumi: ni va liira ryokulia ha zana himbi nekitumi. 47Na Labani ya ki gulika Jegar-sahadutha: navutswa Yakobo ya ki gulika Galeed. 48Na Labani ya vola, Kitumi yiki ki veye kilolekidzu hagati hange nive lero. Kigira yaga lieta lyakyo lya langwa Galeed: 49na kandi Mizipa, kigira ya vola, Yahova a ve mulindi hagati hange nive, lwa kwavukana mulala ku wundi. 50Nu u va nu u dambidza avana vange, kandi nu u va nu u vugula avakali avandi halala na avana vange yava, si ha li nomundu halala nekwinye; Henza, Nyasaye a veye mulolekidzi hagati hange nive. 51Na Labani ya volera Yakobo, Henza kitumi yiki, kandi munara yigu, gwa nda singeridza hagati hange nive. 52Kitumi yiki ki ve kilolekidzu, na munara yigu gu ve kilolekidzu, inze si nda vita kitumi yiki kuduka ku ive, kandi ive si u la vita kitumi yiki na munara yigu kuduka ku inze kukola ubudamano. 53Nyasaye wa Abrahamu, na Nyasaye wa Nahoro, na Nyasaye wa dada wavo, a kalage hagati hetu. Na Yakobo yisuha ku Welitibwa wa Isaka dada wewe. 54Na Yakobo yiita isadaka mu kigulu, na a langa avamwavo veve vadze kulia vyokulia: navo va lia vyokulia, na va linda mu kigulu ubudiku bwosi. 55Na mugamba mabwebwe Labani ya vuka, na a busa avana veve avayai na vakana, na a va gasidza, ma Labani ya tsia ni yirana hehe.
Currently Selected:
Litanga 31: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967