Kutwula 7
7
1Na Yahova ya volera Musa, Henza, nkoli ive kuva kuli Nyasaye ku Farao; na Haruni amwavo wowo a la va muprofeti wowo. 2U la vola gosi aga nku laga; na Haruni amwavo wowo a ia volera Farao, a lakule avana va Israeli va twule mu kivala kikye. 3Na nda dinyeridza mwoyo gwa Farao na nda meda vilolekidzu vyange na vyokugenya vyange mu kivala kya Egepeti. 4Navutswa Farao a la vula kumuhulira, na nda vika mukono gwange ku Egepeti, nokuleta amahe gange, avandu vange avana va Israeli, va twule mu kivala kya Egepeti nelikalaga linene. 5Na Avaegepeti va la manya Inze mbeye Yahova, lwa nyira mukono gwange ku Egepeti, nokutwulidza avana va Israeli hagati havo. 6Na Musa na Haruni va kola ndiyo; kuli Yahova ya va laga, va kola ndiyo. 7Na Musa ya li nemihiga makumi gatano na gavaka, na Haruni ya li nemihiga makumi gatano na gavaka, nemihiga gyivaka, lwa va volera Farao.
8Kandi Yahova ya volera Musa na Haruni, na a vola, 9Lwa Farao a la mu volera, na a vola, Langaminyira mwinye kyokugenya; hene yaho u la volera Haruni, U vugule impimbo yoyo, u gi lakule hasi imbiri wa Farao, i duke kugwa inzoka. 10Na Musa na Haruni vingira ku Farao, ni va kola ndiyo, kuli Yahova ya va laga: na Haruni ya lakula hasi impimbo yeye imbiri wa Farao, na imbiri wa vatumekiri veve, nayo ya gwa inzoka. 11Hene yaho Farao ya langa avageeri na avasegetiri: navo kandi, avasegetiri va Egepeti, va kola ndiyo nobusegetiri bwavo. 12Kigira va lakula sa mulala impimbo yeye hasi, natsyo tsya gwa tsinzoka: navutswa impimbo ya Haruni ya mira tsimpimbo tsyavo. 13Na mwoyo gwa Farao gwa gwa mudinyu, na a vula kuvahulira, kuli Yahova ya vola.
14Na Yahova ya volera Musa Mwoyo gwa Farao gu veye muliduhu yambakananga kulakula avandu va tsie. 15U tsie ku Farao mugamba; henza, a tsitsanga ha madzi; nive u la singira ku luginga lwomugera kuvugana naye; na impimbo ya girunkannywa kuva inzoka i la va mu mukono gugwo. 16Na u la mu volera, Yahova, Nyasaye wa Vahebraina, u ntumi ku ive, a volanga, U lakule avandu vange va duke kuntumekira mwigendinyama: na, henza, kuduka kalunu u kikiri kuhulira. 17Yahova a volanga, Ku inkuva yiyi u la manya mbeye Yahova: henza, nda kuya amadzi aga veye mu mugera yimu nempimbo ya mbeye nayo mu mukono gwange, nago ga la girunkannywa, na ga la gwa masahi. 18Na tsisudzi tsi veye mu mugera tsi la kudza, na mugera gu la gwa mudamano; na Avaegepeti va la lola kivihiri kunwa amadzi gomugera. 19Na Yahova ya volera Musa, U volere Haruni, U vugule impimbo yoyo, u nyire mukono gugwo ku amadzi ga Egepeti, noku migera gyavo, noku tugera twavo, noku tsinyanza tsyavo, noku madavalia gavo gosi, ga duke kuva masahi, na hosi mu kivala kya Egepeti ha la va namasahi, mu viju vyemisala nomu viju vya magina.
20Na Musa na Haruni va kola kuli Yahova ya va laga; na ya ginga impimbo, nokuduya amadzi gomugera, imbiri wa Farao, na imbiri wa vatumekiri veve; na amadzi gosi gomugera ga girunkannywa kugwa masahi. 21Na tsisudzi tsya li mu mugera tsya kudza; na mugera gwa funya ubugundu, na Avaegepeti si va nyala kunwa amadzi ga twula ku mugera; na masahi ga li mu kivala kyosi kya Egepeti. 22Kandi avasegetiri va Egepeti va kola kuli yaga nobukumu bwavo: na mwoyo gwa Farao gwa dinyiridzwa, na a vula kuvahulira; kuli Yahova ya vola. 23Na Farao yirana ni yingira mu inyumba yeye, kali yivi si ya vi vika mu mwoyo. 24Na Avaegepeti vosi va yava ku luginga lwomugera va nyole amadzi gokunwa; kigira si va nyala kunwa amadzi gomugera. 25Na ga duka madiku gatano na gaviri, inyima wa Yahova ya li duya mugera.
Currently Selected:
Kutwula 7: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967