Kutwula 6
6
1Na Yahova ya volera Musa, Kalunu u la lola kya nkolera Farao: kigira ku mukono gwetsingulu a la va lakula va tsie, kandi ku mukono gwetsingulu a la va kunga va twule mu kivala kikye.
2Na Nyasaye ya volera Musa, na a vola Inze mbeye Yahova: 3na nda loieka ku Abrahamu, ku Isaka, na ku Yakobo, na lieta Nyasaye Wanyala Vyosi; navutswa ku lieta lyange, Yahova, si nda manyekana kuvo. 4Kandi nsingeridzi lilagana lyange halala navo, nduke kuvaha kivala kya Kanani, kivala kye limenya lyavo, kya va li va menya mukyo. 5Na kuvita yaga, mbuliye likenya lya avana va Israeli, ava Vaegepeti va vika mu butugwakandi nzidzulitsi lilagana lyange. 6Kunangwa u volere avana va Israeli, Inze mbeye Yahova, na nda twulidza mwinye mu twule ku misigo gya Avaegepeti, na nda mu honnya ku butugwa bwavo, nda mu boholola nomukono gwa nyirwa, nelikalaga linene: 7kandi nda vugula mwinye mu ve avandu vange, na inze nda va Nyasaye ku mwinye; na mwinye mu la manya mbeye Yahova Nyasaye wenyu, u twulidzanga mwinye ku misigo gya Avaegepeti. 8Kandi nda mu leta mu kivala kya ndisuhira Abrahamu, Isaka, na Yakobo kuvaha; na nda ki haana ku mwinye ki ve miyandu gyenyu: mbeye Yahova. 9Na Musa ya volera avana va Israeli kuli yaga: navutswa si va hulira Musa kigira ubululu bwemyoyo, kandi kigira ubutugwa budinyu.
10Na Yahova ya volera Musa, na a vola, 11Ingira, u volere Farao mwami wa Egepeti, a haane munwa avana va Israeli va tsie kutwula mu kivala kikye. 12Na Musa ya vola imbiri wa Yahova, na a vola, Henza, avana va Israeli si va mbulira mba; nasindi Farao a la mbulira ndi, inze u veye womunwa gwa vula kukevwal 13Na Yahova ya volera Musa na Haruni, na a laga lilaga ku avana va Israeli, noku Farao mwami wa Egepeti, kutwulidza avana va Israeli mu kivala kya Egepeti.
14Yava va veye mitwe gyetsinyumba tsya vadada vavo. Avana va Rubeni munene wa Israeli: Hanoku, na Palu, Heziron, na Karmi; yava navenyumba ya Rubeni. 15Na avana va Simeoni: Jemueli, na Jamini, na Ohadu, na Jakin, na Zoharu, na Shaulu mwana wa mukali wa Kanani; yava navenyumba ya Simeoni. 16Na yaga na ameta ga vana va Levi kuli makula gavo: Gerishon na Kohathu, na Merari; na mihiga gyeliva lya Levi gya li mia na makumi gavaka na gyitano na gyiviri. 17Avana va Gerishon: Libni, na Shimei, kuli avetsinyumba tsyavo. 18Na avana va Kohathu: Amram, na Iziharu, na Hebironi, na Uzieli; na mihiga gyeliva lya Kohathu gya li mia na makumi gavaka na gyivaka. 19Na avana va Merari: Mahali na Mushi. Yava navetsinyumba tsya Valevi kuli amakula gavo. 20Na Amram ya vugula Jokebedi mbotso wa dada wewe kuva mukali wewe; naye ya mwivulira Haruni na Musa: na mihiga gyeliva lya Amram gya li mia na makumi gavaka na gyitano na gyiviri. 21Na avana va Iziharu: Kora, na Nefegu, na Zikiri. 22Na avana va Uzieli: Mishaeli, na Elizafan, na Sithiri. 23Na Haruni ya vugula Elisheba, mukana wa Aminadabu, mbotso wa Nahashoni kuva mukali wewe; naye ya mwivulira Nadabu na Abihu, Eleazaru na Ithamaru. 24Na avana va Kora: Asiri, na Elikana, na Abiasafu; yava navetsinyumba tsya Vakokathu. 25Na Eleazaru mwana wa Haruni ya vugula mulala ku avakana va Putieli kuva mukali wewe; naye ya mwivulira Finehasi. Yava va veye mitwe gyetsinyumba tsya vadada va Valevi. 26Yava nivo Haruni zana na Musa, ava Nyasaye ya va volera, na a vola, Mu twulidze avana va Israeli mu kivala kya Egepeti kuli amahe gavo. 27Yavo nivo ava volera Farao mwami wa Egepeti, va duke kutwulidza avana va Israeli mu Egepeti: yava nivo Musa zana na Haruni.
28Kunangwa ku lidiku yilyo lwa Yahova ya volera Musa mu kivala kya Egepeti, 29Yahova ya volera Musa, na a vola, Inze mbeye Yahova: u volera Farao mwami wa Egepeti gosi ga nku volera. 30Na Musa ya vola imbiri wa Yahova, Henza, inze mbeye womunwa gwa vula kukevwa, Farao a la mbulira ndi?
Currently Selected:
Kutwula 6: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967