Litanga 33
33
1Kandi Yakobo ya ginga tsimoni tsitsye, na a lola, henza, Esau yadzanga, na vandu tsimia tsine halala naye. Naye ya gavula avana ku Leah, noku Raheli, noku avakana avatugwa vaviri. 2Na ya vika avakana avatugwa na avana vavo imbiri, na inyima ya vika Leah na avana veve, na Raheli na Yosefa inyima wa vosi. 3Naye mwene yemira imbiri wavo, na yinama mwene kuduka hasi hali gatano na kaviri, kuduka lwa yisunda himbi ku amwavo wewe. 4Na Esau ya nyagula kuvugana naye, na a mu kuberera, na a mu gwira mu ligoti, na a mu busa: navo va lira. 5Naye ya ginga tsimoni tsitsye, na a lola avakali na avana; na a teva, Ni vaha yava ava veye halala nive? Naye ya vola, Va veye avana va Nyasaye ku tsimbabasi tsitsye ya ha mutumekiri wowo. 6Kandi avakana vatugwa visunda himbi, yava na avana vavo, ni vinama avene. 7Kandi Leah na avana veve visunda himbi, navo vinama avene: kandi inyima Yosefa yisunda himbi na Raheli, ni vinama avene. 8Naye ya teva, Ku lihe yili lyosi lya nda vugana nalyo, ive u vola ki? Naye ya vola, Nduke kunyola tsimbabasi imbiri wa mwami wange. 9Na Esau ya vola, Inze mbeye navyo vi duki, amitu wange; kya u veye nakyo ki ve kikyo. 10Na Yakobo ya vola, Auwa, ni mba ni nyoye tsimbabasi imbiri wowo, mwadza, u vugule kihaanwa mmukono gwange; kigira ndoli mumoni mumwo, kuli mundu a lolanga mumoni mwa Nyasaye, na inze nyanzeki ku ive. 11Mwadza, u vugule kihaanwa kyange kya u leteywi; kigira Nyasaye u nkoleye tsimbabasi tsinyingi, kandi kigira mbeye navyo vi duki. Naye ya mu goonya, na ya vugula. 12Na Esau ya vola, Genda ku tsie ulugendo lwetu, na inze ndimirira imbiri wowo. 13Naye ya mu volera, Mwami wange a manya avana va veye vadoto, na magondi netsing'ombe tsya mbeye natsyo tsi nyunya, ni va tsi gendidza kuvita kali ga dukanga lidiku lilala, vyayo vyosi vi la hera. 14Mwadza, mwami wange, yimire imbiri womutumekiri wewe: na inze nda londa galaha, kuli ligenda lyemitugu gyi veye imbiri wange, kandi kuli ligenda lya avana, nduhe nduke ku mwami wange ha Seiru. 15Na Esau ya vola, Mbula ndeke avalala ku yavo ava mbeye navo halala nive. Naye ya vola, Kigira ki? Nduke kunyola tsimbabasi imbiri womwami wange. 16Kunangwa Esau yirana lidiku zana, na a tsia Seiru. 17Na Yakobo ya samula, na a tsia Sukothu, na yombaka yo inyumba, nokulomba yo vidioli vyemitugu gyigye: kigira yaga ha zana ha langwa Sukothu.
18Na Yakobo ya duka nemirembe mu lidala lya Shekem, mu kivala kya Kanani, lwa ya twula Padan-aram; na ya lomba limenya lilye himbi ku lidala. 19Naye ya gula mulimi gwa yombaka ho lihema lilye, mu mukono gwa avana va Hamoru, dada wa Shekem, nevidonye vyefetha mia. 20Na yombaka ho ubali, na a bu gulika El-Elohe-Israeli.
Currently Selected:
Litanga 33: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967