Kutwula 38
38
1Kandi ya lomba ubwali bwekihaanwa kyokusambwa bwomusala gwe kikuma: ubutambi bwabwo bwa li ligera lyamakono gatano, na ubugalamu bwabwo bwa li ligera lyamakono gatano, tsimbega tsya li nobuleng'anu; na ubudiguluku bwabwo bwa li ligera lyamakono gavaka. 2Kandi ya lomba tsinziga tsyabwo ku tsikorna tsine tsyabwo; tsinziga tsyabwo tsya li tsyekindu kilala nabwo: na ya handidza kubwo mugasa. 3Na ya lomba viju vyobwali, tsinyingu, na vyokung'uula ligoke, na vituva, na tsinzago, na tsingyu tsyomuliru viju vyosi vyabwo ya lomba nomugasa. 4Kandi ya lombera ubwali kikereko kyomuliru kyomugasa, isi wolusigi lwokukumbiridza ubwali, ki duka hagati hobwali. 5Na ya lomba tsimingiri tsine kuvikwa ku tsikorna tsine tsyekikereko kyomugasa, kuva hokuvitidza misala. 6Na ya lomba misala gyokuginga gyomusala gwe kikuma, na ya handidza kugyo mugasa. 7Na ya vika misala mu tsimingiri ku tsimbega tsyobwali kubuginga; ya bu lomba netsimbao kandi nobwiyangu bwa li mubwo.
8Kandi ya lomba lwero nobwikaliru bwalwo nomugasa, gwa li gwevilolero vyavakali ava tumekiri ha muliango gwelihema lyokuvuganira mu.
9Kandi ya lomba mugidzi: ku luvega lwa kusini gwa li netsingubo tsyekatani tsindahi tsya sitwa, ubutambi bwatsyo bwa li ligera lyamakono mia, 10na tsitiru tsyatsyo tsya li makumi gaviri, na viduku vyatsyo vyomugasa, vya li makumi gaviri; na visunga vya tsitiru na vyulu vyatsyo vya li vyefetha. 11Kandi ku luvega lwa kasikasini gwa li nengubo ubutambi bwayo bwa li ligera lya makono mia, netsitiru tsyagwo makumi gaviri, nevyokusingeridza vyatsyo vya li makumi gaviri, vyomugasa; visunga vyetsitiru, nevyulu vya tsyo, vya li vyefetha. 12Na ku luvega lwemadioli gwa li netsingubo tsyomugidzi tsyeligera lyamakono makumi gatano, na tsitiru tsyatsyo makumi gaviri, na viduku vyatsyo likumi, visunga vyetsitiru na vyulu vyatsyo vya li vyefetha. 13Na ku luvega lwevugwe lya li neligera lyamakono makumi gatano. 14Na tsingubo tsyoluvega lulala lwekiribwa tsya li neligera lyamakono likumi na gatano ubutambi bwatsyo; na tsitiru tsyatsyo tsivaka, na viduku vyatsyo vivaka; 15kandi ndiyo ku luvega lundi: ku luvega yilu noku luvega yilu lwekiribwa tsingubo tsya li neligera lyamakono likumi na gatano; tsitiru tsyatsyo tsivaka, na viduku vyatsyo vivaka. 16Tsingubo tsyosi tsyomugidzi ku tsimbega tsyosi tsya li tsyekatani indahi ya sitwa. 17Na viduku vyetsitiru vya li vyomugasa; na visunga vyetsitiru, na vyulu vyatsyo vya li vyefetha; na vikuniko vyemitwe vyetsitiru vya li vyefetha; na tsitiru tsyosi tsyomugidzi tsi la va ne vyulu vyefetha. 18Kandi ingubo li yokukinga yekiribwa kyomugidzi ya li miyinzi gyomusidza, yeblue, na yekiforosadi, na yenzakanyu, na ikatani indahi i sitwa: na ubutambi bwayo bwa li neligera lyamakono makumi gaviri, na ubudiguluku mu bugalamu bwayo bwa li neligera lyamakono gatano, bwa leng'ana netsingubo tsyomugidzi. 19Na tsitiru tsyayo tsya li tsine, na viduku vyatsyo vya li tsine tsyomugasa; na visunga vyatsyo vya li vyefetha, na vikuniko vye mitwe gyatsyo, na vyulu vyatsyo, vya li vyefetha. 20Na vivambo vyosi vyelihema, na vyomugidzi tsimbega tsyosi, vya li vyomugasa.
21Livalidza lyeviju vyosi vya lomberwa lihema, lihema lyelilolekidza ni yili, kuli vya validzwa, kuli lilaga lya Musa, vyobutumiki bwa Valevi, ku mukono gwa Ithamaru, mwana wa Haruni musalisi. 22Na Bezaleli mwana wa Uri, mwana wa Huru, wehiri ya Yuda, ya lomba vyosi vya Yahova ya laga Musa. 23Na halala naye ya li ho Oholiabu, mwana wa Ahisamaku, wehiri ya Dan, wokuvadza magina, na musidza, na wokuvika ubusalago bweblue, nobwekiforosadi, nobwenzakanyu, nobwengubo yekatani indahi.
24Ithahabu yosi ya va tumekira mu miyinzi gyosi mu lilomba lya hatakatifu, kali ithahabu yekihaanwa, ya li tsitalenta makumi gaviri na n tsitano na tsine, na tsishekeli tsimia tsitano na tsiviri, na makumi gavaka, kuli tsishekeli tsya hatakatifu. 25Na ifetha ya yavo ava validzwa avelivugana ya li tsitalenta mia indala, na tsishekeli elfu indala na tsimia tsitano na tsiviri na makumi gatano na gaviri na tsitano, kuli tsishekeli tsya hatakatifu: 26ibeka indala ku mutwe mulala, ga veye kuvola inusu yeshekeli, kuli ishekeli ya hatakatifu, kuvo sa mulala avingira mu livalidzwa, wa li nemihiga makumi gaviri kinga wa vita mihiga makumi gaviri, tsya avandu avetsielfu tsimia tsitano na indala, na tsielfu tsivaka, na tsimia tsitano na avandu makumi gatano. 27Na tsitalenta mia tsyefetha tsya li tsyokutuula viduku vya hatakatifu, na viduku vyengubo yokukinga; viduku mia vyetsitalenta mia, italenta indala ku kiduku kilala. 28Kandi tsishekeli elfu indala na tsimia tsitano na tsiviri, na makumi gatano na gaviri na tsitano, ya lomba visunga vyetsitiru, na handidza ifetha ku vikuniko vyemitwe vyatsyo, na ya tsi lombera vyulu. 29Na mugasa gwa letwa gwa li tsitalenta makumi gatano na gaviri, na tsishekeli tsielfu tsiviri, na tsimia tsine. 30Kandi nagwo ya lomba viduku vyomuliango gwelihema lyokuvugana mu, na ubwali bwomugasa, na kikereko kyabwo kyomugasa, na viju vyosi vyobwali, 31na viduku vyomugidzi gwokukumbiridza tsimbega tsyosi, na viduku vyekiribwa kyomugidzi, na vivambo vyosi vyelihema, na vivambo vyosi vyomugidzi gwokukumbiridza tsimbega tsyosi.
Currently Selected:
Kutwula 38: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967